Ezequiel 6 - Li Santil hu1 Ut li Ka̱cuaꞌ quia̱tinac cuiꞌchic cuiqꞌuin ut quixye cue: 2 —At ralal cui̱nk, ilon cuan cuiꞌ li tzu̱l li cuanqueb Israel ut ta̱ye reheb li raylal li teꞌxcꞌul. 3 Joꞌcaꞌin ta̱ye reheb li tzu̱l li cuanqueb Israel: Cherabihak li ra̱tin li Ka̱cuaꞌ. Joꞌcaꞌin xye li Ka̱cuaꞌ reheb li tzu̱l ut eb li bol joꞌ ajcuiꞌ eb li nimaꞌ ut eb li ru takꞌa. La̱in tintakla chak saꞌ e̱be̱n li raylal. Tinsach ruheb saꞌ li ple̱t li naꞌajej li najteb xteram li nequeꞌxlokꞌoni cuiꞌ li jalanil dios. 4 Ta̱sachekꞌ ruheb li artal ut ta̱puqꞌui̱k lix jalam u̱ch li sakꞌe li nequeꞌxqꞌue chokꞌ xdioseb. Ut eb li tenamit teꞌcamsi̱k chiruheb lix yi̱banbil dios. 5 Tinqꞌueheb li camenak chiruheb lix yi̱banbil dios. Ut lix bakeleb tincuteb chixjun sutam lix artaleb. 6 Saꞌ chixjunil li naꞌajej li texcua̱nk cuiꞌ ta̱sachekꞌ ruheb. Ta̱sachekꞌ ruheb chi junaj cua le̱ artal li nequexlokꞌonin cuiꞌ ut eb le̱ yi̱banbil dios ta̱puqꞌui̱k. Li artal li nequecꞌat cuiꞌ li incienso teꞌpoꞌi̱k. Chixjunil li quilaje̱yi̱b ta̱poꞌi̱k chi junaj cua. 7 Cuanqueb li teꞌcamsi̱k saꞌ e̱ya̱nk. Riqꞌuin aꞌin te̱qꞌue retal nak la̱in li Ka̱cuaꞌ. 8 Abanan incꞌaꞌ tinsacheb ru chi junaj cua li tenamit Israel. Saꞌ xya̱nkeb li jeqꞌuinbil ruheb saꞌ jalan tenamit, cuan li incꞌaꞌ teꞌcamsi̱k saꞌ li ple̱t. 9 Ut li joꞌ qꞌuial chic li incꞌaꞌ teꞌcamsi̱k tinjulticokꞌ reheb nak cua̱nkeb chi pre̱xil saꞌ jalan tenamit. Ta̱julticokꞌ reheb nak quirahoꞌ inchꞌo̱l chirixeb. Ta̱julticokꞌ reheb chanru nak xinqꞌueheb chi cꞌuluc raylal xban nak incꞌaꞌ xeꞌcuan saꞌ ti̱quilal chicuu ut xban ajcuiꞌ nak xineꞌxtzꞌekta̱na xban xlokꞌoninquil li jalanil dios. Aꞌaneb ajcuiꞌ teꞌecꞌa̱nk re nak incꞌaꞌ us xeꞌxba̱nu ut teꞌxuta̱na̱k xban lix ma̱usilaleb. 10 La̱in xinqꞌue li raylal aꞌin saꞌ xbe̱neb re nak teꞌxqꞌue retal nak la̱in li Ka̱cuaꞌ. Moco incꞌaꞌ ta ninba̱nu li cꞌaꞌru ninye. 11 Ut li Ka̱cuaꞌ quixye cue: —Ya̱ban ut tenle la̱ cuukꞌ ut tenle la̱ cuok saꞌ chꞌochꞌ xban li ma̱usilal li quilajeꞌxba̱nu eb laj Israel. Ut jap a̱cue xban xrahil a̱chꞌo̱l xban nak cuan laj Israel teꞌca̱mk saꞌ li ple̱t, cuan li teꞌca̱mk xban cueꞌej ut cuan ajcuiꞌ li teꞌca̱mk xban yajel. 12 Ut cuanqueb chak chi najt teꞌca̱mk xban caki yajel ut eb li cuanqueb chi nachꞌ teꞌca̱mk saꞌ li ple̱t. Ut li joꞌ qꞌuial chic teꞌcana̱k teꞌca̱mk xban cueꞌej. Joꞌcaꞌin nak tincuisi lin joskꞌil saꞌ xbe̱neb. 13 Ut teꞌxqꞌue retal nak la̱in li Ka̱cuaꞌ nak teꞌril lix camenakeb saꞌ eb li naꞌajej li cuanqueb cuiꞌ li yi̱banbil dios ut chixjun sutam eb li artal, joꞌ ajcuiꞌ saꞌ eb li naꞌajej najt xteram ut saꞌ eb li tzu̱l, joꞌ ajcuiꞌ rubeleb li ni̱nki cheꞌ ji li queꞌxcꞌat cuiꞌ lix sununquil ban re xlokꞌoninquil lix dioseb. 14 La̱in tinsach ru lix naꞌajeb li teꞌcua̱nk cuiꞌ. Ma̱cꞌaꞌ chic cua̱nk chi saꞌ. Li naꞌajej chanchanak chic li chaki chꞌochꞌ naticla chak saꞌ li sur ut nacuulac cuan cuiꞌ li naꞌajej Diblat re nak eb laj Israel teꞌxqꞌue retal nak la̱in li Ka̱cuaꞌ.— |
© 2019, Wycliffe Bible Translators. All rights reserved.
Wycliffe Bible Translators, Inc.