Gálatas 3 - Li Santil hu

Li chakꞌrab ut li pa̱ba̱l

¹ La̱ex aj Galacia, ma̱cꞌaꞌ e̱naꞌleb. ¿Ani xbalakꞌin e̱re nak incꞌaꞌ chic yo̱quex xpa̱banquil lix ya̱lal? Nak xkachꞌolob che̱ru chanru nak quiqꞌueheꞌ li Jesucristo chiru cruz, chanchan nak tzꞌakal yo̱quex chirilbal.

² Caꞌaj cuiꞌ aꞌin nacuaj xpatzꞌbal e̱re. ¿Ma riqꞌuin ta biꞌ xba̱nunquil li naxye saꞌ li chakꞌrab nak xecꞌul li Santil Musikꞌej? Ma̱ jokꞌe. La̱ex xecꞌul li Santil Musikꞌej nak xepa̱b li Cristo.

³ ¿Ma kꞌaxal cuiꞌchic ma̱cꞌaꞌ e̱naꞌleb? Cui riqꞌuin li Santil Musikꞌej xetiquib chak xpa̱banquil li Jesucristo, ¿ma nequecꞌoxla anakcuan nak ta̱tzꞌaklok ru le̱ pa̱ba̱l yal riqꞌuin li cꞌaꞌak re ru nequeba̱nu e̱junes?

⁴ ¿Ma te̱canab chi ma̱cꞌaꞌ rajbal chixjunil li quecꞌul chi joꞌcanan? La̱in ninye nak incꞌaꞌ te̱ba̱nu chi joꞌcan.

⁵ Li Dios naxqꞌue li Santil Musikꞌej ut naxba̱nu li milagros e̱riqꞌuin. Nacuaj tinpatzꞌ e̱re aꞌin: ¿ma naxba̱nu aꞌan xban nak nequepa̱b li chakꞌrab malaj ut xban nak xepa̱b li Cristo li quiyeheꞌ resil e̱re?

⁶ Cꞌoxlankex caꞌchꞌinak chirix laj Abraham. Joꞌ naxye saꞌ li Santil Hu, laj Abraham quixpa̱b li Dios ut xban nak quipa̱ban, li Dios quixye nak ti̱c chic lix chꞌo̱l.

⁷ Nacuaj nak te̱nau nak li tzꞌakal ralal xcꞌajol laj Abraham, aꞌaneb li nequeꞌpa̱ban re li Dios.

⁸ Najter kꞌe cutan nak toj ma̱jiꞌ nacꞌulun resil li evangelio saꞌ ruchichꞌochꞌ, ac cuan saꞌ xchꞌo̱l li Dios nak ta̱ti̱cobresi̱k xchꞌo̱leb li ma̱cuaꞌeb aj judío nak teꞌpa̱ba̱nk. Joꞌcan nak tzꞌi̱banbil saꞌ li Santil Hu li quixye li Dios re laj Abraham: Saꞌ a̱cꞌabaꞌ la̱at osobtesinbilakeb chixjunileb li tenamit. (Gén. 12:3)

⁹ Joꞌcan nak li ani nequeꞌpa̱ban, osobtesinbileb joꞌ nak qui-osobtesi̱c laj Abraham xban nak quixpa̱b li Dios.

¹⁰ Chixjunileb li nequeꞌxsicꞌ xti̱quilal xchꞌo̱l riqꞌuin xba̱nunquil li naxye saꞌ li najter chakꞌrab, tenebanbil li tojba ma̱c saꞌ xbe̱neb xban nak joꞌcaꞌin tzꞌi̱banbil saꞌ li Santil Hu: Tenebanbil li tojba ma̱c saꞌ xbe̱neb li ani incꞌaꞌ nequeꞌxba̱nu chixjunil li tzꞌi̱banbil retalil saꞌ li chakꞌrab. (Deut. 27:26)

