Génesis 8 - Li Santil hu

Nak quiyama li hab

¹ Li Dios quixtokꞌoba ru laj Noé joꞌ ajcuiꞌ chixjunileb li xul li cuanqueb saꞌ li jucub cab. Quixtakla jun nimla ikꞌ saꞌ xbe̱n li ruchichꞌochꞌ ut qui-oc chi chakic li haꞌ.

² Quixcanab e̱lc li haꞌ saꞌ li chꞌochꞌ ut incꞌaꞌ chic quixqꞌue li hab.

³ Timil timil quichakic li haꞌ saꞌ ruchichꞌochꞌ. Chiru jun ciento riqꞌuin mero ciento cutan li haꞌ yo̱ chi sa̱c.

⁴ Saꞌ li cuuklaju xbe li xcuuk li po re li chihab aꞌan, li jucub cab coxhila̱nk saꞌ xbe̱n li tzu̱l Ararat xcꞌabaꞌ.

⁵ Yo̱ chi chakic li haꞌ ut toj saꞌ li xbe̱n li cutan re li xlaje li po quilajeꞌcꞌutun xbe̱n eb li tzu̱l.

⁶ Nak ac xnumeꞌ caꞌcꞌa̱l cutan chic laj Noé quixte lix ventanil li jucub cab li quixyi̱b.

⁷ Quirachꞌab jun li xul tzꞌok xcꞌabaꞌ. Li xul aꞌan yo̱ chi rupupic saꞌ xbe̱n li haꞌ toj retal nak quichakic li haꞌ saꞌ xbe̱n li chꞌochꞌ.

⁸ Mokon chic laj Noé quirachꞌab jun li paloma re nak tixnau ma yo̱ chi chakic li haꞌ saꞌ xbe̱n li chꞌochꞌ.

⁹ Li paloma quisukꞌi cuiꞌchic saꞌ li jucub cab xban nak incꞌaꞌ quixtau bar tixcꞌochob rib xban nak toj cuan li haꞌ saꞌ xbe̱n li ruchichꞌochꞌ. Laj Noé quixyeꞌ li rukꞌ. Quixchap li paloma ut quirocsi cuiꞌchic saꞌ li jucub cab.

¹⁰ Quiroybeni cuukub cutan chic ut quirachꞌab cuiꞌchic li paloma re nak tixnau ma yo̱ chi chakic li haꞌ.

¹¹ Ecuu quisukꞌi chak li paloma. Quixcꞌam chak saꞌ ruch re jun xxak li cheꞌ olivo xcꞌabaꞌ. Chi joꞌcan laj Noé quixnau nak ac yo̱ chi sa̱c li haꞌ saꞌ ruchichꞌochꞌ.

¹² Quiroybeni cuukub cutan chic ut quirachꞌab cuiꞌchic li paloma. Co̱ li paloma ut incꞌaꞌ chic quisukꞌi chak riqꞌuin laj Noé.

¹³ Cuakib ciento chihab riqꞌuin jun (601) chihab cuan re laj Noé nak quichakic li haꞌ. Saꞌ li xbe̱n cutan re li xbe̱n po laj Noé quixte lix tzꞌapbal re li jucub cab ut qui-iloc chirix cab. Quiril nak ac xchakic li haꞌ saꞌ ruchichꞌochꞌ.

¹⁴ Saꞌ li cuukub xcaꞌcꞌa̱l (27) xbe li xcab po ac xchakic chi us li ruchichꞌochꞌ.

¹⁵ Li Dios quia̱tinac riqꞌuin laj Noé ut quixye re:

¹⁶ —Anakcuan tat-e̱lk saꞌ li jucub cab a̱cuochben la̱ cuixakil. Ut teꞌe̱lk ajcuiꞌ la̱ cualal rochbeneb li rixakileb.

¹⁷ Ta̱cuisiheb ajcuiꞌ chixjunileb li xul li joꞌ qꞌuial li cuanqueb saꞌ li jucub cab a̱cuochben. Ta̱cuisiheb li xul li nequeꞌrupupic ut eb li xul li nequeꞌbe̱c, joꞌ ajcuiꞌ li xul li nequeꞌxjucuqui rib saꞌ chꞌochꞌ. Teꞌe̱lk re nak teꞌqꞌuia̱nk ut teꞌpucꞌa̱nk saꞌ ruchichꞌochꞌ, chan li Dios.

¹⁸ Ut qui-el laj Noé saꞌ li jucub cab rochben li rixakil. Ut queꞌel ajcuiꞌ li ralal rochbeneb li rixakil.

¹⁹ Queꞌel ajcuiꞌ chixjunileb li xul li nequeꞌrupupic ut li nequeꞌbe̱c, joꞌ eb ajcuiꞌ li xul li nequeꞌxjucuqui rib saꞌ chꞌochꞌ. Quilajeꞌel chi ju̱nk chꞌu̱tal chixjunileb li xul, aꞌ yal cꞌaꞌru chi xulil.

²⁰ Laj Noé quixyi̱b jun artal riqꞌuin tusbil pec re xlokꞌoninquil li Ka̱cuaꞌ Dios. Ut quixchapeb li xul, li nequeꞌbe̱c joꞌ ajcuiꞌ li nequeꞌrupupic, saꞌ xya̱nkeb li xul li natiꞌeꞌ xtibeleb. Ut quixcꞌateb saꞌ xbe̱n li artal chokꞌ xmayej chiru li Ka̱cuaꞌ Dios.

²¹ Lix bo̱c li cꞌatbil mayej quicuulac riqꞌuin li Dios ut quicuulac chiru lix sununquil. Li Dios quixye saꞌ xchꞌo̱l: —Ma̱ jun cua chic tintzꞌekta̱na li ruchichꞌochꞌ xbaneb li cristian. Ac reheb li cristian nak aj ma̱queb. Ma̱ jun sut chic tinsach ruheb chixjunileb li cuanqueb saꞌ ruchichꞌochꞌ riqꞌuin butꞌi haꞌ.

²² Joꞌ najtil chic ta̱cua̱nk li ruchichꞌochꞌ junelic ta̱cua̱nk li a̱uc. Ta̱cua̱nk kꞌoloc. Ta̱cua̱nk li que ut ta̱cua̱nk li tik. Ta̱cua̱nk li sakꞌehil ut ta̱cua̱nk li habalkꞌe. Ta̱cua̱nk li cutan ut ta̱cua̱nk li kꞌojyi̱n. Incꞌaꞌ teꞌpaltok chiruheb, chan li Dios.