Génesis 17 - Li Santil hu

Li circuncisión nacꞌanjelac chokꞌ retalil li contrato

¹ Nak ac bele̱laju roꞌcꞌa̱l (99) chihab cuan re laj Abram, li Ka̱cuaꞌ Dios quixcꞌutbesi rib chiru ut quixye re: —La̱in li Ka̱cuaꞌ Dios li kꞌaxal nim incuanquil. Chatcua̱nk saꞌ xya̱lal chicuu ut ti̱cak a̱chꞌo̱l.

² La̱in tinxakab xcuanquil li contrato li xinba̱nu a̱cuiqꞌuin. La̱in tinqꞌue chi qꞌuia̱nc la̱ cualal a̱cꞌajol, chan li Ka̱cuaꞌ Dios re laj Abram.

³ Laj Abram quicuikꞌla ut quixxulub lix jolom saꞌ chꞌochꞌ.

⁴ Ut li Dios quixye ajcuiꞌ re laj Abram: —Li contrato li tinba̱nu a̱cuiqꞌuin, aꞌan aꞌin: La̱at tat-oc chokꞌ xxeꞌto̱nil yucuaꞌeb nabaleb chi tenamit, chan.

⁵ —Anakcuan ma̱cuaꞌ chic aj Abram la̱ cꞌabaꞌ. Aj Abraham chic a̱cꞌabaꞌ xban nak xatinqꞌue chokꞌ xxeꞌto̱nil yucuaꞌeb li qꞌuila tenamit.

⁶ Relic chi ya̱l nak tebinqꞌue chi qꞌuia̱nc la̱ cualal a̱cꞌajol. Nabalak le̱ tenamit ut teꞌcua̱nk ajcuiꞌ le̱ rey saꞌ le̱ tenamit chixju̱nkaleb.

⁷ Junelic ta̱cua̱nk xcuanquil li contrato li xinba̱nu a̱cuiqꞌuin joꞌ ajcuiꞌ riqꞌuineb la̱ cualal a̱cꞌajol. La̱in la̱ Dios la̱at, ut la̱in ajcuiꞌ xDioseb la̱ cualal a̱cꞌajol.

⁸ Li chꞌochꞌ Canaán li cuancat cuiꞌ anakcuan tinqꞌue a̱cue ut eb la̱ cualal a̱cꞌajol teꞌe̱chani̱nk re chi junaj cua. La̱inak lix Dioseb chixjunileb la̱ cualal a̱cꞌajol, chan.

⁹ Ut li Dios quixye ajcuiꞌ re laj Abraham: —Tento nak la̱at ta̱ba̱nu li contrato cuiqꞌuin la̱in. Joꞌcan ajcuiꞌ teꞌxba̱nu la̱ cualal a̱cꞌajol.

¹⁰ La̱at ta̱ba̱nu li cꞌaꞌru tinye a̱cue. Joꞌcan ajcuiꞌ teꞌxba̱nu chixjunileb la̱ cualal a̱cꞌajol. Ut aꞌan aꞌin li tinye e̱re. Li junju̱nk chi cui̱nk saꞌ e̱ya̱nk, tento nak teꞌxcꞌul li circuncisión.

¹¹ Ut li circuncisión aꞌan aꞌin: Ta̱setma̱nk caꞌchꞌinak xtzꞌu̱mal ruꞌuj xtzꞌejcual li cui̱nk. Ta̱ba̱nu aꞌin chokꞌ retalil li contrato li xkaba̱nu chi kibil kib.

¹² Li junju̱nk chi cꞌulaꞌal te̱lom tixcꞌul li circuncisión nak cua̱nk cuakxakib cutan xyoꞌlajic. Aꞌin lin chakꞌrab li ta̱ticla̱k anakcuan ut ta̱uxma̱nk chalen. Joꞌcan ta̱uxma̱nk reheb chixjunileb li cocꞌ te̱lom saꞌ xya̱nkeb la̱ cualal a̱cꞌajol joꞌ eb ajcuiꞌ la̱ lokꞌbil mo̱s usta jalan xtenamiteb.

¹³ Tento nak chixjunileb la̱ cualal a̱cꞌajol teꞌxcꞌul li circuncisión. Joꞌcan ajcuiꞌ eb la̱ mo̱s cui̱nk. Chi joꞌcaꞌin ta̱cana̱k jun retalil riqꞌuin le̱ tzꞌejcual. Aꞌan retalil li contrato li xkaba̱nu chi kibil kib.

