Hechos 10 - Li Santil hu

Laj Pedro ut laj Cornelio

¹ Quicuan jun li cui̱nk aran Cesarea aj Cornelio xcꞌabaꞌ. Aꞌan li nataklan saꞌ xbe̱neb jun chꞌu̱tal chi soldado aj Italia nequeꞌxye re.

² Li cui̱nk aꞌan quixxucua ru li Dios joꞌqueb ajcuiꞌ chixjunileb li cuanqueb saꞌ li rochoch. Cha̱bil xnaꞌleb ut junelic natijoc chiru li Dios ut junelic naxtenkꞌaheb li nebaꞌ.

³ Saꞌ jun li cutan saꞌ oxib o̱r tana re ecuu laj Cornelio quiril saꞌ visión nak qui-oc jun li ángel riqꞌuin ut quixye re: —At Cornelio, chan.

⁴ Laj Cornelio ta̱xucuak nak quiril li ángel ut quixye: —Cꞌaꞌru ta̱cuaj tinba̱nu, Ka̱cuaꞌ.— Li ángel quixye: —Li Dios xrabi la̱ tij. Nacuulac chiru li cꞌaꞌru nacaba̱nu re xtenkꞌanquileb li nebaꞌ.

⁵ Anakcuan tinye a̱cue takla cuib oxibakeb li cui̱nk aran Jope chixcꞌambal chak li cui̱nk aj Simón xcꞌabaꞌ. Aj Pedro nayeman ajcuiꞌ re.

⁶ Aꞌan ta̱yehok a̱cue cꞌaꞌru us ta̱ba̱nu. Aꞌan yo̱ chi hila̱nc saꞌ rochoch laj Simón laj yi̱bom tzꞌu̱m. Li rochoch cuan chire li palau, chan li ángel.

⁷ Nak ac x-el li ángel riqꞌuin, laj Cornelio quixbok cuib lix mo̱s cui̱nk ut quixbok ajcuiꞌ jun reheb lix soldado li naxxucua ru li Dios.

⁸ Quixserakꞌi reheb chixjunileb li quiyeheꞌ re xban li ángel ut quixtaklaheb Jope re nak teꞌxcꞌam chak laj Pedro.

⁹ Cuulajak chic ac cuulaqueb na re saꞌ li tenamit Jope nak laj Pedro quitakeꞌ saꞌ xcaꞌ tasal li cab chi tijoc. Caꞌchꞌin na chic ma̱ cuaꞌleb.

¹⁰ Quichal xtzꞌocajic ut quiraj raj ru cuaꞌac. Abanan toj yo̱queb chixyi̱banquil lix tzacae̱mk. Nak toj yo̱ chiroybeninquil lix tzacae̱mk, quiril jun li visión.

¹¹ Quiril nak teto li choxa ut chanchan jun nimla saki tꞌicr yo̱ chak chi cubec. Pixbil saꞌ xca̱ pacꞌalil lix xuc li tꞌicr ut yo̱ chak chi cubec saꞌ ruchichꞌochꞌ.

¹² Chi saꞌ li tꞌicr aꞌan cuanqueb chak nabal pa̱y ru li xul xcomoneb li nequeꞌcuan saꞌ ruchichꞌochꞌ. Cuanqueb cuan cuib rokeb ut cuib rukꞌ, cuanqueb xcomoneb li cꞌantiꞌ ut cuanqueb xcomoneb li xul li nequeꞌrupupic chiru choxa.

¹³ Ut quirabi jun xya̱b cux quixye re: —At Pedro, chap a̱cue li xul aꞌin. Ta̱camsi ut ta̱tiu, chan.

¹⁴ Laj Pedro quixye: —Incꞌaꞌ, Ka̱cuaꞌ. Ma̱ jun sut xintzaca cꞌaꞌak re ru li naxye saꞌ li chakꞌrab nak incꞌaꞌ us xtzacanquil, chan.

¹⁵ Ut quixye cuiꞌchic li yo̱ chi a̱tinac: —La̱at incꞌaꞌ naru nacacꞌoxla nak incꞌaꞌ us ta̱tzaca li cꞌaꞌru xye li Dios nak us ta̱tzaca, chan.

¹⁶ Oxib sut quiyeheꞌ re chi joꞌcan ut chirix aꞌan quixoqueꞌ li nimla tꞌicr aꞌan ut quicꞌameꞌ cuiꞌchic saꞌ choxa.

¹⁷ Laj Pedro toj yo̱ ajcuiꞌ chixcꞌoxlanquil cꞌaꞌru xya̱lal li quicꞌutbesi̱c chiru nak queꞌcuulac li cui̱nk li queꞌtakla̱c xban laj Cornelio. Cuanqueb chire li cab ut yo̱queb chixpatzꞌbal bar cuan li rochoch laj Simón.

