Hageo 1 - Li Santil hu

Li Ka̱cuaꞌ quixye reheb nak tento teꞌxyi̱b cuiꞌchic lix templo

¹ Yo̱ xcab chihab roquic chokꞌ rey aran Persia laj Darío saꞌ li xbe̱n cutan re li xcuak po nak quia̱tinac li Ka̱cuaꞌ riqꞌuin li profeta Hageo. Li cꞌaꞌru quiyeheꞌ re xban li Dios quixye re laj Zorobabel, li gobernador, li ralal laj Salatiel. Ut quixye ajcuiꞌ re laj Josué li xbe̱nil aj tij, li ralal laj Josadac.

² Aꞌan aꞌin li quixye li nimajcual Dios re laj Hageo: —Li tenamit aꞌin nequeꞌxye nak toj ma̱jiꞌ nacuulac xkꞌehil nak teꞌxyi̱b cuiꞌchic lin templo, chan.

³ Ut laj Hageo quixye reheb li tenamit li cꞌaꞌru quiyeheꞌ re xban li Dios ut quixye:

⁴ —¿Ma xkꞌehil ta biꞌ chokꞌ e̱re la̱ex nak texcua̱nk saꞌ cha̱bil cab ut lix templo li Ka̱cuaꞌ incꞌaꞌ nequecꞌoxla xyi̱banquil?

⁵ Li nimajcual Dios quixye reheb: —Checꞌoxla chi us li cꞌaꞌru yo̱quex chixba̱nunquil.

⁶ Kꞌaxal nabal nequerau, ut ma̱cꞌaꞌ ajcuiꞌ nequekꞌol; nequexcuaꞌac ut incꞌaꞌ nequexnujac; nequex-ucꞌac ut incꞌaꞌ nanumeꞌ le̱ chaki el; nequeqꞌue le̱ rakꞌ che̱rix ut incꞌaꞌ nequextikcuoꞌ; li nacꞌanjelac saꞌ cutan, chanchan saꞌ hopol aj bo̱ls naxqꞌue lix tojbal.

⁷ Li nimajcual Dios quixye reheb: —Checꞌoxla chi us li cꞌaꞌru yo̱quex chixba̱nunquil.

⁸ Joꞌcan nak ayukex saꞌ li qꞌuicheꞌ ut sicꞌomak chak li cheꞌ ut yi̱bomak cuiꞌchic lin santil templo ut la̱in ta̱sahokꞌ saꞌ inchꞌo̱l ut aran tinlokꞌoni̱k, chan li Ka̱cuaꞌ.

⁹ Nabal nequesicꞌ ut caꞌchꞌin ajcuiꞌ nequetau. La̱in chanchan apunbil tinba̱nu nak tinmakꞌ che̱ru li cꞌaꞌru nequexoc saꞌ le̱ rochoch, xban nak moco ra ta chicuu nak tinba̱nu. ¿Cꞌaꞌut nak tinba̱nu e̱re chi joꞌcan? chan li nimajcual Dios. Xban nak kꞌaxal nequeqꞌue e̱chꞌo̱l chixyi̱banquil chi us le̱ rochoch ut incꞌaꞌ nequecꞌoxla xyi̱banquil lin templo, chan.

¹⁰ La̱ex quexma̱cob. Joꞌcan nak incꞌaꞌ quintakla li hab saꞌ xbe̱n le̱ chꞌochꞌ ut incꞌaꞌ quimok le̱ racui̱mk.

¹¹ La̱in xinba̱nun re nak incꞌaꞌ quixqꞌue li hab. La̱in xinchakihobresin re le̱ racui̱mk. Quichakic li cꞌaꞌru cuan saꞌ li cꞌaleba̱l ut saꞌ eb li tzu̱l. Quichakic le̱ trigo joꞌqueb ajcuiꞌ le̱ uvas. Ut quichakic xto̱nal le̱ olivos. Quilajeꞌchakic chixjunil le̱ racui̱mk ut ta̱chakik ajcuiꞌ e̱re la̱ex joꞌeb ajcuiꞌ le̱ queto̱mk. Quicana chi ma̱cꞌaꞌ rajbal li trabaj li queba̱nu.

¹² Li profeta Hageo quixye reheb chixjunil li quiyeheꞌ re xban li Dios. Nak queꞌrabi li cꞌaꞌru quixye, laj Zorobabel li ralal laj Salatiel ut laj Josué li xbe̱nil aj tij, li ralal laj Josadac, joꞌqueb ajcuiꞌ chixjunileb li tenamit, queꞌxxucua ru li Ka̱cuaꞌ lix Dioseb. Ut queꞌxba̱nu li quixye.

¹³ Ut laj Hageo, lix profeta li Dios, quia̱tinac riqꞌuineb li tenamit saꞌ xcꞌabaꞌ li Ka̱cuaꞌ Dios. Quixye reheb: —Joꞌcaꞌin xye e̱re li Dios: La̱in cua̱nkin e̱riqꞌuin, chan.

¹⁴ Ut li Ka̱cuaꞌ quixqꞌue xcacuil xchꞌo̱l laj Zorobabel, li ralal laj Salatiel, li gobernador re Judá, joꞌ ajcuiꞌ laj Josué lix be̱nil aj tij, li ralal laj Josadac. Ut quixqꞌue ajcuiꞌ xcacuileb xchꞌo̱l li tenamit, ut queꞌoc chi cꞌanjelac re xyi̱banquil lix templo li nimajcual Dios.

¹⁵ Queꞌxtiquib cꞌanjelac saꞌ li ca̱hib xcaꞌcꞌa̱l xbe li xcuak po re li xcab chihab roquic chokꞌ rey laj Darío.