Génesis 36 - Li Santil hu

Eb li ralal xcꞌajol laj Esaú

¹ Aꞌaneb aꞌin li ralal xcꞌajol laj Esaú, li nayeman ajcuiꞌ Edom re.

² Laj Esaú quisumla riqꞌuin oxib chi ixk aj cananeo. Aꞌaneb aꞌin lix cꞌabaꞌeb: lix Ada aꞌan lix rabin laj Elón aj hitita; lix Aholibama, aꞌan lix rabin laj Aná. Lix Aholibama, aꞌan li ri laj Zibeón aj heveo.

³ Ut li rox li rixakil, aꞌan lix Basemat. Aꞌan lix rabin laj Ismael. Laj Nebaiot, aꞌan li ras lix Basemat.

⁴ Laj Esaú quicuan jun li ralal riqꞌuin lix Ada. Aꞌan aj Elifaz xcꞌabaꞌ. Ut quicuan ajcuiꞌ jun li ralal riqꞌuin lix Basemat. Aꞌan laj Reuel xcꞌabaꞌ.

⁵ Ut laj Esaú quicuan oxib li ralal riqꞌuin lix Aholibama. Aꞌaneb aꞌin lix cꞌabaꞌeb; laj Jeús, laj Jaalam, ut laj Coré. Chixjunileb li o̱b chi ralal laj Esaú queꞌyoꞌla aran saꞌ li tenamit Canaán.

⁶ Laj Esaú qui-el saꞌ li naꞌajej li cuan cuiꞌ laj Jacob li ri̱tzꞌin. Quixcꞌameb li rixakil ut lix rabin ut li ralal chirix joꞌ eb ajcuiꞌ chixjunileb li cuanqueb riqꞌuin. Quixcꞌam chixjunileb lix queto̱mk joꞌ ajcuiꞌ li cꞌaꞌru re li joꞌ qꞌuial li queꞌtam aran Canaán.

⁷ Joꞌcan nak queꞌel aran xban nak kꞌaxal nabal li cꞌaꞌak re ru cuan reheb ut incꞌaꞌ chic natzꞌakloc lix naꞌajeb lix queto̱mk. Joꞌcan nak queꞌel saꞌ li naꞌajej li cuanqueb cuiꞌ.

⁸ Joꞌcan nak laj Esaú co̱ chi cua̱nc saꞌ li naꞌajej li tzu̱l ru Seir xcꞌabaꞌ. Nayeman ajcuiꞌ aj Edom re laj Esaú.

⁹ Aꞌaneb aꞌin li ralal xcꞌajol laj Esaú. Laj Esaú, aꞌan lix xeꞌto̱nil yucuaꞌeb laj Edom li cuanqueb saꞌ li naꞌajej Seir li tzu̱l ru.

¹⁰ Aꞌaneb aꞌin lix cꞌabaꞌeb li ralal xcꞌajol laj Esaú: laj Elifaz, aꞌan li ralal riqꞌuin lix Ada. Laj Reuel, aꞌan li ralal riqꞌuin lix Basemat.

¹¹ Aꞌaneb aꞌin lix cꞌabaꞌeb li ralal laj Elifaz: laj Temán, laj Omar, laj Zefo, laj Gatam ut laj Cenaz.

¹² Laj Elifaz quicuan jun chic li ixk riqꞌuin. Aꞌan lix Timna xcꞌabaꞌ. Laj Elifaz quicuan jun li ralal aj Amalec xcꞌabaꞌ riqꞌuin lix Timna. Aꞌaneb li ralal xcꞌajol lix Ada li rixakil laj Esaú.

¹³ Aꞌaneb aꞌin lix cꞌabaꞌeb li ralal laj Reuel: laj Nahat, laj Zera, laj Sama ut laj Miza. Aꞌaneb li ralal xcꞌajol laj Esaú riqꞌuin lix Basemat.

