Hechos 17 - Li Santil hu

Li chꞌaꞌajquilal queꞌxcꞌul laj Pablo ut laj Silas nak cuanqueb Tesalónica

¹ Nak yo̱queb chi xic laj Pablo ut laj Silas queꞌnumeꞌ Anfípolis ut Apolonia. Ut chirix aꞌan, queꞌcuulac Tesalónica bar cuan cuiꞌ jun li cab li nequeꞌxchꞌutub cuiꞌ ribeb laj judío.

² Laj Pablo qui-oc saꞌ li cab li nequeꞌxchꞌutub cuiꞌ ribeb laj judío joꞌ cꞌaynak chixba̱nunquil. Oxib li hiloba̱l cutan quixnumsi aran ut yo̱ chixchꞌolobanquil chiruheb lix ya̱lal li naxye saꞌ li Santil Hu.

³ Yo̱ chixchꞌolobanquil chiruheb nak li Cristo quixcꞌul nabal li raylal joꞌ tenebanbil saꞌ xbe̱n ut quicuacli cuiꞌchic chi yoꞌyo saꞌ xya̱nkeb li camenak. Quixye reheb: —Li Jesús li yo̱quin chixyebal e̱re, aꞌan li Cristo laj Colonel, chan.

⁴ Cuanqueb aj judío queꞌpa̱ban ut queꞌcana chirochbeninquil laj Pablo ut laj Silas. Joꞌcan ajcuiꞌ queꞌxba̱nu nabaleb laj griego li nequeꞌxlokꞌoni li Dios. Ut nabaleb li ixk li naꞌno̱queb ru queꞌpa̱ban.

⁵ Ut eb laj judío li incꞌaꞌ queꞌpa̱ban, cꞌajoꞌ nak queꞌjoskꞌoꞌ xban xcakaleb xchꞌo̱l. Queꞌra̱tina jun chꞌu̱tal li cui̱nk incꞌaꞌ useb xnaꞌleb li junes saꞌ be nequeꞌcuan. Ut li jun chꞌu̱tal chi cui̱nk aꞌan queꞌoc chixchikꞌbal xjoskꞌileb li tenamit. Xban nak yo̱queb xjoskꞌil, queꞌoc saꞌ rochoch laj Jasón chixsicꞌbaleb laj Pablo ut laj Silas re teꞌxcꞌameb chiruheb li tenamit.

⁶ Queꞌril nak incꞌaꞌ queꞌxtau laj Pablo ut laj Silas. Queꞌxchap laj Jasón rochben cuib oxibeb laj pa̱banel ut queꞌxcꞌam chiruheb li nequeꞌtaklan saꞌ li tenamit. Japjo̱queb re chixyebal: —Eb li cui̱nk aꞌin, yo̱queb chixpoꞌbal xchꞌo̱leb li tenamit saꞌ chixjunil li ruchichꞌochꞌ ut anakcuan xeꞌchal arin chixpoꞌbal xchꞌo̱leb li katenamit.

⁷ Ut laj Jasón xcꞌuleb saꞌ rochoch. Yo̱queb chixkꞌetbal lix chakꞌrab laj César li Acuabej. Yo̱queb chixyebal nak cuan jun chic li rey, aꞌan li Jesús, chanqueb.

⁸ Li qꞌuila tenamit joꞌqueb ajcuiꞌ li nequeꞌtaklan saꞌ li tenamit queꞌsach xchꞌo̱leb chirabinquil li cꞌaꞌru yo̱queb chixyebal eb aꞌan.

⁹ Eb li nequeꞌtaklan saꞌ li tenamit queꞌxye reheb laj Jasón ut li rochben nak tento teꞌxtoj riqꞌuin tumin li reliqueb. Ut nak ac xeꞌxcꞌul li tumin, queꞌachꞌaba̱c laj Jasón ut eb li rochben.

Laj Pablo ut laj Silas queꞌxchꞌolob xya̱lal aran Berea

¹⁰ Saꞌ ajcuiꞌ li kꞌojyi̱n aꞌan eb laj pa̱banel li cuanqueb aran queꞌrisi laj Pablo ut laj Silas saꞌ li tenamit aꞌan ut queꞌxtaklaheb toj Berea. Nak queꞌcuulac aran, queꞌco̱eb saꞌ li cab li nequeꞌxchꞌutub cuiꞌ ribeb laj judío.

¹¹ Eb li cuanqueb aran Berea kꞌaxal kꞌuneb xchꞌo̱l chiruheb li cuanqueb Tesalónica. Queꞌxcꞌul chi sa saꞌ xchꞌo̱leb li ra̱tin li Dios li yo̱ chixyebal laj Pablo. Ut rajlal cutan queꞌxtzol saꞌ li Santil Hu re rilbal ma joꞌcan tana naxye.

