Hebreos 11 - Li Santil hu

Li pa̱ba̱l

¹ ¿Cꞌaꞌru li pa̱ba̱l? Li pa̱ba̱l aꞌan xnaubal nak relic chi ya̱l takacꞌul li yo̱co chiroybeninquil. Usta incꞌaꞌ nakil ru aban nakanau nak takacꞌul.

² Li Dios quisahoꞌ xchꞌo̱l riqꞌuineb li kaxeꞌto̱nil yucuaꞌ xban nak queꞌpa̱ban.

³ Xban nak nakapa̱b li ra̱tin li Dios, nakanau nak li Dios quixyi̱b li choxa joꞌ ajcuiꞌ li ruchichꞌochꞌ. Ma̱cuaꞌ riqꞌuin cꞌaꞌak re ru quixyi̱b li ruchichꞌochꞌ. Yal riqꞌuin li ra̱tin quixyi̱b.

⁴ Xban lix pa̱ba̱l laj Abel, quixqꞌue jun xmayej cha̱bil chiru li quixqꞌue laj Caín. Xban lix pa̱ba̱l, li Dios quixye nak ti̱c xchꞌo̱l ut quixcꞌul lix mayej. Usta camenak chic laj Abel, aban toj cuan retalil chokꞌ ke la̱o chanru nak quipa̱ban chiru li Dios.

⁵ Xban lix pa̱ba̱l laj Enoc incꞌaꞌ quicam. Quicꞌameꞌ ban saꞌ choxa xban li Dios. Incꞌaꞌ chic queꞌxtau xban nak ac xcꞌameꞌ. Nakanau nak li Dios quisahoꞌ saꞌ xchꞌo̱l riqꞌuin nak toj ma̱jiꞌ nacꞌameꞌ saꞌ choxa xban nak joꞌcan tzꞌi̱banbil saꞌ li Santil Hu.

⁶ Ma̱ jokꞌe ta̱sahokꞌ xchꞌo̱l li Dios riqꞌuin li ani incꞌaꞌ napa̱ban. Ma̱ ani naru nachal riqꞌuin li Dios cui incꞌaꞌ naxpa̱b nak cuan li Dios ut nak aꞌan naxqꞌue xkꞌajca̱munquil li ani nasicꞌoc re.

⁷ Xban lix pa̱ba̱l laj Noé, li Dios quixye re cꞌaꞌru talajcꞌulma̱nk. Ut laj Noé quixpa̱b li quixye li Dios usta toj ma̱jiꞌ nacꞌulman. Quixyi̱b li nimla jucub cab re xcolbal rib aꞌan, joꞌ eb ajcuiꞌ li ralal xcꞌajol. Ut lix pa̱ba̱l laj Noé quixcꞌutbesi nak li cuanqueb saꞌ ruchichꞌochꞌ incꞌaꞌ queꞌpa̱ban. Joꞌcan nak queꞌcam. Xban nak quipa̱ban, li Dios quixye nak ti̱c xchꞌo̱l laj Noé.

⁸ Xban lix pa̱ba̱l, laj Abraham qui-abin chiru li Dios nak quixye re nak ta̱e̱lk saꞌ li tenamit cuan cuiꞌ. Co̱ saꞌ li naꞌajej li quiyechiꞌi̱c re xban li Dios. Nak qui-el chak saꞌ li tenamit, co̱ chi incꞌaꞌ naxnau bar xic re.

⁹ Xban lix pa̱ba̱l laj Abraham quicuan saꞌ li naꞌajej li quiyechiꞌi̱c re xban li Dios, ut quicuan aran joꞌ jun jalan xtenamit. Quixyi̱b xmuheba̱l tꞌicr xban nak yal numecꞌ re. Joꞌcan ajcuiꞌ queꞌxba̱nu laj Isaac ut laj Jacob xban nak aꞌaneb li teꞌe̱chani̱nk re li cꞌaꞌru quixyechiꞌi li Dios.

¹⁰ Laj Abraham incꞌaꞌ quixyi̱b cha̱bil ochoch, xban nak yo̱ chiroybeninquil jun xnaꞌaj saꞌ li santil choxa. Li naꞌajej aꞌan yi̱banbil xban li Ka̱cuaꞌ Dios ut ta̱cua̱nk chi junelic.

