Ezequiel 7 - Li Santil hu

¹ Ut li Ka̱cuaꞌ quixye cuiꞌchic cue:

² —At ralal cui̱nk, la̱in li Ka̱cuaꞌ Dios. Aꞌan aꞌin li yo̱quin chixyebal reheb laj Israel. Cuulac re xkꞌehil rosoꞌjic chixjunil le̱ tenamit. Cuulac re xkꞌehil nak ta̱osokꞌ le̱ naꞌaj.

³ Anakcuan la̱ex tex-osokꞌ xban nak la̱in yo̱ injoskꞌil saꞌ e̱be̱n. Tinrakok a̱tin saꞌ e̱be̱n aꞌ yal chanru le̱ yehom e̱ba̱nuhom. Texinqꞌue chixtojbal rix le̱ ma̱usilal.

⁴ Ut incꞌaꞌ tincuy e̱ma̱c chi moco tincuil xtokꞌoba̱l e̱ru. Texinqꞌue chixtojbal rix li incꞌaꞌ us nequeba̱nu. Saꞌ e̱be̱n ajcuiꞌ la̱ex ta̱sukꞌi̱k li ma̱usilal nequeba̱nu, re nak te̱qꞌue retal nak la̱in li Ka̱cuaꞌ Dios.

⁵ Joꞌcaꞌin xye li Ka̱cuaꞌ: —Ta̱cha̱lk jun nimla raylal saꞌ e̱be̱n toj retal tex-osokꞌ. Kꞌaxal ra te̱cꞌul.

⁶ Anakcuan xex-osoꞌ. Xchal le̱ rosoꞌjic. Ac xcuulac xkꞌehil nak tex-osokꞌ.

⁷ Xchal le̱ rosoꞌjic la̱ex li cuanquex saꞌ li naꞌajej aꞌin. Xcuulac xkꞌehil nak incꞌaꞌ chic texninkꞌei̱k saꞌ eb li tzu̱l. Incꞌaꞌ chic sahak saꞌ e̱chꞌo̱l. Junes saꞌ rahil chꞌo̱lejil chic cua̱nkex.

⁸ Chi se̱b tincꞌut lin joskꞌil che̱ru. La̱ex te̱nau nak kꞌaxal yo̱ injoskꞌil saꞌ e̱be̱n. Ut la̱in tinrakok a̱tin saꞌ e̱be̱n aꞌ yal chanru le̱ yehom e̱ba̱nuhom. Texinqꞌue chixtojbal rix le̱ ma̱usilal.

⁹ Incꞌaꞌ tincuy e̱ma̱c chi moco tincuil xtokꞌoba̱l e̱ru. Texinqꞌue ban chixtojbal rix le̱ ma̱c. Ut li ma̱usilal nequeba̱nu saꞌ e̱be̱n ajcuiꞌ la̱ex ta̱sukꞌi̱k. Ut la̱ex te̱nau nak la̱in li Ka̱cuaꞌ ut te̱nau ajcuiꞌ nak la̱in li tinqꞌuehok e̱re chixtojbal rix le̱ ma̱c.

¹⁰ Xcuulac xkꞌehil nak tex-osokꞌ. Xcuulac xkꞌehil nak te̱toj rix li ma̱usilal xeba̱nu xban nak le̱ ma̱usilal xnumta yalak bar ut xnumta le̱ kꞌetkꞌetil.

¹¹ Xnumta li ma̱usilal ut xban nak cuan nabal li ma̱usilal xnumta li rahobtesi̱nc. Ma̱ jun e̱re teꞌcolekꞌ, usta cuanqueb xbiomal ut usta ni̱nkeb xcuanquil. Telajeꞌosokꞌ ban chixjunileb ut ma̱ ani chic ta̱ya̱bak xban nak chixjunileb teꞌosokꞌ.

¹² Xcuulac xkꞌehil ut xcuulac xcutanquil nak li ani ta̱lokꞌok incꞌaꞌ ta̱sahokꞌ xchꞌo̱l riqꞌuin li tixlokꞌ. Ut li ani ta̱cꞌayi̱nk incꞌaꞌ ta̱rahokꞌ xchꞌo̱l riqꞌuin li tixcꞌayi xban nak lin joskꞌil cuan saꞌ xbe̱n chixjunileb li tenamit.

¹³ Li ani tixcꞌayi lix chꞌochꞌ incꞌaꞌ chic tixcꞌul li cꞌaꞌru quixcꞌayi usta toj yoꞌyo̱k xban nak tenebanbil li raylal aꞌin saꞌ xbe̱neb xban li ma̱usilal xeꞌxba̱nu. Chixjunileb teꞌosokꞌ.

¹⁴ Teꞌxya̱basi li trompeta re teꞌxcauresi ribeb chi xic chi pletic. Abanan ma̱ jun reheb ta̱e̱lk chi pletic xban nak lin joskꞌil cuan saꞌ xbe̱n chixjunileb.

