Hechos 13 - Li Santil hu

Queꞌxtiquib lix cꞌanjel laj Bernabé ut laj Saulo

¹ Saꞌ xya̱nkeb laj pa̱banel aran Antioquía cuanqueb profeta ut cuanqueb aj tzolonel. Aꞌaneb aꞌin: laj Bernabé, laj Simón li nequeꞌxye Niger re, laj Lucio Cirene xtenamit, laj Manaén li quiqꞌuiresi̱c riqꞌuin laj Herodes li acuabej, ut laj Saulo.

² Nak yo̱queb chi tijoc chiru li Dios ut chi ayunic, li Santil Musikꞌej quixye reheb: —Qꞌuehomakeb xjuneseb laj Saulo ut laj Bernabé re nak teꞌxba̱nu li cꞌanjel aꞌin li sicꞌbileb cuiꞌ ru inban, chan.

³ Queꞌxba̱nu lix ayu̱n ut queꞌtijoc nak queꞌxqꞌue li rukꞌeb saꞌ xbe̱neb laj Saulo ut laj Bernabé. Tojoꞌnak queꞌxchakꞌrabiheb.

⁴ Laj Saulo ut laj Bernabé queꞌco̱eb Seleucia joꞌ quiyeheꞌ reheb xban li Santil Musikꞌej. Queꞌel aran ut queꞌco̱eb chiru haꞌ toj Chipre.

⁵ Ut nak queꞌcuulac Salamina, queꞌxchꞌolob xya̱lal li ra̱tin li Dios saꞌ eb li cab li nequeꞌxchꞌutub cuiꞌ ribeb laj judío. Ut laj Juan Marcos yo̱ ajcuiꞌ chixtenkꞌanquileb.

⁶ Yo̱queb chixbeninquil chixjunil li naꞌajej li sutsu saꞌ haꞌ. Queꞌcuulac saꞌ li tenamit Pafos. Aran queꞌxtau jun aj tu̱l aj judío. Barjesús lix cꞌabaꞌ. Li cui̱nk aꞌan aj balakꞌ. Naxye nak saꞌ xcꞌabaꞌ li Dios naa̱tinac. Abanan moco ya̱l ta.

⁷ Li cui̱nk aꞌan cuan riqꞌuin laj Sergio Paulo, li qꞌuebil xcuanquil chi takla̱nc saꞌ li naꞌajej aꞌan. Laj Sergio Paulo, li cuan xnaꞌleb, quixtakla xbokbaleb laj Saulo ut laj Bernabé xban nak quiraj rabinquil li ra̱tin li Dios.

⁸ Abanan yo̱ chi chꞌiꞌchꞌiꞌi̱nc laj Barjesús laj tu̱l. (Chi jalbil ru li cꞌabaꞌej aꞌan naraj naxye Elimas.) Yo̱ chixchꞌiꞌchꞌiꞌinquileb xban nak incꞌaꞌ quiraj nak ta̱pa̱ba̱nk laj Sergio Paulo.

⁹ Xban nak cuan li Santil Musikꞌej riqꞌuin, laj Saulo li nayeman ajcuiꞌ aj Pablo re, quixnau nak incꞌaꞌ us xnaꞌleb laj Barjesús. Joꞌcan nak quixcaꞌya saꞌ ru.

¹⁰ Ut quixye re: —La̱at chanchanat laj tza. La̱at aj ticꞌtiꞌ. Xicꞌ nacacuil li ti̱quilal. Junes balakꞌic ut ma̱usilal nacaba̱nu. La̱at nacapoꞌ ru li rusilal li Ka̱cuaꞌ.

¹¹ Anakcuan li Ka̱cuaꞌ ta̱rakok a̱tin saꞌ a̱be̱n. Tatmutzꞌokꞌ ut najt incꞌaꞌ ta̱ilok xnakꞌ a̱cuu, chan laj Pablo. Ut saꞌ junpa̱t quimoy ut quikꞌojyi̱noꞌ saꞌ xnakꞌ ru. Quixyal xsicꞌbal ani ta̱chꞌilo̱nk re.

¹² Ut nak laj Sergio Paulo quiril li cꞌaꞌru quixcꞌul laj tu̱l, quixpa̱b li Ka̱cuaꞌ. Sachso xchꞌo̱l chirabinquil li tijleb chirix li Ka̱cuaꞌ.

