Hebreos 10 - Li Santil hu

¹ Li chakꞌrab li quiqꞌueheꞌ re laj Moisés yal retalil li usilal talajeꞌcha̱lk mokon. Saꞌ li chakꞌrab aꞌan naxye nak teꞌmayejak rajlal chihab aban moco riqꞌuin ta li mayejac quiti̱cobresi̱c lix yuꞌameb.

² Cui ta riqꞌuin li mayejac ta̱e̱lk lix ma̱queb incꞌaꞌ raj chic nequeꞌmayejac rajlal chihab. Abanan nequeꞌrecꞌa saꞌ li ra̱meb nak toj cuan lix ma̱queb. Joꞌcan nak incꞌaꞌ queꞌxcanab li mayejac.

³ Lix ya̱lal li mayejac nequeꞌxba̱nu aꞌan re xjulticanquil chiruheb nak toj cuanqueb xma̱c.

⁴ Lix quiqꞌuel li chiba̱t ut li toro incꞌaꞌ narisi li ma̱c.

⁵ Joꞌcan nak li Ka̱cuaꞌ Jesucristo, nak ac cha̱lc re saꞌ ruchichꞌochꞌ, quixye re li Acuabej Dios: La̱in ninnau nak la̱at incꞌaꞌ nacacuaj lix quiqꞌuel li mayej xul. Incꞌaꞌ nacuulac cha̱cuu li cꞌaꞌak re ru chi mayejil. Joꞌcan nak tina̱qꞌue chi tzꞌejcualocꞌ.

⁶ Incꞌaꞌ nacuulac cha̱cuu li cꞌatbil mayej chi moco li cꞌaꞌak re ru chi mayejil re risinquil li ma̱c.

⁷ Ut quinye: Cueꞌquin, at Ka̱cuaꞌ, tinba̱nu li nacacuaj joꞌ tzꞌi̱banbil saꞌ li Santil Hu chicuix. (Sal. 40:6-8)

⁸ Joꞌcaꞌin quixye li Cristo re li Dios: Incꞌaꞌ nacuulac cha̱cuu li cꞌatbil mayej chi moco li cꞌaꞌak re ru chi mayejil re risinquil li ma̱c. Xelajeꞌxba̱nu aꞌin xban nak joꞌcan tzꞌi̱banbil saꞌ li chakꞌrab junxil. Quixye li a̱tin aꞌin usta ac tzꞌi̱banbil saꞌ li chakꞌrab nak teꞌmayejak.

⁹ Ut quixye ajcuiꞌ: Cueꞌquin, at Ka̱cuaꞌ. Tinba̱nu li nacacuaj, chan. Joꞌcan nak li Dios quirisi xcuanquil li mayejac xul ut chokꞌ re̱kaj li mayej aꞌan quixqꞌue li Jesucristo chi ca̱mc chiru li cruz.

¹⁰ Li Jesucristo quixba̱nu li quiraj li Dios nak quixmayeja rib chiru li cruz. Jun sut ajcuiꞌ quixmayeja rib, ut riqꞌuin lix camic cuybil li kama̱c ut santobresinbilo.

¹¹ Saꞌ xya̱nkeb laj Israel, chixjunileb laj tij cuulaj cuulaj nequeꞌmayejac ut li mayej aꞌan incꞌaꞌ narisi li ma̱c.

¹² Abanan li Jesucristo jun sut ajcuiꞌ quixmayeja rib nak quicam re xcuybal xsachbal li ma̱c. Chirix aꞌan co̱ saꞌ choxa ut quicꞌojla saꞌ xnim ukꞌ li Dios.

¹³ Ut aran yo̱ chiroybeninquil nak ta̱cuulak xkꞌehil nak tixyekꞌ saꞌ rok eb li xicꞌ nequeꞌiloc re.

¹⁴ Xban nak jun sut ajcuiꞌ quixmayeja rib li Jesucristo nak quicam chiru li cruz, ma̱cꞌaꞌ chic xma̱queb chiru li Dios li santobresinbileb.