¹⁴ Lix Aholibama, aꞌan li rox rixakil laj Esaú. Laj Esaú quicuan ralal riqꞌuin. Aꞌaneb aꞌin lix cꞌabaꞌeb: laj Jeús, laj Jaalam ut laj Coré. Lix Aholibama aꞌan lix rabin laj Aná li ralal laj Zibeón.

¹⁵ Li queꞌtaklan saꞌ xbe̱neb li ralal xcꞌajol laj Esaú, aꞌaneb li ralal laj Elifaz li asbej saꞌ xya̱nkeb li ralal xcꞌajol laj Esaú. Aꞌaneb aꞌin lix cꞌabaꞌeb: laj Temán, laj Omar, laj Zefo ut laj Cenaz,

¹⁶ joꞌ eb ajcuiꞌ laj Coré, laj Gatam, ut laj Amalec. Aꞌaneb aꞌin li queꞌtaklan saꞌ xbe̱neb li ralal xcꞌajol laj Elifaz saꞌ li tenamit Edom. Aꞌaneb li ri lix Ada.

¹⁷ Laj Reuel, aꞌan li ralal laj Esaú. Eb li ralal laj Reuel, aꞌaneb aꞌin: laj Nahat, laj Zera, laj Sama ut laj Miza. Aꞌaneb li queꞌtaklan saꞌ xbe̱neb li ralal xcꞌajol laj Reuel saꞌ li tenamit Edom. Aꞌaneb li ri laj Esaú riqꞌuin lix Basemat.

¹⁸ Lix Aholibama li rixakil laj Esaú, aꞌan lix rabin laj Aná. Aꞌaneb aꞌin li xcꞌabaꞌeb li ralal laj Esaú riqꞌuin lix Aholibama: laj Jeús, laj Jaalam, ut laj Coré.

¹⁹ Aꞌaneb li ralal xcꞌajol laj Esaú, li nayeman ajcuiꞌ aj Edom re. Aꞌaneb li queꞌtaklan saꞌ lix tenamiteb.

²⁰ Eb laj horeo queꞌcuan ajcuiꞌ saꞌ li naꞌajej aꞌan. Laj Seir aꞌan aj horeo. Aꞌaneb aꞌin li ralal laj Seir; laj Lotán, laj Sobal, ut laj Zibeón. Laj Aná, aꞌan li ralal laj Zibeón.

²¹ Laj Seir quicuan oxib chic li ralal. Aꞌaneb aꞌin lix cꞌabaꞌeb: laj Disón, laj Ezer ut laj Disán. Eb aꞌan queꞌtaklan saꞌ xbe̱neb laj horeo. Eb laj horeo, aꞌaneb li ralal xcꞌajol laj Seir. Eb aꞌan queꞌcuan saꞌ li tenamit Edom.

²² Aꞌaneb aꞌin li ralal laj Lotán: laj Hori, ut laj Hemam. Ut lix Timna, aꞌan li ri̱tzꞌin laj Lotán.

²³ Aꞌaneb aꞌin li ralal laj Sobal; laj Alván, laj Manahat, laj Ebal, laj Sefo ut laj Onam.

²⁴ Aꞌaneb aꞌin li ralal laj Zibeón: laj Aja, ut laj Aná. Laj Aná, aꞌan li quitaꞌoc re li yuꞌam haꞌ saꞌ li chaki chꞌochꞌ nak yo̱ chirilbaleb lix bu̱r lix yucuaꞌ.

²⁵ Laj Aná quicuan jun li ralal laj Disón xcꞌabaꞌ. Quicuan ajcuiꞌ jun xrabin xAholibama xcꞌabaꞌ.

²⁶ Aꞌaneb aꞌin li ralal laj Disón: laj Hemdán, laj Esbán, laj Itrán, ut laj Querán.

²⁷ Ut eb li ralal laj Ezer, aꞌaneb aꞌin: laj Bilhán, laj Zaaván ut laj Acán.

²⁸ Aꞌaneb aꞌin li ralal laj Disán: laj Uz ut laj Arán.