¹¹ Xban lix pa̱ba̱leb, laj Abraham ut lix Sara quicuan jun lix cꞌulaꞌal saꞌ xti̱xilaleb, usta lix Sara aꞌan jun ixk incꞌaꞌ naqꞌuiresin. Aban queꞌxnau nak teꞌxcꞌul li cꞌaꞌru quiyechiꞌi̱c reheb xban li Dios.

¹² Usta ac ti̱x chic laj Abraham nak quiyoꞌla li ralal, abanan queꞌtam li ralal xcꞌajol. Lix qꞌuialeb li ralal xcꞌajol joꞌ xqꞌuial li chahim chiru li choxa ut joꞌ xqꞌuial li samaib li cuan chire li palau. Ut incꞌaꞌ naru rajlanquileb xban lix qꞌuialeb.

¹³ Chixjunileb aꞌan quilajeꞌcam. Usta incꞌaꞌ queꞌxcꞌul chixjunil li cꞌaꞌru quiyechiꞌi̱c reheb xban li Dios, queꞌxpa̱b nak ta̱cꞌulma̱nk li yechiꞌinbil. Joꞌcan nak saheb saꞌ xchꞌo̱l. Queꞌxye nak li ruchichꞌochꞌ aꞌin ma̱cuaꞌ tzꞌakal xnaꞌajeb; yal numeleb ban saꞌ ruchichꞌochꞌ.

¹⁴ Queꞌxye chi joꞌcaꞌin xban nak toj yo̱queb chiroybeninquil jun lix naꞌajeb.

¹⁵ Li naꞌajej aꞌan ma̱cuaꞌ li naꞌajej queꞌel cuiꞌ chak. Cui ta aꞌan, quiru raj queꞌsukꞌi cuiꞌchic aran.

¹⁶ Aban queꞌroybeni jun naꞌajej kꞌaxal cha̱bil, aꞌ li santil choxa. Joꞌcan nak li Dios incꞌaꞌ naxuta̱nac chixyebal nak aꞌan lix Dioseb xban nak quixcꞌu̱b jun li naꞌajej chokꞌ reheb.

¹⁷ Laj Abraham quiyaleꞌ lix pa̱ba̱l xban li Dios nak quixye re nak tixmayeja li ralal. Jun ajcuiꞌ li ralal cuan, aban xban nak naxpa̱b li Dios, laj Abraham quixqꞌue laj Isaac chokꞌ xmayej.

¹⁸ Quixqꞌue li ralal chokꞌ xmayej, usta aꞌan li quiyechiꞌi̱c re xban li Dios re nak teꞌta̱mk li ralal xcꞌajol.

¹⁹ Cui ta quicam laj Isaac, laj Abraham ac naxnau nak nim xcuanquil li Dios re xcuaclesinquil cuiꞌchic chi yoꞌyo saꞌ xya̱nkeb li camenak. Naru xyebal nak chanchan aꞌan quixba̱nu li Dios xban nak laj Abraham quixkꞌaxtesi li ralal re ca̱mc. Aban quikꞌaxtesi̱c cuiꞌchic re chi yoꞌyo xban li Dios.

²⁰ Laj Isaac quixpa̱b nak li Dios tixqꞌue li quixyechiꞌi re. Joꞌcan nak quixye reheb laj Jacob ut laj Esaú nak li Dios ta̱osobtesi̱nk reheb nak ta̱cuulak xkꞌehil.

²¹ Laj Jacob quixpa̱b nak tixcꞌul li quiyechiꞌi̱c re xban li Dios. Joꞌcan nak ac ca̱mc re, laj Jacob quirosobtesiheb li ralal laj José. Ut chirix aꞌan, laj Jacob quixxulub rib saꞌ xbe̱n lix xukꞌ ut quixlokꞌoni li Dios.

