Ezequiel 8 - Li Santil hu

Li xcab visión li quicꞌutbesi̱c chiru laj Ezequiel

¹ O̱b cutan chic xticlajic li xcuak li po re li xcuak chihab kacꞌambal Babilonia nak la̱in chunchu̱quin saꞌ cuochoch cuochbeneb li nequeꞌcꞌamoc be saꞌ xya̱nkeb li ralal xcꞌajol laj Judá. Ut la̱in quicuecꞌa nak quixqꞌue cue lix cuanquil li Ka̱cuaꞌ li nimajcual Dios.

² Ut quicuil jun li chanchan cui̱nk. Quicꞌutun chicuu nak naticla saꞌ xcꞌa̱mal xsaꞌ toj takꞌa saꞌ li rok chanchan xam. Ut naticla saꞌ xcꞌa̱mal xsaꞌ toj saꞌ lix jolom chanchan li chꞌi̱chꞌ nalemtzꞌun.

³ Li chanchan cui̱nk quixyeꞌ li rukꞌ ut quinixchap chi rismal injolom. Ut lix musikꞌ li Ka̱cuaꞌ quinixtaksi saꞌ ikꞌ saꞌ choxa. Ut saꞌ visión li Ka̱cuaꞌ quinixcꞌam toj Jerusalén saꞌ li oqueba̱l re li tenamit li cuan saꞌ li norte, li cuan cuiꞌ li yi̱banbil dios li naqꞌuehoc xjoskꞌil li tzꞌakal Dios.

⁴ Ut aran quicuil cuiꞌchic lix lokꞌal li Ka̱cuaꞌ lix Dioseb laj Israel, joꞌ li quicuil saꞌ li visión li quixcꞌut chicuu nak cuanquin saꞌ li ru takꞌa.

⁵ Ut li yo̱quin chirilbal quixye cue: —At ralal cui̱nk, ilon saꞌ li norte, chan cue. Ut la̱in quin-iloc, ut saꞌ li oqueba̱l li cuan saꞌ li norte li cuan cuiꞌ li artal quicuil li yi̱banbil dios li xicꞌ na-ileꞌ xban li Ka̱cuaꞌ.

⁶ Ut li chanchan cui̱nk quixye cuiꞌchic cue: —At ralal cui̱nk, ¿ma nacaqꞌue retal li cꞌaꞌru yo̱queb chixba̱nunquil eb li ralal xcꞌajol laj Israel? Xban li ma̱usilal li nequeꞌxba̱nu yo̱queb chicuisinquil saꞌ lin templo. Ut toj cuan cuiꞌchic li cꞌaꞌak re ru numtajenak xyibal ru li toj ta̱cuil, chan.

⁷ Ut quinixcꞌam saꞌ li oqueba̱l re li neba̱l re li templo ut quicuil jun li hopol cuan chiru li tzꞌac.

⁸ Ut li chanchan cui̱nk quixye cue: —At ralal cui̱nk, nimobresi lix hopolal li tzꞌac aꞌan, chan. Ut la̱in quinnimobresi lix hopolal li tzꞌac ut quicuil jun li oqueba̱l aran.

⁹ Ut quixye cue: —Ocan ut ta̱cuil li ma̱usilal ut li yibru naꞌleb yo̱queb chixba̱nunquil saꞌ li naꞌajej aꞌan, chan cue.

¹⁰ Ut la̱in quin-oc saꞌ li naꞌajej aꞌan ut quicuil. Yi̱banbil chiru li tzꞌac retalil li cꞌantiꞌ ut li xul li nequeꞌxquelo ribeb chiru chꞌochꞌ ut li xul li kꞌaxal yibeb ru. Ut quicuil ajcuiꞌ li yi̱banbil dios li nequeꞌxlokꞌoni eb laj Israel.

¹¹ Ut aran xakxo̱queb li laje̱b xca̱cꞌa̱l (70) chi cui̱nk li nequeꞌcꞌamoc be saꞌ xya̱nkeb laj Israel. Saꞌ xya̱nkeb aꞌan cuan laj Jaazanías li ralal laj Safán. Saꞌ rukꞌ li junju̱nk cuan lix sansar ut yo̱ chi takecꞌ lix sibel li pom.

¹² Li chanchan cui̱nk quixye cue: —At ralal cui̱nk, ¿ma xaqꞌue retal li cꞌaꞌru yo̱queb chixba̱nunquil eb li nequeꞌcꞌamoc be saꞌ xya̱nkeb laj Israel? Chixjunileb yo̱queb chixlokꞌoninquileb li yi̱banbil dios chi mukmu. Ut nequeꞌxye nak la̱in incꞌaꞌ nacuil li cꞌaꞌru nequeꞌxba̱nu. Nequeꞌxye nak la̱in xintzꞌekta̱na lix naꞌajeb.

¹³ Abanan kꞌaxal cuiꞌchic yibru li cꞌaꞌru ta̱cuil mokon, chan cue.

¹⁴ Chirix aꞌan quinixcꞌam saꞌ li oqueba̱l re li templo, li cuan saꞌ li norte. Ut queꞌcuil li ixk chunchu̱queb aran. Yo̱queb chi ya̱bac chirix lix dios Tamuz xcꞌabaꞌ.

¹⁵ Ut li chanchan cui̱nk quixye cue: —At ralal cui̱nk, ¿ma nacaqꞌue retal chixjunil li cꞌaꞌak re ru aꞌin? Toj cuan cuiꞌchic kꞌaxal yibru li ta̱cuileb chiruheb aꞌin, chan cue.

¹⁶ Ut quinixcꞌam toj saꞌ li oqueba̱l re li templo. Saꞌ xyi lix mu cab ut li artal cuanqueb o̱b xcaꞌcꞌa̱l li cui̱nk. Li rixeb nacana bar cuan cuiꞌ lix templo li Dios. Yo̱queb chi iloc saꞌ releb sakꞌe ut yo̱queb chixlokꞌoninquil li sakꞌe.

¹⁷ Ut li chanchan cui̱nk quixye cue: —At ralal cui̱nk, ¿ma xacuil chixjunil aꞌin? ¿Ma incꞌaꞌ nacꞌojla xchꞌo̱leb laj Judá nak nequeꞌxba̱nu li ma̱usilal aꞌin? ¿Ma incꞌaꞌ tzꞌakal nak nequeꞌrahobtesin yalak bar? Ut nequeꞌchal arin saꞌ lin templo chixba̱nunquil li ma̱usilal re nak teꞌxqꞌue injoskꞌil. Niquineꞌxmajecua nak nequeꞌxqꞌue li rukꞌ cheꞌ saꞌ ruꞌujeb.

¹⁸ Xban nak cꞌajoꞌ lin joskꞌil saꞌ xbe̱neb, la̱in tinqꞌueheb chixtojbal lix ma̱queb. La̱in incꞌaꞌ tintokꞌoba ruheb chi moco tincuuxta̱naheb ru. Usta nequeꞌxjap reheb chixya̱banquil lin cꞌabaꞌ, abanan la̱in incꞌaꞌ chic tincuabi lix tijeb.