Génesis 3 - Li Santil hu

Li cui̱nk naxkꞌet ra̱tin li Dios

¹ Li cꞌantiꞌ kꞌaxal cuiꞌchic cuan xnaꞌleb chiruheb chixjunileb li xul li quixyoꞌobtesi li Ka̱cuaꞌ Dios. Kꞌaxal se̱b xchꞌo̱l chixba̱nunquil li incꞌaꞌ us. Li cꞌantiꞌ quixye re li ixk: —¿Ma relic chi ya̱l nak li Dios quixye e̱re nak incꞌaꞌ naru te̱lou li ru chixjunileb li cheꞌ li cuan saꞌ xnaꞌaj li acui̱mk?—

² Ut li ixk quixye re li cꞌantiꞌ: —Naru takalou ru chixjunil li cheꞌ cuan saꞌ xnaꞌaj li acui̱mk.

³ Caꞌaj cuiꞌ li ru li cheꞌ li cuan saꞌ xyi incꞌaꞌ naru nakalou. Li Dios quixye ke nak incꞌaꞌ naru nakalou li ru aꞌan chi moco takachꞌeꞌ. “Cui te̱lou ru li cheꞌ aꞌan, texca̱mk”, chan ke.

⁴ Tojoꞌnak li cꞌantiꞌ quixye re li ixk: —Incꞌaꞌ. Relic chi ya̱l nak incꞌaꞌ texca̱mk.

⁵ Li Dios naxnau nak jokꞌe te̱lou ru li cheꞌ, te̱nau chic chixjunil. Chanchanakex chic li Dios. Te̱nau chic cꞌaꞌru li us ut cꞌaꞌru li incꞌaꞌ us, chan.

⁶ Ut li ixk quiril nak li ru li cheꞌ sa xloubal. Chꞌinaꞌus na-iloc ru li cheꞌ. Ut quixra ru xloubal re nak cua̱nk chic xnaꞌleb. Quixsicꞌ ru li cheꞌ. Quixlou ut quixqꞌue ajcuiꞌ re lix be̱lom. Ut chi xcabichaleb queꞌxlou ru li cheꞌ.

⁷ Tojoꞌnak chi xcabichaleb queꞌxnau chic cꞌaꞌru li us ut cꞌaꞌru li incꞌaꞌ us. Queꞌxqꞌue retal nak tꞌustꞌu̱queb. Queꞌxboj xak li cheꞌ higuera xcꞌabaꞌ chokꞌ ru̱chileb li rakꞌ. Ut riqꞌuin aꞌan queꞌxtzꞌap ribeb.

⁸ Nak ac x-ecuu chic, queꞌrabi nak yo̱ chi be̱c li Ka̱cuaꞌ Dios saꞌ xnaꞌaj li acui̱mk. Li cui̱nk rochben li rixakil queꞌxmuk rib chiru li Ka̱cuaꞌ Dios saꞌ xya̱nkeb li cheꞌ.

⁹ Li Ka̱cuaꞌ Dios quixbok li cui̱nk ut quixye re: —Adán, ¿bar cuancat?—

¹⁰ Ut laj Adán quichakꞌoc ut quixye: —Xcuabi nak yo̱cat chi be̱c saꞌ xnaꞌaj li acui̱mk. Ut xinxucuac xban nak tꞌustꞌu̱quin. Xinmuk cuib cha̱cuu, chan.

¹¹ Li Dios quixye re: —¿Ani xyehoc a̱cue nak tꞌustꞌu̱cat? ¿Ma xalou ru li cheꞌ li xinye a̱cue nak incꞌaꞌ ta̱lou? chan.

¹² Quichakꞌoc li cui̱nk ut quixye: —Li ixk li xaqꞌue chokꞌ cuochben, aꞌan xqꞌuehoc cue li ru li cheꞌ. Ut xinlou, chan.

¹³ Tojoꞌnak li Ka̱cuaꞌ Dios quixye re li ixk: —¿Cꞌaꞌru xaba̱nu?— Ut quichakꞌoc li ixk ut quixye: —Li cꞌantiꞌ xbalakꞌin cue. Xban aꞌan nak xinlou ru li cheꞌ, chan.