¹⁵ Joꞌcan ajcuiꞌ li Santil Musikꞌej naxchꞌolob xya̱lal chiku nak aꞌan tzꞌakal ya̱l xban nak joꞌcaꞌin naxye saꞌ li Santil Hu:

¹⁶ Aꞌin li contrato tinqꞌue reheb, chan li Dios. Ta̱cuulak xkꞌehil nak tinqꞌue lin chakꞌrab saꞌ lix cꞌaꞌuxeb ut tinqꞌue ajcuiꞌ saꞌ li ra̱meb.

¹⁷ Ut quixye ajcuiꞌ: Incꞌaꞌ chic ta̱nak saꞌ inchꞌo̱l lix ma̱queb chi moco lix ma̱usilaleb. (Jer. 31:33-34)

¹⁸ Joꞌcan nak cui ac cuybil sachbil li kama̱c, ma̱cꞌaꞌ chic xcꞌanjel li mayejac re risinquil li ma̱c.

Naru tocua̱nk chi sum a̱tin riqꞌuin li Dios

¹⁹ Joꞌcan utan ex herma̱n, anakcuan naru tocua̱nk chi sum a̱tin riqꞌuin li Dios xban nak quihoyeꞌ lix lokꞌlaj quiqꞌuel li Jesucristo nak quicam chiru li cruz saꞌ kacꞌabaꞌ.

²⁰ Riqꞌuin lix camic li Jesucristo quixsach xcuanquil li tꞌicr li quicuan saꞌ li tabernáculo ut quixqꞌue li acꞌ naꞌleb re xtaubal li junelic yuꞌam ut anakcuan naru tocua̱nk chi sum a̱tin riqꞌuin li Dios.

²¹ Li Jesucristo, aꞌan lix yucuaꞌil aj tij chokꞌ ke la̱o li ralal xcꞌajol li Dios.

²² Joꞌcan nak chikaqꞌue kib rubel xcuanquil li Dios chi anchal kachꞌo̱l ut chi ma̱cꞌaꞌak kaxiu xban nak nakecꞌa nak ma̱cꞌaꞌ chic li kama̱c. Chꞌajbil chic li ka̱m xban xquiqꞌuel li Jesucristo ut cubsinbil chic kahaꞌ.

²³ Joꞌcan nak cauhak taxak kachꞌo̱l saꞌ li kapa̱ba̱l xban nak li Dios naxqꞌue li cꞌaꞌru naxyechiꞌi ke.

²⁴ Chikasicꞌ chanru takatenkꞌa kib re nak takara kib ut chikaba̱nu usilal chi kibil kib.

²⁵ Cuanqueb li incꞌaꞌ nequeꞌxic saꞌ li chꞌutubaj ib. Abanan incꞌaꞌ takaba̱nu joꞌ nequeꞌxba̱nu eb aꞌan. Junelic ban takachꞌutub kib re xlokꞌoninquil li Dios. Chikaqꞌue xcacuub li kachꞌo̱l chi kibil kib. Tento takaba̱nu aꞌan xban nak chi se̱b tol-e̱lk li Jesucristo.

²⁶ Cui junelic yo̱co chi ma̱cobc chi ac nakanau xya̱lal li ra̱tin li Dios, ma̱cꞌaꞌ chic xcuybal li kama̱c xban nak nakanau nak ma̱c yo̱co chixba̱nunquil.

²⁷ Cui junelic yo̱ko chi ma̱cobc, caꞌaj chic li rakba a̱tin ut lix xamlel li tojba ma̱c yo̱co chiroybeninquil bar cuiꞌ teꞌcꞌatekꞌ li xicꞌ nequeꞌiloc re li Ka̱cuaꞌ Dios.

