Hechos 15 - Li Santil hu

Eb laj cꞌamol be queꞌxchꞌutub ribeb Jerusalén chixcꞌu̱banquil cꞌaꞌru tento teꞌxba̱nu laj pa̱banel li ma̱cuaꞌeb aj judío

¹ Cuanqueb aj pa̱banel queꞌchal chak Judea. Queꞌoc chixyebal reheb laj pa̱banel: —Incꞌaꞌ naru texcolekꞌ cui incꞌaꞌ te̱ba̱nu li circuncisión joꞌ naxye li chakꞌrab li quiqꞌueheꞌ re laj Moisés, chanqueb.

² Riqꞌuin aꞌan queꞌxtiquib xcuechꞌinquil ribeb riqꞌuin laj Pablo ut laj Bernabé chirix li naꞌleb aꞌin. Ut queꞌxcꞌu̱b ru nak laj Pablo ut laj Bernabé teꞌxic Jerusalén chixpatzꞌbal reheb li apóstol ut reheb laj cꞌamol be ma tento nak teꞌxcꞌul li circuncisión re nak teꞌcolekꞌ. Cuanqueb ajcuiꞌ cuib oxib laj pa̱banel co̱eb chirixeb.

³ Queꞌtakla̱c xbaneb laj pa̱banel aran Antioquía. Nak yo̱queb chi numecꞌ Fenicia ut Samaria, queꞌxye resil nak queꞌpa̱ban li ma̱cuaꞌeb aj judío. Ut cꞌajoꞌ nak queꞌsahoꞌ saꞌ xchꞌo̱leb chixjunileb laj pa̱banel rabinquil nak yo̱queb chi pa̱ba̱nc.

⁴ Ut nak queꞌcuulac Jerusalén, queꞌcꞌuleꞌ xbaneb li apóstol, eb laj cꞌamol be joꞌqueb ajcuiꞌ chixjunileb laj pa̱banel. Ut queꞌxserakꞌi reheb chanru nak li Dios quixtenkꞌaheb riqꞌuin li cꞌanjel queꞌxba̱nu.

⁵ Abanan cuanqueb cuib oxib laj pa̱banel aj fariseo. Eb aꞌan queꞌxye: —Eb laj pa̱banel li ma̱cuaꞌeb aj judío, tento teꞌxba̱nu li circuncisión. Tento teꞌxba̱nu li cꞌaꞌru naxye li chakꞌrab li quixqꞌue ke laj Moisés, chanqueb.

⁶ Queꞌxchꞌutub ribeb li apóstol ut eb laj cꞌamol be chixsicꞌbal cꞌaꞌru teꞌxba̱nu riqꞌuin li chꞌaꞌajquilal aꞌin.

⁷ Ut nak ac xeꞌxcuechꞌi ribeb chi us chirix li naꞌleb aꞌin, laj Pedro quicuacli ut qui-oc chi a̱tinac. Quixye reheb: —Ex herma̱n, la̱ex nequenau nak ac junxil quixsicꞌ chak cuu li Dios saꞌ e̱ya̱nk re tinye resil li colba-ib reheb li ma̱cuaꞌeb aj judío re nak teꞌpa̱ba̱nk ajcuiꞌ eb aꞌan.

⁸ Li Dios naxnau cꞌaꞌru nanumeꞌ saꞌ xchꞌo̱l li junju̱nk. Quixcꞌut chiku nak naxraheb aꞌan nak quixqꞌue li Santil Musikꞌej reheb joꞌ nak quixqꞌue ke la̱o.

⁹ Moco jalan ta chic li colba-ib li xqꞌue ke la̱o chiru li xqꞌue reheb aꞌan. Quixcuy quixsach lix ma̱queb xban nak xeꞌpa̱ban.

¹⁰ Anakcuan ut ¿cꞌaꞌut nak yo̱quex chixyalbal rix li Dios riqꞌuin xqꞌuebal li i̱k aꞌin saꞌ xbe̱neb laj pa̱banel li ma̱cuaꞌeb aj judío? ¿Cꞌaꞌut nak te̱puersiheb chixba̱nunquil li naxye li chakꞌrab li incꞌaꞌ xoru chixba̱nunquil la̱o chi moco eb li kaxeꞌto̱nil yucuaꞌ?

¹¹ Yal xban rusilal li Ka̱cuaꞌ Jesús nak xopa̱ban ut xocoleꞌ joꞌ eb ajcuiꞌ aꞌan, chan laj Pedro.

¹² Queꞌxcanab a̱tinac chixjunileb li chꞌutchꞌu̱queb aran ut queꞌoc chirabinquil nak laj Pablo ut laj Bernabé yo̱queb chixserakꞌinquil chanru nak li Dios quixtenkꞌaheb chixba̱nunquil li milagro ut li sachba chꞌo̱lej saꞌ xya̱nkeb li ma̱cuaꞌeb aj judío.