Laj Pablo ut laj Bernabé queꞌxchꞌolob xya̱lal aran Antioquía xcue̱nt Pisidia

¹³ Laj Pablo queꞌel Pafos saꞌ jucub joꞌqueb ajcuiꞌ li rochben ut queꞌco̱eb Perge xcue̱nt Panfilia. Aran queꞌxcanab ribeb ut laj Juan Marcos quisukꞌi Jerusalén.

¹⁴ Eb aꞌan queꞌnumeꞌ Perge ut queꞌcuulac Antioquía xcue̱nt Pisidia. Saꞌ li hiloba̱l cutan queꞌoc saꞌ li cab li nequeꞌxchꞌutub cuiꞌ ribeb laj judío ut queꞌcꞌojla aran.

¹⁵ Eb laj cꞌamol be queꞌril xsaꞌ li chakꞌrab ut queꞌril ajcuiꞌ xsaꞌ li hu li queꞌxtzꞌi̱ba li profeta. Ut chirix aꞌan queꞌxye re laj Pablo: —Ex kas ki̱tzꞌin, cui cuan li cꞌaꞌru te̱ye re xqꞌuebal xcacuil xchꞌo̱leb li tenamit, takaj rabinquil anakcuan, chanqueb.

¹⁶ Quixakli laj Pablo ut quixtaksi li rukꞌ re xyebal reheb nak incꞌaꞌ chic teꞌchoki̱nk. Quixye: —Ex aj judío ut la̱ex li ma̱cuaꞌex aj judío, li nequelokꞌoni li Ka̱cuaꞌ, abihomak li tinye e̱re.

¹⁷ Li Dios li nequeꞌxlokꞌoni li ralal xcꞌajol laj Israel, aꞌan quixsiqꞌueb ru li kaxeꞌto̱nil yucuaꞌ. Quirosobtesiheb ut quixtamresiheb nak cuanqueb aran Egipto. Ut riqꞌuin xnimal xcuanquil quirisiheb saꞌ li tenamit aꞌan.

¹⁸ Caꞌcꞌa̱l chihab quixcuy chak rilbaleb nak yo̱queb chak chi numecꞌ saꞌ li chaki chꞌochꞌ.

¹⁹ Quixsach ruheb cuukub li xni̱nkal ru tenamit saꞌ li naꞌajej Canaán ut li naꞌajej aꞌan quicana chokꞌ reheb laj Israel.

²⁰ Chixjunil aꞌin quicꞌulman chiru ca̱hib ciento riqꞌuin mero ciento chihab. Chirix aꞌan li Dios quixqꞌueheb aj rakol a̱tin chi takla̱nc saꞌ xbe̱neb toj qui-oc laj Samuel li profeta.

²¹ Chirix chic aꞌan queꞌxtzꞌa̱ma xreyeb. Ut li Dios quixqꞌue laj Saúl chokꞌ xreyeb. Aꞌan quitaklan saꞌ xbe̱neb chiru caꞌcꞌa̱l chihab. Laj Saúl aꞌan ralal laj Cis xcomoneb li ralal xcꞌajol laj Benjamín.

²² Ut nak qui-isi̱c laj Saúl, li Dios quixqꞌue laj David chokꞌ xreyeb ut quixye: “Xinsicꞌ ru laj David ralal laj Isaí. Nacuulac chicuu lix naꞌleb li cui̱nk aꞌan. Aꞌan tixba̱nu chixjunil li cꞌaꞌru nacuaj la̱in,” chan.

²³ Ut saꞌ xya̱nkeb li ralal xcꞌajol aꞌan, li Dios quixqꞌue chi yoꞌla̱c li Jesús laj Colol re li tenamit Israel joꞌ quixyechiꞌi reheb.

²⁴ Nak toj ma̱jiꞌ nacꞌulun li Jesús, laj Juan yo̱ chixchꞌolobanquil chiruheb chixjunileb laj Israel nak tento teꞌxyotꞌ xchꞌo̱l teꞌxjal xcꞌaꞌux ut teꞌxcꞌul li cubi haꞌ.

²⁵ Nak ac rakecꞌ re xba̱nunquil lix cꞌanjel, laj Juan quixye, “¿Anihin la̱in nak nequecꞌoxla? Moco la̱in ta li yo̱quex chiroybeninquil. Cha̱lc ban re chicuix li yo̱quex chiroybeninquil. Aꞌan nim xcuanquil chicuu la̱in. Moco incꞌulub ta xhitbal xcꞌa̱mal lix xa̱b,” chan laj Juan.

²⁶ Ex kas ki̱tzꞌin, la̱ex ralal xcꞌajol laj Abraham, ut la̱ex li ma̱cuaꞌex aj judío li nequexucua ru li Dios, taklanbil chak chokꞌ e̱re laj Colonel.

