Filipenses 1 - Li Santil hu

Laj Pablo quixtakla xsahil xchꞌo̱leb

¹ La̱in laj Pablo. Yo̱quin chixtzꞌi̱banquil li hu aꞌin cuochben laj Timoteo. La̱o aj cꞌanjel chiru li Jesucristo. Li hu aꞌin, aꞌan e̱re la̱ex li nequexcꞌamoc be saꞌ xya̱nkeb laj pa̱banel aran Filipos ut e̱re ajcuiꞌ la̱ex li nequextenkꞌan saꞌ li cꞌanjel aran. Ut e̱re ajcuiꞌ che̱junilex la̱ex aj pa̱banel aran Filipos, li junaj chic e̱ru riqꞌuin li Jesucristo.

² Chicua̱nk taxak e̱riqꞌuin li usilal ut li tuktu̱quilal li naxqꞌue li Dios li kaYucuaꞌ ut li naxqꞌue li Ka̱cuaꞌ Jesucristo.

Laj Pablo quitijoc chirixeb laj pa̱banel

³ Rajlal nak nequexjulticoꞌ cue, ninbantioxi chiru li Dios.

⁴ Ut junelic nintijoc che̱rix chi sa saꞌ inchꞌo̱l.

⁵ Nasahoꞌ saꞌ inchꞌo̱l xban nak chalen nak xexpa̱ban xeqꞌue e̱chꞌo̱l chintenkꞌanquil xyebal resil li colba-ib toj chalen anakcuan.

⁶ Chalen nak xexpa̱ban, li Dios yo̱ chi cꞌanjelac e̱riqꞌuin. Ut ninnau nak junelic textenkꞌa toj ta̱tzꞌaklok ru le̱ pa̱ba̱l saꞌ li cutan nak tol-e̱lk cuiꞌchic li Jesucristo.

⁷ Xban nak nequeqꞌue e̱chꞌo̱l chi cꞌanjelac chiru li Cristo, joꞌcan nak junelic nequexincꞌoxla ut kꞌaxal sa saꞌ inchꞌo̱l e̱riqꞌuin. La̱ex xextzꞌakon cuochben riqꞌuin li usilal li naxqꞌue li Cristo. Xextzꞌakon ajcuiꞌ cuiqꞌuin riqꞌuin rahil chꞌo̱lej nak cuanquin chi pre̱xil ut xextzꞌakon ajcuiꞌ cuiqꞌuin nak yo̱quin chixchꞌolobanquil xya̱lal li colba-ib reheb li cuanqueb xcuanquil re nak teꞌxnau nak tzꞌakal ya̱l li cꞌaꞌru yo̱co chixchꞌolobanquil.

⁸ Li Dios naxnau nak cꞌajoꞌ nequexinra. Ut li rahoc aꞌin, aꞌan qꞌuebil cue xban li Cristo.

⁹ Ut li nintzꞌa̱ma chiru li Dios nak nintijoc che̱rix, aꞌan aꞌin: nak kꞌaxal cuiꞌchic cherahak e̱rib chi ribil e̱rib. Ut chinumta̱k taxak li rahoc ut chiqꞌuehekꞌ taxak e̱naꞌleb re xtaubal bar cuan li tzꞌakal ya̱l.

¹⁰ Nintzꞌa̱ma chiru li Dios nak textenkꞌa re nak junelic te̱nau cꞌaꞌru li us ut cꞌaꞌru li incꞌaꞌ us. Ut ti̱cak taxak le̱ chꞌo̱l re nak ma̱ ani ta̱cuechꞌi̱nk e̱rix chalen nak tol-e̱lk cuiꞌchic li Jesucristo.

¹¹ Ut riqꞌuin li cha̱bilal li qꞌuebil e̱re xban li Jesucristo, nequeqꞌue xlokꞌal li Dios.

Li Dios quixsukꞌisi chokꞌ usilal li raylal li quixcꞌul laj Pablo

¹² Ex inherma̱n, nacuaj nak te̱nau nak chixjunil li yo̱quin chixcꞌulbal, aꞌan yo̱ chi cꞌanjelac re xyebal resil li colba-ib yalak bar.

¹³ Cuan xya̱lal nak xineꞌxqꞌue saꞌ tzꞌalam. Eb laj ilol pre̱x joꞌqueb ajcuiꞌ chixjunileb li cuanqueb saꞌ li palacio nequeꞌxnau nak cuanquin saꞌ tzꞌalam xban nak nincꞌanjelac chiru li Cristo.

¹⁴ Ut nabaleb laj pa̱banel xeꞌxcacuubresi xchꞌo̱leb saꞌ xpa̱ba̱leb saꞌ xcꞌabaꞌ li Ka̱cuaꞌ xban nak xeꞌxqꞌue retal nak cau inchꞌo̱l usta cuanquin chi pre̱xil saꞌ xcꞌabaꞌ li Jesucristo. Ut nequeꞌxchꞌolob xya̱lal li ra̱tin li Dios chi ma̱cꞌaꞌ xxiuheb.

¹⁵ Ya̱l nak cuan li nequeꞌxye resil li Cristo yal xban nak niquineꞌxcakali ut niquineꞌxcuechꞌi. Abanan cuan ajcuiꞌ li nequeꞌxye resil li Cristo chi anchal xchꞌo̱leb ut saꞌ xya̱lal.

