Hechos 19 - Li Santil hu

Eb lix tzolom laj Juan queꞌxcꞌul li Santil Musikꞌej aran Éfeso

¹ Nak laj Apolos cuan Corinto laj Pablo quinumeꞌ saꞌ eb li naꞌajej toj quicuulac Éfeso. Ut aran quixtauheb jun chꞌu̱taleb laj pa̱banel.

² Quixye reheb: —¿Ma quecꞌul li Santil Musikꞌej nak quexpa̱ban? chan laj Pablo reheb. Ut eb aꞌan queꞌxye: —Incꞌaꞌ nakanau nak cuan ta li Santil Musikꞌej, chanqueb.

³ Ut laj Pablo quixye reheb: —¿Chanru nak quicubsi̱c e̱haꞌ?— Eb aꞌan queꞌxye: —Li cubi haꞌ li xkacꞌul, aꞌan li quixba̱nu laj Juan, chanqueb.

⁴ Laj Pablo quixye reheb: —Laj Juan quixcubsiheb xhaꞌ li queꞌxyotꞌ xchꞌo̱l ut queꞌxjal xcꞌaꞌux. Quixye reheb nak teꞌpa̱ba̱nk saꞌ xcꞌabaꞌ li Jesucristo li tol-e̱lk mokon, chan.

⁵ Nak queꞌrabi aꞌan, queꞌxtzꞌa̱ma li cubi haꞌ ut quicubsi̱c xhaꞌeb saꞌ xcꞌabaꞌ li Ka̱cuaꞌ Jesús.

⁶ Laj Pablo quixqꞌue li rukꞌ saꞌ xbe̱neb ut queꞌxcꞌul li Santil Musikꞌej. Queꞌa̱tinac saꞌ jalan a̱tinoba̱l ut queꞌxye resil li cꞌaꞌru quicꞌutbesi̱c chiruheb xban li Dios.

⁷ Cuanqueb tana cablaju chi cui̱nk li queꞌpa̱ban saꞌ xya̱nkeb.

Eb laj pa̱banel queꞌxtiquib xchꞌutubanquil ribeb chi lokꞌoni̱nc aran Éfeso

⁸ Chiru oxib po laj Pablo quixchꞌolob lix ya̱lal chiruheb laj Éfeso chi ma̱cꞌaꞌ xxiu saꞌ li cab li nequeꞌxchꞌutub cuiꞌ ribeb laj judío. Quixyal xkꞌe xcꞌutbal chi tzꞌakal lix ya̱lal lix nimajcual cuanquilal li Dios.

⁹ Cuanqueb li queꞌxcacuubresi xchꞌo̱leb ut incꞌaꞌ queꞌraj pa̱ba̱nc. Queꞌoc chixmajecuanquil li evangelio chiruheb chixjunileb. Joꞌcan nak laj Pablo quixcanab xchꞌolobanquil lix ya̱lal aran saꞌ li cab li nequeꞌxchꞌutub cuiꞌ ribeb laj judío. Ut quixcꞌameb laj pa̱banel chirix. Rajlal cutan quixcꞌut lix ya̱lal chiruheb saꞌ li cab li natzoloc cuiꞌ jun li cui̱nk aj Tiranno xcꞌabaꞌ.

¹⁰ Cuib chihab quixba̱nu chi joꞌcaꞌin. Ut chixjunileb li cuanqueb Asia, eb laj judío, joꞌeb ajcuiꞌ li ma̱cuaꞌeb aj judío, queꞌrabi li ra̱tin li Ka̱cuaꞌ Jesús.

¹¹ Ut li Ka̱cuaꞌ Dios quixqꞌue xcuanquil laj Pablo chixba̱nunquil li sachba chꞌo̱lej.

¹² Usta caꞌaj cuiꞌ lix tꞌicr ut lix sut laj Pablo nequeꞌxqꞌue saꞌ xbe̱neb li yaj, nequeꞌqꞌuira. Ut nequeꞌel li ma̱us aj musikꞌej riqꞌuineb.

¹³ Cuanqueb aj judío nequeꞌxye nak nequeꞌxnau risinquileb li ma̱us aj musikꞌej ut nequeꞌxbeni ribeb chixba̱nunquil. Queꞌxyal xpatzꞌbal xcꞌabaꞌ li Ka̱cuaꞌ Jesús saꞌ xbe̱neb li cuan ma̱us aj musikꞌej riqꞌuineb ut queꞌxye: —Saꞌ xcꞌabaꞌ li Jesús li naxjultica laj Pablo, tinye e̱re elenkex riqꞌuin li cui̱nk aꞌan, chanqueb.

