Génesis 40 - Li Santil hu

Laj José quixchꞌolob xya̱lal li cuib chi matcꞌ

¹ Mokon chic nak ac xcꞌulman aꞌin, cuib lix mo̱s laj faraón queꞌpaltoꞌ chiru. Li jun, aꞌan aj yi̱bom caxlan cua ut li jun chic aꞌan li naqꞌuehoc rucꞌa li rey.

² Li jun, aꞌan li nataklan reheb li nequeꞌyi̱ban caxlan cua ut li jun chic, aꞌan li nataklan reheb li nequeꞌqꞌuehoc rucꞌa li rey. Laj faraón quijoskꞌoꞌ saꞌ xbe̱neb aꞌan.

³ Quixkꞌaxtesiheb saꞌ rukꞌ li nataklan reheb li soldados. Aꞌan li na-iloc tzꞌalam. Ut saꞌ li tzꞌalam aꞌan cuan laj José chi pre̱xil.

⁴ Laj ilol tzꞌalam quixkꞌaxtesiheb saꞌ rukꞌ laj José re nak aꞌan chic ta̱ilok reheb. Ut najt queꞌcuan chi pre̱xil.

⁵ Saꞌ jun li kꞌojyi̱n li cuib chi pre̱x queꞌmatqꞌuec. Jalan jala̱nk lix matcꞌ li junju̱nk ut jalan jala̱nk ajcuiꞌ lix ya̱lal.

⁶ Joꞌ cuulajak chic nak quisake̱u, laj José quicuulac riqꞌuineb li pre̱x. Quiril nak mas sakquirin nequeꞌiloc xban nak ra saꞌ xchꞌo̱leb.

⁷ Laj José quixpatzꞌ reheb li cuib chi cui̱nk li cuanqueb chi pre̱xil: —¿Cꞌaꞌut nak ra saꞌ e̱chꞌo̱l? chan reheb.

⁸ Eb aꞌan queꞌxye re: —La̱o xomatqꞌuec ut ma̱ ani naru xyebal ke cꞌaꞌru xya̱lal li kamatcꞌ.— Laj José quixye reheb: —Caꞌaj cuiꞌ li Ka̱cuaꞌ Dios nanaꞌoc re cꞌaꞌru xya̱lal lix matcꞌ li junju̱nk. Naru te̱ye cue le̱ matcꞌ, chan.

⁹ Ut li jun li quitaklan reheb laj qꞌuehol ucꞌa saꞌ rochoch laj faraón, quixserakꞌi lix matcꞌ re laj José ut quixye: —Saꞌ lin matcꞌ xcuil jun to̱n li uvas.

¹⁰ Li jun to̱n chi uvas cuan oxib rukꞌ ut qui-atzꞌumac. Saꞌ junpa̱t quiu̱chin ut quikꞌanoꞌ li ru.

¹¹ Xcuil nak chapcho lix secꞌ laj faraón saꞌ cuukꞌ. Yo̱quin chixyatzꞌbal lix yaꞌal li uvas chi saꞌ lix secꞌ ut la̱in xinqꞌue re laj faraón, chan li cui̱nk.

¹² Ut laj José quixye re: —Aꞌan aꞌin xya̱lal la̱ matcꞌ. Li oxib li rukꞌ li uvas li xacuil, aꞌan retalil oxib cutan.

¹³ Saꞌ rox li cutan laj faraón tatxcꞌam cuiꞌchic chi trabajic saꞌ rochoch. Ut la̱at ta̱qꞌue cuiꞌchic rucꞌa laj faraón joꞌ caba̱nu chak junxil.

¹⁴ Nak cua̱nkat cuiꞌchic saꞌ rochoch laj faraón saꞌ la̱ cꞌanjel, ba̱nu usilal, chijulticokꞌ a̱cue li usilal xinba̱nu a̱cue. Chat-a̱tinak chicuix riqꞌuin laj faraón re nak naru tineꞌrisi ajcuiꞌ la̱in.

¹⁵ La̱in yal quineꞌrelkꞌa chak junxil saꞌ xtenamiteb laj hebreo. Ma̱cuaꞌ incꞌulub cua̱nc arin saꞌ tzꞌalam xban nak ma̱cꞌaꞌ inma̱c, chan laj José.

¹⁶ Ut li cui̱nk, li quitaklan reheb laj yi̱bom caxlan cua saꞌ rochoch laj faraón quixqꞌue retal nak cha̱bil lix matcꞌ li rochben. Aꞌan quixye re laj José: —La̱in xinmatqꞌuec ajcuiꞌ. Saꞌ lin matcꞌ xcuil oxib li chacach bitꞌbo̱queb inban ut cuan li saki caxlan cua chi saꞌ.

¹⁷ Ut li chacach li cuan saꞌ xbe̱n nujenak chi caxlan cua qꞌuila pa̱y ru. Li caxlan cua aꞌan re laj faraón. Ut quicuil nak yo̱queb chi rupupic li xul saꞌ xbe̱neb li chacach li cuan saꞌ injolom ut yo̱queb chixcuaꞌbal li caxlan cua li cuan chi saꞌ, chan.

¹⁸ Laj José quixye re: —Aꞌan aꞌin xya̱lal la̱ matcꞌ. Li oxib chi chacach, aꞌan retalil oxib cutan.

¹⁹ Ut saꞌ rox li cutan laj faraón tixtakla risinquil la̱ jolom ut tateꞌxtꞌuyub chiru junak cheꞌ. Ut eb li soꞌsol teꞌcha̱lk ut telajeꞌxtꞌupi la̱ tibel ut tateꞌxtiu, chan laj José.

²⁰ Ut saꞌ rox li cutan quixninkꞌei xchihab laj faraón. Quixbokeb chixjunileb lix mo̱s saꞌ lix ninkꞌe. Quixbokeb ajcuiꞌ li cuib chi pre̱x, jun li quitaklan reheb laj yi̱bom caxlan cua, ut li jun chic li quitaklan reheb laj qꞌuehol rucꞌa.

²¹ Laj faraón quixqꞌue cuiꞌchic xcꞌanjel li cui̱nk li quitaklan reheb laj qꞌuehol rucꞌa. Ut li cui̱nk aꞌan quixqꞌue cuiꞌchic rucꞌa saꞌ rukꞌ laj faraón.

²² Ut li cui̱nk jun chic li quitaklan reheb laj yi̱bom caxlan cua, laj faraón quixtakla chi tꞌuyuba̱c. Quixcꞌul joꞌ quiyeheꞌ re xban laj José.

²³ Ut li cui̱nk li nataklan reheb laj qꞌuehol rucꞌa laj faraón incꞌaꞌ chic quijulticoꞌ re laj José. Quisach ban saꞌ xchꞌo̱l.