²² Xban lix pa̱ba̱l laj José, nak ac ca̱mc re, quixjultica reheb laj Israel nak saꞌ jun cutan teꞌe̱lk saꞌ li tenamit Egipto. Ut quixye ajcuiꞌ reheb nak teꞌxcꞌam lix bakel nak teꞌe̱lk saꞌ li tenamit aꞌan.

²³ Xban lix pa̱ba̱leb lix naꞌ xyucuaꞌ laj Moisés, nak quiyoꞌla laj Moisés, oxib po queꞌxmuk chiru li rey. Queꞌril nak cꞌajoꞌ xchakꞌal ru li cꞌulaꞌal ut incꞌaꞌ queꞌxucuac chi xkꞌetbal lix chakꞌrab li rey nak quixye nak teꞌcamsi̱k li cꞌulaꞌal li cocꞌ te̱lom.

²⁴ Xban lix pa̱ba̱l laj Moisés, nak quicui̱nkiloꞌ incꞌaꞌ quiraj nak teꞌxye nak lix rabin li rey, aꞌan lix naꞌ.

²⁵ Incꞌaꞌ quiraj tzꞌako̱nc saꞌ li sahil chꞌo̱lej cuanqueb cuiꞌ laj Egipto. Quixnau nak li sahil chꞌo̱lej aꞌan yal nanumeꞌ. Quiraj ban xcꞌulbal li raylal li yo̱queb chixcꞌulbal laj Israel lix tenamit li Dios.

²⁶ Naxnau nak kꞌaxal lokꞌ nak tixcꞌul li raylal saꞌ xcꞌabaꞌ li Cristo chiru xcꞌulbal lix biomal li tenamit Egipto. Ut yo̱ chiroybeninquil lix kꞌajca̱munquil li ta̱qꞌuehekꞌ re xban li Dios.

²⁷ Xban xpa̱ba̱l laj Moisés qui-el chak saꞌ li tenamit Egipto ut incꞌaꞌ quixucuac chiru li rey usta yo̱ xjoskꞌil saꞌ xbe̱n. Quixcacuubresi xchꞌo̱l xban nak naxnau nak li Dios cuan riqꞌuin. Chanchan li yo̱ chirilbal ru, aban li Dios ma̱ ani na-iloc ru.

²⁸ Xban lix pa̱ba̱l, laj Moisés quixba̱nu li pascua joꞌ quiyeheꞌ re xban li Dios. Nak e̱lqueb re Egipto quixtakla xqꞌuebal xquiqꞌuel li carner chiruheb li puerta. Ut nak quinumeꞌ li ángel chi camsi̱nc, ma̱ jun li xbe̱n ralaleb laj Israel quixcamsi.

²⁹ Xban lix pa̱ba̱leb laj Israel, queꞌnumeꞌ saꞌ xyi li Caki Palau. Chaki chꞌochꞌ li queꞌnumeꞌ cuiꞌ. Ut joꞌcan ajcuiꞌ queꞌraj xba̱nunquil eb laj Egipto. Aban incꞌaꞌ queꞌru xban nak li haꞌ quixjunaji rib saꞌ xbe̱neb ut aran queꞌosoꞌ chixjunileb.

³⁰ Xban lix pa̱ba̱leb laj Israel, cuukub cutan queꞌxsuti rix li tenamit Jericó. Ut saꞌ xcuuk li cutan quitꞌaneꞌ li tzꞌac li sutsu cuiꞌ li tenamit. Ut queꞌre̱chani li tenamit.

³¹ Lix Rahab aꞌan jun ixk naxcꞌayi rib nak quicuan. Xban nak quipa̱ban, quixtenkꞌaheb laj Israel li queꞌchal chixqꞌuebal retal li tenamit. Xban lix pa̱ba̱l, lix Rahab incꞌaꞌ quicam saꞌ xya̱nkeb li incꞌaꞌ queꞌpa̱ban re li Dios.

³² Toj cuan raj nabal tinserakꞌi e̱re, aban incꞌaꞌ ta̱tzꞌaklok li cutan re tinserakꞌik chirix lix pa̱ba̱leb laj Gedeón, laj Barac, laj Sansón, ut laj Jefté; ut tinye ajcuiꞌ raj e̱re chanru lix pa̱ba̱leb laj David, laj Samuel, ut eb li profeta. Aban incꞌaꞌ ta̱tzꞌaklok li cutan.

