Hageo 2 - Li Santil hu

¹ Jun xcaꞌcꞌa̱l xbe li xcuuk po re li chihab aꞌan nak quia̱tinac cuiꞌchic li Dios riqꞌuin li profeta Hageo ut quixye re:

² —Tat-a̱tinak riqꞌuineb laj Zorobabel li ralal laj Salatiel, ut laj Josué li ralal laj Josadac, joꞌqueb ajcuiꞌ li tenamit ut ta̱ye reheb chi joꞌcaꞌin,

³ “¿Ma toj cuan saꞌ e̱ya̱nk qui-iloc re lin templo junxil? ¿Ma jultic e̱re nak cꞌajoꞌ xchꞌinaꞌusal nak quicuan? ¿Ma nacuulac ta biꞌ che̱ru lin templo chanru nak cuan anakcuan? ¿Ma incꞌaꞌ ta biꞌ nequeril nak ma̱cꞌaꞌ chic xchꞌinaꞌusal joꞌ junxil?”

⁴ Anakcuan, cacuubresi a̱chꞌo̱l, at Zorobabel. Cacuubresi ajcuiꞌ a̱chꞌo̱l la̱at at Josué li xbe̱nil aj tij. Cacuubresihomak e̱chꞌo̱l che̱junilex li cuanquex arin ut chexcꞌanjelak ut la̱in cua̱nkin e̱riqꞌuin, chan li nimajcual Dios.

⁵ Nak quex-el chak aran Egipto, la̱in quinye e̱re nak cua̱nkin e̱riqꞌuin. Ut chalen anakcuan cuanquin e̱riqꞌuin. Joꞌcan nak mexxucuac.

⁶ Cuulac re xkꞌehil nak la̱in tincuecꞌasi saꞌ xnaꞌaj li choxa ut li ruchichꞌochꞌ ut li palau.

⁷ Sicsotkeb xban xxiuheb chixjunileb li xni̱nkal ru tenamit ut teꞌxcꞌam chak arin saꞌ lin templo lix biomaleb ut ta̱nujak lin templo riqꞌuin lin lokꞌal, chan li Ka̱cuaꞌ Dios li kꞌaxal nim xcuanquil.

⁸ Chixjunil li plata ut li oro li cuan saꞌ ruchichꞌochꞌ cue la̱in, chan li nimajcual Dios.

⁹ Li templo li te̱yi̱b la̱ex aꞌanak li kꞌaxal lokꞌ chiru li quicuan junxil. Ut tinqꞌueheb chi cua̱nc saꞌ tuktu̱quil usilal li cuanqueb saꞌ li naꞌajej aꞌin, chan li nimajcual Dios.

¹⁰ Ca̱hib xcaꞌcꞌa̱l xbe li xbele li po re li xcab chihab roquic chokꞌ rey laj Darío nak li Ka̱cuaꞌ quia̱tinac cuiꞌchic riqꞌuin li profeta Hageo.

¹¹ Ut quixye re nak saꞌ xcꞌabaꞌ li nimajcual Dios tixpatzꞌ reheb laj tij chirix li chakꞌrab.

¹² Cui junak aj tij tixcꞌam li mayejanbil tib saꞌ lix tꞌicr ut cui lix tꞌicr ta̱nak saꞌ xbe̱n li caxlan cua, malaj ut saꞌ li vino, malaj ut saꞌ li aceite, malaj ut saꞌ xbe̱n cꞌaꞌ chic re ru chi tzacae̱mk, ¿ma santobresinbilak chic ta̱cana̱k li tzacae̱mk li quinak cuiꞌ? chan. Ut eb laj tij queꞌchakꞌoc ut queꞌxye nak incꞌaꞌ.

¹³ Tojoꞌnak laj Hageo quixpatzꞌ cuiꞌchic reheb ut quixye: —Cui cuan junak ac xmux rib riqꞌuin xchꞌeꞌbal junak li camenak ut cui tixchꞌeꞌ li cꞌaꞌ re ru chi tzacae̱mk, ¿ma muxbil chic ru ta̱cana̱k li tzacae̱mk? chan. Ut eb laj tij queꞌchakꞌoc ut queꞌxye: —Muxbil chic ru ta̱cana̱k, chanqueb.

