Hechos 28 - Li Santil hu

Laj Pablo quicuulac saꞌ li naꞌajej Malta

¹ Nak ac cuanco chic chi chꞌochꞌel, quikanau nak li naꞌajej aꞌan, li sutsu saꞌ haꞌ, aꞌan Malta xcꞌabaꞌ.

² Li cuanqueb aran cꞌajoꞌ li usilal queꞌxba̱nu ke. Coeꞌxcꞌul saꞌ xya̱lal chikajunilo ut queꞌxtzꞌab jun xam xban nak cꞌajoꞌ li hab ut cꞌajoꞌ li que.

³ Laj Pablo quixxoc chak jun kꞌa̱l li rukꞌ cheꞌ chaki ut quixqꞌue saꞌ li xam. Jun li cꞌambolay quie̱lelic xban xtikcual li xam ut quixtiu li rukꞌ laj Pablo. Tꞌuytꞌu quicana.

⁴ Li cuanqueb saꞌ li naꞌajej Malta, nak queꞌril li cꞌambolay tꞌuytꞌu chi rukꞌ, queꞌxye chi ribileb rib: —Relic chi ya̱l nak li cui̱nk aꞌin, aꞌan aj camsinel. Xcoleꞌ chak chiru li palau, abanan incꞌaꞌ ta̱canaba̱k chi yoꞌyo arin chi incꞌaꞌ tixcꞌul xtojbal rix lix ma̱c, chanqueb.

⁵ Ut laj Pablo quixchikꞌ li rukꞌ ut li cꞌambolay quitꞌaneꞌ saꞌ xam ut ma̱cꞌaꞌ quixcꞌul laj Pablo.

⁶ Eb aꞌan yo̱queb chiroybeninquil jokꞌe ta̱si̱po̱k laj Pablo ut ta̱tꞌanekꞌ chi camenak. Najt queꞌroybeni ut nak queꞌril nak ma̱cꞌaꞌ quixcꞌul, queꞌxjal lix cꞌaꞌuxeb ut queꞌxye: —Dios tana li cui̱nk aꞌan, chanqueb.

⁷ Aran cuan xcꞌaleba̱l laj Publio li cuan xcuanquil saꞌ li naꞌajej Malta. Aꞌan coxcꞌul saꞌ xya̱lal ut riqꞌuin cohilan chiru oxib cutan.

⁸ Lix yucuaꞌ laj Publio tꞌantꞌo saꞌ chꞌa̱t. Yo̱ xtik ut yo̱ xquicꞌ saꞌ. Laj Pablo qui-oc saꞌ li naꞌajej li cuan cuiꞌ. Quixqꞌue li rukꞌ saꞌ xbe̱n nak quitijoc ut quiqꞌuirtesi̱c.

⁹ Nak queꞌrabi resil nak ac xqꞌuirtesi̱c lix yucuaꞌ laj Publio, nabaleb li yaj li cuanqueb saꞌ li naꞌajej aꞌan, queꞌcuulac riqꞌuin laj Pablo ut queꞌqꞌuirtesi̱c.

¹⁰ Riqꞌuin li usilal qui-ux reheb, kꞌaxal cuiꞌchic coeꞌxra ut queꞌxqꞌue nabal cꞌaꞌru ke. Ut nak ac xic ke nabal li cꞌaꞌru ke queꞌxsi ke re ta̱cꞌanjelak ke chiru be.

Laj Pablo quicuulac Roma ut quia̱tinac riqꞌuineb laj cꞌamol be saꞌ xya̱nkeb laj judío

¹¹ Ut nak quinumeꞌ oxib po, co-oc saꞌ jun li jucub re Alejandría li yo̱ chixnumsinquil li habalkꞌe saꞌ li naꞌajej Malta. Li jucub aꞌan cuan retalil lix dioseb chiru. Cástor ut Pólux xcꞌabaꞌeb.

¹² Cocuulac saꞌ li tenamit Siracusa ut aran cohilan oxib cutan.

¹³ Chirix chic aꞌan co̱o cuiꞌchic chiru haꞌ ut cocuulac saꞌ li tenamit Regio. Cuulajak chic quiticla li ikꞌ li nachal saꞌ li sur. Yo̱ li ikꞌ chalen nak cocuulac saꞌ li naꞌajej Puteoli.

¹⁴ Saꞌ li naꞌajej aꞌan cuanqueb aj pa̱banel katauheb. Eb aꞌan queꞌxtzꞌa̱ma chiku nak tocana̱k cuukubak cutan riqꞌuineb. Ut chirix aꞌan co̱o cuiꞌchic Roma.

¹⁵ Eb laj pa̱banel li cuanqueb Roma queꞌrabi resil nak cuulac ke. Cuanqueb laj pa̱banel queꞌchal chi cꞌuluc ke toj cuan cuiꞌ li cꞌayil Apio xcꞌabaꞌ ut cuanqueb ajcuiꞌ queꞌcꞌuluc ke toj saꞌ li naꞌajej Oxib Tabernas. Nak quiril ruheb laj pa̱banel, laj Pablo quixbantioxi chiru li Dios ut quicꞌojla xchꞌo̱l.

¹⁶ Nak cocuulac Roma, li capitán quixkꞌaxtesiheb li pre̱x re li coronel. Ut laj Pablo quicanaba̱c chi cua̱nc xjunes rochben jun li soldado li na-iloc re.

