Génesis 35 - Li Santil hu

Li Dios quirosobtesi laj Jacob saꞌ li naꞌajej Bet-el

¹ Ut li Dios quixye re laj Jacob: —Anakcuan yi̱bomak li cꞌaꞌru e̱re ut texxic saꞌ li tenamit Bet-el ut texcana̱k aran. Ut ta̱yi̱b junak li artal re tina̱lokꞌoni cuiꞌ. Aꞌan li naꞌajej li quincꞌutbesi cuiꞌ cuib cha̱cuu nak cat-e̱lelic chiru laj Esaú la̱ cuas, chan li Dios.

² Laj Jacob quixye reheb li ralal xcꞌajol joꞌ eb ajcuiꞌ li cuanqueb rubel xtakl: —Isihomak chixjunileb li jalanil dios li cuanqueb e̱riqꞌuin. Tex-ati̱nk ut texjalok chokꞌ retalil nak te̱canab xba̱nunquil li ma̱usilal.

³ Ut yoꞌkeb saꞌ junpa̱t saꞌ li naꞌajej Bet-el. Aran tinyi̱b jun li artal re xlokꞌoninquil li tzꞌakal Dios, li Dios li quitenkꞌan chak cue nak cuanquin saꞌ raylal. Aꞌan qui-ochbenin chak cue nak quilajinnumeꞌ chak yalak bar, chan.

⁴ Eb aꞌan queꞌxkꞌaxtesi saꞌ rukꞌ laj Jacob chixjunileb li jalanil dios. Queꞌxkꞌaxtesiheb ajcuiꞌ chixjunileb li caꞌxic li queꞌxqꞌue xcuanquil. Laj Jacob quixmuk li cꞌaꞌak re ru aꞌin saꞌ chꞌochꞌ rubel jun to̱n li cheꞌ ji. Li cheꞌ aꞌan nachꞌ cuan riqꞌuin li tenamit Siquem.

⁵ Li Dios quixqꞌue xxiuheb chixjunileb li tenamit li cuanqueb chi nachꞌ riqꞌuin li quicuan cuiꞌ laj Jacob. Xban nak queꞌxucuac, incꞌaꞌ queꞌxta̱ke laj Jacob re teꞌxpleti nak yo̱queb chi xic Bet-el.

⁶ Quicuulac laj Jacob saꞌ li naꞌajej Luz rochbeneb chixjunileb li yo̱queb chi xic chirix. Nayeman ajcuiꞌ Bet-el re. Li naꞌajej aꞌan cuan saꞌ xcue̱nt Canaán.

⁷ Laj Jacob quixyi̱b jun li artal ut quixqꞌue El-bet-el chokꞌ xcꞌabaꞌ li naꞌajej aꞌan. Quixqꞌue xcꞌabaꞌ chi joꞌcaꞌin xban nak aran quixcꞌutbesi rib li Dios chiru nak yo̱ chi e̱lelic chiru li ras.

⁸ Ut quicam lix Débora li quicuan chokꞌ xmo̱s li camenak Rebeca. Ut queꞌxbec xjulel rubel jun lix to̱nal ji ut aran queꞌxmuk nachꞌ riqꞌuin li tenamit Bet-el. Alón-bacut queꞌxqꞌue chokꞌ xcꞌabaꞌ li naꞌajej aꞌan.

⁹ Nak quisukꞌi chak laj Jacob Padan-aram, li Ka̱cuaꞌ Dios quixcꞌutbesi cuiꞌchic rib chiru. Ut aran laj Jacob qui-osobtesi̱c cuiꞌchic xban li Dios.

¹⁰ Li Ka̱cuaꞌ Dios quixye re: —La̱at aj Jacob a̱cꞌabaꞌ. Abanan anakcuan ma̱cuaꞌ chic aj Jacob teꞌxye a̱cue. Aj Israel chic a̱cꞌabaꞌ, chan. Joꞌcaꞌin nak li Dios quixqꞌue aj Israel chokꞌ xcꞌabaꞌ.

¹¹ Li Dios quixye re: —La̱in li Ka̱cuaꞌ Dios li kꞌaxal nim incuanquil. Chexqꞌui̱k ut cheꞌta̱mk la̱ cualal a̱cꞌajol. Riqꞌuineb la̱ cualal a̱cꞌajol teꞌcua̱nk li ni̱nki tenamit. Ut saꞌ xya̱nkeb ajcuiꞌ aꞌan teꞌcua̱nk ajcuiꞌ li rey.

¹² Li chꞌochꞌ li xinqꞌue re laj Abraham joꞌ ajcuiꞌ re laj Isaac, anakcuan tinkꞌaxtesi chokꞌ a̱cue. Ut nak tatca̱mk la̱at, tinkꞌaxtesi li chꞌochꞌ aꞌin reheb la̱ cualal a̱cꞌajol, chan li Dios.

