Hechos 12 - Li Santil hu

Quicamsi̱c laj Jacobo ut quiqꞌueheꞌ saꞌ tzꞌalam laj Pedro

¹ Saꞌ eb li cutan aꞌan laj Herodes quixtiquib xrahobtesinquileb laj pa̱banel.

² Quixtakla xcamsinquil riqꞌuin chꞌi̱chꞌ laj Jacobo li ras laj Juan.

³ Laj Herodes quixqꞌue retal nak eb laj judío queꞌsahoꞌ xchꞌo̱l riqꞌuin li cꞌaꞌru quixba̱nu. Joꞌcan nak quixtakla ajcuiꞌ xchapbal laj Pedro. Quixba̱nu aꞌin saꞌ li ninkꞌe nak nequeꞌxcuaꞌ li caxlan cua ma̱cꞌaꞌ xchꞌamal.

⁴ Nak ac xchapeꞌ laj Pedro, li rey Herodes quixtakla saꞌ tzꞌalam ut quixkꞌaxtesi saꞌ rukꞌeb ca̱hib chꞌu̱tal chi soldado re teꞌxcꞌacꞌale. Ca̱hib chi soldado cuan saꞌ li junju̱nk chꞌu̱tal. Laj Herodes cuan saꞌ xchꞌo̱l nak tixcꞌam chiruheb li tenamit nak ac xrakeꞌ li ninkꞌe re teꞌxrak a̱tin saꞌ xbe̱n.

⁵ Joꞌcan nak laj Pedro ilbil chi us xbaneb li soldado re nak incꞌaꞌ ta̱e̱lelik. Abanan eb laj pa̱banel cau yo̱queb chi tijoc chirix.

Nak qui-isi̱c laj Pedro saꞌ tzꞌalam xban li Dios

⁶ Ac cuulac re xkꞌehil nak ta̱cꞌamekꞌ laj Pedro xban laj Herodes chiruheb li tenamit. Saꞌ li kꞌojyi̱n aꞌan laj Pedro yo̱ chi cua̱rc saꞌ xyiheb li cuib chi soldado bacꞌbo riqꞌuin cadena. Ut cuanqueb ajcuiꞌ laj cꞌacꞌalenel chire li oqueba̱l re li tzꞌalam.

⁷ Ut xaka̱mil jun x-ángel li Dios bar cuan cuiꞌ laj Pedro ut quixcutanobresi saꞌ li tzꞌalam. Li ángel quixtꞌotzꞌotzꞌi laj Pedro ut quirajsi. Quixye re: —Cuaclin. Se̱ba a̱cuib, chan. Ut saꞌ junpa̱t quitꞌaneꞌ li cadena chi rukꞌ.

⁸ Ut li ángel quixye re: —Qꞌue la̱ cuakꞌ cha̱cuix ut qꞌue la̱ xa̱b cha̱cuok, chan re. Ut laj Pedro quixba̱nu joꞌ quiyeheꞌ re. Ut li ángel quixye cuiꞌchic re: —Tzꞌap a̱cuib saꞌ la̱ tꞌicr ut yoꞌo chicuix, chan.

⁹ Laj Pedro co̱ chirix li ángel. Abanan incꞌaꞌ naxnau nak tzꞌakal ya̱l li yo̱ chixba̱nunquil li ángel. Saꞌ xchꞌo̱l laj Pedro nak visión li yo̱ chirilbal.

¹⁰ Queꞌcuulac cuan cuiꞌ li jun chꞌu̱tal chi soldado ut queꞌnumeꞌ aran. Ut queꞌcuulac cuiꞌchic cuanqueb cuiꞌ li jun chꞌu̱tal chic. Ut queꞌnumeꞌ aran toj queꞌcuulac cuan cuiꞌ li puerta chꞌi̱chꞌ li na-ux cuiꞌ oc saꞌ li tenamit. Ut li puerta aꞌan quixte rib xjunes chiruheb. Queꞌel ut queꞌxkꞌax jun li nim be. Aran quicanaba̱c xjunes laj Pedro xban li ángel.

¹¹ Laj Pedro quixqꞌue retal li cꞌaꞌru quixcꞌul ut quixye saꞌ xchꞌo̱l: —Anakcuan ninnau chi tzꞌakal nak li Ka̱cuaꞌ, aꞌan li xtaklan chak re li ángel. Xinixcol saꞌ rukꞌ laj Herodes. Ut xinixcol ajcuiꞌ saꞌ rukꞌeb chixjunileb laj judío li teꞌraj xba̱nunquil raylal cue, chan.

¹² Nak quixtau ru li cꞌaꞌru quixcꞌul, laj Pedro co̱ saꞌ rochoch lix María lix naꞌ laj Juan li nayeman Marcos re. Aran chꞌutchꞌu̱queb nabaleb laj pa̱banel yo̱queb chi tijoc.

