Génesis 44 - Li Santil hu

Lix secꞌ laj José queꞌxqꞌue saꞌ lix coxtal laj Benjamín

¹ Laj José quixye re li xbe̱n mo̱s: —Ayu la̱at ut ta̱butꞌeb lix coxtal riqꞌuin li trigo li joꞌ qꞌuial na teꞌxcuy xcꞌambal. Ut ta̱qꞌue cuiꞌchic lix tumineb li junju̱nk saꞌ eb lix coxtal.

² Ut saꞌ lix coxtal li i̱tzꞌinbej, ta̱qꞌue lin secꞌ plata. Ut ta̱qꞌue ajcuiꞌ lix tumin chi saꞌ lix coxtal, chan. Ut li mo̱s quixba̱nu joꞌ quiyeheꞌ re xban laj José.

³ Joꞌ cuulajak chic nak quisake̱u, eb li ralal laj Jacob queꞌchakꞌrabi̱c xban laj José ut queꞌco̱eb ut queꞌxcꞌameb ajcuiꞌ lix bu̱r.

⁴ Tojoꞌ junpa̱t reliqueb li cui̱nk saꞌ li tenamit, nak laj José quixbok li xbe̱n mo̱s ut quixye re: —Ayu saꞌ junpa̱t ut toxa̱tauheb li cui̱nk li xeꞌco̱eb. Ut ta̱ye reheb, “¡Cꞌoxlahomak chi us! Usilal xba̱nu e̱re lin patrón. ¿Cꞌaꞌut nak xeba̱nu li incꞌaꞌ us re? ¿Cꞌaꞌut nak xerelkꞌa chak lix secꞌ plata lin patrón?” chaꞌkat reheb.

⁵ Ut ta̱ye ajcuiꞌ reheb, “Li secꞌ aꞌan, aꞌan li na-ucꞌac cuiꞌ lin patrón ut aꞌan nacꞌanjelac ajcuiꞌ re kꞌehi̱nc. Cꞌajoꞌ xyibal ru li xeba̱nu chak re lin patrón,” chaꞌkat reheb, chan laj José re lix mo̱s.

⁶ Li mo̱s co̱ saꞌ junpa̱t ut coxtauheb li cui̱nk saꞌ be. Ut quixye reheb chixjunil li quiyeheꞌ re xban laj José.

⁷ Eb aꞌan queꞌchakꞌoc ut queꞌxye re: —At Ka̱cuaꞌ, ¿cꞌaꞌut nak yo̱cat chixyebal ke chi joꞌcan? La̱o moco cꞌaynako ta chixba̱nunquil li naꞌleb aꞌan.

⁸ ¿Ma incꞌaꞌ ta biꞌ xaqꞌue retal nak xkakꞌaxtesi li tumin li xkatau saꞌ eb li kacoxtal Canaán? Aꞌan retalil nak la̱o ma̱ jaruj to-oc chirelkꞌanquil xbiomal la̱ patrón. Usta plata, usta oro, la̱o incꞌaꞌ naru to-oc xchꞌeꞌbal li cꞌaꞌru re.

⁹ Sicꞌ saꞌ li kacoxtal. Ma ho̱n tana nacatau saꞌ eb li kacoxtal. Cui ta̱tau li secꞌ saꞌ xcoxtal junak, aꞌan ta̱camsi̱k. Ut chikajunilo tocana̱k chokꞌ xmo̱s la̱ patrón, chanqueb re.

¹⁰ Li mo̱s quixye reheb: —Chi-uxma̱nk taxak joꞌ xaye. Li ani tintau cuiꞌ li secꞌ, aꞌan ta̱cana̱k chokꞌ aj cꞌanjel chicuu chi junaj cua. Ut la̱ex li jun chꞌol chic naru texxic xban nak ma̱cuaꞌ la̱ex cuan e̱re, chan.

¹¹ Ut eb aꞌan saꞌ junpa̱t quilajeꞌxcubsi chiru chꞌochꞌ lix coxtal ut li junju̱nk queꞌxhit lix coxtaleb.

¹² Ut li mo̱s quixtiquib xsicꞌbal xbe̱n cua saꞌ xcoxtal li asbej. Toj saꞌ rosoꞌjic quixsicꞌ saꞌ xcoxtal li i̱tzꞌinbej. Ut aran quixtau li secꞌ saꞌ xcoxtal laj Benjamín.

¹³ Ut eb li ras laj Benjamín queꞌxkꞌichi li rakꞌeb chirixeb xban xrahileb saꞌ xchꞌo̱l. Quilajeꞌxbacꞌ lix coxtal saꞌ junpa̱t. Quilajeꞌxtaksi cuiꞌchic chirixeb lix bu̱r. Ut queꞌsukꞌi cuiꞌchic saꞌ li tenamit li cuan cuiꞌ laj José.

¹⁴ Ut laj Judá rochbeneb li ri̱tzꞌin ut li ras queꞌcuulac saꞌ li rochoch laj José. Eb aꞌan queꞌxcuikꞌib rib saꞌ chꞌochꞌ chiru laj José.

¹⁵ Laj José quixye reheb aꞌan: —¿Cꞌaꞌut nak xeba̱nu chi joꞌcaꞌin? ¿Ma incꞌaꞌ ta biꞌ nequenau nak junak cui̱nk joꞌ la̱in kꞌaxal nim incuanquil, ninnau ajcuiꞌ kꞌehi̱nc? chan laj José reheb.

