Hebreos 12 - Li Santil hu

Chikacꞌoxla li Jesucristo

¹ Numtajenak xqꞌuialeb laj pa̱banel li queꞌcuan chak najter. Kaqꞌuehak retal chanru lix pa̱ba̱leb. Chanru nak queꞌpa̱ban chak aꞌan, joꞌcan ajcuiꞌ takaba̱nu la̱o. Cui junak naraj a̱linac, narisi chixjunil li naa̱lobresin re ut naxyal xkꞌe chi a̱linac. Joꞌcan ajcuiꞌ takaba̱nu la̱o. Takacanab chixjunil li cꞌaꞌak re ru nachꞌiꞌchꞌiꞌin ke saꞌ li kapa̱ba̱l ut takacanab ajcuiꞌ li ma̱c li nachapoc ke. Chikacuyak taxak li cꞌaꞌak re ru tento xcuybal re nak takaba̱nu joꞌ naraj li Dios.

² Kaqꞌuehak kachꞌo̱l chixta̱kenquil li Jesucristo laj cꞌamol be chiku. Aꞌan naqꞌuehoc re li kapa̱ba̱l ut naxtzꞌakobresi ru. Usta xuta̱nal li ca̱mc quixcꞌul chiru li cruz, abanan incꞌaꞌ quixqꞌue saꞌ xchꞌo̱l. Ut quixcuy li raylal saꞌ kacꞌabaꞌ la̱o xban nak lix sahilal xchꞌo̱l quiqꞌueheꞌ re mokon. Ut anakcuan cuan saꞌ choxa saꞌ xnim ukꞌ li Dios.

Li Dios nocoxtij xban nak la̱o li ralal xcꞌajol

³ Cheqꞌuehak retal chanru nak quixcuy li rahobtesi̱c li Jesucristo xbaneb laj ma̱c. Joꞌcan ajcuiꞌ la̱ex. Checuyak li ra xi̱cꞌ ut incꞌaꞌ chichꞌina̱nk e̱chꞌo̱l saꞌ le̱ pa̱ba̱l.

⁴ La̱ex toj ma̱jiꞌ nequexcamsi̱c xban nak nequeqꞌue e̱chꞌo̱l chixcolbal e̱rib chiru li ma̱c.

⁵ ¿Ma ac xsach saꞌ e̱chꞌo̱l li cꞌaꞌru quixye li Dios re xchꞌolobanquil le̱ naꞌleb? Li Dios naa̱tinac e̱riqꞌuin joꞌ naa̱tinac junak yucuaꞌbej riqꞌuin lix cocꞌal. Joꞌcaꞌin tzꞌi̱banbil saꞌ li Santil Hu: Ex cualal incꞌajol, me̱tzꞌekta̱na le̱ tijbal li ninye e̱re, chi moco chichꞌina̱nk e̱chꞌo̱l nak nequexinkꞌus.

⁶ La̱in nintij li ani ninra ut ninkꞌus chi cau li ani nincꞌul chokꞌ cualal incꞌajol. (Prov. 3:11-12)

⁷ Tento nak te̱cuy li tijecꞌ re nak te̱tau e̱naꞌleb. Joꞌcan nak nequextij li Dios xban nak la̱ex li ralal xcꞌajol. ¿Ma cuan ta biꞌ junak alalbej incꞌaꞌ natijeꞌ xban lix yucuaꞌ?

⁸ Cui li Dios incꞌaꞌ nequextij joꞌ nak naxtijeb chixjunileb li ralal xcꞌajol, aꞌan naraj naxye nak la̱ex ma̱cuaꞌex tzꞌakal ralal xcꞌajol. Ut li Dios ma̱cuaꞌ ajcuiꞌ tzꞌakal e̱yucuaꞌ.

⁹ Saꞌ kacaꞌchꞌinal, li kanaꞌ kayucuaꞌ nocoeꞌxkꞌus ut naka-oxlokꞌiheb. ¿Ma tojaꞌ ta chic li kachoxahil yucuaꞌ incꞌaꞌ takapa̱b nak toxkꞌus? Cui nakapa̱b li kakꞌusbal naxqꞌue li Dios, cua̱nk kayuꞌam chi junelic.

¹⁰ Saꞌ kacaꞌchꞌinal li kanaꞌ kayucuaꞌ nocoeꞌxkꞌus joꞌ nequeꞌcuulac chiruheb aꞌan. Aban li Ka̱cuaꞌ Dios nocoxkꞌus chi tzꞌakal. Nocoxkꞌus re nak ta̱ti̱cokꞌ kachꞌo̱l ut toxsantobresi xban nak aꞌan santo.

