Ezequiel 5 - Li Santil hu

¹ Ut quixye cuiꞌchic cue li Ka̱cuaꞌ: —At ralal cui̱nk, sicꞌ junak a̱chꞌi̱chꞌ kꞌes re, re ta̱jo li rismal a̱jolom ut la̱ mach. Ut ta̱sicꞌ ajcuiꞌ junak la̱ bisleb re ta̱cuisi chi oxib jachal la̱ cuismal.

² Jun jachal la̱ cuismal ta̱cꞌat saꞌ xyi li tenamit nak ac xrakeꞌ li ple̱t. Ut li jun jachal chic ta̱seti chi chꞌi̱chꞌ chixjun sutam li tenamit. Ut li jun jachal chic ta̱cut saꞌ ikꞌ ut ta̱cꞌamekꞌ yalak bar. Ut la̱in tincua̱linaheb li tenamit riqꞌuin chꞌi̱chꞌ.

³ Ut ta̱chap ajcuiꞌ caꞌchꞌinak la̱ cuismal ut ta̱bacꞌ chire la̱ cuakꞌ.

⁴ Ta̱chap caꞌchꞌinak la̱ cuismal li xabacꞌ chire la̱ cuakꞌ ut ta̱cut saꞌ xyi li xam. Li xam aꞌan, aꞌan li ta̱cꞌatok reheb li ralal xcꞌajol laj Israel.

⁵ Joꞌcaꞌin xye li Ka̱cuaꞌ li nimajcual Dios: —La̱in xinxakaban re li nimla tenamit Jerusalén saꞌ xyi li xni̱nkal tenamit li cuanqueb chixjun sutam.

⁶ Abanan eb li cuanqueb Jerusalén queꞌxkꞌet lin chakꞌrab ut incꞌaꞌ queꞌxba̱nu li cꞌaꞌru quebintakla cuiꞌ. Aꞌaneb chic li kꞌaxal xeꞌkꞌetoc re lin chakꞌrab chiruheb li tenamit li cuanqueb chixjun sutam.

⁷ Joꞌcan nak li Ka̱cuaꞌ quixye reheb: —La̱ex li kꞌaxal xexkꞌetoc re lin chakꞌrab chiruheb li xni̱nkal tenamit li cuanqueb che̱jun sutam. Ut incꞌaꞌ xeba̱nu li cꞌaꞌru xexintakla cuiꞌ. Chi moco xeba̱nu li cꞌaꞌru naxye lix chakꞌrabeb li tenamit li cuanqueb che̱jun sutam.

⁸ Joꞌcan nak la̱in li Ka̱cuaꞌ ninye e̱re: —La̱in yo̱ injoskꞌil saꞌ e̱be̱n la̱ex aj Jerusalén. Texinqꞌue chixtojbal e̱ma̱c chiruheb li xni̱nkal tenamit.

⁹ Tinqꞌue junak nimla raylal saꞌ e̱be̱n xban li ma̱usilal xeba̱nu. Ma̱ jun sut quinba̱nu chi joꞌcan junxil chi moco tinba̱nu mokon.

¹⁰ Eb li yucuaꞌbej teꞌxtiu li ralal xcꞌajoleb. Ut eb li alal cꞌajolbej teꞌxtiu lix yucuaꞌeb. La̱in tinrakok a̱tin saꞌ e̱be̱n. Tinjeqꞌui ruheb saꞌ jalan tenamit li joꞌ qꞌuial teꞌcana̱k. Chanchan cutbileb saꞌ ikꞌ tinba̱nu reheb.

¹¹ La̱in li yoꞌyo̱quil Dios ninye riqꞌuin juramento nak la̱in tinsach e̱ru xban nak xemux ru lin templo xban chixjunil li ma̱usilal xeba̱nu. La̱in incꞌaꞌ tincuy e̱ma̱c chi moco tincuil xtokꞌoba̱l e̱ru.

¹² Jun jachal le̱ tenamit teꞌca̱mk xban caki yajel ut cueꞌej. Ut li jun jachal chic teꞌcamsi̱k chi chꞌi̱chꞌ chirix le̱ tenamit. Ut li jun jachal chic tebinjeqꞌui ru saꞌ jalan tenamit. Chanchan cutbileb saꞌ ikꞌ tinba̱nu reheb nak tincua̱linaheb chi chꞌi̱chꞌ.

¹³ Nak acak xinba̱nu li cꞌaꞌru xinye, ta̱e̱lk lin joskꞌil ut ta̱cꞌojla̱k inchꞌo̱l. Nak xcuisi lin joskꞌil saꞌ e̱be̱n, te̱qꞌue retal nak la̱in li Ka̱cuaꞌ quinyehoc re aꞌin nak yo̱ injoskꞌil.

¹⁴ Tinsach ru le̱ tenamit. Tincanab chi juqꞌuinbil. Tincꞌut e̱xuta̱n chiruheb li jun chꞌol chic tenamit li cuanqueb chi nachꞌ. Ut chixjunileb li teꞌnumekꞌ aran teꞌril li cꞌaꞌru te̱cꞌul.

¹⁵ Texseꞌe̱k ut texhobekꞌ ut eb li xni̱nkal tenamit li cuanqueb che̱jun sutam teꞌxucuak chirilbal li cꞌaꞌru te̱cꞌul nak tinrakok a̱tin saꞌ e̱be̱n riqꞌuin lin joskꞌil. Texinkꞌus chi cau nak yo̱k injoskꞌil saꞌ e̱be̱n. La̱in li Ka̱cuaꞌ yo̱quin chi yehoc re aꞌin.

¹⁶ La̱in tintakla li cueꞌej saꞌ e̱be̱n. Chanchan nak yo̱quin che̱cutbal riqꞌuin lin tzimaj. Riqꞌuin li cueꞌej li tintakla saꞌ e̱be̱n, la̱in tinsach e̱ru. Kꞌaxal cuiꞌchic li cueꞌej tintakla saꞌ e̱be̱n. Tincuisi chi junaj cua le̱ tzacae̱mk.

¹⁷ Tintakla cueꞌej saꞌ e̱be̱n ut tintakla ajcuiꞌ li joskꞌ aj xul re teꞌsach e̱ru. Ut tintakla li caki yajel ut li camsi̱nc saꞌ e̱be̱n ut tintakla ajcuiꞌ li ple̱t. La̱in li Ka̱cuaꞌ yo̱quin chi yehoc re aꞌin.