Génesis 34 - Li Santil hu

Lix Dina quichapeꞌ saꞌ pue̱rs xban laj Siquem

¹ Lix Dina aꞌan lix rabin laj Jacob riqꞌuin lix Lea. Lix Dina co̱ chirulaꞌaninquileb li xkaꞌal saꞌ li tenamit re nak tixnauheb ru.

² Laj Hamor, aj heveo, aꞌan li acuabej re li tenamit aꞌan. Li ralal laj Hamor, aꞌan laj Siquem. Nak laj Siquem quiril lix Dina, quixchap ut quixpuersi ru re nak ta̱cua̱nk riqꞌuin.

³ Riqꞌuin li cꞌaꞌru quixba̱nu laj Siquem, cꞌajoꞌ nak co̱ xchꞌo̱l chirix lix Dina, lix rabin laj Jacob. Ut qui-oc chixkꞌunbesinquil.

⁴ Laj Siquem quia̱tinac riqꞌuin laj Hamor lix yucuaꞌ ut quixye re, —Ba̱nu usilal cue, tzꞌa̱ma chokꞌ cuixakil li xkaꞌal aꞌan. La̱in tincuaj sumla̱c riqꞌuin, chan re.

⁵ Laj Jacob quirabi resil nak quichapeꞌ lix rabin xban laj Siquem. Ut aꞌan ma̱cꞌaꞌ quixye. Toj quiroybeni nak queꞌsukꞌi chak eb li ralal li cuanqueb chak chi iloc queto̱mk saꞌ cꞌaleba̱l.

⁶ Toj ma̱jiꞌ nequeꞌcuulac nak laj Hamor, xyucuaꞌ laj Siquem, co̱ chi a̱tinac riqꞌuin laj Jacob.

⁷ Nak eb li ralal laj Jacob queꞌrabi resil li cꞌaꞌru quicꞌulman, queꞌsukꞌi chak saꞌ junpa̱t. Eb aꞌan queꞌrahoꞌ saꞌ xchꞌo̱l ut queꞌchal ajcuiꞌ xjoskꞌileb xban nak nimla ma̱c chiruheb chixjunileb laj Israel nak laj Siquem quicuan riqꞌuin lix rabin laj Jacob. Incꞌaꞌ raj xru xba̱nu chi joꞌcan riqꞌuin junak xkaꞌal aj Israel.

⁸ Laj Hamor quia̱tinac riqꞌuineb ut quixye reheb: —Laj Siquem li cualal cꞌajoꞌ nak xco̱ xchꞌo̱l chirix li xkaꞌal. Ba̱nuhomak usilal, qꞌuehomak li xkaꞌal re ta̱sumla̱k riqꞌuin li cualal.

⁹ Us raj nak teꞌxcꞌam ribeb li kalal kacꞌajol re nak kechꞌalalak chic kib, chan. Li kalal la̱o teꞌsumla̱k riqꞌuineb le̱ rabin la̱ex. Ut le̱ ralal la̱ex teꞌsumla̱k riqꞌuineb li karabin la̱o.

¹⁰ La̱ex naru texcana̱k kiqꞌuin saꞌ li chꞌochꞌ aꞌin. Naru textrabajik ut naru texcua̱nk chi junaj cua arin. Te̱ba̱nu li cꞌanjel li cꞌaꞌru te̱raj ut naru ajcuiꞌ te̱lokꞌ le̱ chꞌochꞌ arin, chan.

¹¹ Laj Siquem quixye re lix yucuaꞌ lix Dina joꞌ ajcuiꞌ reheb li ras ut li ri̱tzꞌin: —Chixcꞌulak e̱chꞌo̱l li cꞌaꞌru xyeman e̱re. Aꞌ yal cꞌaꞌru te̱patzꞌ cue, la̱in tinqꞌue e̱re.

¹² Yehomak cue joꞌ nimal te̱raj. Usta nabal, la̱in tinqꞌue e̱re. Mexcꞌoxlac riqꞌuin aꞌan. Qꞌuehomak cue li xkaꞌal re nak tinsumla̱k riqꞌuin, chan.

¹³ Xban nak ac nequeꞌxnau nak laj Siquem quixchap saꞌ pue̱rs lix Dina, eb li ras riqꞌuin balakꞌ aj a̱tin queꞌchakꞌoc chiruheb laj Hamor ut laj Siquem.

¹⁴ Queꞌxye reheb: —Incꞌaꞌ naru takaqꞌue li kanab re junak cui̱nk ma̱jiꞌ naxcꞌul li circuncisión xban nak xuta̱nal aꞌan saꞌ kaya̱nk la̱o, chanqueb.

¹⁵ Cui chixjunilex la̱ex te̱cꞌul li circuncisión joꞌ nak xkacꞌul la̱o, la̱o takasume li cꞌaꞌru xaye ke.

¹⁶ Chi joꞌcaꞌin tixcꞌul kachꞌo̱l re nak le̱ ralal teꞌsumla̱k riqꞌuineb li karabin ut li kalal la̱o teꞌsumla̱k riqꞌuineb le̱ rabin. Ut la̱o tocua̱nk saꞌ e̱ya̱nk ut takajunaji kib.

