Hechos 14 - Li Santil hu

Laj Pablo ut laj Bernabé queꞌxcꞌul raylal xban nak queꞌxchꞌolob xya̱lal aran Iconio

¹ Nak queꞌcuulac Iconio, laj Pablo ut laj Bernabé queꞌoc saꞌ li cab li nequeꞌxchꞌutub cuiꞌ ribeb laj judío. Queꞌxchꞌolob lix ya̱lal chiruheb ut nabaleb aj judío queꞌpa̱ban joꞌqueb ajcuiꞌ li ma̱cuaꞌeb aj judío.

² Ut eb laj judío li incꞌaꞌ queꞌpa̱ban, queꞌxtacchiꞌiheb li ma̱cuaꞌeb aj judío re nak teꞌxpoꞌ xchꞌo̱leb saꞌ xbe̱neb laj pa̱banel.

³ Abanan laj Pablo ut laj Bernabé najt queꞌcana aran. Ut xban nak cauheb xchꞌo̱l riqꞌuin li Ka̱cuaꞌ queꞌxchꞌolob xya̱lal li rusilal li Dios. Ut li Ka̱cuaꞌ yo̱ chixqꞌuebal xcuanquil li ra̱tineb xban nak yo̱ chixtenkꞌanquileb chixba̱nunquil li milagros ut li sachba chꞌo̱lej.

⁴ Queꞌxjach ribeb li tenamit. Cuanqueb li queꞌoquen chirixeb laj judío ut cuanqueb li queꞌoquen chirixeb li apóstol.

⁵ Saꞌ xya̱nkeb li xicꞌ nequeꞌiloc reheb laj Pablo ut laj Bernabé cuanqueb aj judío ut cuanqueb ma̱cuaꞌeb aj judío. Queꞌxjunaji ribeb riqꞌuineb li nequeꞌtaklan saꞌ li tenamit ut queꞌxcꞌu̱b ru chanru nak teꞌxrahobtesi ut teꞌxcuti chi pec laj Pablo ut laj Bernabé.

⁶ Abanan laj Pablo ut laj Bernabé queꞌrabi resil li yo̱queb chixcꞌu̱banquil ut queꞌe̱lelic chiruheb. Co̱eb saꞌ eb li tenamit Listra ut Derbe xcue̱nt Licaonia ut queꞌco̱eb ajcuiꞌ saꞌ eb li cꞌaleba̱l li cuanqueb chi xjun sutam.

⁷ Ut aran yo̱queb chixchꞌolobanquil resil li colba-ib.

Queꞌxcuti laj Pablo chi pec aran Listra

⁸ Aran Listra cuan jun li cui̱nk incꞌaꞌ naru nabe̱c. Chalen saꞌ xcaꞌchꞌinal incꞌaꞌ us li rok. Li cui̱nk aꞌan chunchu aran.

⁹ Yo̱ chirabinquil li cꞌaꞌru yo̱ chixyebal laj Pablo. Laj Pablo quixcaꞌya li cui̱nk ut quixqꞌue retal nak li cui̱nk aꞌan quixpa̱b nak naru ta̱qꞌuirtesi̱k.

¹⁰ Joꞌcan nak laj Pablo quixye re chi cau xya̱b xcux: —Cuaclin. Xaklin chi us, chan. Ac ta̱cuacli̱k ut qui-oc chi be̱c li cui̱nk.

¹¹ Nak li tenamit queꞌril li cꞌaꞌru quixba̱nu laj Pablo, queꞌxjap reheb chixyebal saꞌ ra̱tinoba̱leb laj Licaonia: —Xeꞌchal saꞌ kaya̱nk li dios. Chanchaneb cui̱nk, chanqueb.

¹² Laj Bernabé queꞌxqꞌue xcꞌabaꞌ chokꞌ Júpiter, ut laj Pablo Mercurio queꞌxqꞌue chokꞌ xcꞌabaꞌ xban nak aꞌan aj cꞌamol be chi a̱tinac.

¹³ Li rochoch laj Júpiter lix dioseb aꞌan cuan chire li tenamit. Laj tij li nacꞌanjelac chiru lix dioseb aꞌan cuan chire li tenamit. Laj tij li nacꞌanjelac chiru lix dioseb quixcꞌam chire li tenamit li cuacax ut li cotobanbil utzꞌuꞌuj. Quiraj raj xmayejanquil chiruheb li apóstol rochbeneb li tenamit.