¹¹ Relic chi ya̱l nak nakacꞌul li kakꞌusbal moco sa ta nakecꞌa. Ra ban nakecꞌa nak nocokꞌuseꞌ. Abanan cui nakacuy kꞌusecꞌ mokon nakatau xya̱lal nak riqꞌuin li kꞌusecꞌ nacha̱biloꞌ li kayuꞌam ut ta̱tukla̱k ajcuiꞌ li kachꞌo̱l.

Kꞌaxal xucuajel xtzꞌekta̱nanquil li ra̱tin li Dios

¹² Checacuubresihak le̱ rok e̱rukꞌ li ma̱cꞌaꞌ xmetzꞌe̱u. Lix ya̱lal li jaljo̱quil ru a̱tin aꞌan aꞌin: Checacuubresi le̱ chꞌo̱l re nak incꞌaꞌ ta̱chꞌina̱nk e̱chꞌo̱l saꞌ le̱ pa̱ba̱l.

¹³ Ti̱cobresihomak ru le̱ be re nak li ye̱k incꞌaꞌ chic tixbachꞌ li rok; ta̱cacuu̱k ban. Naraj naxye: ti̱cak taxak le̱ yuꞌam re nak li toj acꞌ saꞌ lix pa̱ba̱l incꞌaꞌ ta̱chꞌina̱nk xchꞌo̱l. Teꞌcacuu̱k ban xchꞌo̱leb saꞌ lix pa̱ba̱leb.

¹⁴ Chexcua̱nk saꞌ tuktu̱quil usilal riqꞌuineb le̱ ras e̱ri̱tzꞌin. Chexcua̱nk saꞌ ti̱quilal ut saꞌ santilal, xban nak cui ma̱cꞌaꞌ e̱santilal ma̱ jokꞌe te̱ril ru li Dios.

¹⁵ Chetenkꞌa e̱rib che̱ribil e̱rib saꞌ le̱ pa̱ba̱l re nak ma̱ jun e̱re ta̱tzꞌekta̱na̱nk li rusilal li Dios. Cheba̱nu cue̱nt re nak incꞌaꞌ te̱yoꞌob li cꞌahi̱nc ib saꞌ e̱ya̱nk. Cui joꞌcan te̱ba̱nu naru naniman ru li chꞌaꞌajquilal ut ma̱re nabaleb teꞌxic cuiꞌchic saꞌ li ma̱c xban aꞌan.

¹⁶ Ma̱ ani taxak junak saꞌ e̱ya̱nk yal tixlakꞌab rib chi incꞌaꞌ sumsu. Chi moco cheba̱nu joꞌ quixba̱nu laj Esaú nak quixtzꞌekta̱na lix lokꞌlaj ma̱tan. Laj Esaú quixcꞌul raj lix ma̱tan xban nak aꞌan li xbe̱n alalbej. Abanan quixtzꞌekta̱na lix ma̱tan xban nak quixcꞌayi yal riqꞌuin jun cuaꞌal chi cua.

¹⁷ La̱ex nequenau nak mokon quixrahi raj cuiꞌchic xcꞌulbal li rosobtesinquil laj Esaú riqꞌuin lix yucuaꞌ. Abanan incꞌaꞌ chic quiru xban nak ac quixtzꞌekta̱na. Ta̱ya̱bak nak quixtzꞌa̱ma cuiꞌchic, aban incꞌaꞌ chic quiru. Ma̱cꞌaꞌ chic xjalenquil.

¹⁸ La̱ex incꞌaꞌ queba̱nu joꞌ queꞌxba̱nu eb laj Israel najter kꞌe cutan. Eb aꞌan queꞌjiloc riqꞌuin li tzu̱l Sinaí nak li Dios quixqꞌue lix chakꞌrab re laj Moisés saꞌ li tzu̱l aꞌan. Quicuan xam. Quikꞌojyi̱noꞌ ut quicuan ajcuiꞌ ca̱k-sut-ikꞌ.

¹⁹ Eb aꞌan queꞌrabi xya̱b li trompeta ut queꞌrabi ajcuiꞌ xya̱b xcux li Dios nak quia̱tinac riqꞌuineb. Ut queꞌxtzꞌa̱ma nak meꞌa̱tina̱c chic xban li Dios.