¹³ Nak li Dios quirakeꞌ chi a̱tinac riqꞌuin laj Jacob, qui-el saꞌ li naꞌajej aꞌan.

¹⁴ Ut laj Jacob quixchap jun li pec ut quixxakab saꞌ li naꞌajej aꞌan chokꞌ retalil nak aran quia̱tinac li Dios riqꞌuin. Ut laj Jacob quixqꞌue li aceite joꞌ ajcuiꞌ li vino saꞌ xbe̱n li pec chokꞌ retalil nak li naꞌajej aꞌan osobtesinbil.

¹⁵ Laj Jacob quixqꞌue cuiꞌchic Bet-el chokꞌ xcꞌabaꞌ li naꞌajej aꞌan xban nak aꞌan li naꞌajej li quia̱tina̱c cuiꞌ xban li Dios.

Lix camic lix Raquel

¹⁶ Eb aꞌan queꞌel saꞌ li naꞌajej Bet-el. Toj cuan ma̱ nequeꞌcuulac saꞌ li tenamit Efrata nak quicuulac xcutanquil nak ta̱qꞌuira̱k lix Raquel. Abanan quicuan chꞌaꞌajquilal saꞌ xyoꞌlajic li cꞌulaꞌal.

¹⁷ Nak yo̱ chi yoꞌla̱c li cꞌulaꞌal, li ixk li yo̱ chi iloc re quixye: —Matcꞌoxlac. Te̱lom la̱ cꞌulaꞌal li xyoꞌla, chan.

¹⁸ Ut nak ac ca̱mc re, lix Raquel quixye: —Aj Benoni te̱qꞌue chokꞌ xcꞌabaꞌ li cꞌulaꞌal aꞌin, chan ut quicam. Abanan li yucuaꞌbej quixqꞌue aj Benjamín chokꞌ xcꞌabaꞌ.

¹⁹ Joꞌcaꞌin nak quicam lix Raquel ut quimukeꞌ saꞌ li be li naxic Efrata. Anakcuan Belén nayeman re li tenamit aꞌan.

²⁰ Laj Jacob quixxakab jun li nimla pec saꞌ xbe̱n li camenak Raquel chokꞌ retalil. Ut li pec aꞌan toj cuan aran anakcuan.

²¹ Laj Israel qui-el aran ut quixyi̱b lix muheba̱l jun pacꞌal li naꞌajej Migdal-edar xcꞌabaꞌ.

²² Nak ac cuanqueb chic saꞌ li naꞌajej aꞌan, laj Rubén quixchꞌic rib riqꞌuin lix Bilha li quicuan riqꞌuin lix yucuaꞌ joꞌ rixakil. Cꞌajoꞌ nak quijoskꞌoꞌ laj Israel nak quirabi cꞌaꞌru quixba̱nu li ralal. Cablaju eb li ralal laj Jacob queꞌcuan, li nayeman ajcuiꞌ aj Israel re.

Eb li ralal laj Jacob

²³ Aꞌaneb aꞌin li ralal li quicuan riqꞌuin lix Lea. Laj Rubén, aꞌan li asbej. Chirix chic aꞌan quicuan laj Simeón, laj Leví, laj Judá, laj Isacar ut laj Zabulón.

²⁴ Riqꞌuin lix Raquel queꞌcuan cuib li ralal laj Jacob. Aꞌaneb aꞌin lix cꞌabaꞌeb: laj José ut laj Benjamín.

²⁵ Ut quicuan ajcuiꞌ cuib li ralal riqꞌuin lix Bilha, lix mo̱s lix Raquel. Aꞌaneb aꞌin lix cꞌabaꞌeb: laj Dan ut laj Neftalí.

²⁶ Ut quicuan ajcuiꞌ cuib li ralal riqꞌuin lix Zilpa, lix mo̱s lix Lea. Aꞌaneb aꞌin lix cꞌabaꞌeb: laj Gad ut laj Aser. Aꞌaneb aꞌin li ralal laj Jacob, li queꞌyoꞌla saꞌ li naꞌajej Padan-aram.

Lix camic laj Isaac

²⁷ Laj Jacob co̱ saꞌ li tenamit Mamre chirilbal laj Isaac lix yucuaꞌ. Arba ut Hebrón nequeꞌxye re li tenamit aꞌan. Saꞌ ajcuiꞌ li naꞌajej aꞌan quicuan laj Abraham nak toj yoꞌyo̱k.

²⁸ Jun ciento riqꞌuin ca̱cꞌa̱l (180) chihab cuan re laj Isaac.

²⁹ Nak ac ti̱x chic chi us, laj Isaac quicam ut coxtauheb lix xeꞌto̱nil yucuaꞌ. Laj Esaú ut laj Jacob queꞌxmuk lix yucuaꞌeb nak quicam.