¹⁴ Nak queꞌxqꞌue retal li cꞌaꞌru yo̱queb li tenamit, laj Pablo ut laj Bernabé queꞌxpej li rakꞌeb retalil nak incꞌaꞌ quicuulac chiruheb li cꞌaꞌru yo̱queb chixba̱nunquil li tenamit. Ut queꞌco̱eb saꞌ a̱nil saꞌ xya̱nkeb li tenamit ut queꞌxye chi cau xya̱b xcuxeb:

¹⁵ —Ex tenamit, ¿cꞌaꞌut nak nequeba̱nu chi joꞌcan? La̱o yal cui̱nko joꞌ la̱ex. Juntakꞌe̱to e̱riqꞌuin. Aꞌan aj e nak xochal arin saꞌ e̱ya̱nk chixyebal e̱re nak te̱canab li joꞌ ma̱joꞌil naꞌleb. Sicꞌomak ban li yoꞌyo̱quil Dios li quiyi̱ban re li choxa, li ruchichꞌochꞌ, li palau ut chixjunil li cꞌaꞌru cuan.

¹⁶ Junxil li Dios quixcanabeb li tenamit chi cua̱nc joꞌ queꞌraj eb aꞌan.

¹⁷ Riqꞌuin li usilal li naxba̱nu ke, junelic yo̱ chixcꞌutbesinquil chiku nak aꞌan li Dios. Aꞌan naxcꞌut chiku nak aꞌan yal re saꞌ xbe̱n chixjunil. Aꞌan naqꞌuehoc re li hab. Aꞌan naqꞌuehoc re chi u̱chi̱nc li kacui̱mk chi nabal, ut aꞌan ajcuiꞌ nacꞌojoban re li kachꞌo̱l riqꞌuin li katzacae̱mk ut riqꞌuin lix sahil kachꞌo̱l, chan laj Pablo.

¹⁸ Usta laj Pablo ut laj Bernabé queꞌxchꞌolob xya̱lal chiruheb li tenamit, abanan ra sa nak queꞌxcꞌul xchꞌo̱l nak incꞌaꞌ teꞌmayejak chiruheb.

¹⁹ Queꞌcuulac eb laj judío li queꞌchal Antioquía ut Iconio. Queꞌxtacchiꞌiheb nabaleb li tenamit. Queꞌxcuti chi pec laj Pablo ut queꞌrisi chire li tenamit. Saꞌ xchꞌo̱leb aꞌan nak camenak chic laj Pablo queꞌxcanab.

²⁰ Laj Pablo quiril nak quisuteꞌ xbaneb laj pa̱banel. Quicuacli ut co̱ saꞌ li tenamit. Ut saꞌ xcab li cutan co̱ cuiꞌchic Derbe rochben laj Bernabé.

Laj Pablo co̱ cuiꞌchic Antioquía xcue̱nt Siria chixqꞌuebal xcacuilal xchꞌo̱leb laj pa̱banel

²¹ Nak queꞌxchꞌolob resil li colba-ib saꞌ li tenamit Derbe, nabaleb queꞌpa̱ban. Chirix chic aꞌan queꞌsukꞌi cuiꞌchic saꞌ eb li tenamit Listra, Iconio ut Antioquía.

²² Yo̱queb chixqꞌuebal xcacuil xchꞌo̱leb laj pa̱banel. Queꞌxye reheb nak teꞌxpa̱b li Ka̱cuaꞌ chi anchaleb xchꞌo̱l ut incꞌaꞌ teꞌxcanab xpa̱banquil. Queꞌxye reheb nak tento teꞌxcuy xnumsinquil li raylal re nak teꞌoc saꞌ lix nimajcual cuanquilal li Dios.

²³ Queꞌxxakab aj cꞌamol be re li junju̱nk chꞌu̱tal chi aj pa̱banel. Queꞌxba̱nu lix ayu̱n ut queꞌtijoc saꞌ xbe̱neb re xkꞌaxtesinquileb saꞌ rukꞌ li Ka̱cuaꞌ li ac xeꞌpa̱ban.

²⁴ Nak yo̱queb chi xic queꞌnumeꞌ saꞌ li naꞌajej Pisidia ut queꞌcuulac Panfilia.

²⁵ Queꞌxye resil li evangelio aran Perge ut queꞌco̱eb Atalia.

²⁶ Queꞌel aran ut queꞌco̱eb chiru haꞌ toj Antioquía saꞌ li naꞌajej li queꞌtakla̱c cuiꞌ chi cꞌanjelac chiru li Ka̱cuaꞌ. Queꞌcanaba̱c saꞌ rukꞌ li Dios re nak aꞌan ta̱ilok reheb. Joꞌcaꞌin nak queꞌxchoy li cꞌanjel li quiqꞌueheꞌ reheb re teꞌxba̱nu.

²⁷ Nak queꞌcuulac Antioquía queꞌxchꞌutub chixjunileb laj pa̱banel ut queꞌxserakꞌi reheb chixjunil li quixba̱nu li Ka̱cuaꞌ reheb. Queꞌxserakꞌi ajcuiꞌ reheb chanru nak li Dios quixqꞌue li evangelio reheb li ma̱cuaꞌeb aj judío.

²⁸ Laj Pablo ut laj Bernabé najt queꞌcana riqꞌuineb laj pa̱banel saꞌ li naꞌajej aꞌan.