¹⁸ Queꞌxpatzꞌ ma aran cuan chi hila̱nc laj Simón li nequeꞌxye aj Pedro re.

¹⁹ Laj Pedro toj yo̱ ajcuiꞌ chixcꞌoxlanquil cꞌaꞌru xya̱lal li visión li quiril nak li Santil Musikꞌej quixye re: —Oxib li cui̱nk xeꞌchal cha̱sicꞌbal.

²⁰ Ayu, cuben ut a̱tinaheb chak. Matcꞌoxlac chi xic chirixeb xban nak la̱in xintaklan chak reheb, chan.

²¹ Joꞌcan nak laj Pedro quicube ut quixye reheb li cui̱nk: —Cueꞌquin. La̱in laj Simón Pedro li niquine̱sicꞌ. ¿Cꞌaꞌru xcꞌamoc chak e̱re toj arin ut cꞌaꞌru te̱raj cuiqꞌuin? chan.

²² Eb aꞌan queꞌxye: —Laj Cornelio li capitán xtaklan chak ke. Aꞌan jun cui̱nk ti̱c xchꞌo̱l ut naxxucua ru li Dios. Chixjunileb laj judío nequeꞌxqꞌue saꞌ xnakꞌ ruheb. Jun x-ángel li Dios quixcꞌutbesi rib chiru ut quixye re nak tatxbok saꞌ rochoch re nak ta̱ru̱k ta̱rabi li cꞌaꞌru ta̱ye re, chanqueb re.

²³ Laj Pedro quirocsiheb ut queꞌxnumsi li kꞌojyi̱n saꞌ li cab aꞌan. Saꞌ li cutan jun chic laj Pedro co̱ chirixeb. Ut cuib oxib laj pa̱banel re Jope queꞌco̱eb chirix.

²⁴ Joꞌ cuulajak chic queꞌcuulac Cesarea ut laj Cornelio yo̱ chiroybeninquileb rochbeneb li rechꞌalal ut eb li tzꞌakal rami̱g li quixbok riqꞌuin.

²⁵ Nak laj Pedro quicuulac saꞌ li rochoch, laj Cornelio qui-el chixcꞌulbal. Quixcuikꞌib rib chiru re xlokꞌoninquil.

²⁶ Abanan laj Pedro quixye re: —Cuaclin. Mina̱lokꞌoni la̱in xban nak la̱in yal cui̱nkin joꞌ la̱at, chan.

²⁷ Yo̱ chi a̱tinac riqꞌuin laj Cornelio nak yo̱queb chi oc saꞌ li cab. Nak queꞌoc, queꞌxtau nabaleb ac chꞌutchꞌu̱queb saꞌ li cab.

²⁸ Laj Pedro quixye reheb: —La̱ex nequenau nak lix chakꞌrabeb laj judío naxye nak incꞌaꞌ naru takajunaji kib riqꞌuineb li ma̱cuaꞌeb aj judío chi moco ta̱ru̱k to-oc saꞌ rochocheb. Abanan xcꞌut chicuu li Ka̱cuaꞌ Dios nak ma̱ jun li cristian tintzꞌekta̱na chi moco tinye nak incꞌaꞌ us a̱tinac riqꞌuineb.

²⁹ Joꞌcan nak incꞌaꞌ xinkꞌetkꞌeti cuib chi cha̱lc nak xineꞌxbok chak. Ye cue cꞌaꞌut nak xatakla inbokbal, chan.

³⁰ Quichakꞌoc laj Cornelio ut quixye: —Ca̱hib cutan anakcuan joꞌcaꞌin ajcuiꞌ ho̱nal nak yo̱quin chi ayunic ut chi tijoc saꞌ li cuochoch. Oxib o̱r re ecuu quixcꞌutbesi rib chicuu jun li cui̱nk nalemtzꞌun li rakꞌ.

³¹ Quixye cue, “At Cornelio, li Dios quirabi la̱ tij. Nacuulac chiru li cꞌaꞌru nacaba̱nu re xtenkꞌanquileb li nebaꞌ.

³² Takla xcꞌambal laj Simón Pedro li cuan aran Jope. Yo̱ chi hila̱nc saꞌ li rochoch laj Simón laj yi̱bom tzꞌu̱m. Li rochoch aꞌan cuan chire li palau. Nak ta̱cꞌulu̱nk laj Pedro, tixchꞌolob cha̱cuu lix ya̱lal,” chan cue li ángel.

³³ Joꞌcan nak xintakla a̱cꞌambal saꞌ junpa̱t. Ut la̱at xaba̱nu usilal ke. Xatcꞌulun. Anakcuan ut chikajunilo cuanco arin chiru li Dios chirabinquil chixjunil li cꞌaꞌru ta̱ye ke li xye chak a̱cue li Dios, chan laj Cornelio re laj Pedro.