³³ Nak queꞌpletic riqꞌuin li jalanil tenamit, xban nak cuanqueb xpa̱ba̱l, queꞌre̱chani. Saꞌ xya̱lal queꞌtaklan ut xban lix pa̱ba̱leb queꞌxcꞌul li quiyechiꞌi̱c reheb xban li Dios. Cuan li queꞌqꞌueheꞌ saꞌ xya̱nkeb li cakcoj re teꞌtiꞌekꞌ, aban ma̱cꞌaꞌ queꞌux re xbaneb li cakcoj.

³⁴ Xban lix pa̱ba̱leb incꞌaꞌ queꞌcꞌat nak queꞌcuteꞌ saꞌ xam. Cuan queꞌcamsi̱c raj chi chꞌi̱chꞌ, aban incꞌaꞌ queꞌyoqꞌueꞌ. Riqꞌuin lix pa̱ba̱leb, queꞌqꞌueheꞌ xcacuilal li ma̱cꞌaꞌeb xmetzꞌe̱u. Nak queꞌpletic riqꞌuineb li jalanil tenamit, queꞌnumta xcuanquil saꞌ xbe̱neb xban li Dios toj retal queꞌre̱chani li tenamit.

³⁵ Cuanqueb ixk, xban lix pa̱ba̱leb, queꞌcuacli cuiꞌchic lix camenakeb chi yoꞌyo. Ut cuanqueb ajcuiꞌ queꞌrahobtesi̱c toj retal nak queꞌcam xban lix pa̱ba̱leb. Incꞌaꞌ queꞌraj nak teꞌachꞌaba̱k xbaneb li xicꞌ nequeꞌiloc reheb xban nak incꞌaꞌ queꞌraj xtzꞌekta̱nanquil li Dios. Ac nequeꞌxnau nak teꞌxcꞌul jun yuꞌam kꞌaxal cha̱bil saꞌ choxa nak teꞌcuacli̱k cuiꞌchic chi yoꞌyo.

³⁶ Cuan queꞌhobeꞌ, cuan queꞌsaqꞌueꞌ, ut cuan queꞌbaqꞌueꞌ ut queꞌqꞌueheꞌ saꞌ tzꞌalam.

³⁷ Cuan queꞌcamsi̱c chi pec ut cuan queꞌseteꞌ riqꞌuin jachleb cheꞌ. Queꞌyaleꞌ ra̱lenquil aban incꞌaꞌ queꞌxtzꞌekta̱na li Dios. Ut cuan ajcuiꞌ queꞌcamsi̱c riqꞌuin kꞌesnal chꞌi̱chꞌ. Quilajeꞌxbeni rib yalak bar ut riqꞌuin rix chiba̱t ut rix carner queꞌxyi̱b li rakꞌeb. Nebaꞌeb ut rahobtesinbileb. Kꞌaxal ra queꞌxcꞌul.

³⁸ Ma̱cuaꞌ raj xcꞌulubeb li incꞌaꞌ useb xnaꞌleb nak teꞌcua̱nk laj pa̱banel saꞌ xya̱nkeb. Xban nak queꞌrahobtesi̱c, eb laj pa̱banel quilajeꞌe̱lelic chiruheb ut queꞌcuan yalak bar saꞌ li chaki chꞌochꞌ, saꞌ tzu̱l, ut queꞌcuan ajcuiꞌ saꞌ li ochoch pec.

³⁹ Nak nakabi aꞌin chirixeb laj pa̱banel, nakanau nak tzꞌakal re ru lix pa̱ba̱leb. Aban toj ma̱jiꞌ quitzꞌakloc ru lix colbaleb li quiyechiꞌi̱c reheb xban li Dios.

⁴⁰ Li Dios quiraj nak yo̱keb chi oybeni̱nc re nak teꞌtzꞌako̱nk kochben riqꞌuin li kꞌaxal lokꞌ yechiꞌinbil ke. Aꞌan li kacolbal saꞌ xcꞌabaꞌ li Jesucristo.