Hechos 3 - Li Santil hu

Laj Pedro quixqꞌuirtesi jun li cui̱nk incꞌaꞌ nabe̱c

¹ Saꞌ jun li cutan queꞌco̱eb saꞌ li templo laj Pedro rochben laj Juan oxib o̱r re ecuu saꞌ x-o̱ril li tijoc.

² Rajlal cutan nacꞌameꞌ jun li cui̱nk incꞌaꞌ nabe̱c chalen saꞌ xyoꞌlajic ut naqꞌueheꞌ chire li oqueba̱l re li templo. Lix cꞌabaꞌ li oqueba̱l aꞌan “Chꞌinaꞌus”. Naqꞌueheꞌ li yaj aran re tixtzꞌa̱ma cꞌaꞌru re riqꞌuineb li nequeꞌoc saꞌ li templo.

³ Li cui̱nk aꞌin quiril nak yo̱queb chi oc saꞌ li templo laj Pedro ut laj Juan. Qui-oc chixtzꞌa̱manquil cꞌaꞌru re reheb.

⁴ Laj Pedro ut laj Juan queꞌcana chirilbal li yaj ut laj Pedro quixye re: —Ilon chak kiqꞌuin.—

⁵ Nak quirabi li cui̱nk li cꞌaꞌru quixye, qui-oc chiroybeninquil cꞌaꞌru teꞌxqꞌue re.

⁶ Laj Pedro quixye re: —Ma̱cꞌaꞌ intumin la̱in re tinqꞌue a̱cue. Abanan li cꞌaꞌru cuan cuiqꞌuin tinqꞌue a̱cue. Saꞌ xcꞌabaꞌ li Ka̱cuaꞌ Jesucristo laj Nazaret, ninye a̱cue cuaclin ut be̱n, chan re.

⁷ Ut nak quixye aꞌin, quixchap ut quixcuaclesi riqꞌuin lix nim ukꞌ. Saꞌ junpa̱t quicacuu li xbe̱n rak ut li rok li cui̱nk.

⁸ Saꞌ junpa̱t quixakli ut quibe̱c. Ut qui-oc saꞌ li templo rochbeneb. Yo̱ chi piscꞌoc xban xsahil xchꞌo̱l ut yo̱ chixlokꞌoninquil li Dios.

⁹ Chixjunileb li tenamit queꞌiloc re chi be̱c ut chixlokꞌoninquil li Dios.

¹⁰ Cꞌajoꞌ nak queꞌxucuac ut sachso̱queb xchꞌo̱l chirilbal li cui̱nk aꞌan, xban nak queꞌxnau ru nak aꞌan li nacꞌojla chixtzꞌa̱manquil cꞌaꞌru re chire li oqueba̱l “Chꞌinaꞌus” xcꞌabaꞌ.

Laj Pedro quixye reheb laj judío nak li Jesús aꞌan laj Colonel li yechiꞌinbil xban li Dios

¹¹ Ut li cui̱nk li quiqꞌuirtesi̱c incꞌaꞌ quiraj xcanabanquil rib riqꞌuineb laj Pedro ut laj Juan. Yo̱ chi be̱c rochbeneb. Ut chixjunileb sachso̱queb xchꞌo̱l chirilbal li quicꞌulman. Queꞌco̱eb saꞌ a̱nil saꞌ li templo ut queꞌxchꞌutub ribeb saꞌ li oqueba̱l Salomón xcꞌabaꞌ, cuanqueb cuiꞌ laj Pedro ut laj Juan.

¹² Nak laj Pedro quirileb, quixye reheb: —La̱ex aj Israel, ¿cꞌaꞌut nak sachso e̱chꞌo̱l nequexcana xban li cꞌaꞌru xcꞌulman? ¿Cꞌaꞌut nak yo̱quex chikilbal? ¿Ma nequecꞌoxla la̱ex nak la̱o xkaqꞌuirtesi li cui̱nk aꞌin kajunes? ¿Ma xban ta biꞌ kacuanquil ut li kacha̱bilal nak xkaqꞌue chi be̱c li cui̱nk aꞌin?

¹³ Li Dios li queꞌxlokꞌoni chak laj Abraham, laj Isaac ut laj Jacob joꞌqueb ajcuiꞌ li kaxeꞌto̱nil yucuaꞌ, aꞌan quiqꞌuehoc xcuanquil li Jesucristo laj cꞌanjel chiru. Ut la̱ex quekꞌaxtesi aꞌan re laj Pilato. Ut nak laj Pilato quiraj raj rachꞌabanquil, la̱ex incꞌaꞌ queraj.

