Génesis 42 - Li Santil hu

Eb li ras laj José queꞌcuulac Egipto

¹ Nak laj Jacob quirabi resil nak cuan li trigo aran Egipto, quixye reheb li ralal: —La̱ex ma̱cꞌaꞌ yo̱quex chixba̱nunquil. ¿Cꞌaꞌut nak yal yo̱quex chixcaꞌyanquil e̱rib chi ribil e̱rib?

² La̱in xcuabi resil nak aran Egipto cuan li trigo. Ayukex la̱ex ut te̱lokꞌ chak caꞌchꞌinak ke re nak incꞌaꞌ toca̱mk xban katzꞌocajic, chan laj Jacob.

³ Ut li laje̱b li ras laj José queꞌco̱eb chixlokꞌbal li trigo aran Egipto.

⁴ Abanan laj Jacob incꞌaꞌ quixtakla laj Benjamín chirixeb li ras xban nak cꞌajoꞌ lix cꞌaꞌux chirix. Cuan saꞌ xchꞌo̱l nak ma̱re cꞌaꞌru tixcꞌul saꞌ be nak yo̱keb chi xic.

⁵ Eb li ralal laj Jacob, li nayeman ajcuiꞌ aj Israel re, queꞌcuulac saꞌ xya̱nkeb li yo̱queb chi lokꞌoc trigo aran Egipto xban nak yo̱ ajcuiꞌ li cueꞌej saꞌ li tenamit Canaán.

⁶ Laj José, aꞌan li nataklan saꞌ li tenamit Egipto ut saꞌ rukꞌ aꞌan quicana xcꞌayinquil li trigo. Eb li ras laj José queꞌcuulac riqꞌuin ut queꞌxxulub rib saꞌ chꞌochꞌ chiru.

⁷ Nak laj José quirileb ru, aꞌan ticto quixnau ruheb nak aꞌaneb li ras, abanan quixba̱nu rib nak incꞌaꞌ naxnauheb ru. Kꞌetkꞌet caꞌchꞌin laj José nak quira̱tinaheb li ras. Quixpatzꞌ reheb: —¿Bar xexchal chak la̱ex? chan reheb. Eb aꞌan queꞌchakꞌoc ut queꞌxye re: —La̱o xochal Canaán. Xochal arin chixlokꞌbal caꞌchꞌinak li katzacae̱mk, chanqueb re.

⁸ Laj José quixnau ruheb li ras, abanan eb aꞌan incꞌaꞌ queꞌxqꞌue retal nak aꞌan laj José.

⁹ Ut quinak saꞌ xchꞌo̱l laj José chanru nak quimatqꞌuec chirixeb li ras. Quixye reheb: —La̱ex moco ya̱l ta nak chi lokꞌoc xexchal arin. La̱ex yal qꞌuehoc etal xexchal arin re nak te̱ril li cꞌaꞌru cuan arin, chan laj José.

¹⁰ Eb aꞌan queꞌxye re: —Chacuy taxak li kama̱c, at Ka̱cuaꞌ. La̱at nim la̱ cuanquil. Li cꞌaꞌru xochal xba̱nunquil arin yal xlokꞌbal caꞌchꞌinak li katrigo re ta̱cꞌanjelak chokꞌ re li katzacae̱mk.

¹¹ La̱o kas kib. Junaj kayucuaꞌ. Saꞌ xya̱lal nococuan. La̱o ma̱cuaꞌo aj qꞌuehol etal, chanqueb re.

¹² Laj José quixye cuiꞌchic reheb: —Moco ya̱l ta li nequeye. La̱ex xexchal chixqꞌuebal retal cꞌaꞌru cuan saꞌ li tenamit aꞌin, chan.

¹³ Eb aꞌan queꞌxye re: —La̱o cablajuho chikajunil. Ralalo jun chi cui̱nk aj Canaán. Li i̱tzꞌinbej xcana chak riqꞌuin li kayucuaꞌ. Ut li jun chic ma̱ ani chic saꞌ kaya̱nk, chanqueb re laj José.

¹⁴ Ut laj José quixye reheb: —Ya̱l ajcuiꞌ li xinye e̱re nak la̱ex aj qꞌuehol etal.

¹⁵ Chi joꞌcaꞌin ta̱tzꞌilma̱nk a̱tin che̱rix ma relic chi ya̱l li cꞌaꞌru yo̱quex chixyebal. Tinye e̱re saꞌ xcꞌabaꞌ laj faraón nak la̱ex incꞌaꞌ naru tex-e̱lk arin toj ta̱cha̱lk le̱ ri̱tzꞌin.