¹⁶ Nequeꞌxchꞌolob xya̱lal xban nak niquineꞌxra ut nequeꞌxnau nak cuanquin chi pre̱xil xban nak ninqꞌue xcuanquil li colba-ib.

¹⁷ Aban li jun chꞌol chic nequeꞌxye resil li Cristo yal xban nak cuan cꞌaꞌru nequeꞌxra ut moco chi anchal ta xchꞌo̱leb nequeꞌxba̱nu. Nequeꞌxba̱nu chi joꞌcan yal re xqꞌuebal xrahil inchꞌo̱l nak cuanquin chi pre̱xil.

¹⁸ Abanan ma̱cꞌaꞌ naxye. Usta chi anchal xchꞌo̱leb, usta incꞌaꞌ, yo̱queb chixyebal resil li Jesucristo. Ut nasahoꞌ inchꞌo̱l riqꞌuin aꞌan.

¹⁹ Ut junelic ta̱sahokꞌ inchꞌo̱l xban nak ninnau nak yo̱quex chi tijoc chicuix. Ut li Santil Musikꞌej natenkꞌan cue. Joꞌcan nak nasahoꞌ saꞌ inchꞌo̱l xban nak ninnau nak chixjunil li nincꞌul, li Dios tixsukꞌisi chokꞌ usilal chokꞌ cue.

²⁰ Incꞌaꞌ nacuaj xxuta̱nobresinquil cuib riqꞌuin xba̱nunquil li cꞌaꞌak re ru incꞌaꞌ us. Nacuaj ban nak junelic cua̱nk xcacuilal inchꞌo̱l re xyebal resil li Jesucristo. Nacuaj xqꞌuebal xlokꞌal li Cristo anakcuan ut chi junelic riqꞌuin li ninba̱nu ut riqꞌuin ajcuiꞌ lin camic.

²¹ La̱in, nak toj yoꞌyo̱quin, cuanquin chi sum a̱tin riqꞌuin li Cristo. Abanan kꞌaxal raj cuiꞌchic us li ca̱mc chokꞌ cue xban nak ninnau nak tinxic riqꞌuin.

²² Abanan cui li Dios toj tixqꞌue inyuꞌam saꞌ ruchichꞌochꞌ re nak tincꞌanjelak chiru li Ka̱cuaꞌ, incꞌaꞌ ninnau bar cuan li kꞌaxal us chokꞌ cue. ¿Ma us nak yoꞌyo̱quin malaj ut us nak tinca̱mk?

²³ Chꞌaꞌaj chokꞌ cue xnaubal bar cuan li kꞌaxal us. Nacuaj raj ca̱mc re nak tinxic riqꞌuin li Cristo. Aꞌan raj li kꞌaxal us chokꞌ cue la̱in.

²⁴ Abanan chokꞌ e̱re la̱ex, us nak yoꞌyo̱kin.

²⁵ Ninnau chi tzꞌakal nak naru texintenkꞌa. Joꞌcan nak ninnau nak tincua̱nk saꞌ e̱ya̱nk re e̱tenkꞌanquil. Texintenkꞌa re nak sahak saꞌ e̱chꞌo̱l nak yo̱kex chi qꞌui̱c saꞌ le̱ pa̱ba̱l.

²⁶ Nincꞌoxla nak tincuulak cuiꞌchic e̱riqꞌuin ut nak te̱ril cuiꞌchic cuu, ta̱sahokꞌ saꞌ le̱ chꞌo̱l saꞌ xcꞌabaꞌ li Jesucristo.

²⁷ Li kꞌaxal lokꞌ xba̱nunquil, aꞌan aꞌin: Chexcua̱nk saꞌ xya̱lal riqꞌuineb le̱ ras e̱ri̱tzꞌin joꞌ e̱cꞌulub xban nak la̱ex ac xepa̱b li Jesucristo. Usta cuanquin e̱riqꞌuin, usta ma̱ anihin, nacuaj rabinquil resil nak cau e̱chꞌo̱l saꞌ le̱ pa̱ba̱l. Ut nacuaj ajcuiꞌ rabinquil nak junaj le̱ chꞌo̱l ut junaj e̱cꞌaꞌux chixyebal resil li colba-ib saꞌ xcꞌabaꞌ li Jesucristo.

²⁸ Incꞌaꞌ texxucuak chiruheb li xicꞌ nequeꞌiloc e̱re. Cui la̱ex incꞌaꞌ texxucuak, eb aꞌan teꞌxqꞌue retal nak la̱ex texcolekꞌ ut eb aꞌan teꞌsachekꞌ. Ut li Ka̱cuaꞌ Dios, aꞌan li ta̱cꞌutuk re li naꞌleb aꞌin chiruheb.

²⁹ Qꞌuebil e̱re le̱ ma̱tan xban li Dios re xpa̱banquil li Cristo. Ut moco caꞌaj cuiꞌ ta te̱cꞌul li rusilal re xpa̱banquil. Usilal aj ban cuiꞌ nak qꞌuebil e̱re xcꞌulbal li raylal saꞌ xcꞌabaꞌ li Cristo.

³⁰ Ac xeril chanru nak ninyal inkꞌe chixqꞌuebal xcuanquil li colba-ib ut nequerabi resil nak toj yo̱quin ajcuiꞌ xyalbal inkꞌe. Ut nequeyal ajcuiꞌ e̱kꞌe la̱ex xqꞌuebal xcuanquil li colba-ib cuochbenex.