¹⁴ La̱ex incꞌaꞌ queraj xcolbal rix li santil cui̱nk aꞌin, li ti̱c xchꞌo̱l. Aꞌ chic laj camsinel queqꞌue chi achꞌaba̱c.

¹⁵ La̱ex queqꞌue chi camsi̱c aꞌan, ut aꞌan li naqꞌuehoc yuꞌam. Abanan quicuaclesi̱c cuiꞌchic chi yoꞌyo xban li Dios saꞌ xya̱nkeb li camenak. Ut aꞌan li nakachꞌolob xya̱lal la̱o xban nak la̱o xkil chi tzꞌakal nak quicuacli.

¹⁶ Li cui̱nk aꞌin xqꞌuira saꞌ xcꞌabaꞌ li Jesús. Riqꞌuin xpa̱banquil li Jesús xqꞌuira chi junaj cua li cui̱nk aꞌin li nequenau ru ut yo̱quex chirilbal.

¹⁷ Joꞌcan ut ex cuas cui̱tzꞌin, la̱in ninnau nak queqꞌue chi camsi̱c li Jesús xban nak incꞌaꞌ nequenau xya̱lal joꞌqueb ajcuiꞌ li nequeꞌtaklan saꞌ e̱be̱n.

¹⁸ Riqꞌuin aꞌin quitzꞌakloc ru li queꞌxye chak li profeta najter nak queꞌxye nak tento tixcꞌul li rahobtesi̱c li Cristo li Mesías, xban nak joꞌcan quixye li Dios.

¹⁹ Joꞌcan ut nak yotꞌomak e̱chꞌo̱l ut jalomak e̱cꞌaꞌux ut sicꞌomak li Ka̱cuaꞌ re nak aꞌan tixcuy tixsach le̱ ma̱c. Ut li Ka̱cuaꞌ tixqꞌue xcacuilal ut xsaylal e̱chꞌo̱l.

²⁰ Li Dios tixtakla cuiꞌchic chak li Jesucristo saꞌ ruchichꞌochꞌ xban nak aꞌan li Mesías li ac xakabanbil chak najter re xcolbaleb chiru li raylal li cuanqueb saꞌ ruchichꞌochꞌ.

²¹ Abanan tento nak cua̱nk chak aran saꞌ choxa toj ta̱cuulak xkꞌehil nak ta̱tzꞌaklok ru chixjunil joꞌ queꞌxchꞌolob xya̱lal li santil profeta junxilaj joꞌ quiyeheꞌ reheb xban li Dios.

²² Laj Moisés quixye reheb li kaxeꞌto̱nil yucuaꞌ, Li Ka̱cuaꞌ le̱ Dios tixqꞌue junak profeta saꞌ e̱ya̱nk sicꞌbil ru xban joꞌ la̱in. E̱comon ajcuiꞌ la̱ex. Cheba̱nu chixjunil li cꞌaꞌru tixye e̱re.

²³ Ut li ani incꞌaꞌ tixpa̱b li cꞌaꞌru tixye li profeta aꞌan, ta̱isi̱k saꞌ xya̱nkeb lix tenamit li Dios ut ta̱sachekꞌ ru. (Deut. 18:18-19)

²⁴ Chalen nak quicuan li profeta Samuel chixjunileb li profeta queꞌxye ajcuiꞌ resil li cꞌaꞌru ta̱cꞌulma̱nk saꞌ eb li cutan aꞌin.

²⁵ La̱ex ralal xcꞌajol eb li profeta ut la̱ex texcꞌuluk re li quiyechiꞌi̱c reheb le̱ xeꞌto̱nil yucuaꞌ. Nak li Dios quixba̱nu li contrato riqꞌuin laj Abraham, quixye re, “Chixjunileb li cuanqueb saꞌ ruchichꞌochꞌ teꞌosobtesi̱k saꞌ xcꞌabaꞌeb la̱ cualal a̱cꞌajol.”

²⁶ Nak li Dios quixtakla chak li ralal, quixtakla xbe̱n cua e̱riqꞌuin la̱ex aj judío re e̱rosobtesinquil re nak che̱junju̱nkalex te̱yotꞌ e̱chꞌo̱l ut te̱jal e̱cꞌaꞌux ut te̱canab xba̱nunquil li ma̱usilal.—