²⁹ Aꞌaneb aꞌin li nequeꞌtaklan saꞌ xbe̱n li tenamit Seir: laj Lotán, laj Sobal, laj Zibeón, laj Aná,

³⁰ joꞌ eb ajcuiꞌ laj Disón, laj Ezer ut laj Disán. Eb aꞌan queꞌtaklan saꞌ xbe̱neb laj horeo. Eb li cui̱nk aꞌin, aꞌaneb li queꞌtaklan saꞌ xbe̱neb li ju̱nk chꞌu̱tal li ralal xcꞌajoleb.

³¹ Nak toj ma̱jiꞌ nacuan xreyeb laj Israel, aꞌaneb aꞌin li queꞌtaklan saꞌ li tenamit Edom.

³² Laj Bela, li ralal laj Beor, aꞌan li quicuan chokꞌ rey saꞌ li naꞌajej Edom. Dinaba xcꞌabaꞌ li tenamit li quicuan cuiꞌ chi takla̱nc laj Bela.

³³ Nak quicam laj Bela, laj Jobab qui-oc chokꞌ re̱kaj. Laj Jobab, aꞌan li ralal laj Zera li chalenak chak Bosra.

³⁴ Nak quicam laj Jobab, laj Husam qui-oc chokꞌ re̱kaj. Aꞌan li chalenak chak Temán.

³⁵ Nak quicam laj Husam, laj Hadad qui-oc chokꞌ re̱kaj. Laj Hadad, aꞌan li ralal laj Bedad. Laj Bedad, aꞌan li quinumta saꞌ xbe̱neb laj Madián nak queꞌpletic saꞌ li naꞌajej Moab. Avit xcꞌabaꞌ li tenamit li quicuan cuiꞌ chi takla̱nc laj Hadad.

³⁶ Nak quicam laj Hadad, aꞌ chic laj Samla qui-oc chokꞌ re̱kaj. Laj Samla, aꞌan chalenak chak saꞌ li tenamit Masreca.

³⁷ Nak quicam laj Samla, aꞌ chic laj Saúl qui-oc chokꞌ re̱kaj. Laj Saúl, aꞌan chalenak chak saꞌ li tenamit Rehobot li cuan chire li nimaꞌ Éufrates.

³⁸ Nak quicam laj Saúl, laj Baal-hanán li ralal laj Acbor qui-oc chokꞌ re̱kaj.

³⁹ Nak quicam laj Baal-hanán, aꞌ chic laj Hadar qui-oc chokꞌ re̱kaj. Pau xcꞌabaꞌ li tenamit li quicuan cuiꞌ chi takla̱nc laj Hadar. Ut li rixakil laj Hadar, aꞌan lix Mehetabel xcꞌabaꞌ. Aꞌan lix coꞌ lix Matred, lix rabin laj Mezaab.

⁴⁰ Aꞌaneb aꞌin lix cꞌabaꞌeb li queꞌtaklan saꞌ xbe̱neb li ju̱nk chꞌu̱tal li ralal xcꞌajol laj Esaú. Li tenamit li queꞌtaklan cuiꞌ quiqꞌueheꞌ xcꞌabaꞌeb joꞌ xcꞌabaꞌeb li queꞌtaklan saꞌ xbe̱neb. Aꞌaneb aꞌin lix cꞌabaꞌeb: laj Timna, laj Alva, ut laj Jetet,

⁴¹ ut eb laj Aholibama, laj Ela, ut laj Pinón,

⁴² ut eb laj Cenaz, laj Temán, ut laj Mibzar,

⁴³ joꞌ eb ajcuiꞌ laj Magdiel ut laj Iram. Chixjunil li cꞌabaꞌej tzꞌi̱banbil arin, aꞌaneb li queꞌtaklan saꞌ xbe̱neb li ralal xcꞌajol laj Esaú. Tzꞌi̱banbil ajcuiꞌ lix cꞌabaꞌeb li tenamit li queꞌcuan cuiꞌ chi takla̱nc. Lix xeꞌto̱nil yucuaꞌeb laj Edom, aꞌan laj Esaú.