¹⁶ Xicak junak li cuan saꞌ e̱ya̱nk chixcꞌambal chak le̱ ri̱tzꞌin. Ut la̱ex texcana̱k arin saꞌ tzꞌalam. Chi joꞌcan tinnau ma relic chi ya̱l li cꞌaꞌru yo̱quex chixyebal cue. Cui incꞌaꞌ nequecꞌam chak le̱ ri̱tzꞌin, ta̱nauma̱nk saꞌ xcꞌabaꞌ laj faraón nak la̱ex aj qꞌuehol etal, chan.

¹⁷ Laj José quixtaklaheb chixjunileb saꞌ tzꞌalam re oxib cutan.

¹⁸ Saꞌ rox li cutan laj José quixye reheb: —La̱in ninqꞌue xcuanquil li Dios. Te̱ba̱nu li cꞌaꞌru tinye e̱re re nak texcolekꞌ.

¹⁹ Cui ya̱l nak saꞌ xya̱lal nequexcuan, cana̱k junak le̱ ras arin saꞌ tzꞌalam. Ut li bele̱b chic ta̱ru̱k teꞌxcꞌam li trigo saꞌ le̱ rochoch xban nak yo̱ ajcuiꞌ li cueꞌej aran.

²⁰ Ut texsukꞌi̱k cuiꞌchic chak ut te̱cꞌam chak arin le̱ ri̱tzꞌin. Chi joꞌcan tinnau nak ya̱l li cꞌaꞌru xeye cue ut la̱ex texcolekꞌ che̱junilex. Cui incꞌaꞌ ya̱l, la̱ex texca̱mk, chan. Ut queꞌoc chixcꞌoxlanquil chanru teꞌxba̱nu.

²¹ Ut queꞌxye chi ribileb rib: —Relic chi ya̱l nak xoma̱cob riqꞌuin li cꞌaꞌru kaba̱nu chak junxil re laj José, li ki̱tzꞌin. La̱o quikil nak quirahoꞌ saꞌ xchꞌo̱l riqꞌuin li kaba̱nu re. La̱o incꞌaꞌ quikil xtokꞌoba̱l ru nak quixtzꞌa̱ma chiku nak takatokꞌoba ru. Xban aꞌan nak xchal li raylal aꞌin saꞌ kabe̱n, chanqueb chi ribileb rib.

²² Ut laj Rubén quixye reheb: —¿Ma incꞌaꞌ ta biꞌ quinye e̱re nak incꞌaꞌ te̱ba̱nu raylal re laj José li ki̱tzꞌin? Ut la̱ex incꞌaꞌ xex-abin chicuu. Ut anakcuan tento nak ta̱cua̱nk re̱kaj lix camic. Aꞌan na li cꞌaꞌru yo̱co chixtojbal anakcuan riqꞌuin li xkaba̱nu chak junxil, chan laj Rubén.

²³ Eb aꞌan incꞌaꞌ queꞌxnau nak laj José yo̱ chixtaubal ru li ra̱tinoba̱leb xban nak cuan jun laj jalol a̱tin na-ochbenin re ut aꞌan najaloc re li a̱tin li naxye laj José.

²⁴ Ut laj José quixcanabeb junpa̱t ut co̱ chi ya̱bac xjunes xban xsahil saꞌ xchꞌo̱l. Quisukꞌi ut quia̱tinac riqꞌuineb. Laj José quixchap laj Simeón ut quixbacꞌ li rukꞌ chiruheb li ras.

²⁵ Ut quixtakla xbutꞌbal li trigo saꞌ eb lix coxtal. Ut saꞌ li junju̱nk chi coxtal quixkꞌajsi li tumin li queꞌxtoj cuiꞌ li trigo. Ut quixqꞌueheb ajcuiꞌ xtzacae̱mk re nak teꞌcuaꞌak saꞌ be. Joꞌcan quixba̱nu reheb.

²⁶ Ut eb aꞌan quilajeꞌxbacꞌ li ju̱nk coxtal chi trigo chirixeb lix bu̱r, ut queꞌco̱eb.

²⁷ Eb aꞌan queꞌoc chi hila̱nc saꞌ jun li muheba̱l bar teꞌxnumsi cuiꞌ li kꞌojyi̱n. Ut jun reheb qui-oc chixqꞌuebal xcua lix bu̱r. Nak quixhit lix coxtal, quisach xchꞌo̱l chirilbal nak cuan peꞌ li tumin chi saꞌ lix coxtal.