¹² Nabaleb laj judío queꞌpa̱ban saꞌ xya̱nkeb aꞌan. Cuanqueb ajcuiꞌ ixk aj griego xni̱nkaleb ru queꞌpa̱ban. Ut queꞌpa̱ban ajcuiꞌ nabaleb li cui̱nk aj griego.

¹³ Queꞌrabi resil laj judío li cuanqueb Tesalónica nak laj Pablo yo̱ chixjulticanquil li ra̱tin li Dios aran Berea. Ut queꞌco̱eb aran chixpoꞌbal xchꞌo̱leb li tenamit.

¹⁴ Aꞌut eb laj pa̱banel saꞌ junpa̱t queꞌxtakla laj Pablo chire li palau re nak ta̱xic saꞌ jalan naꞌajej. Aban laj Silas ut laj Timoteo toj queꞌcana Berea.

¹⁵ Eb li queꞌco̱eb chi canaba̱nc re laj Pablo, queꞌxcꞌam toj saꞌ li tenamit Atenas. Nak queꞌsukꞌi Berea, laj Pablo quixtakla resil chirixeb nak laj Silas ut laj Timoteo teꞌxic Atenas chi junpa̱t.

Laj Pablo quixchꞌolob xya̱lal chiruheb li tzolbileb li cuanqueb aran Atenas

¹⁶ Nak laj Pablo yo̱ chiroybeninquileb laj Silas ut laj Timoteo saꞌ li tenamit Atenas, quixqꞌue retal nak kꞌaxal cuiꞌchic nabaleb li yi̱banbil Dios cuanqueb saꞌ li tenamit aꞌan. Cꞌajoꞌ nak quirahoꞌ saꞌ xchꞌo̱l.

¹⁷ Joꞌcan nak qui-oc chixchꞌolobanquil lix ya̱lal chi tzꞌakal chiruheb li tenamit saꞌ li cab li nequeꞌxchꞌutub cuiꞌ ribeb laj judío joꞌqueb ajcuiꞌ li ma̱cuaꞌeb aj judío li queꞌxlokꞌoni li Dios. Ut rajlal cutan quixchꞌolob lix ya̱lal chiruheb li cuanqueb saꞌ cꞌayil.

¹⁸ Cuanqueb cui̱nk aj epicúreo ut eb aj estoico xcꞌabaꞌeb li nequeꞌxcꞌoxla nak kꞌaxal cuan xnaꞌlebeb. Eb aꞌan queꞌoc chixcuechꞌinquil rix li cꞌaꞌru yo̱ chixyebal laj Pablo. Ut yo̱queb chixyebal: —¿Cꞌaꞌru yo̱ chixyebal li cui̱nk aꞌan li junes a̱tinac naxba̱nu?— Ut cuan cuiꞌchic yo̱queb chi yehoc re: —Joꞌ li xchal anchal xyebal resil jalanil dios arin saꞌ katenamit, chanqueb. Queꞌxye chi joꞌcan xban nak laj Pablo yo̱ chixchꞌolobanquil resil li colba-ib saꞌ xcꞌabaꞌ li Jesucristo joꞌ ajcuiꞌ chirix lix cuaclijiqueb cuiꞌchic li camenak chi yoꞌyo.

¹⁹ Joꞌcan nak queꞌxcꞌam laj Pablo saꞌ li naꞌajej li nequeꞌxchꞌutub cuiꞌ ribeb li kꞌaxal cuanqueb xnaꞌleb. Areópago xcꞌabaꞌ li naꞌajej aꞌan. Ut queꞌxye re: —¿Ma ta̱ru̱k ta̱ye ke cꞌaꞌru xya̱lal li acꞌ tijleb aꞌin li yo̱cat chixyebal?

²⁰ Ma̱ jun sut kabiom li naꞌleb aꞌin. Takaj takanau cꞌaꞌru xya̱lal, chanqueb re.

²¹ Saꞌ eb li cutan aꞌan chixjunileb laj Atenas ut eb li jalaneb xtenamit li cuanqueb aran, ma̱cꞌaꞌ chic cꞌaꞌak re ru nequeꞌxcꞌoxla. Caꞌaj chic rabinquil ut a̱tinac chirix li acꞌ naꞌleb nequeꞌxba̱nu.

²² Ut laj Pablo quixakli chiruheb li cuanqueb saꞌ li naꞌajej aꞌan, ut quixye reheb: —Ex cui̱nk aj Atenas, yo̱quin chixqꞌuebal retal nak nequepa̱b chixjunil li cꞌaꞌak re ru.