¹¹ Ac chꞌolchꞌo nak ma̱ ani ta̱ti̱cobresi̱k xchꞌo̱l chiru li Dios yal riqꞌuin xba̱nunquil li naxye saꞌ li najter chakꞌrab xban nak tzꞌi̱banbil saꞌ li Santil Hu nak ani naxpa̱b li Dios, ta̱ti̱cobresi̱k xchꞌo̱l chiru li Dios ut ta̱cua̱nk xyuꞌam chi junelic. (Hab. 2:4)

¹² Li chakꞌrab incꞌaꞌ naxye nak topa̱ba̱nk. Caꞌaj cuiꞌ naxye nak tento xba̱nunquil li naxye re nak ta̱cua̱nk li kayuꞌam. Joꞌcaꞌin tzꞌi̱banbil saꞌ li chakꞌrab: Li ani naxba̱nu chixjunil li naxye li chakꞌrab, li jun aꞌan ta̱cua̱nk xyuꞌam. (Lev. 18:5)

¹³ Abanan li Jesucristo coxcol chiru li tojba ma̱c li tenebanbil saꞌ kabe̱n xban li chakꞌrab. Aꞌan quicoloc ke nak quixqꞌue rib chi ca̱mc re xtojbal rix li kama̱c. Joꞌcaꞌin tzꞌi̱banbil saꞌ li Santil Hu: Tzꞌekta̱nanbileb chixjunileb li nequeꞌcamsi̱c chi tꞌuytꞌu chiru li cheꞌ. (Deut. 21:23)

¹⁴ Li Jesucristo quixtoj rix li kama̱c nak quicam chiru li cruz re nak saꞌ xcꞌabaꞌ aꞌan li ma̱cuaꞌeb aj judío teꞌxcꞌul li rosobtesinquil riqꞌuin li Dios joꞌ li quixcꞌul laj Abraham ut re ajcuiꞌ nak riqꞌuin xpa̱banquil li Jesucristo takacꞌul li Santil Musikꞌej li quiyechiꞌi̱c ke xban li Dios.

Li chakꞌrab ut li yechiꞌinbil xban li Dios

¹⁵ Ex inherma̱n, nacuaj xchꞌolobanquil lix ya̱lal aꞌin che̱ru riqꞌuin li cꞌaꞌru nacꞌulman saꞌ li kayuꞌam arin saꞌ ruchichꞌochꞌ. Junak cui̱nk nak tixba̱nu xcontrato, chi acak xakxo xcuanquil, ma̱ ani chic naru nasachoc re, chi moco tixtik ru.

¹⁶ Joꞌ tzꞌi̱banbil saꞌ li Santil Hu, li cꞌaꞌru quiyechiꞌi̱c re laj Abraham xban li Dios, quiyechiꞌi̱c ajcuiꞌ reheb li ralal xcꞌajol. Moco yo̱ ta chi a̱tinac chirixeb chixjunileb li ralal xcꞌajol. Yo̱ ban chi a̱tinac chirix jun ajcuiꞌ. Ut li jun aꞌan, aꞌan li Cristo.

¹⁷ Aꞌin ut tinye: Li Dios quixba̱nu jun li contrato najter riqꞌuin laj Abraham ut quixxakab xcuanquil saꞌ xcꞌabaꞌ li Cristo. Li chakꞌrab li quiqꞌueheꞌ re laj Moisés ca̱hib ciento riqꞌuin laje̱b xcaꞌcꞌa̱l (430) chihab mokon incꞌaꞌ naxsach xcuanquil li contrato li ac xakabanbil xcuanquil, chi moco tixcanab ta chi ma̱cꞌaꞌ rajbal li yechiꞌinbil re laj Abraham xban li Dios.

¹⁸ Cui ta naru xcꞌulbal li colba-ib riqꞌuin xba̱nunquil li naxye li chakꞌrab, ma̱cꞌaꞌ raj rajbal li quiyechiꞌi̱c re laj Abraham xban li Dios. Abanan li cꞌaꞌru quixyechiꞌi li Dios re laj Abraham, aꞌan yal chi ma̱tan quixqꞌue.

