Génesis 46 - Li Santil hu

Laj Jacob quicuulac saꞌ li naꞌajej Egipto

¹ Laj Israel qui-el aran ut quixcꞌam chirix chixjunil li cꞌaꞌru cuan re. Ut nak quicuulac saꞌ li naꞌajej Beerseba, quimayejac chiru li Ka̱cuaꞌ Dios, li naxlokꞌoni laj Isaac lix yucuaꞌ.

² Chiru li kꞌojyi̱n aꞌan, li Ka̱cuaꞌ Dios quia̱tinac riqꞌuin laj Israel chanchan saꞌ xmatcꞌ. —Jacob, chan li Dios re. —Cueꞌquin, cuanquin arin, chan nak quichakꞌoc laj Israel.

³ Ut li Ka̱cuaꞌ Dios quixye re: —La̱in li Ka̱cuaꞌ Dios li quixlokꞌoni la̱ yucuaꞌ. Matxucuac chi xic Egipto xban nak aran tinqꞌueheb chi qꞌuia̱nc nabaleb la̱ cualal a̱cꞌajol. Riqꞌuineb aꞌan ta̱cua̱nk jun nimla tenamit.

⁴ Anakcuan la̱in tin-ochbeni̱nk a̱cue toj saꞌ li tenamit Egipto. Relic chi ya̱l la̱in texinsukꞌisi cuiꞌchic arin saꞌ li naꞌajej Canaán. Ut laj José, aꞌan li ta̱tzꞌapok re la̱ cuu nak tatca̱mk, chan li Dios re laj Israel.

⁵ Ut laj Jacob qui-el saꞌ li naꞌajej Beerseba. Eb li ralal queꞌcꞌamoc re aꞌan saꞌ li carre̱t li taklanbileb chak xban laj faraón. Ut queꞌxcꞌam ajcuiꞌ li rixakil eb aꞌan joꞌ eb ajcuiꞌ lix cocꞌaleb.

⁶ Queꞌxcꞌameb lix queto̱mk chirixeb, joꞌ ajcuiꞌ chixjunil li cꞌaꞌru reheb li quitam saꞌ li tenamit Canaán. Ut quicuulac Egipto laj Jacob rochbeneb chixjunileb li ralal xcꞌajol.

⁷ Laj Jacob quixcꞌam chirix chixjunileb li ralal, joꞌ ajcuiꞌ lix rabin. Ut quixcꞌameb ajcuiꞌ chixjunileb li ri. Chixjunileb li ralal xcꞌajol queꞌco̱eb Egipto chirix laj Jacob.

⁸ Arin tzꞌi̱banbil xcꞌabaꞌeb li ralal xcꞌajol laj Israel li queꞌco̱eb Egipto. Laj Rubén, aꞌan li xbe̱n ralal laj Jacob.

⁹ Aꞌaneb aꞌin lix cꞌabaꞌeb li ralal laj Rubén: laj Hanoc, laj Falú, laj Hezrón, ut laj Carmi.

¹⁰ Ut aꞌaneb aꞌin lix cꞌabaꞌeb li ralal laj Simeón: laj Jemuel, laj Jamín, laj Ohad, laj Jaquín, laj Zohar, ut quicuan jun chic li ralal riqꞌuin jun ixk aj cananea. Aj Saúl xcꞌabaꞌ li ralal li quicuan.

¹¹ Aꞌaneb aꞌin lix cꞌabaꞌeb li ralal laj Leví: laj Gersón, laj Coat, ut laj Merari.

¹² Ut aꞌaneb aꞌin lix cꞌabaꞌeb li ralal laj Judá: laj Er, laj Onán, laj Sela, laj Fares ut laj Zara. Laj Er ut laj Onán queꞌcam saꞌ li tenamit Canaán. Ut laj Fares quicuan cuib li ralal laj Hezrón ut laj Hamul xcꞌabaꞌeb.

¹³ Aꞌaneb aꞌin lix cꞌabaꞌeb li ralal laj Isacar: laj Tola, laj Fúa, laj Job ut laj Simrón.

¹⁴ Ut aꞌaneb aꞌin lix cꞌabaꞌeb li ralal laj Zabulón: laj Sered, laj Elón ut laj Jahleel.

¹⁵ Joꞌcaꞌin xcꞌabaꞌeb li oxlaju xcaꞌcꞌa̱l (33) chi ralal xcꞌajol laj Jacob li quicuan riqꞌuin lix Lea saꞌ li naꞌajej Padan-aram. Ut quicuan ajcuiꞌ jun xrabin riqꞌuin lix Lea, xDina xcꞌabaꞌ.

¹⁶ Aꞌaneb aꞌin lix cꞌabaꞌeb li ralal laj Gad: laj Zifión, laj Hagui, laj Ezbón, laj Suni, laj Eri, laj Arodi ut laj Areli.

¹⁷ Ut aꞌaneb aꞌin lix cꞌabaꞌeb li ralal laj Aser: laj Imna, laj Isúa, laj Isúi, laj Bería, ut lix Sera li ri̱tzꞌineb. Laj Bería quicuan cuib li ralal, laj Heber ut laj Malquiel xcꞌabaꞌeb.

