Génesis 16 - Li Santil hu

Lix Agar ut lix yum aj Ismael xcꞌabaꞌ

¹ Lix Sarai li rixakil laj Abram ma̱ jun xcocꞌal. Aꞌan cuan jun xmo̱s xAgar xcꞌabaꞌ. Aꞌan chalenak chak Egipto.

² Lix Sarai quixye re laj Abram: —La̱at nacanau nak ma̱ jun incꞌulaꞌal. La̱in tincuaj junak incꞌulaꞌal, aban li Ka̱cuaꞌ Dios incꞌaꞌ naxqꞌue cue. Naru tatcua̱nk riqꞌuin lin mo̱s. Ma̱re ta̱cua̱nk junak a̱cꞌulaꞌal riqꞌuin ut la̱in tinxoc chokꞌ cue, chan lix Sarai. Ut laj Abram quixpa̱b li cꞌaꞌru quiyeheꞌ re xban lix Sarai.

³ Nak quicꞌulman aꞌin ac laje̱b chihab roquiqueb saꞌ li tenamit Canaán. Lix Sarai quixkꞌaxtesi lix mo̱s saꞌ rukꞌ laj Abram re nak ta̱cua̱nk riqꞌuin.

⁴ Tojoꞌnak laj Abram quicuan riqꞌuin, ut lix Agar quicana chi yaj aj ixk. Nak quixnau nak ta̱cua̱nk junak lix cꞌulaꞌal, lix Agar incꞌaꞌ chic quixqꞌue saꞌ xnakꞌ ru lix Sarai. Ut lix Agar xicꞌ chic naril aꞌan.

⁵ Lix Sarai quixye re laj Abram: —Saꞌ a̱ma̱c la̱at nak yo̱quin chixcꞌulbal li raylal aꞌin. La̱in xinqꞌue lin mo̱s a̱cue ut anakcuan xicꞌ chic ninril. Nak xnau nak ta̱cua̱nk jun lix cꞌulaꞌal yo̱ chixnimobresinquil rib chicuu. Li Ka̱cuaꞌ Dios taxak tixye ke ani cuan xma̱c, ma la̱at malaj la̱in, chan lix Sarai.

⁶ Quichakꞌoc laj Abram ut quixye re: —La̱at nacanau nak la̱ mo̱s cuan rubel a̱takl. La̱at yal a̱cue cꞌaꞌru ta̱ba̱nu riqꞌuin, chan laj Abram. Cꞌajoꞌ nak quijoskꞌoꞌ lix Sarai saꞌ xbe̱n lix mo̱s ut cꞌajoꞌ nak quixchꞌila. Tojoꞌnak lix Agar quie̱lelic.

⁷ Lix Agar yo̱ chi be̱c saꞌ li chaki chꞌochꞌ. Quicuulac cuan cuiꞌ li yuꞌam haꞌ saꞌ li be naxic saꞌ li tenamit Shur. Ut aran quitaꞌeꞌ xban lix ángel li Ka̱cuaꞌ Dios.

⁸ Ut li ángel quia̱tinac riqꞌuin ut quixpatzꞌ re: —Agar, at xmo̱s lix Sarai, ¿bar xatchal chak? Ut, ¿bar yo̱cat chi xic? chan. Ut lix Agar quixye re: —La̱in yo̱quin chi e̱lelic chiru lix Sarai lin patrón, chan.

⁹ Lix ángel li Dios quixye re: —Sukꞌin cuiꞌchic riqꞌuin la̱ patrón. Tatcua̱nk saꞌ xya̱lal riqꞌuin ut ta̱pa̱b li cꞌaꞌru tixye a̱cue.

¹⁰ Teꞌcua̱nk nabal la̱ cualal a̱cꞌajol. Incꞌaꞌ ta̱ru̱k rajlanquileb xban nak numtajenak xqꞌuialeb la̱ cualal a̱cꞌajol teꞌcua̱nk.

¹¹ Qꞌue retal, la̱at yaj aj ixkat. La̱ cꞌulaꞌal ta̱yoꞌla̱k chꞌina te̱lom. Aj Ismael ta̱qꞌue chokꞌ xcꞌabaꞌ. Joꞌcan lix cꞌabaꞌ ta̱qꞌue xban nak li Dios naxnau li raylal li yo̱cat chixcꞌulbal, ut aꞌan tatxtenkꞌa, chan.

¹² Li ángel quixye ajcuiꞌ re: —Laj Ismael cauhak rib joꞌ junak joskꞌ aj xul ut ta̱pletik yalak ani aj iqꞌuin. Xicꞌ ta̱ilekꞌ xbaneb chixjunileb. Laj Ismael joꞌ eb ajcuiꞌ li ralal xcꞌajol teꞌxyi̱b lix naꞌaj nachꞌ riqꞌuineb li ri̱tzꞌin usta eb aꞌan incꞌaꞌ teꞌraj, chan li ángel.

¹³ Lix Agar quixye: —La̱at li Ka̱cuaꞌ Dios li nacat-iloc cue, chan re li Dios. Ut quixye cuiꞌchic, —Arin saꞌ li chaki chꞌochꞌ li Dios xcꞌutbesi rib chicuu ut moco xincam ta nak xcuil ru, chan.

¹⁴ Joꞌcan nak li yuꞌam haꞌ aꞌan quiqꞌueheꞌ chokꞌ xcꞌabaꞌ “Li yoꞌyo̱quil Dios li na-iloc cue”. Li yuꞌam haꞌ aꞌin cuan saꞌ xyi li cuib chi tenamit Cades ut Bered.

¹⁵ Nak quiyoꞌla li ralal laj Abram riqꞌuin lix Agar, laj Abram quixqꞌue aj Ismael chokꞌ xcꞌabaꞌ.

¹⁶ Cuakib roꞌcꞌa̱l (86) chihab cuan re laj Abram nak quiyoꞌla laj Ismael.