Hebreos 9 - Li Santil hu

Li tabernáculo aꞌan retalil li choxa

¹ Li xbe̱n contrato cuan xchakꞌrab naxye chanru nak nalokꞌoniman li Dios ut cuan jun li muheba̱l re lokꞌoni̱nc, tabernáculo xcꞌabaꞌ, yi̱banbil xbaneb li cui̱nk.

² Joꞌcaꞌin nak yi̱banbil li naꞌajej. Tasbil saꞌ xyi riqꞌuin jun nimla tꞌicr. Saꞌ li xbe̱n tasal cuan li candil cuukub xxamlel ut cuan ajcuiꞌ li me̱x bar naqꞌueman cuiꞌ li mayejanbil caxlan cua. Li xbe̱n tasal aꞌan Santil Naꞌajej xcꞌabaꞌ.

³ Li naꞌajej li cuan jun pacꞌal li tꞌicr, aꞌan Lokꞌlaj Santil Naꞌajej xcꞌabaꞌ.

⁴ Aran cuan jun xcꞌatbal li pom yi̱banbil riqꞌuin oro, ut cuan ajcuiꞌ jun li Lokꞌlaj Ca̱x letzbil oro chirix. Chi saꞌ li Lokꞌlaj Ca̱x aꞌan cuan li xar oro bar cuiꞌ cꞌu̱lanbil li maná. Cꞌu̱lanbil ajcuiꞌ saꞌ li ca̱x lix xukꞌ laj Aarón li quituxmec ut qui-atzꞌumac. Ut cꞌu̱lanbil ajcuiꞌ aran li cuib chi pec ti̱c ru li tzꞌi̱banbil cuiꞌ li laje̱b chi chakꞌrab.

⁵ Ut saꞌ xbe̱n li Lokꞌlaj Ca̱x cuan cuib li querubines yi̱banbileb riqꞌuin oro chanchaneb li ángel. Aꞌan retalil nak cuan li Dios aran. Lix xiqꞌueb naxcꞌul rib saꞌ xbe̱n lix tzꞌapbal re li ca̱x bar naqꞌueman cuiꞌ li mayej quicꞌ re xcuybal li ma̱c. Abanan anakcuan incꞌaꞌ takachꞌolob nabal chic chirix aꞌan.

⁶ Joꞌcaꞌin nak queꞌcꞌanjelac saꞌ li naꞌajej li queꞌxlokꞌoni cuiꞌ li Dios. Rajlal cutan queꞌoc laj tij saꞌ li xbe̱n tasal chixba̱nunquil lix cꞌanjel.

⁷ Aban saꞌ lix cab tasal caꞌaj cuiꞌ li xyucuaꞌil aj tij na-oc jun sut chiru li jun chihab. Ut nak na-oc saꞌ li Lokꞌlaj Santil Naꞌajej aꞌan, naxcꞌam xquiqꞌuel li xul ut naxmayeja re ta̱cuyekꞌ lix ma̱c aꞌan ut re ajcuiꞌ nak ta̱cuyekꞌ xma̱queb li tenamit.

⁸ Riqꞌuin li a̱tin aꞌin, chirix li lokꞌoni̱nc junxil saꞌ li tabernáculo, li Santil Musikꞌej naxcꞌut chiku nak moco yalak ani ta naru na-oc toj chi saꞌ li Lokꞌlaj Santil Naꞌajej riqꞌuin li Dios xban nak toj cuan xcꞌanjel li najter chakꞌrab chiruheb ut toj yo̱queb chi cꞌanjelac saꞌ li xbe̱n tasal. Joꞌcan nak li xbe̱n tasal aꞌan naramoc re li oqueba̱l chiruheb saꞌ li Lokꞌlaj Santil Naꞌajej.

⁹ Chixjunil aꞌin, aꞌan jun retalil chokꞌ ke anakcuan nak junxil quilajeꞌmayejac. Aban li cꞌatbil mayej ut li cꞌaꞌak chic re ru chi mayejil incꞌaꞌ quirisi lix ma̱queb.