²³ Nak yo̱quin chi be̱c saꞌ le̱ tenamit xebinqꞌue retal li cꞌaꞌru nequelokꞌoni ut xintau ajcuiꞌ jun li artal tzꞌi̱banbil chiru “Re li Dios li Incꞌaꞌ Naubil Ru”. Li Dios li nequelokꞌoni la̱ex chi incꞌaꞌ nequenau ru, aꞌan ajcuiꞌ li yo̱quin chixchꞌolobanquil xya̱lal che̱ru.

²⁴ Ut aꞌan ajcuiꞌ li Dios, li quiyi̱ban re li ruchichꞌochꞌ ut chixjunil li cꞌaꞌak re ru cuan. Aꞌan laj e̱chal re li choxa ut li ruchichꞌochꞌ. Aꞌan incꞌaꞌ nacuan saꞌ junak cab yi̱banbil xban cui̱nk.

²⁵ Chi moco aꞌ ta li cui̱nk naqꞌuehoc cꞌaꞌak re ru re aꞌan. Aꞌan ban naqꞌuehoc ke li kayuꞌam ut aꞌan naqꞌuehoc li kamusikꞌ. Aꞌan li naqꞌuehoc chixjunil li cꞌaꞌru cuan.

²⁶ Riqꞌuin jun chi cui̱nk quixyoꞌobtesi chixjunileb li cristian li cuanqueb saꞌ ruchichꞌochꞌ. Ut aꞌan yal re joꞌ najtil teꞌcua̱nk li junju̱nk saꞌ ruchichꞌochꞌ. Ut aꞌan ajcuiꞌ quiqꞌuehoc re lix naꞌajeb li junju̱nk chi tenamit.

²⁷ Quixba̱nu chi joꞌcan re nak li junju̱nk teꞌxsicꞌ li Dios ut ma̱re teꞌxtau nak teꞌxsicꞌ. Ut relic chi ya̱l moco chꞌaꞌaj ta xtaubal cui teꞌxsicꞌ chi anchaleb xchꞌo̱l.

²⁸ Aꞌan naqꞌuehoc kayuꞌam ut saꞌ xcꞌabaꞌ aꞌan nak yoꞌyo̱co ut noco-ecꞌan. Joꞌ quixye jun laj bichanel saꞌ e̱ya̱nk: “Relic chi ya̱l nak la̱o ralal xcꞌajol li Dios,” chan.

²⁹ Joꞌcan nak cui la̱o ralal xcꞌajol li Dios, incꞌaꞌ naru takacꞌoxla nak li Dios chanchan ta li oro, malaj li plata chi moco li pec li yi̱banbil yal riqꞌuin xcꞌaꞌux ut xnaꞌlebeb li cui̱nk.

³⁰ Li Dios incꞌaꞌ quixqꞌue saꞌ xbe̱neb li tenamit lix ma̱queb saꞌ eb li cutan nak incꞌaꞌ queꞌxtau ru lix ya̱lal. Abanan anakcuan naxjultica chiruheb chixjunileb li tenamit nak teꞌxyotꞌ xchꞌo̱l teꞌxjal xcꞌaꞌux.

³¹ Li Dios ac xxakab jun li cutan re ta̱rakok a̱tin saꞌ xbe̱neb chixjunileb li cuanqueb saꞌ ruchichꞌochꞌ. Ut quixxakab li ani ta̱rakok a̱tin saꞌ ti̱quilal. Quixcꞌut chiku nak tzꞌakal ya̱l xban nak quixcuaclesi cuiꞌchic chi yoꞌyo saꞌ xya̱nkeb li camenak, chan laj Pablo.

³² Nak eb li cuanqueb xnaꞌleb queꞌrabi li yo̱ chixyebal chirix lix cuaclijiqueb li camenak chi yoꞌyo, cuan queꞌseꞌen re ut cuan ajcuiꞌ queꞌyehoc re: —Takaj takabi cuiꞌchic li cꞌaꞌru yo̱cat chixyebal saꞌ junak chic cutan, chanqueb.

³³ Ut chirix aꞌan, laj Pablo qui-el saꞌ xya̱nkeb.

³⁴ Cuanqueb ajcuiꞌ li queꞌxcꞌul xchꞌo̱l li quixye laj Pablo ut queꞌxpa̱b li Jesús. Saꞌ xya̱nkeb li queꞌpa̱ban cuan laj Dionisio. Aꞌan jun reheb li queꞌtaklan saꞌ li tenamit. Ut quipa̱ban ajcuiꞌ jun li ixk xDámaris xcꞌabaꞌ. Ut cuanqueb ajcuiꞌ cuib oxib chic queꞌpa̱ban.