¹⁴ Cui junak cui̱nk incꞌaꞌ tixcꞌul li circuncisión, aꞌan tzꞌekta̱nanbilak xban nak aꞌan xkꞌet lin chakꞌrab, chan li Dios.

¹⁵ Li Dios quixye ajcuiꞌ re laj Abraham: —Anakcuan ma̱cuaꞌak chic xSarai xcꞌabaꞌ la̱ cuixakil; xSara chic ta̱qꞌuema̱nk chokꞌ xcꞌabaꞌ.

¹⁶ La̱in tincuosobtesi lix Sara. Ut ta̱cua̱nk la̱ cualal riqꞌuin. Relic chi ya̱l tincuosobtesi aꞌan. Lix Sara ta̱cua̱nk nabaleb li ralal xcꞌajol. Aꞌan ta̱oc chokꞌ xnaꞌeb nabal chi tenamit li toj teꞌyoꞌla̱k mokon. Li ralal xcꞌajol lix Sara teꞌoc chokꞌ xreyeb li tenamit, chan li Dios.

¹⁷ Laj Abraham quicuikꞌla ut quixxulub lix jolom saꞌ chꞌochꞌ ut qui-oc chi seꞌec. Laj Abraham quixye saꞌ xchꞌo̱l: —¿Ma kꞌaxal ya̱l ta cuiꞌ nak ta̱cua̱nk junak cualal nak ac xinba̱nu li jun ciento chihab? Ut lix Sara, ¿ma ta̱cua̱nk ta biꞌ junak lix cꞌulaꞌal nak ac xba̱nu li laje̱b roꞌcꞌa̱l (90) chihab? chan.

¹⁸ Ut laj Abraham quixye re li Dios, —Usan cui laj Ismael tixcꞌul li usilal a̱cuiqꞌuin, chan.

¹⁹ Li Dios quixye re laj Abraham: —Ac xinye a̱cue nak lix Sara ta̱cua̱nk lix cꞌulaꞌal. Aj Isaac ta̱qꞌue chokꞌ xcꞌabaꞌ. La̱in tinba̱nu ajcuiꞌ lin contrato chi junelic riqꞌuin aꞌan joꞌ ajcuiꞌ riqꞌuineb li ralal xcꞌajol, chan.

²⁰ —Xcuabi cꞌaꞌru xaye chirix laj Ismael. Matcꞌoxlac. Tincuosobtesi ajcuiꞌ aꞌan. Aꞌan ta̱cua̱nk ajcuiꞌ nabal li ralal xcꞌajol. Laj Ismael ta̱cua̱nk cablaju li ralal. Ni̱nkakeb xcuanquil saꞌ lix tenamiteb ut nimak ajcuiꞌ lix tenamiteb.

²¹ Abanan lin contrato junelic cua̱nk riqꞌuin laj Isaac. Aꞌan la̱ cualal li ta̱cua̱nk riqꞌuin lix Sara chiru li chihab jun, chan li Dios re laj Abraham.

²² Nak quirakeꞌ chi a̱tinac, li Ka̱cuaꞌ Dios qui-el riqꞌuin laj Abraham.

²³ Saꞌ ajcuiꞌ li cutan aꞌan laj Abraham quixset lix tzꞌu̱mal ruꞌuj xtzꞌejcual laj Ismael. Chi joꞌcaꞌin quixba̱nu li circuncisión reheb lix mo̱s li queꞌyoꞌla saꞌ rochoch. Ut quixba̱nu ajcuiꞌ reheb lix lokꞌbil mo̱s. Saꞌ li cutan aꞌan qui-uxman chixjunil joꞌ quiyeheꞌ re xban li Ka̱cuaꞌ Dios.

²⁴ Bele̱laju roꞌcꞌa̱l (99) chihab cuan re laj Abraham nak quixcꞌul lix circuncisión.

²⁵ Oxlaju chihab cuan re laj Ismael nak quixcꞌul lix circuncisión.

²⁶ Saꞌ li cutan aꞌan queꞌxcꞌul li circuncisión laj Abraham ut laj Ismael li ralal.

²⁷ Chixjunileb lix mo̱s cui̱nk li queꞌyoꞌla saꞌ rochoch laj Abraham queꞌxcꞌul li circuncisión, joꞌ eb ajcuiꞌ li lokꞌbil mo̱s li jalan xtenamiteb.