Laj Pedro quixye re laj Cornelio nak li Dios incꞌaꞌ naxsicꞌ ru li ani naxra

³⁴ Quixtiquib a̱tinac laj Pedro ut quixye: —Anakcuan xinqꞌue retal chi tzꞌakal nak li Dios incꞌaꞌ naxsicꞌ ru li ani naxra.

³⁵ Li ani naxxucua ru li Dios ut naxba̱nu li ti̱quilal aꞌ yal bar xtenamit, li jun aꞌan naraheꞌ xban li Dios.

³⁶ La̱ex nequenau nak li Dios quixtakla resil li colba-ib reheb laj Israel. Li colba-ib, aꞌan li naqꞌuehoc tuktu̱quil usilal saꞌ xcꞌabaꞌ li Jesucristo. Ut li Jesucristo, aꞌan li Ka̱cuaꞌ, ut nim xcuanquil saꞌ xbe̱n chixjunil.

³⁷ La̱ex nequenau cꞌaꞌru quicꞌulman saꞌ chixjunil li tenamit Judea. Quiticla aran Galilea nak ac xchꞌoloba̱c resil li cubi haꞌ xban laj Juan.

³⁸ Ac e̱rabiom resil li Jesucristo aj Nazaret. Li Dios quixqꞌue li Santil Musikꞌej re, ut quixqꞌue xcuanquil. Aꞌan quibe̱c yalak bar chixba̱nunquil li usilal ut chixqꞌuirtesinquileb li tacuasinbileb xban laj tza xban nak li Dios cuan riqꞌuin.

³⁹ La̱o quikil riqꞌuin ku chixjunil li cꞌaꞌru quixba̱nu li Jesús aran Judea ut Jerusalén. Abanan eb aꞌan queꞌxcamsi chiru cruz.

⁴⁰ Ut li Dios quixcuaclesi cuiꞌchic chi yoꞌyo saꞌ xya̱nkeb li camenak saꞌ rox li cutan. Ut mokon li Jesús quixcꞌutbesi rib chiku.

⁴¹ Incꞌaꞌ quixcꞌutbesi rib chiruheb chixjunileb. Caꞌaj cuiꞌ chiruheb li quisiqꞌueꞌ ruheb junxil xban li Dios. La̱o cocuaꞌac ut co-ucꞌac riqꞌuin nak ac xcuacli cuiꞌchic chi yoꞌyo saꞌ xya̱nkeb li camenak.

⁴² Ut coxtakla chixchꞌolobanquil xya̱lal ut chixjulticanquil chiruheb li tenamit nak aꞌan qꞌuebil xban li Dios chi rakoc a̱tin saꞌ xbe̱neb chixjunileb, li yoꞌyo̱queb joꞌ ajcuiꞌ li camenakeb.

⁴³ Aꞌan aꞌin li Jesús li queꞌxye chak resil chixjunileb li profeta junxil. Queꞌxye nak saꞌ xcꞌabaꞌ aꞌan ta̱cuyekꞌ xma̱queb chixjunileb li nequeꞌpa̱ban re.—

Li Santil Musikꞌej quiqꞌueheꞌ reheb li ma̱cuaꞌeb aj judío

⁴⁴ Toj yo̱ ajcuiꞌ chi a̱tinac laj Pedro nak queꞌxcꞌul li Santil Musikꞌej chixjunileb li yo̱queb chi abi̱nc re li ra̱tin li Dios li yo̱ chixyebal.

⁴⁵ Eb laj pa̱banel aj judío, li queꞌchal chirix laj Pedro, queꞌsach xchꞌo̱l chirilbal nak li Dios quixqꞌue li Santil Musikꞌej reheb li ma̱cuaꞌeb aj judío. Gentiles nayeman ajcuiꞌ reheb.

⁴⁶ Queꞌrabi nak yo̱queb chi a̱tinac saꞌ jalan a̱tinoba̱l ut yo̱queb chixnimanquil ru li Dios.

⁴⁷ Ut laj Pedro quixye: —¿Ma cuan ta biꞌ junak incꞌaꞌ ta̱ajok nak teꞌcube̱k xhaꞌeb aꞌin li xeꞌcꞌuluc re li Santil Musikꞌej, joꞌ nak xkacꞌul la̱o? chan.

⁴⁸ Ut quixtakla xcubsinquil xhaꞌeb saꞌ xcꞌabaꞌ li Ka̱cuaꞌ Jesucristo. Ut eb aꞌan queꞌxtzꞌa̱ma chiru laj Pedro nak ta̱cana̱k cuib oxibak cutan chic riqꞌuineb.