¹⁵ Chirix le̱ tenamit cua̱nk li ple̱t ut saꞌ li tenamit cua̱nk li caki yajel ut cueꞌej. Eb li cua̱nkeb chak saꞌ cꞌaleba̱l teꞌcamsi̱k saꞌ li ple̱t ut li cua̱nkeb saꞌ li tenamit teꞌca̱mk xban li caki yajel ut li cueꞌej.

¹⁶ Cuanqueb li teꞌe̱lelik saꞌ eb li tzu̱l re xcolbal ribeb joꞌ li mucuy li nequeꞌcuan saꞌ li ru takꞌa. Chixjunileb yo̱keb chi ya̱bac xban li ma̱usilal queꞌxba̱nu.

¹⁷ Chixjunileb sicsotkeb xbaneb xxiu. Ut ma̱cꞌaꞌakeb xmetzꞌe̱u li rok rukꞌ.

¹⁸ Teꞌxqꞌue kꞌes ru tꞌicr chirixeb ut yo̱keb xxiu. Jobilak rismaleb ut yo̱keb xxuta̱n.

¹⁹ Teꞌxcut lix oro ut lix plata saꞌ be xban nak ma̱cꞌaꞌ chic ta̱oc cuiꞌ reheb. Chi moco li oro chi moco li plata ta̱ru̱k ta̱colok reheb saꞌ xkꞌehil nak li Ka̱cuaꞌ tixcꞌut lix joskꞌil. Incꞌaꞌ chic ta̱sahokꞌ xchꞌo̱leb riqꞌuin lix oro ut lix plata chi moco ta̱cꞌojla̱k xchꞌo̱leb xban nak ma̱cꞌaꞌak chic lix tzacae̱mkeb. Lix oro ut lix plata, aꞌan li quiqꞌuehoc reheb chi ma̱cobc.

²⁰ Kꞌaxal queꞌxqꞌue xlokꞌal li cꞌaꞌru reheb li kꞌaxal terto xtzꞌak. Riqꞌuin aꞌan queꞌxnimobresi ribeb nak queꞌxyi̱b li yi̱banbil dios li kꞌaxal yibru. Joꞌcan nak la̱in xinba̱nun re nak xicꞌ chic teꞌril li cꞌaꞌru terto xtzꞌak.

²¹ Joꞌcan nak la̱in tinkꞌaxtesi lix biomaleb saꞌ rukꞌeb li jalan tenamit. Eb li incꞌaꞌ useb xnaꞌleb teꞌrelkꞌa ut teꞌxmux ru.

²² Teꞌcha̱lk laj e̱lkꞌ ut teꞌoc saꞌ lin templo ut teꞌxmux ru. Ut la̱in ma̱cꞌaꞌ tinba̱nu re xcolbal lin lokꞌlaj naꞌaj.

²³ Ta̱cauresi junak li cadena retalil nak texchapekꞌ xban nak li naꞌajej aꞌin numtajenak chi ma̱usilal ut camsi̱nc. Li tenamit junes rahobtesi̱nc nequeꞌxcꞌoxla.

²⁴ Tintaklaheb chak li tenamit li kꞌaxal yibru xnaꞌlebeb re nak aꞌaneb chic teꞌe̱chani̱nk re li rochocheb. Riqꞌuin aꞌin tincuisi lix kꞌetkꞌetileb li ni̱nkeb xcuanquil. Ut li artal li nequeꞌxlokꞌoni cuiꞌ lix dioseb tinqꞌue chi muxecꞌ.

²⁵ Xucuajel li raylal li ta̱cha̱lk saꞌ e̱be̱n. Te̱sicꞌ raj chic bar ta̱cꞌojla̱k e̱chꞌo̱l, abanan ma̱ bar te̱tau.

²⁶ Ta̱numta̱k li raylal saꞌ e̱be̱n. Rajlal yo̱kex chirabinquil resil li raylal li ta̱cha̱lk saꞌ e̱be̱n. Te̱tzꞌa̱ma chiruheb li profeta nak teꞌxye e̱re li cꞌaꞌru ta̱cꞌulma̱nk, abanan incꞌaꞌ teꞌxba̱nu. Eb laj tij ma̱cꞌaꞌ chic cꞌaꞌru teꞌxcꞌut che̱ru, chi moco eb laj qꞌuehol naꞌleb ta̱ru̱k teꞌxchꞌolob xya̱lal che̱ru.

²⁷ Li rey ta̱rahokꞌ xchꞌo̱l, ut li ralal ta̱chꞌina̱nk xchꞌo̱l ut eb li tenamit sicsotkeb xban xxiu. La̱in texinqꞌue chixtojbal rix le̱ ma̱c. La̱in tinrakok a̱tin saꞌ e̱be̱n joꞌ nak xexrakoc a̱tin saꞌ xbe̱neb le̱ ras e̱ri̱tzꞌin. Ut te̱nau nak la̱in li Ka̱cuaꞌ.—