¹⁴ Tojoꞌnak li Ka̱cuaꞌ Dios quixye re li cꞌantiꞌ: —Xban nak xaba̱nu aꞌin, tzꞌekta̱nanbilakat chic chiruheb chixjunileb li xul. Ta̱jucuqui a̱cuib ut chiru a̱saꞌ chic tatbe̱k. Chꞌochꞌ chic ta̱lou chi junelic.—

¹⁵ Li Dios quixye ajcuiꞌ re li cꞌantiꞌ: —La̱in tinqꞌue raylal saꞌ e̱ya̱nk re nak xicꞌ chic te̱ril e̱rib la̱at ut li ixk. Xicꞌ teꞌril rib la̱ cualal a̱cꞌajol riqꞌuineb li ralal xcꞌajol li ixk. Saꞌ junak cutan la̱at ta̱rahobtesi li rit rok junak reheb li ralal xcꞌajol li ixk, ut aꞌan tixpuqꞌui la̱ jolom.

¹⁶ Ut li Dios quixye re li ixk: —Kꞌaxal cuiꞌchic nabal li raylal tinqꞌue saꞌ a̱be̱n nak cua̱nkat chi yaj aj ixk. Riqꞌuin raylal teꞌyoꞌla̱k la̱ cocꞌal. Ut ta̱cuaj nak cua̱nk la̱ be̱lom a̱cuiqꞌuin ut aꞌan ta̱takla̱nk a̱cue.

¹⁷ Ut li Dios quixye re laj Adán: —Xban nak xapa̱b re la̱ cuixakil ut xalou ru li cheꞌ li xinye a̱cue nak incꞌaꞌ ta̱lou, a̱ma̱c la̱at nak tzꞌekta̱nanbilak chic li chꞌochꞌ chi junelic. Ra sa chic nak ta̱tau la̱ tzacae̱mk joꞌ najtil tatcua̱nk saꞌ ruchichꞌochꞌ.

¹⁸ Qꞌuix ut pim ta̱e̱lk chiru li chꞌochꞌ. Ut la̱at ta̱tzaca li acui̱mk li ta̱e̱lk saꞌ li chꞌochꞌ li ta̱cꞌanjela ru.

¹⁹ Cau tattrabajik ut riqꞌuin la̱ tikob tatcuaꞌak. Joꞌcaꞌin nak tatcua̱nk toj retal tatca̱mk ut tatsukꞌi̱k cuiꞌchic chꞌochꞌ. Pacꞌbil chꞌochꞌ oquenakat chak ut chꞌochꞌ ajcuiꞌ tatsukꞌi̱k nak tat-osokꞌ, chan li Dios re laj Adán.

²⁰ Ut laj Adán quixqꞌue xEva chokꞌ xcꞌabaꞌ li rixakil xban nak aꞌan xbe̱n xnaꞌeb chixjunil li toj teꞌyoꞌla̱k.

²¹ Ut li Ka̱cuaꞌ Dios quixyi̱b rakꞌ li cui̱nk ut li ixk riqꞌuin rix xul ut quixtikibeb.

²² Quixye li Ka̱cuaꞌ Dios: —Anakcuan li cui̱nk juntakꞌe̱t chic kiqꞌuin la̱o. Naxnau chic li us ut li incꞌaꞌ us. Tento takisi saꞌ li naꞌajej Edén re nak incꞌaꞌ tixsicꞌ ut tixlou ru li cheꞌ li naqꞌuehoc junelic yuꞌam, ut ta̱cua̱nk lix yuꞌam chi junelic, chan.

²³ Joꞌcan nak li Dios quirisiheb saꞌ li naꞌajej Edén ut quixqꞌue chixtrabajinquil ru li chꞌochꞌ li quipaqꞌueꞌ cuiꞌ.

²⁴ Li Dios quirisiheb li cui̱nk ut li ixk. Quixqꞌueheb li querubines aran saꞌ releb sakꞌe saꞌ li naꞌajej Edén. Quixqꞌueheb saꞌ li oqueba̱l re li naꞌajej re nak teꞌril nak ma̱ ani ta̱oc. Ut quixqꞌue jun li chꞌi̱chꞌ yo̱ xxamlel ut yo̱ xsutinquil rib yalak bar re xrambal ru li be re nak ma̱ ani ta̱oc cuan cuiꞌ li cheꞌ li naqꞌuehoc junelic yuꞌam.