¹⁷ Nak ac xnumeꞌ chic oxib cutan, laj Pablo quixbokeb li nequeꞌcꞌamoc be saꞌ xya̱nkeb laj judío li cuanqueb Roma. Nak acak xeꞌchꞌutla quia̱tinac riqꞌuineb re xcolbal rib, ut quixye reheb: —Ex cuas cui̱tzꞌin, la̱in incꞌaꞌ xinma̱cob chiruheb li cuech tenamitil chi moco xinkꞌet lix chakꞌrabeb li kaxeꞌto̱nil yucuaꞌ. Abanan xinchapeꞌ Jerusalén xbaneb laj judío, ut xineꞌxkꞌaxtesi saꞌ rukꞌeb laj Roma.

¹⁸ Ut eb laj Roma nak queꞌrakoc a̱tin saꞌ inbe̱n, ma̱ jun inma̱c queꞌxtau re incamsinquil. Queꞌraj raj cuachꞌabanquil.

¹⁹ Abanan eb laj judío incꞌaꞌ queꞌraj quineꞌrisi. Joꞌcan nak quintzꞌa̱ma chiruheb nak li acuabej César ta̱rakok a̱tin saꞌ inbe̱n. Moco chixjitbal ta lin tenamit xinchal.

²⁰ Aꞌan aj e nak xintakla e̱bokbal. Xcuaj rilbal e̱ru ut xcuaj a̱tinac e̱riqꞌuin. Saꞌ xcꞌabaꞌ li jun li nakayoꞌoni la̱o aj Israel nak bacꞌbo̱quin anakcuan riqꞌuin li cadena aꞌin, chan reheb.

²¹ Ut eb aꞌan queꞌxye: —La̱o ma̱ jun hu xkacꞌul chalenak ta Judea, ut ma̱ jun li kas ki̱tzꞌin xcꞌulun cha̱jitbal chi moco chixyebal junak cꞌaꞌak re ru incꞌaꞌ us cha̱cuix.

²² Takaj rabinquil cꞌaꞌru nacacꞌoxla chirix aꞌan xban nak kabiom nak yalak bar xicꞌ nequeꞌrabi li tijleb chirix li Jesús, chanqueb.

²³ Joꞌcan nak queꞌxxakab jun li cutan re nak teꞌcuulak riqꞌuin saꞌ li cab li cuan cuiꞌ. Nabaleb queꞌcuulac riqꞌuin laj Pablo re nak tixchꞌolob xya̱lal chiruheb chirix lix nimajcual cuanquilal li Dios. Quixnumsi li cutan chixchꞌolobanquil lix ya̱lal chirix li Jesús joꞌ tzꞌi̱banbil saꞌ lix chakꞌrab laj Moisés joꞌ ajcuiꞌ li queꞌxtzꞌi̱ba li profeta re nak teꞌxpa̱b li Jesús.

²⁴ Cuan queꞌpa̱ban re li cꞌaꞌru yo̱ chixyebal. Abanan cuan ajcuiꞌ li incꞌaꞌ queꞌxpa̱b.

²⁵ Cuanqueb li incꞌaꞌ queꞌcuulac chiruheb li cꞌaꞌru yo̱ chixyebal laj Pablo, ut queꞌoc chi e̱lc. Nak ac xiqueb re, laj Pablo quixye li a̱tin aꞌin: —Ya̱l ajcuiꞌ li quixcꞌutbesi li Santil Musikꞌej chiru li profeta Isaías chirixeb li kaxeꞌto̱nil yucuaꞌ nak quixye:

²⁶ Ayu ut ta̱ye reheb li tenamit chi joꞌcaꞌin: Yo̱kex chirabinquil, abanan moco te̱tau ta ru lix ya̱lal li cꞌaꞌru te̱rabi; ut yo̱kex chirilbal, abanan incꞌaꞌ te̱qꞌue retal cꞌaꞌru xya̱lal li cꞌaꞌru te̱ril.

²⁷ Xban nak cacuubresinbil lix chꞌo̱leb li tenamit aꞌin, joꞌcan nak incꞌaꞌ teꞌxtau xya̱lal. Incꞌaꞌ saken teꞌabi̱nk ut incꞌaꞌ saken teꞌilok re nak incꞌaꞌ teꞌxtau xya̱lal li cꞌaꞌru teꞌril ut incꞌaꞌ teꞌxtau xya̱lal li teꞌrabi. Incꞌaꞌ teꞌxtau xya̱lal, chi moco teꞌxjal xcꞌaꞌux, chi moco tebinqꞌuirtesi, chan li Dios. (Isa. 6:9-10)

²⁸ Joꞌcan nak chenauhak nak li resil li colba-ib li naxqꞌue li Dios quiqꞌueheꞌ reheb li ma̱cuaꞌeb aj judío. Aꞌan eb chic teꞌabi̱nk re, chan laj Pablo.

²⁹ Nak queꞌrabi aꞌin, eb laj judío queꞌco̱eb ut yo̱queb chixcuechꞌinquil rib.

³⁰ Cuib chihab quicuan aran Roma laj Pablo saꞌ li cab li quixtoꞌoni. Ut quixcꞌuleb chi sa saꞌ xchꞌo̱l chixjunileb li queꞌcuulac riqꞌuin.

³¹ Yo̱ chixchꞌolobanquil lix ya̱lal lix nimajcual cuanquilal li Dios ut yo̱ chixyebal resil li Ka̱cuaꞌ Jesucristo chi ma̱cꞌaꞌ xxiu. Ut ma̱ ani quiramoc chiru xyebal.