¹⁰ Saꞌ lix pa̱ba̱leb junxil cuan li chakꞌrab chirix li cꞌaꞌru teꞌxtzaca ut cꞌaꞌru teꞌrucꞌ joꞌ ajcuiꞌ chanru nak teꞌchꞌajok re xsantobresinquileb rib. Usta incꞌaꞌ quijala lix naꞌlebeb, aban tento queꞌxba̱nu li chakꞌrab aꞌan toj quicuulac xkꞌehil nak li Dios quixjal nak quixqꞌue li acꞌ naꞌleb.

¹¹ Aban ac xcꞌulun li Jesucristo ut aꞌan chic li tzꞌakal xyucuaꞌil aj tij chokꞌ ke la̱o. Ut xkacꞌul li rusilal li Dios li quixqꞌue ke saꞌ li acꞌ contrato. Li Jesucristo incꞌaꞌ nacꞌanjelac saꞌ junak tabernáculo yi̱banbil xbaneb li cui̱nk arin saꞌ ruchichꞌochꞌ. Kꞌaxal lokꞌ cuiꞌchic li naꞌajej li nacꞌanjelac cuiꞌ.

¹² Li Ka̱cuaꞌ Jesucristo co̱ saꞌ li Lokꞌlaj Santil Naꞌajej saꞌ choxa. Aꞌan incꞌaꞌ quixmayeja xquiqꞌuel li chiba̱t chi moco ral cuacax. Quixmayeja ban lix lokꞌlaj quiqꞌuel. Jun sut ajcuiꞌ quixmayeja rib re xqꞌuebal li kacolbal chi junelic.

¹³ Saꞌ lix pa̱ba̱leb junxil cuan nak riqꞌuin li cꞌaꞌru nequeꞌxba̱nu laj tij, nequeꞌxmux ru lix cꞌanjel saꞌ li tabernáculo. Ut re xsachbal lix paltileb queꞌxmayeja li chiba̱t ut li toro. Lix quiqꞌuel ut lix chahil li cꞌatbil tukꞌ ixk cuacax narachrachi̱c saꞌ xbe̱neb laj tij.

¹⁴ Cui lix quiqꞌuel li xul naru naxsach lix paltileb, kꞌaxal nim cuiꞌchic xcuanquil lix quiqꞌuel li Jesucristo xban nak aꞌan narisi li kama̱c. Li Santil Musikꞌej quixtenkꞌa li Jesucristo nak quixmayeja rib chiru li Dios re xtojbal rix li kama̱c. Li Jesucristo tzꞌakal cha̱bil. Ma̱cꞌaꞌ xma̱c ut lix quiqꞌuel narisi li kama̱c li nacꞌamoc chak re li ca̱mc saꞌ kabe̱n. Naxsakobresi li kacꞌaꞌux re nak caꞌaj cuiꞌ chiru li yoꞌyo̱quil Dios tocꞌanjelak.

¹⁵ Anakcuan cuan li acꞌ contrato xban xcamic li Jesucristo. Chixjunileb li bokbileb xban li Dios ta̱cua̱nk xcuybal lix ma̱queb, eb li queꞌcuan rubel xcuanquil li xbe̱n contrato joꞌ ajcuiꞌ la̱o li cuanco rubel xcuanquil li acꞌ contrato. Ut ta̱cua̱nk kayuꞌam chi junelic joꞌ quixyechiꞌi li Dios. Li Jesucristo quicam chiru cruz re kacolbal. Riqꞌuin lix lokꞌlaj quiqꞌuel quixtoj rix li kama̱c.

¹⁶ La̱ex ac nequenau nak junak cui̱nk cuan cꞌaꞌru re naxye cꞌaꞌru ta̱re̱chani li ralal xcꞌajol junju̱nk. Ut aꞌan ta̱uxma̱nk nak acak xcam.

¹⁷ Li a̱tin aꞌin ma̱cꞌaꞌ xcꞌanjel nak toj yoꞌyo li xyehoc re. Toj chirix ban lix camic ta̱cꞌanjelak.