²⁸ Ut aꞌan quixye reheb li ras: —Ilomak li cꞌaꞌru xintau saꞌ lin coxtal. Xeꞌxkꞌajsi chak xtzꞌak li trigo li xkatoj cuiꞌ. ¿Cꞌaꞌut nak xeꞌxba̱nu ke chi joꞌcaꞌin? chan. Ut queꞌsach xchꞌo̱leb. Nequeꞌsicsot nak queꞌxye: —¿Cꞌaꞌ xak ru nak xba̱nu ke li Dios chi joꞌcaꞌin? chanqueb.

²⁹ Ut queꞌcuulac Canaán riqꞌuin lix yucuaꞌeb ut queꞌxserakꞌi re chixjunil li cꞌaꞌru queꞌxcꞌul.

³⁰ Ut queꞌxye re: —Cꞌoxla, li cui̱nk nataklan saꞌ li tenamit Egipto kꞌaxal kꞌetkꞌet nak xora̱tina. Ut xye ke nak la̱o aj qꞌuehol etal.

³¹ La̱o xkaye re: “La̱o saꞌ xya̱lal nococuan. La̱o incꞌaꞌ cꞌaynako chi qꞌuehoc etal.”

³² Ut xkaye ajcuiꞌ re, “La̱o cablajuho chikajunilo. Jun ajcuiꞌ li kayucuaꞌ. Jun li ki̱tzꞌin ma̱ ani chic. Ut li i̱tzꞌinbej xcana chak saꞌ li tenamit Canaán riqꞌuin li kayucuaꞌ,” chanco re.

³³ Tojoꞌnak li cui̱nk li nataklan saꞌ li tenamit Egipto quixye ke, “Re nak tinpa̱b ma relic na chi ya̱l nak la̱ex ti̱c le̱ chꞌo̱l, ta̱cana̱k junak e̱re arin. Ut li jun chꞌol chic teꞌxcꞌam lix trigo reheb le̱ rechꞌalal li ca̱mqueb re xban cueꞌej.

³⁴ Ayukex ut cꞌamomak chak le̱ ri̱tzꞌin li xeye cue. Chi joꞌcan la̱in tinnau nak la̱ex ma̱cuaꞌex aj qꞌuehol etal. Ut tinnau nak la̱ex ti̱c e̱chꞌo̱l. Ut la̱in tinkꞌaxtesi e̱re le̱ ras ut naru texlokꞌok cuiꞌchic saꞌ li tenamit aꞌin,” chan. Joꞌcaꞌin xye ke, chanqueb re lix yucuaꞌeb.

³⁵ Ut nak coxeꞌxte li junju̱nk chi coxtal quilajeꞌxtau li jun jo̱b chi tumin saꞌ eb lix coxtal. Ut nak queꞌril li tumin, cꞌajoꞌ nak queꞌxucuac, joꞌ ajcuiꞌ li yucuaꞌbej.

³⁶ Ut laj Jacob quixye reheb: —Anakcuan cꞌajoꞌ yo̱quex chak chixba̱nunquil cue. Ma̱ ani chic li cualal laj José. Ut anakcuan incꞌaꞌ chic xsukꞌi chak laj Simeón. Ut toj te̱raj cuiꞌchic xmakꞌbal laj Benjamín chicuu. ¿Cꞌaꞌut nak chixjunil natꞌaneꞌ saꞌ inbe̱n? chan laj Jacob reheb.

³⁷ Ut laj Rubén quixye re lix yucuaꞌ: —Kꞌaxtesi saꞌ cuukꞌ laj Benjamín. Matcꞌoxlac. La̱in tincꞌam cuiꞌchic chak a̱cuiqꞌuin. Cui incꞌaꞌ tincꞌam chak laj Benjamín ut tinkꞌaxtesi saꞌ a̱cuukꞌ, la̱at ta̱ru̱k ta̱camsi xcabichaleb li cualal, chan laj Rubén.

³⁸ Ut laj Jacob quixye re: —Ma̱ jaruj ta̱ru̱k ta̱xic li cualal che̱rix. Cꞌoxla, camenak li cualal jun ut caꞌaj chic laj Benjamín nacuan cuiqꞌuin. Ma̱re cꞌaꞌru tixcꞌul saꞌ be nak yo̱kex chi xic. Cui ma̱ anihak chic laj Benjamín cuiqꞌuin, la̱in naru nincam xban xrahil saꞌ inchꞌo̱l xban nak la̱in ti̱xin chic. La̱ex cuan e̱ma̱c cui nincam xban xrahil inchꞌo̱l, chan laj Jacob.