¹⁴ Cuukubeb chi cui̱nk li yo̱queb chi ba̱nu̱nc re aꞌin. Ralaleb jun li cui̱nk aj judío, aj Esceva xcꞌabaꞌ. Aꞌan li xbe̱nil aj tij.

¹⁵ Saꞌ jun li cutan jun li ma̱us aj musikꞌej quichakꞌoc ut quixye reheb: —Ninnau ani li Jesús, ut ninnau ajcuiꞌ ani laj Pablo. Ut la̱ex, ¿anihex? Ut, ¿ani xqꞌuehoc e̱cuanquil chi isi̱nc ma̱us aj musikꞌej? chan reheb.

¹⁶ Li cui̱nk li cuan ma̱us aj musikꞌej riqꞌuin, quixcut rib saꞌ xbe̱neb. Aꞌan kꞌaxal cuiꞌchic cau rib chiruheb. Tacuasinbileb ut pejeleb chic li rakꞌeb nak queꞌe̱lelic saꞌ li cab aꞌan.

¹⁷ Chixjunileb li cuanqueb Éfeso queꞌrabi resil li cꞌaꞌru quicꞌulman, joꞌ aj judío joꞌ eb ajcuiꞌ li ma̱cuaꞌeb aj judío. Quichal xxiuheb chixjunileb ut kꞌaxal cuiꞌchic queꞌxqꞌue xlokꞌal li Ka̱cuaꞌ Jesús.

¹⁸ Ut nabaleb li queꞌpa̱ban queꞌchal ut queꞌxxo̱to lix ma̱queb chiru li Dios chiruheb chixjunileb li cuanqueb aran.

¹⁹ Nabaleb laj tu̱l queꞌchal ut queꞌxcꞌam chak lix huheb li nacꞌanjelac chiruheb re tu̱lac ut queꞌxcꞌat chiruheb chixjunileb li tenamit. Nak queꞌxbir rix lix tzꞌak chixjunil li queꞌxcꞌat, qui-el laje̱b roxcꞌa̱l mil (50,000) chi tumin plata.

²⁰ Ut li ra̱tin li Ka̱cuaꞌ yo̱ chi e̱lc resil yalak bar ut yo̱ ajcuiꞌ chi cꞌutu̱nc xcuanquil li Dios.

²¹ Nak ac xnumeꞌ chixjunil aꞌin, laj Pablo quixcꞌoxla xic toj Jerusalén, nak acak xbeni chak Macedonia ut Acaya. Quixye: —Nak acak xinnumeꞌ aran, tento ajcuiꞌ tinxic Roma chirilbaleb laj pa̱banel li cuanqueb aran, chan.

²² Joꞌcan nak quixtaklaheb Macedonia laj Timoteo ut laj Erasto, li nequeꞌtenkꞌan re. Ut laj Pablo toj quicana aran Asia.

Laj tenol chꞌi̱chꞌ xicꞌ queꞌrabi li cꞌaꞌru quixye laj Pablo

²³ Ut saꞌ eb li cutan aꞌan quiticla jun nimla chꞌaꞌajquilal xban nak nabaleb yo̱queb chixpa̱banquil li Dios.

²⁴ Jun li cui̱nk aj tenol plata, aj Demetrio xcꞌabaꞌ. Aꞌan naxyi̱b riqꞌuin plata li cocꞌ ochoch re lix Diana lix dioseb. Ut nabal li tumin nequeꞌxcꞌul li nequeꞌtrabajic rochben.

²⁵ Quixchꞌutubeb chixjunileb li nequeꞌcꞌanjelac chiru joꞌqueb ajcuiꞌ chixjunileb laj tenol plata ut quixye reheb: —La̱ex nequenau nak riqꞌuin li cꞌanjel aꞌin nakaba̱nu, nakacꞌul nabal li katumin.

²⁶ Ac e̱rabiom resil nak laj Pablo ac xtacchiꞌi nabaleb li cuanqueb aran Éfeso joꞌ ajcuiꞌ saꞌ chixjunil li tenamit xcue̱nt Asia. Ac nequenau nak yo̱ chixyebal reheb nak moco dioseb ta li yal yi̱banbil xban cui̱nk.

²⁷ Ma̱re anchal ta̱sachk li kacꞌanjel xban aꞌan. Ut ma̱re anchal ta̱tzꞌekta̱na̱k ajcuiꞌ xlokꞌal li rochoch lix Diana li kalokꞌlaj dios. Ma̱re ta̱sachk lix cuanquilal li kadios li nequeꞌxlokꞌoni chixjunileb aran Asia, joꞌ ajcuiꞌ li cuanqueb saꞌ chixjunil li ruchichꞌochꞌ, chan laj Demetrio.

