Gálatas 4 - Li Santil hu

¹ Li nacuaj xyebal e̱re aꞌan aꞌin: nak toj caꞌchꞌin, li ta̱e̱chani̱nk re li jun cablal chanchan junak mo̱s. Ma̱cꞌaꞌ naru naxchꞌeꞌ xban nak ma̱jiꞌ natzꞌakloc xchihab usta aꞌan laj e̱chal re chixjunil.

² Toj cuan rubel xcuanquil li na-iloc re ut li nataklan re toj ta̱tzꞌaklok ru lix chihab joꞌ quixye lix yucuaꞌ.

³ Joꞌcan ajcuiꞌ la̱o. Junxil chanchano cocꞌal. Cocuan rubel xcuanquil li najter naꞌleb nak toj ma̱jiꞌ nakanau bar cuan li ya̱l.

⁴ Abanan nak quicuulac xkꞌehil, li Dios quixtakla li Ralal chi yoꞌla̱c saꞌ ruchichꞌochꞌ riqꞌuin jun li ixk. Ut quicuan ajcuiꞌ rubel xcuanquil li najter chakꞌrab.

⁵ Li Dios quixtakla li Ralal re nak aꞌan ta̱colok reheb li cuanqueb rubel xcuanquil li chakꞌrab. Quixba̱nu aꞌin re nak la̱o naru to-oc chokꞌ ralal xcꞌajol.

⁶ Re xcꞌutbal chiku nak la̱o chic ralal xcꞌajol, li Dios quixtakla li Santil Musikꞌej re nak ta̱cua̱nk kiqꞌuin. Ut xban nak cuan li Santil Musikꞌej kiqꞌuin, joꞌcan nak naru nakaye re li Dios, “at inYucuaꞌ.”

⁷ Joꞌcan ut anakcuan ma̱cuaꞌex chic lokꞌbil mo̱s. La̱ex ban chic ralal li Dios. Ut xban nak la̱ex chic ralal li Dios, te̱re̱chani ajcuiꞌ li yechiꞌinbil reheb li ralal xcꞌajol xban nak joꞌcan quiraj li Dios.

Laj Pablo yo̱ chi cꞌoxlac chirixeb laj pa̱banel li cuanqueb Galacia

⁸ Nak toj ma̱jiꞌ nequepa̱b chak li Dios, quelokꞌoniheb li ma̱cuaꞌeb tzꞌakal dios ut quexcꞌanjelac chak chiruheb.

⁹ Anakcuan ac xexpa̱ban ut rehex chic li Dios. ¿Cꞌaꞌut nak te̱raj cuiꞌchic sukꞌi̱c chi cꞌanjelac saꞌ le̱ najteril naꞌleb li ma̱cꞌaꞌ na-oc cuiꞌ? Ut, ¿cꞌaꞌut nak te̱raj cuiꞌchic xqꞌuebal e̱rib rubel xcuanquil li najter chakꞌrab?

¹⁰ La̱ex yo̱quex cuiꞌchic chixba̱nunquil le̱ najteril naꞌleb nak nequeninkꞌei eb li cutan, li po ut li chihab ut li cꞌaꞌak chic re ru chi ninkꞌehil.

¹¹ Nachal incꞌaꞌux e̱ban. Ma̱re yal ma̱cꞌaꞌ rajbal nak xincꞌanjelac saꞌ e̱ya̱nk.

¹² Ex inherma̱n, usta la̱in aj judío, xcuisi cuib rubel xcuanquil li chakꞌrab. Nintzꞌa̱ma che̱ru nak te̱ba̱nu joꞌ xinba̱nu la̱in. Me̱qꞌue chic e̱rib rubel xcuanquil li chakꞌrab. La̱ex ma̱cꞌaꞌ junak raylal xeba̱nu cue.

¹³ La̱ex nequenau nak xban nak quinyajer, quincana Galacia. Joꞌcan nak quiru quinye resil li evangelio e̱re xbe̱n cua.

¹⁴ La̱in ninnau nak chꞌaꞌaj raj chokꞌ e̱re cuilbal saꞌ lin yajel. Abanan incꞌaꞌ xine̱tzꞌekta̱na ut incꞌaꞌ xicꞌ quine̱ril. Xine̱ril ban joꞌ junak x-ángel li Dios ut xine̱cꞌul joꞌ nak xecꞌul raj li Jesucristo.

¹⁵ ¿Bar cuan lix sahil saꞌ le̱ chꞌo̱l querecꞌa nak quincuan e̱riqꞌuin junxil? Li Dios naxnau nak cui ta quiru xba̱nunquil, querisi raj xnakꞌ le̱ ru ut queqꞌue raj cue.

¹⁶ ¿Ma xicꞌ chic niquine̱ril anakcuan yal xban nak xinye e̱re lix ya̱lal chi joꞌcanan?

¹⁷ Chanchan kꞌaxal nequera eb laj balakꞌ. Abanan ma̱cuaꞌ usilal li teꞌraj e̱riqꞌuin. E̱balakꞌinquil ban li teꞌraj. Eb aꞌan teꞌraj nak te̱risi e̱rib cuiqꞌuin re nak eb aꞌan chic li te̱ta̱ke.

