Génesis 4 - Li Santil hu

Laj Caín ut laj Abel

¹ Laj Adán quicuan riqꞌuin lix Eva. Ut lix Eva quicana chi yaj aj ixk. Nak quiyoꞌla li cꞌulaꞌal, aj Caín queꞌxqꞌue chokꞌ xcꞌabaꞌ. Lix Eva quixye: —Saꞌ xcꞌabaꞌ li Ka̱cuaꞌ Dios cuan jun lin chꞌina al, chan.

² Chirix aꞌan quicuan jun chic lix cꞌulaꞌal aj Abel xcꞌabaꞌ. Laj Abel, aꞌan aj qꞌuiresihom carner ut laj Caín, aꞌan aj acuinel.

³ Quicuulac xkꞌehil nak quixqꞌue lix mayej laj Caín chiru li Ka̱cuaꞌ Dios. Lix mayej, aꞌan ru li racui̱mk.

⁴ Ut laj Abel quixqꞌue ajcuiꞌ chokꞌ xmayej li xbe̱n ral lix carner. Quixsicꞌ ru li kꞌaxal cha̱bil saꞌ xya̱nkeb. Ut li Ka̱cuaꞌ Dios quisahoꞌ saꞌ xchꞌo̱l riqꞌuin laj Abel ut quixcꞌul lix mayej.

⁵ Abanan incꞌaꞌ quisahoꞌ xchꞌo̱l riqꞌuin laj Caín ut incꞌaꞌ quixcꞌul lix mayej. Cꞌajoꞌ nak quijoskꞌoꞌ laj Caín ut quipoꞌ li ru.

⁶ Ut li Dios quixye: —¿Cꞌaꞌut nak yo̱ a̱joskꞌil, Caín? ¿Cꞌaꞌut nak joskꞌ la̱ cuu?

⁷ ¿Ma incꞌaꞌ ta biꞌ ta̱qꞌuehekꞌ a̱lokꞌal cui us ta̱ba̱nu? Cui incꞌaꞌ us ta̱ba̱nu, yo̱cat xqꞌuebal a̱cuib chi a̱le̱c ut li ma̱c ta̱numta̱k saꞌ a̱be̱n. Abanan cua̱nk raj a̱cuanquil re nak la̱at tatnumta̱k saꞌ xbe̱n li ma̱c, chan li Dios re laj Caín.

⁸ Saꞌ jun li cutan laj Caín quixye re li ri̱tzꞌin: —Yoꞌo saꞌ cꞌaleba̱l, chan re. Ut nak ac cuanqueb saꞌ li cꞌaleba̱l laj Caín quixcamsi laj Abel.

⁹ Li Dios quixye re laj Caín: —¿Bar cuan la̱ cui̱tzꞌin?— Laj Caín quixye: —Incꞌaꞌ ninnau. ¿Ma la̱in ta biꞌ aj ilol re li cui̱tzꞌin? chan.

¹⁰ Li Dios quixye ajcuiꞌ re: —¿Cꞌaꞌru xaba̱nu? Lix quiqꞌuel la̱ cui̱tzꞌin xahoy chiru chꞌochꞌ yo̱ chi kꞌoko̱nc chicuu.

¹¹ Anakcuan tzꞌekta̱nanbilakat xban li chꞌochꞌ x-ucꞌac re lix quiqꞌuel la̱ cui̱tzꞌin xacamsi.

¹² Nak ta̱trabaji li chꞌochꞌ, incꞌaꞌ chic ta̱u̱chi̱nk la̱ cuacui̱mk. Ta̱beni a̱cuib saꞌ xbe̱n li ruchichꞌochꞌ. Yalak bar a̱cue a̱cuu. Ut ma̱ jaruj tathila̱nk, chan li Dios re.

¹³ Ut quixye laj Caín re li Ka̱cuaꞌ Dios: —Kꞌaxal ra xtojbal rix li ma̱c li xinba̱nu. Ma̱min tincuy.

¹⁴ Xina̱cuisi saꞌ li naꞌajej aꞌin ut incꞌaꞌ chic tina̱cuil. Junes xbeninquil cuib aj chic tinba̱nu saꞌ ruchichꞌochꞌ. Ut yalak ani ta̱taꞌok cue, tinixcamsi, chan.