²⁸ Ut eb li chꞌutchꞌu̱queb aran cꞌajoꞌ nak queꞌjoskꞌoꞌ nak queꞌrabi li cꞌaꞌru quixye. Queꞌxjap reheb chixyebal: —¡Nim xcuanquil lix Diana li kadios la̱o aj Éfeso! chanqueb.

²⁹ Cꞌajoꞌ nak queꞌjoskꞌoꞌ li tenamit. Incꞌaꞌ chic jultiqueb re cꞌaꞌru nequeꞌxba̱nu. Jun xiquiqueb nak co̱eb chixsicꞌbal laj Gayo ut laj Aristarco li queꞌchal chak Macedonia rochben laj Pablo. Ut quelonbileb nak queꞌcꞌameꞌ toj saꞌ li naꞌajej li nequeꞌxchꞌutub cuiꞌ ribeb.

³⁰ Ut laj Pablo quiraj raj xic chi a̱tinac riqꞌuineb li tenamit, abanan eb laj pa̱banel incꞌaꞌ queꞌxcanab chi xic.

³¹ Cuanqueb cuib oxib li rami̱g laj Pablo li nequeꞌcꞌamoc be saꞌ li tenamit. Aꞌaneb aj Roma. Eb aꞌan queꞌxtakla xyebal re laj Pablo nak incꞌaꞌ ta̱xic saꞌ li naꞌajej li nequeꞌxchꞌutub cuiꞌ ribeb li tenamit.

³² Chixjunileb li queꞌxchꞌutub ribeb aran yo̱queb chixjapbal reheb ut incꞌaꞌ chic jultiqueb re li cꞌaꞌru nequeꞌxye. Lix qꞌuialeb li tenamit incꞌaꞌ queꞌxnau cꞌaꞌut nak queꞌxchꞌutub ribeb aran.

³³ Ut queꞌrisi saꞌ xya̱nkeb li tenamit laj Alejandro. Aꞌan quixtaksi li rukꞌ re teꞌxcanab choki̱nc. Quiraj raj a̱tinac re xcolbal rib chiruheb li tenamit.

³⁴ Nak queꞌril nak aꞌan aj judío junaj xya̱b xcuxeb chixjunileb chixyebal: —¡Nim xcuanquil lix Diana li kadios la̱o aj Éfeso! chanqueb. Ut caꞌchꞌin chic ma̱ cuib o̱r queꞌxjap reheb chixyebal aꞌan.

³⁵ Nak ac xkꞌunbesiheb li tenamit laj tzꞌi̱b li nacꞌanjelac saꞌ po̱pol, quixye reheb: —La̱ex aj Éfeso, ¿ma cuan ta biꞌ junak incꞌaꞌ naxnau nak li katenamit Éfeso, aꞌan li nacꞌacꞌalen re li rochoch lix Diana, li kalokꞌlaj dios? Chixjunileb nequeꞌxnau nak li jalam u̱ch aꞌan chalenak chak saꞌ choxa.

³⁶ Li kadios incꞌaꞌ ta̱ru̱k xsachbal ru. Joꞌcan nak me̱qꞌue e̱joskꞌil. Cꞌoxlahomak rix chi us li cꞌaꞌru te̱ba̱nu.

³⁷ ¿Cꞌaꞌut nak xecꞌameb chak li cui̱nk aꞌin arin? Eb aꞌan incꞌaꞌ yo̱queb chixmuxbal ru le̱ dios, chi moco yo̱queb ta chixmajecuanquil.

³⁸ Cui ut laj Demetrio ut eb laj tenol chꞌi̱chꞌ li nequeꞌcꞌanjelac riqꞌuin cuan junak ani teꞌxjit, teto li po̱pol ut cuanqueb aj rakol a̱tin. Teꞌjitok aran re nak ta̱ru̱k ta̱yi̱ba̱k ru lix chꞌaꞌajquilaleb.

³⁹ Cui ut te̱raj xcꞌu̱banquil junak cꞌaꞌak re ru, takachꞌutub kib ut saꞌ xya̱lal takacꞌu̱b ru.

⁴⁰ Anakcuan xiu xiu cuanco. Cui nocoeꞌxjit riqꞌuin li mululij ib yo̱co, ut cui eb laj Roma li nequeꞌtaklan saꞌ kabe̱n teꞌxpatzꞌ ke cꞌaꞌut nak yo̱co chixmululinquil kib, ma̱cꞌaꞌ naru takacol cuiꞌ kib, chan.

⁴¹ Ut nak quirakeꞌ chixyebal aꞌin, quixchakꞌrabiheb li tenamit.