¹⁸ Joꞌcaꞌin xcꞌabaꞌeb li cuaklaju (16) chi ralal xcꞌajol laj Jacob li quicuan riqꞌuin lix Zilpa. Lix Zilpa, aꞌan li mo̱s li quiqꞌueheꞌ re lix Lea xban laj Labán.

¹⁹ Laj Jacob quicuan cuib li ralal riqꞌuin lix Raquel. Laj José ut laj Benjamín xcꞌabaꞌeb.

²⁰ Laj Manasés ut laj Efraín xcꞌabaꞌeb li cuib chi ralal laj José, li queꞌcuan riqꞌuin lix Asenat aran Egipto. Lix Asenat, aꞌan xrabin laj Potifera, li quicꞌamoc be chi tijoc chiruheb laj On.

²¹ Aꞌaneb aꞌin lix cꞌabaꞌeb li ralal laj Benjamín: laj Bela, laj Bequer, laj Asbel, laj Gera, laj Naamán, laj Ehi, laj Ros, laj Mupim, laj Hupim ut laj Ard.

²² Joꞌcaꞌin xcꞌabaꞌeb li ralal xcꞌajol laj Jacob li quicuan riqꞌuin lix Raquel. Aꞌan ca̱lajuheb (14) chixjunileb.

²³ Li ralal laj Dan, aꞌan aj Husim xcꞌabaꞌ.

²⁴ Aꞌaneb aꞌin lix cꞌabaꞌeb li ralal laj Neftalí: laj Jahzeel, laj Guni, laj Jezer ut laj Silem.

²⁵ Joꞌcaꞌin xcꞌabaꞌeb li cuukub chi ralal xcꞌajol laj Jacob li quicuan riqꞌuin lix Bilha. Lix Bilha, aꞌan li mo̱s li quiqꞌueheꞌ re lix Raquel xban laj Labán.

²⁶ Cuakib xca̱cꞌa̱l (66) li ralal xcꞌajol laj Jacob li junaj xquiqꞌueleb li queꞌco̱eb Egipto. Ma̱cꞌaꞌ eb saꞌ ajl li rixakil eb li ralal.

²⁷ Cuib li ralal laj José queꞌyoꞌla aran Egipto. Laje̱b xca̱cꞌa̱l (70) chixjunileb li ralal xcꞌajol laj Jacob li cuanqueb Egipto.

²⁸ Ut laj Jacob quixtakla laj Judá chi cꞌamoc be re teꞌxcꞌul laj José saꞌ li tenamit Gosén. Ut queꞌco̱eb.

²⁹ Ut laj José quixyi̱b lix carre̱t ut qui-oc chi saꞌ. Tojoꞌnak co̱ Gosén chixcꞌulbal lix yucuaꞌ. Nak queꞌxcꞌul rib, laj José ticto quixkꞌalu xcux lix yucuaꞌ ut ma̱ caꞌchꞌin nak quiya̱bac nak queꞌxkꞌalu ribeb.

³⁰ Ut laj Jacob quixye re laj José: —Anakcuan naru tinca̱mk xban nak xcuil la̱ cuu ut ya̱l nak toj yoꞌyo̱cat, chan.

³¹ Ut laj José quixye reheb li ras joꞌ eb ajcuiꞌ reheb li rechꞌalal, —La̱in xic cue chixyebal re laj faraón nak ac xeꞌcꞌulun lin yucuaꞌ cuiqꞌuin joꞌ eb li cuas ut joꞌ eb ajcuiꞌ li kechꞌalal li xeꞌcuan chak Canaán.

³² Tinye ajcuiꞌ re nak eb li cuas, aꞌaneb aj ilol queto̱mk xban nak li cꞌanjel aꞌan cꞌaynakeb chixba̱nunquil saꞌ li tenamit Canaán. Queꞌxcꞌameb chak chirixeb lix queto̱mk, joꞌ eb ajcuiꞌ lix carner, joꞌ eb ajcuiꞌ lix cuacax, ut chixjunil li cꞌaꞌru cuan reheb, chaꞌkin re laj faraón.

³³ Ut nak laj faraón ta̱a̱tinak e̱riqꞌuin ut tixpatzꞌ e̱re cꞌaꞌru li cꞌanjel li nequeba̱nu la̱ex,

³⁴ la̱ex texchakꞌok ut te̱ye re, “Chalen chak saꞌ kacaꞌchꞌinal, la̱o aj ilol queto̱mk. Aꞌan ajcuiꞌ li cꞌanjel li queꞌxba̱nu chak eb li kaxeꞌto̱nil yucuaꞌ.” Joꞌcaꞌin te̱ye re laj faraón re nak aꞌan tixye e̱re nak texcana̱k saꞌ li naꞌajej Gosén. Kꞌaxal us raj texcana̱k arin Gosén xban nak eb laj Egipto xicꞌ nequeꞌrileb li nequeꞌqꞌuiresin queto̱mk, chan laj José reheb li ras.