¹⁴ Quichakꞌoc laj Hageo ut quixye reheb: —Joꞌcan eb ajcuiꞌ li tenamit aꞌin chicuu, chan li nimajcual Dios. —Chixjunil li cꞌaꞌru nequeꞌxba̱nu ut li cꞌaꞌru nequeꞌxmayeja chicuu ac muxbil ru, chan.

¹⁵ Chalen anakcuan cꞌoxlahomak chi us li cꞌaꞌru xecꞌul nak toj ma̱jiꞌ nequetiquib xyi̱banquil lin templo.

¹⁶ Nak toj ma̱jiꞌ xetiquib xyi̱banquil li templo, saꞌ e̱chꞌo̱l la̱ex nak junmay coxtal li ru le̱ trigo te̱xoc, abanan laje̱b ajcuiꞌ x-el. Ut nak oc e̱re xyatzꞌbal ru le̱ uvas, xecꞌoxla nak te̱cꞌul mero ciento cuc li xyaꞌal. Abanan junmay ajcuiꞌ x-el.

¹⁷ La̱in quinsach ru le̱ racui̱mk nak quintakla li tikcual ikꞌ ut quintakla ajcuiꞌ li hab chi nabal toj retal quikꞌa le̱ racui̱mk ut quintakla ajcuiꞌ li sakbach toj retal qui-osoꞌ le̱ racui̱mk, ut quicana chi ma̱cꞌaꞌ rajbal li trabaj queba̱nu. Abanan incꞌaꞌ xejal e̱cꞌaꞌux ut incꞌaꞌ ajcuiꞌ xexsukꞌi cuiqꞌuin, chan li Ka̱cuaꞌ.

¹⁸ —Qꞌuehomak retal anakcuan. Ca̱hib xcaꞌcꞌa̱l xbe li xbele po nak xechoy xqꞌuebal lix cimiento lin templo, chan li Ka̱cuaꞌ.

¹⁹ Qꞌuehomak retal chi us. ¿Ma cuan ta biꞌ ru le̱ racui̱mk xocxo e̱ban? ¿Ma cuan ta biꞌ ru li uvas? ¿Ma cuan ta biꞌ ru li xto̱nal li higo? Ut, ¿ma cuan ta biꞌ ru li granado? Ut, ¿ma x-atzꞌumac ta biꞌ li cheꞌ olivo? Usta ma̱cꞌaꞌ chixjunil aꞌan, abanan chalen anakcuan texcuosobtesi, chan li Ka̱cuaꞌ.

²⁰ Saꞌ ajcuiꞌ li cutan aꞌan, saꞌ li ca̱hib xcaꞌcꞌa̱l xbe li xbele po, quia̱tinac cuiꞌchic li Dios riqꞌuin li profeta Hageo ut quixye re:

²¹ —Tat-a̱tinak cuiꞌchic riqꞌuin laj Zorobabel li gobernador re Judá, ut ta̱ye re nak la̱in tincuecꞌasi saꞌ xnaꞌaj li choxa ut li ruchichꞌochꞌ.

²² La̱in tincuisiheb saꞌ lix naꞌajeb li rey ut tincuisi xcuanquileb li xni̱nkal ru tenamit ut tinsach ruheb. Tinsach ru lix carruajeb re pletic ut chixjunileb li nequeꞌxic chi saꞌ. Ut tincamsiheb lix cacua̱y joꞌqueb ajcuiꞌ li nequeꞌxic chirixeb. Ut xjuneseb teꞌxcamsi ribeb chi ribileb rib.

²³ Li Ka̱cuaꞌ li kꞌaxal nim xcuanquil quixye re laj Zorobabel: —Saꞌ li cutan aꞌan la̱in tin-ilok a̱cue, at Zorobabel, ralalat laj Salatiel. Sicꞌbil a̱cuu inban, la̱at laj cꞌanjel chicuu. Raro̱cat inban joꞌ lin matkꞌab re xba̱nunquil sellar, chan li nimajcual Dios.