Filemón 1 - Li Santil hu

Xqꞌuebal xsahileb xchꞌo̱l

¹ La̱in laj Pablo. Cuanquin chi pre̱xil saꞌ xcꞌabaꞌ li Jesucristo. Cuochben li kaherma̱n Timoteo yo̱quin chixtzꞌi̱banquil li hu aꞌin, at Filemón. La̱at kech aj cꞌanjelil chiru li Cristo ut raro̱cat kaban.

² Li hu aꞌin re ajcuiꞌ lix Apia, li kech aj pa̱banelil ut reheb ajcuiꞌ laj pa̱banel li nequeꞌxchꞌutub rib saꞌ la̱ cuochoch chixlokꞌoninquil li Dios, ut re ajcuiꞌ laj Arquipo li kech aj pa̱banelil. Aꞌan li qui-ochbenin chak ke saꞌ li cꞌanjel chixyebal resil li colba-ib.

³ Chicua̱nk taxak e̱riqꞌuin li usilal ut li tuktu̱quilal li naxqꞌue chak ke li Dios li kaYucuaꞌ ut li naxqꞌue li Ka̱cuaꞌ Jesucristo.

Tzꞌakal re ru lix pa̱ba̱l laj Filemón

⁴ Junelic ninbantioxi chiru lin Dios nak nintijoc cha̱cuix.

⁵ Ninbantioxi chiru li Dios nak nacuabi resil nak nacapa̱b chi tzꞌakal li Jesucristo ut ninbantioxi chiru nak nacaraheb chixjunileb laj pa̱banel.

⁶ Ut nintzꞌa̱ma ajcuiꞌ chiru li Dios nak tatxtenkꞌa re nak ta̱cꞌutu̱nk chanru la̱ pa̱ba̱l. Ut nak teꞌril li rusilal li Jesucristo cuan a̱cuiqꞌuin, teꞌqꞌui̱k saꞌ xpa̱ba̱leb.

⁷ At inherma̱n, cꞌajoꞌ nak nasahoꞌ ut nacꞌojla inchꞌo̱l nak xcuabi resil chanru nak nacaraheb laj pa̱banel ut nacaqꞌue xcacuilal xchꞌo̱leb.

Laj Pablo quixtzꞌa̱ma chiru laj Filemón nak tixcuy xma̱c laj Onésimo

⁸ Anakcuan nacuaj xtzꞌa̱manquil jun usilal cha̱cuu. La̱in la̱ herma̱n saꞌ xcꞌabaꞌ li Cristo ut cuan incuanquil chixyebal a̱cue cꞌaꞌru ta̱ba̱nu.

⁹ Abanan incꞌaꞌ tinmin a̱cuu chixba̱nunquil. Tintzꞌa̱ma ban li usilal cha̱cuu xban nak nakara kib. La̱in ac xinti̱x ut cuanquin chi pre̱xil saꞌ xcꞌabaꞌ li Cristo.

¹⁰ Li usilal nintzꞌa̱ma cha̱cuu, aꞌan chirix laj Onésimo. Chanchan li cualal chicuu nak cuan xban nak chicuu quixpa̱b li Jesucristo nak cuanquin chi pre̱xil.

¹¹ Junxil laj Onésimo incꞌaꞌ quicꞌanjelac chi us cha̱cuu. Abanan anakcuan cha̱bil aj cꞌanjel chic cha̱cuu la̱at ut chicuu ajcuiꞌ la̱in.

¹² Tintakla cuiꞌchic a̱cuiqꞌuin ut nak ta̱cꞌul aꞌan, chanchan ajcuiꞌ nak tina̱cꞌul la̱in.

¹³ La̱in xcuaj raj nak xcana ta cuiqꞌuin. Naru raj ta̱cꞌanjelak chicuu chokꞌ a̱cuu̱chil la̱at nak cuanquin chi pre̱xil xban xyebal resil li colba-ib.