²⁰ Queꞌxye chi joꞌcan xban nak incꞌaꞌ queꞌxcuy rabinquil li chakꞌrab li naxye nak ta̱camsi̱k chi pec li ani ta̱xic aran saꞌ li tzu̱l, usta xul. (Ex. 19:12)

²¹ Xban nak kꞌaxal xucuajel rilbal li yo̱ chi uxc saꞌ xbe̱n li tzu̱l, laj Moisés quixye: Cꞌajoꞌ nak ninxucuac ut ninsicsot xban inxiu, chan. (Deut. 9:19)

²² Abanan la̱ex incꞌaꞌ xeba̱nu joꞌ queꞌxba̱nu eb laj Israel. Nak la̱ex nequepa̱b li Cristo, chanchan nak ac xexjiloc riqꞌuin li tzu̱l Sión. Sión naraj naxye li santil choxa cuan cuiꞌ li yoꞌyo̱quil Dios. Acꞌ Jerusalén nayeman ajcuiꞌ re li naꞌajej aꞌan. Aran cuanqueb li qꞌuila okꞌob chi ángel. Yo̱queb chixlokꞌoninquil li Dios.

²³ Junaj chic e̱ru la̱ex aj pa̱banel. Ut tzꞌi̱banbil le̱ cꞌabaꞌ saꞌ choxa. Textzꞌako̱nk saꞌ choxa e̱rochbeneb li ti̱queb xchꞌo̱l li ac tzꞌakobresinbil ruheb xban li Dios. Cuanquex chi sum a̱tin riqꞌuin li Dios li ta̱rakok a̱tin saꞌ xbe̱neb chixjunileb li cuanqueb saꞌ ruchichꞌochꞌ.

²⁴ Ut cuanquex chi sum a̱tin riqꞌuin li Ka̱cuaꞌ Jesucristo, li quixakaban xcuanquil li acꞌ contrato. Kꞌaxal nim xcuanquil lix quiqꞌuel li Jesucristo. Riqꞌuin aꞌan cuan xcuybal le̱ ma̱c. Ma̱cuaꞌ joꞌ li quicꞌ li quixmayeja laj Abel najter kꞌe cutan.

²⁵ Me̱tzꞌekta̱na li ra̱tin li Dios joꞌ queꞌxba̱nu eb laj Israel. Eb aꞌan incꞌaꞌ queꞌxcuy rabinquil xchakꞌrab li Dios ut queꞌxtzꞌekta̱na li ra̱tin nak quichꞌoloba̱c chak xya̱lal chiruheb aran saꞌ li tzu̱l. Ut quirakeꞌ a̱tin saꞌ xbe̱neb. Cui incꞌaꞌ queꞌcoleꞌ eb aꞌan, ¿ma tojaꞌ ta chic la̱o tocolekꞌ cui takatzꞌekta̱na li Dios li naa̱tinac chak toj saꞌ choxa?

²⁶ Najter nak li Dios quia̱tinac saꞌ li tzu̱l Sinaí, lix ya̱b xcux quirecꞌasi li naꞌajej aꞌan. Ut li Dios quixye: Saꞌ jun sut chic ma̱cuaꞌ caꞌaj cuiꞌ li ruchichꞌochꞌ tincuecꞌasi. Tincuecꞌasi ajcuiꞌ li choxa. (Ex. 19:18)

²⁷ Nak naxye “jun sut chic” naraj naxye nak tixsach li ruchichꞌochꞌ, li choxa, ut chixjunil li cꞌaꞌak re ru yi̱banbil. Aꞌut li incꞌaꞌ yi̱banbil, joꞌ li musikꞌanbil xban li Dios, aꞌan ta̱cana̱k chi junelic.

²⁸ Chikabantioxi chiru nak tocua̱nk riqꞌuin li Dios chi junelic saꞌ lix nimajcual cuanquilal. Aꞌan ma̱ jaruj ta̱osokꞌ. Cua̱nk ban chi junelic. Takalokꞌoni li Dios chi anchal kachꞌo̱l xban nak caꞌaj cuiꞌ aꞌan xcꞌulub lokꞌoni̱c. Kaqꞌuehak kachꞌo̱l chixba̱nunquil li cꞌaꞌru naraj aꞌan ut takaxucua ru.

²⁹ Li kaDios chanchan jun li xam xban nak tixsach chixjunil li incꞌaꞌ us.