¹⁸ Us cui teꞌraj e̱tenkꞌanquil cui chi anchal xchꞌo̱leb teꞌxba̱nu. Abanan tento teꞌxba̱nu chi junelic ut ma̱cuaꞌ caꞌaj cuiꞌ nak cuanquin e̱riqꞌuin.

¹⁹ Ex inherma̱n, chanchanex incocꞌal nak nequexcuil. Cꞌajoꞌ nak nayotꞌeꞌ inchꞌo̱l saꞌ e̱cꞌabaꞌ la̱ex. Chanchan li raylal li naxcꞌul li ixk li cua̱nc re xcꞌulaꞌal. Cꞌajoꞌ narahoꞌ inchꞌo̱l nak toj ma̱jiꞌ nequekꞌaxtesi e̱rib chi tzꞌakal rubel rok rukꞌ li Cristo.

²⁰ Nacuaj ta ac cuanquin e̱riqꞌuin anakcuan re nak tinnau chanru tina̱tinak e̱riqꞌuin. Cꞌajoꞌ incꞌaꞌux che̱rix xban nak incꞌaꞌ ninnau chanru cuanquex.

Lix Agar ut lix Sara

²¹ La̱ex li toj te̱raj cua̱nc rubel xcuanquil li najter chakꞌrab, ¿cꞌaꞌut nak incꞌaꞌ nequeqꞌue retal li cꞌaꞌru naxye?

²² Tzꞌi̱banbil retalil nak laj Abraham quicuan cuib li ralal, jun riqꞌuin li lokꞌbil mo̱s ut li jun chic riqꞌuin li tzꞌakal rixakil. (Gén. 21:2-9)

²³ Ut li ralal laj Abraham li quicuan riqꞌuin li lokꞌbil mo̱s, aꞌan moco yechiꞌinbil ta xban li Dios. Quiyoꞌla joꞌ nequeꞌyoꞌla chixjunileb saꞌ ruchichꞌochꞌ. Abanan li ralal li quiyoꞌla riqꞌuin li tzꞌakal rixakil, aꞌan quiyoꞌla xban nak yechiꞌinbil reheb xban li Dios.

²⁴ Cuan xya̱lal nak quixcꞌul chi joꞌcaꞌin laj Abraham. Aꞌan aꞌin lix ya̱lal: Li cuib chi ixk, aꞌaneb retalil li cuib chi contrato li quixba̱nu li Dios riqꞌuineb laj Abraham ut laj Moisés. Lix Agar, li lokꞌbil mo̱s, aꞌan retalil li contrato quixba̱nu li Dios saꞌ li tzu̱l Sinaí. Ut li toj cuanqueb rubel xcuanquil li najter chakꞌrab chanchaneb li lokꞌbil mo̱s joꞌ li ralal xcꞌajol lix Agar.

²⁵ Lix Agar, aꞌan retalil li tzu̱l Sinaí li cuan Arabia. Aꞌan ajcuiꞌ retalil li tenamit Jerusalén. Ut eb laj Jerusalén chanchaneb li lokꞌbil mo̱s nak cuanqueb, xban nak toj cuanqueb rubel xcuanquil li najter chakꞌrab.

²⁶ Abanan lix Sara, aꞌan retalil li Jerusalén li cuan saꞌ choxa. Ut la̱o ralal xcꞌajol aꞌan.

²⁷ Joꞌcaꞌin tzꞌi̱banbil saꞌ li Santil Hu: Chisahokꞌ taxak saꞌ a̱chꞌo̱l, at ixk, li incꞌaꞌ nacatqꞌuiresin. Jap a̱cue xban xsahil a̱chꞌo̱l la̱at li incꞌaꞌ a̱cuecꞌahom xrahil li ala̱nc, la̱at li tzꞌekta̱nanbilat xban la̱ be̱lom. Chisahokꞌ taxak saꞌ a̱chꞌo̱l xban nak kꞌaxal nabal cuiꞌchic la̱ cualal a̱cꞌajol ta̱cua̱nk chiruheb li ralal xcꞌajol li lokꞌbil mo̱s. (Isa. 54:1)

²⁸ Ex inherma̱n, la̱o joꞌ laj Isaac. La̱o chic ralal xcꞌajol li Dios xban li cꞌaꞌru quiyechiꞌi̱c re laj Abraham xban li Dios.

²⁹ Najter li alalbej li quiyoꞌla riqꞌuin li mo̱s, aꞌan quirahobtesin re li alalbej li quiyoꞌla xban xcuanquil li Santil Musikꞌej. Ut chalen anakcuan joꞌcan ajcuiꞌ nacꞌulman.

³⁰ Aban, ¿cꞌaꞌru naxye saꞌ li Santil Hu? Naxye chi joꞌcaꞌin: Isi li lokꞌbil mo̱s rochben lix yum xban nak li alalbej aꞌan incꞌaꞌ naru natzꞌak lix jun cablal li yucuaꞌbej. Aꞌ ban li alalbej li quiyoꞌla riqꞌuin li tzꞌakal ixakilbej, aꞌan li ta̱e̱chani̱nk re. (Gén. 21:10)

³¹ Joꞌcan ut, ex inherma̱n, la̱o ma̱cuaꞌo ralal xcꞌajol li lokꞌbil mo̱s. La̱o ban ralal xcꞌajol li tzꞌakal ixakilbej.