Génesis 7 - Li Santil hu

Li butꞌi haꞌ

¹ Li Ka̱cuaꞌ Dios quixye re laj Noé, —Anakcuan ocan saꞌ li jucub cab la̱at a̱cuochbeneb la̱ cualal a̱cꞌajol ut la̱ cuixakil, xban nak caꞌaj cuiꞌ la̱at ti̱c a̱chꞌo̱l chicuu saꞌ xya̱nkeb li cristian li cuanqueb saꞌ eb li cutan aꞌin.

² Ta̱cuocsi saꞌ li jucub cab cuukutk sumal chi xul li natiꞌeꞌ xtibeleb, te̱lom ut ixk. Ut ta̱cuocsiheb ajcuiꞌ junju̱nk sumalak li xul, li incꞌaꞌ natiꞌeꞌ xtibeleb, te̱lom ut ixk.

³ Ta̱cuocsi ajcuiꞌ cuukutk sumal li xul li nequeꞌrupupic, tzoꞌ ut tux, re nak cua̱nk riyajileb saꞌ ruchichꞌochꞌ.

⁴ Saꞌ cuukub cutan tintakla chak li hab. Ut chiru caꞌcꞌa̱l cutan ut caꞌcꞌa̱l kꞌojyi̱n yo̱k li hab. Chixjunil li cꞌaꞌak re ru quinyoꞌobtesi saꞌ ruchichꞌochꞌ tinsach ruheb, chan li Dios.

⁵ Ut laj Noé quixba̱nu chixjunil li quitakla̱c cuiꞌ xban li Dios.

⁶ Cuakib ciento (600) chihab cuan re laj Noé nak quicuan li butꞌi haꞌ saꞌ ruchichꞌochꞌ.

⁷ Laj Noé qui-oc saꞌ li jucub cab rochbeneb li ralal, li rixakil ut li rixakileb li ralal re xcolbaleb rib chiru li butꞌi haꞌ.

⁸ Queꞌoc li xul li natiꞌeꞌ xtibeleb. Ut queꞌoc ajcuiꞌ li xul incꞌaꞌ natiꞌeꞌ xtibeleb. Joꞌ ajcuiꞌ li xul li nequeꞌrupupic. Ut queꞌoc ajcuiꞌ li xul li nequeꞌxjucuqui rib saꞌ chꞌochꞌ.

⁹ Chi caꞌcabil queꞌoc li xul saꞌ li jucub riqꞌuin laj Noé, te̱lom ut ixk, joꞌ quiyeheꞌ re laj Noé xban li Dios.

¹⁰ Chixjunileb queꞌoc saꞌ li jucub. Nak quinumeꞌ li cuukub cutan, quiticla li hab ut quichal li butꞌ saꞌ ruchichꞌochꞌ.

¹¹ Saꞌ eb li cutan aꞌan yalak bar quilajeꞌel chak li haꞌ saꞌ chꞌochꞌ. Ut nak quitehon li choxa, quichal li hab chi kꞌaxal cau. Aꞌin quicꞌulman saꞌ li cuuklaju xbe li xcab po re li chihab aꞌan. Cuakib ciento (600) chihab cuan re laj Noé nak quicꞌulman aꞌin.

¹² Ut quixqꞌue li hab chiru caꞌcꞌa̱l cutan ut caꞌcꞌa̱l kꞌojyi̱n.

¹³ Nak toj ma̱jiꞌ naticla li butꞌi haꞌ, laj Noé qui-oc saꞌ li jucub cab rochben li oxib chi ralal, laj Sem, laj Cam, ut laj Jafet. Ut qui-oc ajcuiꞌ li rixakil laj Noé joꞌ eb ajcuiꞌ li rixakileb li oxib chi ralal.

¹⁴ Queꞌoc ajcuiꞌ saꞌ li jucub chixjunileb li xul aꞌ yal cꞌaꞌru chi xulil. Queꞌoc li xul li nequeꞌcuan saꞌ qꞌuicheꞌ joꞌ ajcuiꞌ li queto̱mk. Queꞌoc ajcuiꞌ li xul li nequeꞌrupupic chiru choxa joꞌ ajcuiꞌ li nequeꞌxjucuqui rib saꞌ chꞌochꞌ.

¹⁵ Chixjunil li xul queꞌoc saꞌ li jucub riqꞌuin laj Noé chi ju̱nk sumal.

¹⁶ Queꞌoc ju̱nk sumal li xul aꞌ yal cꞌaꞌru chi xulil joꞌ quiyeheꞌ re laj Noé xban li Dios. Ut nak xeꞌoc chixjunileb, li Dios quixtzꞌap li oqueba̱l re li jucub.

¹⁷ Caꞌcꞌa̱l cutan quixqꞌue li hab. Quichamoꞌ li butꞌ ut li jucub quicuaclesi̱c xban li haꞌ ut napamamnac saꞌ xbe̱n li haꞌ.

¹⁸ Kꞌaxal cuiꞌchic quichamoꞌ li butꞌ saꞌ xbe̱n li ruchichꞌochꞌ. Ut li jucub napamamnac saꞌ xbe̱n li haꞌ.

¹⁹ Quinujac li haꞌ saꞌ xbe̱n li ruchichꞌochꞌ toj retal queꞌmukun chixjunileb li ni̱nki tzu̱l.

²⁰ Numenak cuukub vara xchamal li haꞌ saꞌ xbe̱neb li tzu̱l.

²¹ Ut quilajeꞌcam chixjunileb li cuanqueb saꞌ ruchichꞌochꞌ. Queꞌcam chixjunil li xul li nequeꞌrupupic, joꞌ ajcuiꞌ li nequeꞌxjucuqui rib saꞌ chꞌochꞌ. Queꞌcam li queto̱mk joꞌ eb ajcuiꞌ li nequeꞌcuan saꞌ qꞌuicheꞌ. Ut chixjunileb li cristian queꞌcam.

²² Chixjunileb li cuanqueb saꞌ ruchichꞌochꞌ, quilajeꞌcam. Eb li cristian joꞌ eb ajcuiꞌ li xul quilajeꞌcam.

²³ Joꞌcaꞌin nak li Dios quixsach ruheb chixjunileb li cuanqueb saꞌ ruchichꞌochꞌ. Queꞌosoꞌ li cristian joꞌ ajcuiꞌ chixjunileb li xul li nequeꞌbe̱c. Joꞌ ajcuiꞌ li nequeꞌxjucuqui rib ut li nequeꞌrupupic chiru choxa. Caꞌaj chic laj Noé quicoleꞌ rochbeneb chixjunileb li cuanqueb saꞌ li jucub cab.

²⁴ Jun ciento riqꞌuin mero ciento cutan quicuan li butꞌ saꞌ xbe̱n li ruchichꞌochꞌ.