²⁸ Junxil incꞌaꞌ qui-ileꞌ xtokꞌoba̱l ru li ani quikꞌetoc re xchakꞌrab laj Moisés. Cui cuan cuib malaj oxib li queꞌxye nak ya̱l nak xkꞌet li chakꞌrab, quirakeꞌ a̱tin saꞌ xbe̱n ut queꞌxcamsi.

²⁹ Numtajenak cuiꞌchic ra teꞌxcꞌul li nequeꞌtzꞌekta̱nan re li Ralal li Dios ut nequeꞌxsach xcuanquil lix quiqꞌuel xban nak riqꞌuin xquiqꞌuel li Jesucristo xakabanbil xcuanquil li acꞌ contrato ut santobresinbilo la̱o. Numtajenak cuiꞌchic ra teꞌxcꞌul li nequeꞌxmajecua li Santil Musikꞌej li naqꞌuehoc ke li rusilal li Dios.

³⁰ La̱o nakanau nak li Dios quixye chi joꞌcaꞌin: Caꞌaj cuiꞌ la̱in naru tinqꞌuehok xtojbal rix lix ma̱queb ut la̱in tinrahobtesiheb riqꞌuin li cꞌaꞌru quilajeꞌxba̱nu. Ut quixye cuiꞌchic li Ka̱cuaꞌ: La̱in tinrakok a̱tin saꞌ xbe̱n lin tenamit. (Deut. 32:35-36)

³¹ Kꞌaxal xucuajel nak ta̱rakok a̱tin li yoꞌyo̱quil Dios saꞌ xbe̱neb li nequeꞌtzꞌekta̱nan re.

³² Aban chinak saꞌ e̱chꞌo̱l chanru xecꞌul junxil nak tojeꞌ xepa̱b li Cristo. Nabal chi raylal quilaje̱cꞌul ut incꞌaꞌ xchꞌinan e̱chꞌo̱l.

³³ Cuan saꞌ e̱ya̱nk li xicꞌ queꞌileꞌ ut queꞌhobeꞌ chiruheb li tenamit. Ut la̱ex quextzꞌakon riqꞌuin li raylal li queꞌxcꞌul.

³⁴ La̱ex quiyotꞌeꞌ e̱chꞌo̱l chi rilbal le̱ rech aj pa̱banelil li cuanqueb chi pre̱xil. Ut incꞌaꞌ quirahoꞌ saꞌ le̱ chꞌo̱l nak quimakꞌeꞌ che̱ru li cꞌaꞌru e̱re xban nak nequenau nak saꞌ li choxa cuan e̱ma̱tan kꞌaxal cuiꞌchic lokꞌ. Le̱ ma̱tan li cuan saꞌ choxa incꞌaꞌ nalaj incꞌaꞌ na-osoꞌ.

³⁵ Joꞌcan nak cauhak taxak e̱chꞌo̱l saꞌ le̱ pa̱ba̱l ut riqꞌuin aꞌan cuan e̱kꞌajca̱munquil.

³⁶ La̱ex tento te̱cuy li cꞌaꞌru na-ux e̱re re nak te̱ba̱nu li naraj li Dios. Ut riqꞌuin aꞌan te̱cꞌul li yechiꞌinbil e̱re xban li Dios.

³⁷ Joꞌcaꞌin tzꞌi̱banbil saꞌ li Santil Hu: Chi se̱b tol-e̱lk li Cristo. Incꞌaꞌ ta̱ba̱yk chak.

³⁸ Li ti̱c xchꞌo̱l xban inpa̱banquil cuan xyuꞌam chi junelic. Cui naxcanab inpa̱banquil, incꞌaꞌ ta̱sahokꞌ inchꞌo̱l riqꞌuin, chan li Dios. (Hab. 2:3-4)

³⁹ Aban, la̱o ma̱cuaꞌo xcomoneb li nequeꞌxcanab xpa̱banquil li Dios. Eb aꞌan teꞌxic saꞌ xbalba. La̱o nakapa̱b li Dios ut tocolekꞌ.