Habacuc 1 - Li Santil hu

Laj Habacuc quixcuechꞌ rix li yo̱ chixba̱nunquil li Ka̱cuaꞌ

¹ Aꞌan aꞌin li cꞌaꞌru quicꞌutbesi̱c chiru li profeta Habacuc xban li Ka̱cuaꞌ.

² ¿Joꞌ najtil chic yo̱kin chixjapbal cue chixpatzꞌbal intenkꞌanquil, at Ka̱cuaꞌ, ut la̱at incꞌaꞌ tina̱cuabi? Ut, ¿jarub sut tinya̱ba la̱ cꞌabaꞌ xban li raylal li cuanco cuiꞌ ut la̱at incꞌaꞌ nocoa̱col?

³ ¿Cꞌaꞌut nak niquina̱qꞌue chirilbal li raylal ut li ma̱usilal aꞌin? ¿Cꞌaꞌut nak cuan li rahobtesi̱nc ib saꞌ kaya̱nk? Ut, ¿cꞌaꞌut nak cuan li joskꞌil ut li sacꞌoc ib ut li cuechꞌi̱nc ib saꞌ kaya̱nk?

⁴ Li chakꞌrab nacana chi ma̱cꞌaꞌ chic xcuanquil. Nak nequeꞌrakoc a̱tin, incꞌaꞌ nequeꞌxba̱nu saꞌ xya̱lal. Li nequeꞌba̱nun ma̱usilal, nequeꞌnumta saꞌ xbe̱neb li ti̱queb xchꞌo̱l ut incꞌaꞌ nequeꞌrakoc a̱tin saꞌ ti̱quilal, chan laj Habacuc.

⁵ Li Ka̱cuaꞌ quixye re: —Ilomakeb lix ni̱nkal ru tenamit ut chisachk e̱chꞌo̱l chirilbal li sachba chꞌo̱lej li tinba̱nu saꞌ eb li cutan nak toj cua̱nkex la̱ex. Incꞌaꞌ raj te̱pa̱b cui yal ani ta junak ta̱serakꞌi̱nk e̱re.

⁶ Qꞌuehomak retal, la̱in oc cue chixtaklanquileb laj Caldea, li joskꞌ aj tenamit, li incꞌaꞌ nequeꞌelajic. Eb aꞌan teꞌxsuti li ruchichꞌochꞌ chixmakꞌbal li naꞌajej li jalan aj e.

⁷ Cauheb rib ut xucuajel rilbaleb li tenamit aꞌan. Eb aꞌan incꞌaꞌ nequeꞌxqꞌue xcuanquil li chakꞌrab. Caꞌaj cuiꞌ li nequeꞌraj xba̱nunquil eb aꞌan nequeꞌxqꞌue xcuanquil.

⁸ Kꞌaxal se̱bakeb lix cacua̱yeb chiruheb li hix. Tzꞌakalakeb aj camsinel chiru laj xoj li nequeꞌbe̱c chiru kꞌojyi̱n. Kꞌaxal cuiꞌchic teꞌta̱mk li nequeꞌxic chirix cacua̱y chi camsi̱nc. Chi najt teꞌcha̱lk chak chirix cacua̱y li teꞌcha̱lk chi pletic. Nak teꞌxic saꞌ a̱nil chi pletic, chanchanakeb li cꞌuch nak naxic chi junpa̱t chixchapbal lix tib.

⁹ Li cꞌaꞌru teꞌxtau saꞌ lix beheb, teꞌxsach ru. Ac xiu xiu cuanqueb li tenamit usta toj ma̱jiꞌ nequeꞌnumeꞌ. Nak teꞌnumta̱k saꞌ xbe̱n li tenamit, numtajenak xqꞌuialeb li teꞌxchap. Chanchan xqꞌuial li cocꞌ ru li samaib li cuan chire li palau.

¹⁰ Teꞌxrahobtesiheb li acuabej ut teꞌxtzꞌekta̱naheb li nequeꞌcꞌamoc be saꞌ li tenamit. Nak nequeꞌril li cab li nequeꞌxcol cuiꞌ ribeb li tenamit, nequeꞌxseꞌe. Nequeꞌxtu̱b li chꞌochꞌ ut saꞌ xbe̱n aꞌan nequeꞌtakeꞌ re nak ta̱ru̱k teꞌoc saꞌ li tenamit re teꞌre̱chani.

¹¹ Chanchan nak nanumeꞌ li ca̱k-sut-ikꞌ nak teꞌxsach li tenamit. Teꞌxcꞌoxla nak riqꞌuin xcuanquil lix dioseb teꞌxba̱nu aꞌan, chan li Ka̱cuaꞌ.

¹² Quixye laj Habacuc: —At Ka̱cuaꞌ, at inDios Santo, ¿Ma incꞌaꞌ ta biꞌ ac cuancat chak chalen saꞌ xticlajic? At Ka̱cuaꞌ, la̱at laj Colol ke. Incꞌaꞌ taxak toa̱qꞌue chi ca̱mc. La̱at tatqꞌuehok reheb laj Caldea chi numta̱c saꞌ kabe̱n re takatoj rix li kama̱c.

¹³ La̱at ti̱c la̱ chꞌo̱l ut incꞌaꞌ nacuulac cha̱cuu li incꞌaꞌ us. ¿Cꞌaꞌut nak yal nacacuil li rahobtesi̱nc li yo̱queb chixba̱nunquil? La̱at ma̱cꞌaꞌ nacaba̱nu nak li incꞌaꞌ useb xnaꞌleb nequeꞌxsach ruheb li ti̱queb xchꞌo̱l.

¹⁴ ¿Cꞌaꞌut nak nacacanabeb li tenamit xjuneseb xcꞌulbal li raylal? Ma̱ ani nacꞌamoc be saꞌ xya̱nkeb. Chanchaneb li car saꞌ li nimaꞌ ut chanchaneb li xul li nequeꞌxjucuqui rib saꞌ chꞌochꞌ.

¹⁵ Eb laj Caldea nequeꞌnumta saꞌ xbe̱neb li tenamit ut nequeꞌre̱chaniheb. Chanchaneb laj car nak nequeꞌxchap li car riqꞌuin lix anzuelo ut chanchan nak nequeꞌxchap riqꞌuin lix yoy. Ut nequeꞌsahoꞌ saꞌ xchꞌo̱leb chirilbal li joꞌ qꞌuial nequeꞌxchap.

¹⁶ Eb laj chapol car nequeꞌxqꞌue xlokꞌal lix yoy ut lix anzuelo. Nequeꞌmayejac ut nequeꞌxcꞌat li pom chiru xban nak riqꞌuin aꞌan nequeꞌxsicꞌ li cꞌaꞌru nequeꞌxtzaca.

¹⁷ ¿Ma junelic yo̱keb chixchapbal li tenamit riqꞌuin lix yoy eb laj Caldea? Ut, ¿ma rajlal yo̱keb chixsachbal ru li tenamit chi incꞌaꞌ teꞌril xtokꞌoba̱l ruheb?