¹⁵ Li Dios quixye re: —Li ani ta̱camsi̱nk a̱cue, aꞌan cuukub sut xtojbal rix lix ma̱c tinqꞌue, chan. Chirix aꞌan li Dios quixqꞌue jun li retalil laj Caín re nak yalak ani ta̱taꞌok re incꞌaꞌ tixcamsi.

¹⁶ Qui-el laj Caín chiru li Ka̱cuaꞌ Dios. Ut co̱ chi cua̱nc saꞌ jun li naꞌajej Nod xcꞌabaꞌ li cuan saꞌ releb sakꞌe re li Edén.

Eb li ralal xcꞌajol laj Caín

¹⁷ Laj Caín quicuan riqꞌuin li rixakil. Li ixk aꞌan quicana chi yaj aj ixk. Lix cꞌulaꞌal li quiyoꞌla, aj Enoc queꞌxqꞌue chokꞌ xcꞌabaꞌ. Laj Caín quixyi̱b jun li tenamit ut Enoc quixqꞌue chokꞌ xcꞌabaꞌ li tenamit xban nak aꞌan xcꞌabaꞌ li ralal.

¹⁸ Laj Enoc quicuan jun ralal aj Irad xcꞌabaꞌ. Laj Irad, aꞌan xyucuaꞌ laj Mehujael; ut laj Mehujael, aꞌan xyucuaꞌ laj Metusael; ut laj Metusael, aꞌan xyucuaꞌ laj Lamec.

¹⁹ Laj Lamec quicuan cuib li rixakil. Li jun xAda xcꞌabaꞌ ut li jun chic xZila xcꞌabaꞌ.

²⁰ Ut lix Ada quicuan jun lix cꞌulaꞌal. Aj Jabal queꞌxqꞌue chokꞌ xcꞌabaꞌ. Eb li ralal xcꞌajol laj Jabal, aꞌaneb li queꞌcuan saꞌ eb li muheba̱l yi̱banbil riqꞌuin tꞌicr. Ut eb aꞌan aj qꞌuiresinel xul.

²¹ Laj Jabal quicuan jun ri̱tzꞌin aj Jubal xcꞌabaꞌ. Eb li ralal xcꞌajol laj Jubal, aꞌaneb li nequeꞌchꞌeꞌoc arpa ut xo̱lb.

²² Lix Zila quicuan ajcuiꞌ jun lix cꞌulaꞌal. Aj Tubal-caín queꞌxqꞌue chokꞌ xcꞌabaꞌ. Laj Tubal-caín, aꞌan aj tenol chꞌi̱chꞌ. Ut li chꞌi̱chꞌ li naxtrabaji, aꞌan bronce ut hierro. Laj Tubal-caín quicuan jun li ranab xNaama xcꞌabaꞌ.

²³ Saꞌ jun li cutan laj Lamec quixye reheb li rixakil: —Cherabihak li oc cue chixyebal e̱re, la̱at Ada ut la̱at Zila. La̱ex, cuixakilex, abihomak li cꞌaꞌru tinye. Xincamsi jun li cui̱nk xban nak xinixyocꞌ. Xma̱c nak xinixsacꞌ, xincamsi aꞌan.

²⁴ Cui cuukub sut tixtoj rix xma̱c li ani ta̱camsi̱nk re laj Caín, li ani ta̱chꞌeꞌok cue la̱in, lix tojbal rix lix ma̱c laje̱b xca̱cꞌa̱l cua chi cuukutk chic tixcꞌul, chan laj Lamec reheb li rixakil.

²⁵ Ut laj Adán quicuan cuiꞌchic riqꞌuin li rixakil. Li rixakil quicuan jun chic lix cꞌulaꞌal. Aj Set quixqꞌue chokꞌ xcꞌabaꞌ. Li ixk quixye: —Li Dios quixqꞌue jun chic lin cꞌulaꞌal chokꞌ re̱kaj laj Abel li quixcamsi laj Caín, chan.

²⁶ Ut mokon chic laj Set quicuan jun li ralal. Aj Enós quixqꞌue chokꞌ xcꞌabaꞌ. Nak ac cuan chic laj Enós, queꞌxtiquib xchꞌutubanquileb rib re xlokꞌoninquil li Dios.