¹⁷ Abanan cui la̱ex incꞌaꞌ te̱cꞌul li circuncisión, la̱o toe̱lk saꞌ e̱ya̱nk ut takacꞌam li kanab chikix nak toxic, chanqueb li ralal laj Jacob.

¹⁸ Ut laj Hamor joꞌ ajcuiꞌ laj Siquem queꞌxcꞌul xchꞌo̱l li cꞌaꞌru quiyeheꞌ reheb.

¹⁹ Laj Siquem saꞌ junpa̱t quixcꞌul li circuncisión xban nak cꞌajoꞌ nak nacuulac chiru lix rabin laj Jacob. Laj Siquem, aꞌan li kꞌaxal oxlokꞌinbil chiruheb li cuanqueb saꞌ rochoch lix yucuaꞌ.

²⁰ Ut laj Siquem rochben lix yucuaꞌ, queꞌco̱eb saꞌ li oqueba̱l re li tenamit li nequeꞌxchꞌutub cuiꞌ ribeb li cristian. Ut queꞌoc chi a̱tinac riqꞌuineb li cuanqueb aran.

²¹ Queꞌxye reheb: —Eb li cui̱nk aꞌin, aꞌan kami̱gueb. Teꞌcua̱nk saꞌ kaya̱nk ut teꞌtrabajik arin. Ut tzꞌakal ajcuiꞌ li naꞌajej chokꞌ reheb aꞌan. Chi joꞌcan ta̱ru̱k tosumla̱k riqꞌuineb lix rabin. Ut eb aꞌan teꞌsumla̱k riqꞌuineb li karabin la̱o.

²² Abanan eb aꞌan xeꞌxye nak tento takacꞌul li circuncisión joꞌ nak queꞌxcꞌul chak eb aꞌan re nak junajak chic ku.

²³ Ut chixjunil li cꞌaꞌru cuan reheb la̱o toe̱chani̱nk re. Joꞌ ajcuiꞌ eb lix queto̱mk. Abanan tento nak takacꞌul li circuncisión re nak teꞌcana̱k arin saꞌ kaya̱nk, chanqueb.

²⁴ Chixjunileb li cui̱nk saꞌ li tenamit aꞌan queꞌxcꞌul xchꞌo̱l li cꞌaꞌru quiyeheꞌ reheb xbaneb laj Hamor ut laj Siquem. Ut chixjunileb queꞌxcꞌul li circuncisión.

²⁵ Abanan saꞌ rox li cutan nak toj ra cuanqueb li cui̱nk xban li circuncisión, cuib li ralal laj Jacob, laj Simeón rochben laj Leví, queꞌco̱eb chi pletic saꞌ li tenamit aꞌan chi ma̱cꞌaꞌ saꞌ xchꞌo̱leb. Chixjunileb li cui̱nk aꞌin queꞌcamsi̱c chi chꞌi̱chꞌ xbaneb laj Simeón ut laj Leví, li raseb lix Dina.

²⁶ Riqꞌuin kꞌesnal chꞌi̱chꞌ queꞌxcamsi laj Hamor joꞌ ajcuiꞌ laj Siquem. Saꞌ junpa̱t queꞌrisi lix Dina saꞌ rochocheb laj Siquem, ut queꞌxcꞌam chirix nak queꞌco̱eb.

²⁷ Ut eb li jun chꞌol chic li ralal laj Jacob queꞌcuulac saꞌ li tenamit. Quilajeꞌnumeꞌ saꞌ xbe̱neb li camenak ut quilajeꞌrisi chixjunil li cꞌaꞌak re ru li cuan saꞌ li tenamit. Queꞌxba̱nu chi joꞌcaꞌin xban li ma̱usilal li quixba̱nu re lix Dina laj Siquem.

²⁸ Quilajeꞌxcꞌam ajcuiꞌ chixjunil li queto̱mk li cuan aran, joꞌ ajcuiꞌ li cꞌaꞌru cuan reheb, joꞌ saꞌ tenamit joꞌ saꞌ cꞌaleba̱l.

²⁹ Quilajeꞌrelkꞌa li cꞌaꞌru cuan saꞌ li rochocheb. Queꞌxcꞌam ajcuiꞌ chixjunileb li ixk joꞌ eb ajcuiꞌ li cocꞌal.

³⁰ Laj Jacob quixye re laj Simeón joꞌ ajcuiꞌ re laj Leví: —La̱ex xeqꞌue jun li nimla raylal saꞌ inbe̱n la̱in. Anakcuan chixjunileb li cristian saꞌ li naꞌajej aꞌin xicꞌ chic tineꞌril, eb laj cananeo ut eb laj ferezeo. Ma̱re teꞌxchꞌutub ribeb re teꞌpletik kiqꞌuin. Ut la̱o coꞌxibo ajcuiꞌ. ¿Cꞌaꞌru takaba̱nu? To-osokꞌ chikajunilo, chan laj Jacob.

³¹ Ut eb li ralal queꞌchakꞌoc ut queꞌxye re: —¿Ma xacuaj raj la̱at nak xkacanab li ki̱tzꞌin re nak ta̱osokꞌ joꞌ junak ixk yibru xnaꞌleb? chanqueb re lix yucuaꞌ.