¹⁶ Laj Judá quixye re: —At Ka̱cuaꞌ, ¿cꞌaꞌru raj takaye a̱cue? ¿Cꞌaꞌ chic ru naru takaye a̱cue re nak ta̱pa̱b nak ma̱cuaꞌ la̱o xoba̱nun re aꞌin? Li Ka̱cuaꞌ Dios nanaꞌoc re cꞌaꞌru kama̱c. Ma̱cuaꞌ caꞌaj cuiꞌ riqꞌuin li xeꞌxtau cuiꞌ la̱ secꞌ ta̱cana̱k chokꞌ a̱mo̱s. Tocana̱k ajcuiꞌ la̱o chikajunilo, chanqueb.

¹⁷ Laj José quichakꞌoc ut quixye reheb: —Incꞌaꞌ nacuaj chi joꞌcan. Caꞌaj cuiꞌ li xtauman cuiꞌ lin secꞌ, aꞌan ta̱cana̱k chokꞌ inmo̱s. Ut la̱ex naru texsukꞌi̱k saꞌ xya̱lal riqꞌuin le̱ yucuaꞌ, chan.

Laj Judá quixtzꞌa̱ma nak ta̱tokꞌoba̱k ru laj Benjamín

¹⁸ Ut laj Judá quinachꞌoc chiru laj José ut quixye re: —Chacuy inma̱c. La̱in tincuaj xyebal cuib oxibak a̱tin a̱cue. Usan cui incꞌaꞌ ta̱cha̱lk a̱joskꞌil saꞌ kabe̱n xban nak la̱at kꞌaxal nim a̱cuanquil. La̱at joꞌ laj faraón, chan.

¹⁹ Laj Judá quixye ajcuiꞌ re: —At Ka̱cuaꞌ, la̱at xatpatzꞌoc ke ut xaye ke “¿Ma cuan le̱ yucuaꞌ? ¿Ma cuan le̱ ri̱tzꞌin?” chancat ke.

²⁰ Ut la̱o xkaye a̱cue, “Cuan li kayucuaꞌ. Ti̱x chic. Ut cuan ajcuiꞌ li ki̱tzꞌin toj sa̱j. Saꞌ xti̱xilal li kayucuaꞌ quiyoꞌla li ki̱tzꞌin aꞌan. Caꞌaj chic a jun aꞌin cuan reheb li cuib chi ralal li junaj xnaꞌeb. Li ras li ki̱tzꞌin aꞌin ac camenak. Ut li kayucuaꞌ cꞌajoꞌ nak naxra laj Benjamín.”

²¹ La̱at xaye ke, “Cꞌamomak chak le̱ ri̱tzꞌin arin. Tincuaj tincuil ru,” chancat ke.

²² Ut la̱o xkaye a̱cue, “Li ki̱tzꞌin incꞌaꞌ naru tixcanab chak li kayucuaꞌ xjunes. Cui tixcanab chak li kayucuaꞌ xjunes naru nacam li kayucuaꞌ xban xrahil saꞌ xchꞌo̱l.”

²³ Abanan la̱at xaye ke, “Cui incꞌaꞌ nequecꞌam chak le̱ ri̱tzꞌin, incꞌaꞌ chic te̱ril cuu,” chancat ke.

²⁴ Nak xocuulac riqꞌuin li kayucuaꞌ, ticto xkaye re cꞌaꞌru xaye ke la̱at.

²⁵ Ut li kayucuaꞌ xye ke, “Ayukex cuiꞌchic chixlokꞌbal caꞌchꞌinak katzacae̱mk,” chan.

²⁶ Ut la̱o xkaye re, “Incꞌaꞌ naru toxic cui incꞌaꞌ naxic li ki̱tzꞌin chikix. Incꞌaꞌ toxcꞌul li cui̱nk cui incꞌaꞌ nakacꞌam li ki̱tzꞌin chikix,” chanco re.

²⁷ Ut li kayucuaꞌ xye ke, “La̱ex nequenau nak cuib ajcuiꞌ li cualal quicuan riqꞌuin li cuixakil camenak.

²⁸ Li jun quintakla chi takl ut incꞌaꞌ chic quisukꞌi chak. La̱in ninye nak junak joskꞌ aj xul xcamsin re. Incꞌaꞌ chic xcuil bayak ru.

²⁹ Cui te̱cꞌam che̱rix laj Benjamín, ma̱re cꞌaꞌru tixcꞌul saꞌ be. La̱ex cuan e̱re cui nincam xban xrahil saꞌ inchꞌo̱l,” chan ke li kayucuaꞌ.

³⁰ Ut anakcuan cui tinsukꞌi̱k riqꞌuin lin yucuaꞌ ut ma̱ anihak chic laj Benjamín chicuix, la̱in ninye nak ta̱ca̱mk xban nak junes laj Benjamín naxcꞌoxla.

³¹ Ut la̱o cuan ke cui nacam li kayucuaꞌ xban xrahil saꞌ xchꞌo̱l.

³² La̱in xinye re lin yucuaꞌ, “Cui incꞌaꞌ ta̱sukꞌi̱k chak la̱ cualal chicuix, ta̱cana̱k chi junaj cua li raylal saꞌ inbe̱n,” chanquin re.

³³ Xban aꞌan tintzꞌa̱ma cha̱cuu nak tina̱cꞌul chokꞌ re̱kaj laj Benjamín. La̱in tincana̱k chokꞌ a̱mo̱s. Ba̱nu usilal, canab chi xic laj Benjamín chirixeb li ras.

³⁴ ¿Chan ta cuiꞌ ru nak tinxic riqꞌuin lin yucuaꞌ cui ma̱ anihak chic laj Benjamín chicuix? Incꞌaꞌ tincuy rilbal inyucuaꞌ nak cꞌajoꞌak xrahil saꞌ xchꞌo̱l, chan laj Judá re laj José.