Habacuc 3 - Li Santil hu

Li quixye laj Habacuc saꞌ lix tij

¹ Aꞌan aꞌin jun li tij quixbicha li profeta Habacuc:

² At nimajcual Dios, nak quicuabi resil li joꞌ qꞌuial xaba̱nu, quinxucua a̱cuu. At Ka̱cuaꞌ Dios, chacꞌutbesi ta cuiꞌchic chiku anakcuan li caba̱nu chak junxil. Chacuuxta̱na taxak ku usta yo̱ a̱joskꞌil saꞌ kabe̱n.

³ —Aꞌan aꞌin li quicuil saꞌ li visión, chan laj Habacuc. Quicuil nak li Dios yo̱ chak chi cha̱lc saꞌ li naꞌajej Temán. Li Dios santo xchal saꞌ li tzu̱l Parán. Lix lokꞌal nacꞌutun saꞌ choxa, joꞌ ajcuiꞌ saꞌ chixjunil li ruchichꞌochꞌ.

⁴ Xchal riqꞌuin xnimal xlokꞌal. Nalemtzꞌun lix saken. Chanchan nak narepoc li ca̱k saꞌ li rukꞌ. Aꞌan retalil lix nimal xcuanquilal.

⁵ Nak ac cha̱lc re li Ka̱cuaꞌ quixtakla chak jun li yajel ut nabal queꞌcam. Ut nak ac xnumeꞌ li Ka̱cuaꞌ, quichal jun chic li yajel ut nabaleb queꞌcam xban li tik.

⁶ Quixakli li Ka̱cuaꞌ ut quirakoc a̱tin saꞌ xbe̱neb li cuanqueb saꞌ ruchichꞌochꞌ. Yal quirileb li tenamit ut nequeꞌsicsot queꞌcana. Eb li tzu̱l li cuanqueb chak chalen saꞌ xticlajic li ruchichꞌochꞌ quilajeꞌecꞌan. Quilajeꞌtꞌaneꞌ li najter tzu̱l. Aban li cꞌaꞌru naxba̱nu li Ka̱cuaꞌ incꞌaꞌ najala. Cuan ban chi junelic.

⁷ Quicuil nak queꞌxcꞌul li raylal li cuanqueb saꞌ li naꞌajej Cusán. Ut nequeꞌsicsot xbaneb xxiu li cuanqueb Madián.

⁸ At nimajcual Dios, ¿ma yo̱ ta biꞌ a̱joskꞌil saꞌ xbe̱n li nimaꞌ nak xaxakab li haꞌ? ¿Ma yo̱ ta biꞌ a̱joskꞌil saꞌ xbe̱n li palau nak xajach ru? La̱at xaba̱nu aꞌan re xcolbaleb la̱ tenamit nak queꞌnumeꞌ jun pacꞌal li haꞌ chirixeb lix cacua̱y ut saꞌ eb lix carruaje.

⁹ Xacꞌutbesi la̱ cuanquilal chiruheb. Chanchan nak ac cauresinbil la̱ tzimaj. Xaye riqꞌuin juramento nak ta̱coleb la̱ tenamit ut joꞌcan xaba̱nu. Quilajeꞌjacheꞌ li chꞌochꞌ ut quilajeꞌel li haꞌ.

¹⁰ Ut quicuil ajcuiꞌ nak xban la̱ cuanquilal, li tzu̱l queꞌxucuac cha̱cuu ut quilajeꞌecꞌan saꞌ xnaꞌajeb. Quicuan li butꞌ saꞌ ruchichꞌochꞌ ut cau yo̱ chi ecꞌa̱nc xya̱b li haꞌ nak yo̱ xcutlenquil lix cau ok.

¹¹ Quicuil nak cuan chak la̱ tzimaj ut la̱ la̱ns saꞌ la̱ cuukꞌ ut cꞌajoꞌ nak nalemtzꞌun. Li po ut li sakꞌe incꞌaꞌ chic queꞌecꞌan saꞌ lix naꞌajeb nak queꞌxqꞌue retal la̱ cuanquilal.

¹² Cꞌajoꞌ la̱ joskꞌil nak casuti li ruchichꞌochꞌ ut cayekꞌiheb saꞌ a̱cuok li tenamit xban a̱joskꞌil.

¹³ La̱at catchal chixcolbaleb la̱ tenamit ut chixcolbaleb li ac sicꞌbil ruheb a̱ban. Ut casach ru li nacꞌamoc be saꞌ xya̱nkeb li incꞌaꞌ useb xnaꞌleb. Ut casacheb ru chixjunileb li nequeꞌta̱ken re. Chanchan nak najuqꞌueꞌ jun li cab nak casach chixjunil.

¹⁴ Riqꞌuin ajcuiꞌ lix tzimaj aꞌan, cacamsi laj cꞌamol be saꞌ xya̱nkeb li soldado nak queꞌchal chi numta̱c saꞌ kabe̱n. Chanchan nak nachal li ca̱k-sut-ikꞌ nak queꞌchal chikasachbal. Ut cꞌajoꞌ xsahilal saꞌ xchꞌo̱leb nak queꞌchal chi numta̱c saꞌ kabe̱n la̱o li incꞌaꞌ naru nakacol kib chiruheb.

¹⁵ Quicuil nak yo̱cat chi numecꞌ saꞌ xbe̱n li palau a̱cuochbeneb la̱ cacua̱y ut li haꞌ cꞌajoꞌ nak quitakeꞌ chak lix cuokx.

¹⁶ Nak quicuil li cꞌaꞌru talajcꞌulma̱nk, cꞌajoꞌ nak quiyotꞌeꞌ inchꞌo̱l. Incꞌaꞌ chic quiru quina̱tinac. Nequeꞌsicsot li cuok xban inxiu ut ma̱cꞌaꞌ chic inmetzꞌe̱u quincana. Abanan tincuoybeni li cutan nak ta̱cꞌulma̱nk li raylal aꞌan. Ma̱cꞌaꞌ incꞌaꞌux xban nak ninnau nak li Ka̱cuaꞌ tixsach ruheb li xicꞌ nequeꞌiloc ke.

¹⁷ La̱in sahak saꞌ inchꞌo̱l riqꞌuin li Ka̱cuaꞌ. Usta incꞌaꞌ chic ta̱atzꞌumak lix to̱nal li higo ut incꞌaꞌ chic ta̱u̱chi̱nk li uvas, ut usta incꞌaꞌ chic ta̱u̱chi̱nk lix to̱nal li olivo, ut usta ma̱cꞌaꞌakeb chic li carner saꞌ eb li corral ut ma̱cꞌaꞌakeb chic li cuacax saꞌ eb lix naꞌaj, ta̱sahokꞌ saꞌ inchꞌo̱l.

¹⁸ Usta chixjunil li cꞌaꞌak re ru aꞌin ma̱cꞌaꞌak chic, abanan la̱in ta̱sahokꞌ saꞌ inchꞌo̱l riqꞌuin li Ka̱cuaꞌ laj Colol cue.

¹⁹ Li Ka̱cuaꞌ, li nimajcual Dios, aꞌan li ta̱qꞌuehok xcacuilal inchꞌo̱l. Tixqꞌue chi se̱bocꞌ li cuok joꞌ xse̱bal li rokeb li quej li kꞌaxal cau nequeꞌa̱linac. Ut tinixqꞌue chi cua̱nc saꞌ jun naꞌajej bar ma̱cꞌaꞌ tincꞌul.