¹³ Nak queꞌrakeꞌ chi a̱tinac, laj Jacobo quichakꞌoc ut quixye: —Ex inherma̱n, abihomak li oc cue xyebal e̱re.

¹⁴ Laj Simón Pedro ac xye e̱re chanru nak li Dios quixtiquib rosobtesinquileb li ma̱cuaꞌeb aj judío. Quixsiqꞌueb ru saꞌ xya̱nkeb li ani teꞌpa̱ba̱nk re.

¹⁵ Ut aꞌan ajcuiꞌ li queꞌxtzꞌi̱ba chak retalil li profeta junxil li naxye chi joꞌcaꞌin:

¹⁶ Ut chirix aꞌin la̱in tincha̱lk ut tincuaclesi cuiꞌchic lix tenamit laj David, li tꞌanenak anakcuan. Tinyi̱b cuiꞌchic li tzꞌac li sutsu cuiꞌ ut tinyi̱b cuiꞌchic li juqꞌuinbil. Tinqꞌueheb cuiꞌchic xcuanquil laj Israel,

¹⁷ re nak tineꞌxpa̱b li ma̱cuaꞌeb aj judío. Tineꞌxpa̱b chixjunileb li sicꞌbileb ru inban chokꞌ cualal incꞌajol, chan li Ka̱cuaꞌ Dios.

¹⁸ Ut li Ka̱cuaꞌ Dios li quiyehoc chak re aꞌin, aꞌan ajcuiꞌ li ta̱ba̱nu̱nk re. (Amós 9:11-12)

¹⁹ Joꞌcan nak la̱in ninye nak incꞌaꞌ takapuersi ruheb chixba̱nunquil li naxye li chakꞌrab li ma̱cuaꞌeb aj judío li yo̱queb chixpa̱banquil li Ka̱cuaꞌ.

²⁰ Li tento takaba̱nu, aꞌan tzꞌi̱bac riqꞌuineb ut xyebal reheb nak incꞌaꞌ teꞌxmux rib riqꞌuin xtzacanquil li tzacae̱mk mayejanbil chiruheb li yi̱banbil dios. Incꞌaꞌ teꞌcoꞌbe̱tak teꞌyumbe̱tak. Ut incꞌaꞌ teꞌxtiu xtibel li yatzꞌbil xul chi moco teꞌxtzaca li quicꞌ.

²¹ Joꞌcaꞌin ajcuiꞌ naxye li chakꞌrab li quiqꞌueheꞌ re laj Moisés xban li Dios. Ut chalen chak najter cuan li ani najultican re saꞌ eb li cab li nequeꞌxchꞌutub cuiꞌ ribeb laj judío rajlal hiloba̱l cutan, chan laj Jacobo.

Li hu li queꞌxtzꞌi̱ba reheb li ma̱cuaꞌeb aj judío

²² Eb li apóstol, ut eb laj cꞌamol be rochbeneb chixjunileb laj pa̱banel queꞌxsicꞌ ruheb li teꞌxtakla Antioquía chirixeb laj Pablo ut laj Bernabé. Ut queꞌxsiqꞌueb ru laj Silas ut laj Judas, aj Barsabás nequeꞌxye ajcuiꞌ re. Eb li cui̱nk aꞌin qꞌuebileb xcuanquil xbaneb li rech aj pa̱banelil.

²³ Queꞌxtzꞌi̱ba jun li hu ut queꞌxtakla chirixeb laj Judas ut laj Silas. Joꞌcaꞌin naxye saꞌ li hu queꞌxtakla: Ex herma̱n, li ma̱cuaꞌex aj judío, la̱o li apóstol, ut eb laj cꞌamol be joꞌqueb ajcuiꞌ chixjunileb laj pa̱banel nakatakla xsahil e̱chꞌo̱l la̱ex li cuanquex saꞌ eb li tenamit Antioquía, Siria ut Cilicia. Sahak taxak saꞌ e̱chꞌo̱l.

²⁴ Xkabi resil nak cuanqueb li xeꞌel arin saꞌ kaya̱nk ut xeꞌco̱eb aran saꞌ le̱ tenamit che̱chꞌiꞌchꞌiꞌinquil ut chixpoꞌbal e̱chꞌo̱l riqꞌuin li cꞌaꞌru nequeꞌxye. Abanan moco la̱o ta xotaklan reheb.

²⁵ Joꞌcan nak xkachꞌutub kib ut xkacꞌu̱b ru nak takasicꞌ ruheb li ani takatakla e̱riqꞌuin chirixeb laj Bernabé ut laj Pablo, li raro̱queb kaban.

²⁶ Eb li kaherma̱n aꞌin ac xeꞌxkꞌaxtesi ribeb chi ca̱mc saꞌ xcꞌabaꞌ li Ka̱cuaꞌ Jesucristo.