²⁷ Li cuanqueb Jerusalén ut eb li nequeꞌtaklan saꞌ xbe̱neb li tenamit incꞌaꞌ queꞌxtau ru li queꞌxye eb li profeta. Incꞌaꞌ queꞌxnau nak li Jesús, aꞌan laj Colonel. Abanan nak queꞌxkꞌaxtesi chi ca̱mc li Jesús, quitzꞌakloc ru li a̱tin li queꞌxye li profeta, li na-ileꞌ chiruheb rajlal saꞌ li hiloba̱l cutan.

²⁸ Usta incꞌaꞌ queꞌxtau xma̱c, queꞌxtzꞌa̱ma chiru laj Pilato nak tixqꞌue chi camsi̱c li Jesús.

²⁹ Nak ac xcꞌul chixjunil li raylal li quiyeheꞌ chak chirix xbaneb li profeta junxil, queꞌrisi chiru cruz ut queꞌxmuk.

³⁰ Abanan li Dios quixcuaclesi cuiꞌchic chi yoꞌyo saꞌ xya̱nkeb li camenak.

³¹ Ut chiru nabal cutan qui-ileꞌ ru xbaneb li queꞌochbenin re junxil nak qui-el Galilea ut co̱ Jerusalén. Ut aꞌaneb chic nequeꞌyehoc resil li queꞌril reheb li tenamit anakcuan.

³² Joꞌcan ajcuiꞌ la̱o yo̱co chixchꞌolobanquil che̱ru li cha̱bil esilal aꞌin: nak li Dios quixcuaclesi cuiꞌchic chi yoꞌyo li Jesucristo.

³³ Quitzꞌakloc ru chokꞌ ke la̱o li alal cꞌajolbej li quixyechiꞌi chak li Dios reheb li kaxeꞌto̱nil yucuaꞌ junxil joꞌ tzꞌi̱banbil retalil saꞌ li hu Salmos li naxye chi joꞌcaꞌin: La̱at li tzꞌakal cualal. Anakcuan xatinqꞌue saꞌ a̱cuanquil, chan li Dios. (Sal. 2:7)

³⁴ Quixcuaclesi cuiꞌchic chi yoꞌyo saꞌ xya̱nkeb li camenak ut incꞌaꞌ chic ta̱ca̱mk joꞌ tzꞌi̱banbil retalil saꞌ li hu Isaías li naxye chi joꞌcaꞌin: La̱in texcuosobtesi ut tinqꞌue e̱re li ma̱tan li quinyechiꞌi re laj David junxil. (Isa. 55:3)

³⁵ Ut naxye ajcuiꞌ saꞌ li Salmos: Incꞌaꞌ ta̱canab chi kꞌa̱c lix tibel la̱ Santil Alal. (Sal. 16:10)

³⁶ Relic chi ya̱l laj David nak toj yoꞌyo̱k quicꞌanjelac chiru lix tenamit joꞌ quiraj li Dios. Quicam ut quimukeꞌ chixcꞌatk lix xeꞌto̱nil yucuaꞌ ut quikꞌa lix tibel.

³⁷ Abanan li jun li quicuaclesi̱c cuiꞌchic chi yoꞌyo xban li Dios, aꞌan incꞌaꞌ quikꞌa lix tibel.

³⁸ Joꞌcan ut nak chenauhak la̱ex, kas ki̱tzꞌin, nak nakajultica che̱ru nak caꞌaj cuiꞌ saꞌ xcꞌabaꞌ li Jesús li quicuacli cuiꞌchic chi yoꞌyo cuan xcuybal xsachbal le̱ ma̱c.

³⁹ Incꞌaꞌ quiti̱cobresi̱c xchꞌo̱leb li kaxeꞌto̱nil yucuaꞌ riqꞌuin xba̱nunquil li naxye saꞌ lix chakꞌrab laj Moisés, abanan anakcuan naru chic ta̱ti̱cobresi̱k kachꞌo̱l riqꞌuin xpa̱banquil li Jesús.

⁴⁰ Joꞌcan nak cheqꞌuehak retal chi us re nak incꞌaꞌ ta̱cha̱lk saꞌ e̱be̱n li raylal li queꞌxye chak li profetas junxil.