¹³ Quixtꞌochꞌtꞌochꞌi li puerta li cuan chiru neba̱l. Ut co̱ jun li xkaꞌal xRode xcꞌabaꞌ chirabinquil ani cuan aran.

¹⁴ Quixnau ru xya̱b xcux laj Pedro. Incꞌaꞌ quixte li puerta chiru. Xban xsahil xchꞌo̱l, co̱ saꞌ a̱nil chixyebal resil reheb li cuanqueb saꞌ cab nak laj Pedro cuan chire puerta.

¹⁵ Eb li cuanqueb saꞌ cab incꞌaꞌ queꞌxpa̱b li quixye. —Xlo̱coꞌ a̱cuu, chanqueb re. Abanan lix Rode quixye cuiꞌchic reheb nak ya̱l nak aꞌan laj Pedro. Queꞌchakꞌoc ut queꞌxye re: —Aꞌan yal xmuhel, chanqueb re.

¹⁶ Nak yo̱queb chi a̱tinac, laj Pedro toj yo̱ ajcuiꞌ chixtꞌochbal li puerta. Nak queꞌxte li puerta queꞌril laj Pedro. Sachso̱queb xchꞌo̱l queꞌcana.

¹⁷ Quixtaksi li rukꞌ re nak teꞌxcanab choki̱nc, ut quixserakꞌi reheb chanru nak qui-isi̱c saꞌ tzꞌalam xban li Ka̱cuaꞌ. Quixye reheb: —Yehomak resil aꞌin re laj Jacobo ut reheb chixjunileb laj pa̱banel, chan. Ut chirix aꞌan co̱ saꞌ jalan naꞌajej.

¹⁸ Nak quisake̱u queꞌxqꞌue retal nak ma̱ ani chic laj Pedro saꞌ tzꞌalam. Cꞌajoꞌ nak queꞌsach xchꞌo̱leb li soldado chirilbal li cꞌaꞌru quicꞌulman. Yo̱queb chixyebal chi ribileb rib: —¿Cꞌaꞌru xcꞌul laj Pedro? ¿Bar xco̱? chanqueb.

¹⁹ Ut laj Herodes quixtakla xsiqꞌuinquil. Nak incꞌaꞌ queꞌxtau quixqꞌue saꞌ xbe̱neb laj cꞌacꞌalenel ut quixtakla xcamsinquileb. Chirix aꞌan laj Herodes qui-el Judea ut co̱ chi cua̱nc aran Cesarea.

Lix camic laj Herodes

²⁰ Laj Herodes yo̱ xjoskꞌil saꞌ xbe̱neb laj Tiro ut laj Sidón. Eb aꞌan queꞌchal saꞌ comonil. Ut queꞌxkꞌunbesi laj Blasto li natenkꞌan re li rey. Queꞌxtzꞌa̱ma chiru nak aꞌan ta̱a̱tinak chirixeb chiru li rey re nak ta̱ru̱k teꞌxcꞌam rib saꞌ usilal riqꞌuin xban nak saꞌ xtenamit li rey na-el xtzacae̱mkeb.

²¹ Laj Herodes quixxakab jun li cutan re nak ta̱a̱tinak riqꞌuineb laj Tiro ut laj Sidón. Quixtikib rib riqꞌuin cha̱bil akꞌ cꞌajoꞌ xchakꞌal ru li nequeꞌrocsi li rey. Quicꞌojla saꞌ lix naꞌaj bar narakoc cuiꞌ a̱tin ut qui-oc chi a̱tinac riqꞌuineb li tenamit.

²² Ut eb li tenamit queꞌoc chixyebal chi cau xya̱b xcux: —Li yo̱ chi a̱tinac ma̱cuaꞌ cui̱nk. Aꞌan Dios, chanqueb.

²³ Ut saꞌ ajcuiꞌ li ho̱nal aꞌan, jun x-ángel li Ka̱cuaꞌ quixqꞌue jun yajel saꞌ xbe̱n laj Herodes xban nak quixqꞌue rib chixlokꞌoniheb li tenamit ut incꞌaꞌ quixqꞌue xlokꞌal li Dios. Quimotzoꞌin ut aꞌan quicamsin re.

²⁴ Saꞌ eb li cutan aꞌan li ra̱tin li Ka̱cuaꞌ yo̱ chi abi̱c yalak bar. Ut nabaleb yo̱queb chi pa̱ba̱nc re.

²⁵ Queꞌsukꞌi chak Jerusalén laj Bernabé ut laj Saulo nak ac queꞌxba̱nu lix cꞌanjeleb. Queꞌxcꞌam chirixeb laj Juan, li nequeꞌxye ajcuiꞌ Marcos re.