²⁷ Ut xkasicꞌ ruheb laj Judas ut laj Silas ut xkataklaheb e̱riqꞌuin re nak teꞌxchꞌolob che̱ru li cꞌaꞌru xkatzꞌi̱ba saꞌ li hu aꞌin.

²⁸ Xcꞌul xchꞌo̱l li Santil Musikꞌej joꞌ ajcuiꞌ la̱o nak incꞌaꞌ texkapuersi chixba̱nunquil chixjunil li naxye saꞌ li chakꞌrab. Caꞌaj cuiꞌ eb li naꞌleb aꞌin tento te̱ba̱nu.

²⁹ Incꞌaꞌ te̱tzaca li tzacae̱mk mayejanbil chiru li yi̱banbil dios chi moco te̱tzaca li quicꞌ chi moco te̱tzaca xtibel li yatzꞌbil xul. Ut incꞌaꞌ te̱mux e̱rib riqꞌuin coꞌbe̱tac yumbe̱tac. Cui te̱col e̱rib chiru chixjunil aꞌin, us te̱ba̱nu. Cherilak e̱rib, chan laj Jacobo.

³⁰ Eb li cui̱nk li queꞌtakla̱c co̱eb Antioquía. Queꞌxchꞌutub chixjunileb laj pa̱banel ut queꞌxkꞌaxtesi reheb li hu li queꞌxcꞌam.

³¹ Nak queꞌril xsaꞌ li hu, cꞌajoꞌ nak queꞌsahoꞌ saꞌ xchꞌo̱leb laj pa̱banel ut queꞌcꞌojla xchꞌo̱leb riqꞌuin li cꞌaꞌru quitakla̱c xyebal reheb.

³² Laj Judas ut laj Silas qꞌuebileb xma̱tan chixchꞌolobanquil xya̱lal li ra̱tin li Dios. Queꞌxchꞌolob xya̱lal chiruheb li chꞌutchꞌu̱queb aran ut queꞌxqꞌue xcacuilal xchꞌo̱leb ut queꞌxcꞌojob xchꞌo̱leb riqꞌuin li a̱tin li queꞌxye reheb.

³³ Najt queꞌcana saꞌ xya̱nkeb. Mokon chic queꞌchakꞌrabi̱c re nak teꞌsukꞌi̱k cuiꞌchic Jerusalén riqꞌuineb laj pa̱banel li queꞌtaklan reheb Antioquía. Ut queꞌxtzꞌa̱ma rusilal li Dios saꞌ xbe̱neb.

³⁴ Abanan laj Silas toj quiraj cana̱c aran.

³⁵ Laj Pablo ut laj Bernabé queꞌcana ajcuiꞌ aran Antioquía. Yo̱queb chixcꞌutbal li ra̱tin li Dios ut yo̱queb chixchꞌolobanquil xya̱lal li colba-ib. Ut cuanqueb ajcuiꞌ nabaleb li queꞌtenkꞌan reheb.

Laj Pablo quixjach rib riqꞌuin laj Bernabé ut co̱ xcaꞌ sut chirulaꞌaninquil laj pa̱banel

³⁶ Mokon chic laj Pablo quixye re laj Bernabé: —Toxic cuiꞌchic saꞌ eb li tenamit conumeꞌ cuiꞌ chak chixyebal ra̱tin li Dios re takil chanru cuanqueb laj pa̱banel li cuanqueb saꞌ eb li naꞌajej aꞌan, chan.

³⁷ Ut laj Bernabé quiraj raj xcꞌambal chirixeb laj Juan li nequeꞌxye ajcuiꞌ Marcos re.

³⁸ Abanan incꞌaꞌ quixcꞌul xchꞌo̱l laj Pablo xban nak junxil laj Juan Marcos quixjach rib riqꞌuineb aran Panfilia ut incꞌaꞌ chic co̱ chirixeb chixba̱nunquil li cꞌanjel.

³⁹ Queꞌxcuechꞌi ribeb laj Pablo ut laj Bernabé ut queꞌxcanab ribeb. Laj Bernabé co̱ aran Chipre chiru haꞌ ut quixcꞌam laj Juan Marcos chirix.

⁴⁰ Laj Pablo quixsicꞌ ru laj Silas re tixcꞌam chirix. Eb laj pa̱banel li cuanqueb aran Antioquía queꞌxkꞌaxtesiheb laj Pablo ut laj Silas saꞌ rukꞌ li Ka̱cuaꞌ nak queꞌel aran.

⁴¹ Quilajeꞌxbeni li naꞌajej Siria ut Cilicia. Queꞌxchꞌolob xya̱lal chiruheb laj pa̱banel ut queꞌcacuu xchꞌo̱leb saꞌ xpa̱ba̱leb.