⁴¹ Aꞌan aꞌin li queꞌxtzꞌi̱ba li profeta junxil: Cherabihak, la̱ex li nequextzꞌekta̱nan re li cua̱tin. Chisachk e̱naꞌleb ut chex-osokꞌ ta. La̱in yo̱quin chixba̱nunquil jun li sachba chꞌo̱lej saꞌ eb li cutan aꞌin. Li sachba chꞌo̱lej li yo̱quin chixba̱nunquil incꞌaꞌ raj te̱pa̱b cui yal ani ta junak ta̱serakꞌi̱nk e̱re.— (Hab. 1:5)

⁴² Nak queꞌel laj Pablo ut laj Bernabé saꞌ li cab li nequeꞌxchꞌutub cuiꞌ ribeb laj judío, li ma̱cuaꞌeb aj judío queꞌxtzꞌa̱ma chiru laj Pablo nak ta̱cha̱lk cuiꞌchic saꞌ li hiloba̱l cutan jun chic re nak tixchꞌolob cuiꞌchic xya̱lal chiruheb.

⁴³ Nak queꞌxchakꞌrabiheb li tenamit, nabaleb laj judío joꞌqueb ajcuiꞌ li queꞌoc saꞌ xya̱nkeb aꞌan queꞌxta̱ke laj Pablo ut laj Bernabé. Laj Pablo ut laj Bernabé yo̱queb chixqꞌuebal xnaꞌlebeb re nak teꞌcua̱nk saꞌ xya̱lal joꞌ naraj li Dios.

⁴⁴ Saꞌ li hiloba̱l cutan jun chic, yal cuib oxib aj chic li incꞌaꞌ queꞌcuulac chi abi̱nc nak queꞌxchꞌutub ribeb chixjunileb li cuanqueb saꞌ li tenamit chirabinquil li ra̱tin li Dios li tixye laj Pablo.

⁴⁵ Ut nak queꞌril li qꞌuila tenamit eb li nequeꞌcꞌamoc be saꞌ xya̱nkeb laj judío, cꞌajoꞌ nak queꞌcakoꞌ xchꞌo̱leb. Queꞌoc chixcuechꞌinquil laj Pablo. Queꞌxhob ut queꞌxmajecua.

⁴⁶ Laj Pablo ut laj Bernabé queꞌxye chi cauheb xchꞌo̱l: —Relic chi ya̱l nak xbe̱n cua raj e̱re la̱ex aj judío xkaye resil li ra̱tin li Dios. Abanan la̱ex xetzꞌekta̱na ut xecꞌoxla nak moco e̱cꞌulub ta li junelic yuꞌam. Joꞌcan nak anakcuan takaye resil reheb li ma̱cuaꞌeb aj judío.

⁴⁷ Tento takaye xban nak joꞌcan coxtakla cuiꞌ chak li Ka̱cuaꞌ Dios nak quixye: Xatinxakab re ta̱chꞌolob xya̱lal chiruheb li ma̱cuaꞌeb aj judío ut ta̱ye resil li colba-ib jun sut saꞌ ruchichꞌochꞌ.— (Isa. 49:6)

⁴⁸ Nak queꞌrabi li cꞌaꞌru quixye laj Pablo, li ma̱cuaꞌeb aj judío queꞌsahoꞌ saꞌ xchꞌo̱leb ut queꞌxqꞌue xcuanquil li ra̱tin li Dios. Queꞌpa̱ban li joꞌ qꞌuial li quixye li Dios nak ta̱cua̱nk xyuꞌameb chi junelic.

⁴⁹ Ut yo̱ rabinquil resil li ra̱tin li Dios saꞌ chixjunil li naꞌajej aꞌan.

⁵⁰ Eb laj judío queꞌxtacchiꞌi chak eb li ixk li nequeꞌxqꞌue xcuanquil lix pa̱ba̱leb, li nequeꞌqꞌueheꞌ xlokꞌal joꞌqueb ajcuiꞌ li cui̱nk li cuanqueb xcuanquil saꞌ li tenamit. Queꞌxyoꞌob jun ra xi̱cꞌ saꞌ xbe̱neb laj Pablo ut laj Bernabé. Ut queꞌrisiheb saꞌ lix tenamiteb.

⁵¹ Laj Pablo ut laj Bernabé queꞌxchikꞌchikꞌi li poks chi rokeb nak queꞌel saꞌ li tenamit re xcꞌutbal nak incꞌaꞌ us queꞌxba̱nu reheb. Ut chirix aꞌan queꞌco̱eb Iconio.

⁵² Ut eb laj pa̱banel cꞌajoꞌ xsahil saꞌ xchꞌo̱leb ut li Santil Musikꞌej cuan riqꞌuineb.