¹⁸ Joꞌcan nak li xbe̱n contrato quixakaba̱c chak xcuanquil riqꞌuin xquiqꞌueleb li xul nak queꞌmayeja̱c.

¹⁹ Nak laj Moisés quixye chixjunil li chakꞌrab reheb li tenamit, quixchap li cocꞌ rukꞌ li pim hisopo xcꞌabaꞌ ut caꞌchꞌin li caki lana. Quixtzꞌa saꞌ xquiqꞌuel li chiba̱t ut li ral cuacax yubil riqꞌuin haꞌ. Quixrachrachi li quicꞌ chiru li hu tzꞌi̱banbil cuiꞌ li chakꞌrab ut quixrachrachi ajcuiꞌ saꞌ xbe̱neb li tenamit.

²⁰ Tojoꞌnak quixye reheb: Riqꞌuin li quicꞌ aꞌin xakabanbil xcuanquil li contrato li quixqꞌue li Dios chokꞌ e̱re, chan. (Ex. 24:8)

²¹ Ut laj Moisés quixrachrachi li quicꞌ chiru li tabernáculo joꞌ ajcuiꞌ chiru chixjunil li cꞌaꞌak re ru nacꞌanjelac saꞌ li tabernáculo re xlokꞌoninquil li Dios.

²² Joꞌ tzꞌi̱banbil saꞌ li chakꞌrab, tento xsantobresinquil riqꞌuin quicꞌ chixjunil li quicꞌanjelac chiruheb. Ma̱cꞌaꞌ xcuybal li ma̱c cui incꞌaꞌ ta̱hoyekꞌ li quicꞌ.

Riqꞌuin lix camic li Jesucristo quixtoj rix li kama̱c

²³ Joꞌcan nak tento nak queꞌxrachrachi lix quiqꞌuel li xul chiru li tabernáculo joꞌ ajcuiꞌ chiruheb li cꞌaꞌ re ru cuan chi saꞌ re xsantobresinquileb. Li tabernáculo yal retalil li choxa. Ut li choxa santobresinbil riqꞌuin jun mayej kꞌaxal cuiꞌchic lokꞌ. Aꞌan lix lokꞌlaj quiqꞌuel li Ka̱cuaꞌ Jesucristo.

²⁴ Li Cristo incꞌaꞌ nacꞌanjelac saꞌ junak tabernáculo yi̱banbil xbaneb li cui̱nk. Nacꞌanjelac ban saꞌ choxa. Li tabernáculo quicuan, aꞌan yal retalil li choxa. Li Jesucristo co̱ saꞌ choxa ut anakcuan aran yo̱ chi jaloc a̱tin chikix chiru li Dios.

²⁵ Rajlal chihab na-oc lix yucuaꞌil aj tij saꞌ li Lokꞌlaj Santil Naꞌajej ut naxmayeja xquiqꞌuel li xul. Aban moco joꞌcan ta quixba̱nu li Jesucristo. Aꞌan jun sut ajcuiꞌ quixmayeja lix lokꞌlaj quiqꞌuel nak quicam.

²⁶ Cui ta quixmayeja rib nabal sut, nabal sut raj quicam chalen saꞌ xticlajic li ruchichꞌochꞌ. Aban incꞌaꞌ quixba̱nu chi joꞌcan. Li Jesucristo quicꞌulun re xrakbal li xbe̱n contrato ut jun sut ajcuiꞌ quixmayeja rib. Ut riqꞌuin aꞌan cuan xcuybal li ma̱c.

²⁷ Chixjunil li tenamit jun sut ajcuiꞌ teꞌca̱mk ut li Ka̱cuaꞌ Dios ta̱rakok a̱tin saꞌ xbe̱neb.

²⁸ Joꞌcan nak li Jesucristo jun sut ajcuiꞌ quixmayeja rib re risinquil lix ma̱queb li qꞌuila tenamit. Mokon tol-e̱lk cuiꞌchic, aban ma̱cuaꞌ chic re cuyuc ma̱c ta̱cha̱lk. Tol-e̱lk ban li Jesucristo re xtzꞌakobresinquil li kacolbal chikajunil li yo̱co chi yoꞌoni̱nc re.