¹⁹ ¿Cꞌaꞌru aj e nak quiqꞌueheꞌ li chakꞌrab? Aꞌan quiqꞌueheꞌ re nak tixcꞌut chiruheb li tenamit nak aꞌaneb aj kꞌetol chakꞌrab. Ut li chakꞌrab aꞌan quicuan xcuanquil toj quicꞌulun li Jesucristo li quiyoꞌla saꞌ xya̱nkeb li ralal xcꞌajol laj Abraham, li yechiꞌinbil xban li Dios. Eb li ángel queꞌcꞌanjelac chiru li Dios nak queꞌxye li chakꞌrab re laj Moisés; ut laj Moisés, aꞌan li quiyehoc re chiruheb li tenamit.

²⁰ Abanan ma̱ ani quijaloc a̱tin nak li Dios quixyechiꞌi li ma̱tan re laj Abraham. Aꞌ li Dios, aꞌan li quiba̱nun re.

²¹ ¿Ma aꞌin ta biꞌ naraj naxye nak li chakꞌrab naxsach xcuanquil li cꞌaꞌru quixyechiꞌi li Dios? ¡Ma̱ jokꞌe! Cui ta naru ta̱cua̱nk li kayuꞌam chi junelic riqꞌuin xba̱nunquil li naxye li chakꞌrab, ta̱ti̱cokꞌ aj raj cuiꞌ li kachꞌo̱l chiru li Dios xban li chakꞌrab.

²² Li Santil Hu naxye nak chixjunil li ruchichꞌochꞌ cuan rubel xcuanquil li ma̱c re nak chixjunileb li teꞌpa̱ba̱nk re li Ka̱cuaꞌ Jesucristo teꞌxcꞌul ajcuiꞌ li colba-ib li quiyechiꞌi̱c xban li Dios.

²³ Nak toj ma̱jiꞌ nacꞌulun li Jesucristo saꞌ ruchichꞌochꞌ, toj cuanco rubel xcuanquil li chakꞌrab. Chanchan cuanco chi pre̱xil. Yo̱co chiroybeninquil nak li Dios tixtakla chak li Jesucristo li yechiꞌinbil xban, re nak riqꞌuin xpa̱banquil aꞌan tocolekꞌ.

²⁴ Joꞌcan nak li chakꞌrab, aꞌan nacꞌutuc xya̱lal chiku ut aꞌan nacꞌamoc ke riqꞌuin li Cristo re nak ti̱cobresinbilak kachꞌo̱l riqꞌuin xpa̱banquil li Cristo.

²⁵ Anakcuan ut ac xcuulac xkꞌehil xpa̱banquil li Jesucristo. Joꞌcan nak ma̱cꞌaꞌ chic xcuanquil li najter chakꞌrab saꞌ kabe̱n.

²⁶ Anakcuan la̱ex chic ralal xcꞌajol li Dios che̱junilex xban nak xepa̱b li Jesucristo.

²⁷ La̱ex xecꞌul li cubi haꞌ ut rehex chic li Cristo. Jalbil chic le̱ yuꞌam ut cha̱bil chic le̱ naꞌleb saꞌ xcꞌabaꞌ li Jesucristo.

²⁸ Anakcuan ut moco jalan ta chic laj griego chiruheb laj judío, chi moco jalan ta li mo̱s chiru li patrón, chi moco jalan ta li cui̱nk, chi moco jalan ta li ixk. Junaj ban chic ku saꞌ xcꞌabaꞌ li Jesucristo.

²⁹ Cui la̱ex rehex chic li Cristo, la̱ex ajcuiꞌ ralal xcꞌajol laj Abraham ut la̱ex te̱re̱chani ajcuiꞌ li cꞌaꞌru quiyechiꞌi̱c re laj Abraham xban li Dios.