Hebreos 8 - Li Santil hu

Li Jesucristo, aꞌan xyucuaꞌil aj tij chokꞌ ke la̱o

¹ Aꞌan aꞌin xya̱lal li yo̱co chixyebal e̱re: ya̱l nak cuan jun tzꞌakal xyucuaꞌil aj tij nacꞌanjelac chikix. Aꞌan li Jesucristo li cꞌojcꞌo chak saꞌ xnim ukꞌ li Dios saꞌ lix nimajcual xcuanquilal saꞌ choxa.

² Li Jesucristo nacꞌanjelac saꞌ li Santil Naꞌajej saꞌ choxa li yi̱banbil xban li Dios, ut ma̱cuaꞌ saꞌ li naꞌajej yi̱banbil xbaneb li cui̱nk.

³ Chixjunileb li xyucuaꞌil laj tij xakabanbileb chi mayejac xul ut cꞌaꞌak chic re ru chi mayejil. Joꞌcan ajcuiꞌ li Jesucristo tento tixqꞌue junak mayej.

⁴ Cui toj cuan ta arin saꞌ ruchichꞌochꞌ incꞌaꞌ ajcuiꞌ ta̱cꞌanjelak joꞌ junak reheb laj tij xban nak eb laj tij nequeꞌmayejac joꞌ naxye lix chakꞌrab laj Moisés.

⁵ Li cꞌaꞌru nequeꞌxba̱nu eb laj tij yal jun retalil li na-uxman saꞌ li choxa. Nakanau nak yal retalil xban li cꞌaꞌru quiyeheꞌ re laj Moisés nak oc re chixyi̱banquil li tabernáculo. Li Dios quixye re: Chaqꞌue retal ut chaba̱nu chixjunil joꞌ li retalil quincꞌut cha̱cuu saꞌ xbe̱n li tzu̱l Sinaí. (Ex. 25:40)

⁶ Aꞌut lix cꞌanjel li Jesucristo numtajenak xcuanquil chiru li queꞌxba̱nu chak eb laj tij junxil. Saꞌ li acꞌ contrato li Jesucristo chic naa̱tinac chikix chiru li Dios. Kꞌaxal cha̱bil li acꞌ contrato xban nak riqꞌuin aꞌan kꞌaxal lokꞌ cuiꞌchic li yechiꞌinbil ke xban li Dios.

⁷ Cui ta tzꞌakal re ru li contrato quixba̱nu chak junxil incꞌaꞌ raj chic quixqꞌue junak acꞌ contrato.

⁸ Aban li Dios quiril nak incꞌaꞌ us yo̱queb chixba̱nunquil li tenamit li cuanqueb rubel xcuanquil li xbe̱n contrato. Joꞌcan nak quixye reheb li tzꞌi̱banbil saꞌ li Santil Hu: Ta̱cuulak xkꞌehil nak tinba̱nu junak chic li acꞌ contrato riqꞌuineb li tenamit Israel ut Judá.

⁹ Li contrato aꞌin ma̱cuaꞌ joꞌ li quinba̱nu chak reheb lix xeꞌto̱nil yucuaꞌeb nak quicuisiheb chak saꞌ li tenamit Egipto. Incꞌaꞌ queꞌxba̱nu li naxye li contrato. Xban aꞌan quebintzꞌekta̱na.

¹⁰ Aꞌin li contrato tinba̱nu riqꞌuineb reheb laj Israel. Ta̱cuulak xkꞌehil nak tinqꞌue lin chakꞌrab saꞌ lix cꞌaꞌuxeb ut tinqꞌue ajcuiꞌ saꞌ li ra̱meb. La̱inak lix Dios ut aꞌanakeb lin tenamit.

¹¹ Incꞌaꞌ chic teꞌxchꞌolob xya̱lal chicuix chiruheb li ras ri̱tzꞌin xban nak chi cocꞌ chi ni̱nk teꞌxnau chic anihin.

¹² Tincuy lix ma̱queb ut ma̱ jun cua chic tincꞌoxla lix ma̱usilaleb, chan li Dios. (Jer. 31:31-34)

¹³ Nak li Dios quixye nak tixba̱nu jun chic li acꞌ contrato aꞌan naraj naxye nak li najter contrato yo̱ chi sachc xcuanquil ut ma̱cꞌaꞌ chic xcꞌanjel ta̱cana̱k.