¹⁴ Abanan incꞌaꞌ nacuaj xminbal a̱cuu chixba̱nunquil li usilal aꞌin. Nacuaj ban nak ta̱ba̱nu aꞌan chi anchal a̱chꞌo̱l. Joꞌcan nak ma̱cꞌaꞌ xinba̱nu chi incꞌaꞌ ta ta̱nau la̱at.

¹⁵ Cuan xya̱lal nak qui-el jarubak cutan a̱cuiqꞌuin. Ma̱re lix ya̱lal aꞌan nak quijala lix yuꞌam ut anakcuan ta̱cua̱nk a̱cuiqꞌuin chi junelic.

¹⁶ Anakcuan ma̱cuaꞌ chic joꞌ lokꞌbil mo̱s nak ta̱cua̱nk a̱cuiqꞌuin. Anakcuan kꞌaxal lokꞌ chic chiru junak mo̱s xban nak anakcuan a̱herma̱n chic saꞌ xcꞌabaꞌ li Jesucristo. Raro inban la̱in, ut la̱at kꞌaxal cuiꞌchic nak ta̱ra xban nak a̱mo̱s ut a̱herma̱n ajcuiꞌ saꞌ xcꞌabaꞌ li Ka̱cuaꞌ.

¹⁷ La̱at nacanau nak la̱in a̱cuech aj cꞌanjelil. Joꞌcan nak chacꞌulak laj Onésimo joꞌ nak niquina̱cꞌul la̱in.

¹⁸ Ut cui cuan junak xma̱c cha̱cuu, chaqꞌuehak saꞌ inbe̱n la̱in. Ut cui cuan xcꞌas a̱cuiqꞌuin, la̱in tintoj lix cꞌas cha̱cuu.

¹⁹ La̱in laj Pablo. Ut riqꞌuin cuukꞌ yo̱quin chixtzꞌi̱banquil li a̱tin aꞌin. La̱in tintojok re cha̱cuu. Ut la̱in naru raj tinye a̱cue nak kꞌaxal cuiꞌchic cuan la̱ cꞌas chicuu. La̱at cuan la̱ yuꞌam chi junelic xban nak la̱in xinchꞌolob xya̱lal cha̱cuu.

²⁰ Joꞌcan ut herma̱n, ba̱nu li usilal aꞌin saꞌ xcꞌabaꞌ li Ka̱cuaꞌ. Ut li usilal nintzꞌa̱ma cha̱cuu, aꞌan nak ta̱cꞌul laj Onésimo saꞌ xya̱lal. Chacꞌojob taxak inchꞌo̱l xban nak la̱o aj pa̱banel ut kacomon kib saꞌ xcꞌabaꞌ li Jesucristo.

²¹ Nintzꞌi̱bac a̱cuiqꞌuin xban nak ninnau chi ya̱l nak ta̱ba̱nu li usilal cue. Ut ninnau ajcuiꞌ nak li ta̱ba̱nu, aꞌan kꞌaxal cuiꞌchic nabal chiru li nintzꞌa̱ma cha̱cuu.

²² Ut nintzꞌa̱ma ajcuiꞌ cha̱cuu nak ta̱cauresi li cuochochnal. Yo̱quin chixyoꞌoninquil nak tinxic cuiꞌchic e̱riqꞌuin joꞌ yo̱quex chixtzꞌa̱manquil chiru li Dios.

Eb laj pa̱banel nequeꞌxtakla xsahil xchꞌo̱l laj Filemón

²³ Laj Epafras cuochben chi pre̱xil saꞌ xcꞌabaꞌ li Jesucristo. Aꞌan naxtakla ajcuiꞌ xsahil a̱chꞌo̱l.

²⁴ Ut nequeꞌxtakla ajcuiꞌ xsahil a̱chꞌo̱l laj Marcos, laj Aristarco, laj Demas ut laj Lucas. Cuochbeneb aꞌan nak yo̱co chi cꞌanjelac chiru li Jesucristo.

²⁵ Aꞌ taxak li rusilal li Ka̱cuaꞌ Jesucristo chicua̱nk e̱riqꞌuin. Joꞌcan taxak.