Ezequiel 47 - Li Santil huLi nimaꞌ li na-el chak rubel lix puertil li templo 1 Li cui̱nk quinixcꞌam cuiꞌchic saꞌ li oqueba̱l re li templo. Ut quicuil nak rubel li oqueba̱l yo̱ chak chi e̱lc li haꞌ ut yo̱ chi xic saꞌ li este bar na-iloc cuiꞌ li templo. Li haꞌ yo̱ chi e̱lc rubel li templo saꞌ li sur ut yo̱ chi numecꞌ chixcꞌatk li artal. 2 Li cui̱nk quinrisi chirix li templo. Co-el saꞌ li oqueba̱l li cuan saꞌ li norte ut quinixcꞌam saꞌ li oqueba̱l li cuan saꞌ li este. Ut aran quicuil li rok haꞌ yo̱ chi e̱lc saꞌ li nim re li oqueba̱l. 3 Ut qui-el li cui̱nk ut yo̱ chi xic saꞌ li este. Cuan jun li cꞌa̱m re bisoc saꞌ rukꞌ. Quixbis o̱b ciento metro ut quixye cue nak tinnumekꞌ saꞌ li nimaꞌ saꞌ li naꞌajej aꞌan. Ut la̱in quintiquib numecꞌ ut li haꞌ quicuulac saꞌ xcux cuok. 4 Nak quixbis o̱b ciento metro chic, li haꞌ quicuulac saꞌ xbe̱n cuok. O̱b ciento metro chic quixbis ut li haꞌ quicuulac saꞌ xcꞌa̱mal insaꞌ. 5 Quixbis o̱b ciento metro chic, ut ac cham chic chi us li nimaꞌ. Incꞌaꞌ chic quiru quinnumeꞌ xban nak kꞌaxal cham chic. Ma̱ ani naru nanumeꞌ cui incꞌaꞌ nanau numxic. 6 Ut li cui̱nk quixye cue: —At ralal cui̱nk, qꞌue retal chi us chixjunil li cꞌaꞌru xacuil, chan. Tojoꞌnak li cui̱nk quinixcꞌam cuiꞌchic chire li nimaꞌ. 7 Nak cuanquin aran, quicuil nak cuanqueb nabaleb li ni̱nki cheꞌ chire li nimaꞌ saꞌ xcaꞌ pacꞌalil. 8 Quixye cue li cui̱nk: —Li haꞌ aꞌin yo̱ chi xic saꞌ li este. Nanumeꞌ saꞌ li ru takꞌa Arabá ut tox-ocak saꞌ li palau Mar Muerto. Nak li haꞌ aꞌin ta̱oc saꞌ li palau, ta̱cha̱bilokꞌ li haꞌ. 9 Chixjunil li xul li teꞌcua̱nk saꞌ li nimaꞌ aꞌan ta̱cua̱nk xyuꞌameb. Nabaleb li car li teꞌcua̱nk saꞌ li palau bar ta̱oc cuiꞌ li nimaꞌ. Ta̱cua̱nk xyuꞌameb chixjunil li xul li teꞌcua̱nk saꞌ li haꞌ aꞌan. 10 Ut chire li palau aꞌan cua̱nkeb laj car naticla chak saꞌ li naꞌajej En-gadi nacuulac toj En-eglaim. Ut yalak bar chire li palau yo̱keb chixchakobresinquil lix yoyeb laj car. Qꞌuila pa̱y ru li car ut kꞌaxal nabalakeb li teꞌcua̱nk saꞌ li palau aꞌan, joꞌ li cuanqueb saꞌ li nimla palau Mediterráneo xcꞌabaꞌ. 11 Abanan li haꞌ li yal tamto chire li palau ut lix sa̱b haꞌ incꞌaꞌ ta̱cha̱bilokꞌ. Ta̱cana̱k ban chokꞌ re atzꞌam. 12 Ut chire li nimaꞌ saꞌ xcaꞌ pacꞌalil teꞌcua̱nk qꞌuila pa̱y ru li cheꞌ teꞌu̱chi̱nk. Li cheꞌ aꞌan incꞌaꞌ teꞌtꞌanekꞌ lix xak ut incꞌaꞌ teꞌxcanab u̱chi̱nc. Rajlal teꞌu̱chi̱nk saꞌ xkꞌehil xban nak cuanqueb chire li nimaꞌ li na-el saꞌ li templo. Li cheꞌ aꞌan teꞌu̱chi̱nk ut li ru ta̱loꞌekꞌ ut lix xak ta̱cꞌanjelak chokꞌ ban.— Nak queꞌxcꞌul lix chꞌochꞌeb laj Israel 13 Li nimajcual Dios quixye: —Aꞌaneb aꞌin lix nuba̱l li chꞌochꞌ li ta̱jeqꞌui̱k reheb li cablaju xte̱paleb li ralal xcꞌajol laj Israel. Cuib jachal li chꞌochꞌ li teꞌxcꞌul eb li ralal xcꞌajol laj José. 14 La̱in quinye reheb le̱ xeꞌto̱nil yucuaꞌ riqꞌuin juramento nak tinqꞌue reheb li naꞌajej aꞌin. Joꞌcan nak ta̱jeqꞌui reheb ut juntakꞌe̱t xni̱nkal li teꞌxcꞌul li junju̱nk. Aꞌan aꞌin li chꞌochꞌ li tinqꞌue chokꞌ e̱herencia. 15 Li nuba̱l saꞌ li norte ta̱ticla̱k cuan cuiꞌ li palau Mediterráneo xcꞌabaꞌ saꞌ li be li naxic Hetlón ut ta̱cuulak saꞌ eb li tenamit Zedad, 16 Hamat, Berota, ut Sibraim, li cuan saꞌ li nuba̱l re li tenamit Damasco ut Hamat. Ut nacuulac saꞌ li tenamit Hazar-haticón li cuan saꞌ li nuba̱l re li naꞌajej Haurán. 17 Aꞌin li nuba̱l li cuan saꞌ li norte naticla chak cuan cuiꞌ li palau ut nacuulac toj saꞌ li tenamit Hazar-enán. Eb li naꞌajej Damasco ut Hamat cuanqueb saꞌ li norte. 18 Li nuba̱l li cuan saꞌ li este nacuulac saꞌ xya̱nkeb li naꞌajej Haurán ut Damasco ut saꞌ xya̱nkeb li naꞌajej Galaad ut Israel. Li nimaꞌ Jordán, aꞌan lix nuba̱l. Nacuulac toj cuan cuiꞌ li palau Mar Muerto. 19 Li nuba̱l li cuan saꞌ li sur naticla Tamar ut nacuulac toj cuan cuiꞌ li haꞌ li cuan Cades. Ut nacuulac toj saꞌ li palau Mediterráneo. Aꞌan li nuba̱l li cuan saꞌ li sur. 20 Li nuba̱l li cuan saꞌ li oeste, aꞌan li palau Mediterráneo. Nacuulac saꞌ li norte toj saꞌ li oqueba̱l re Hamat. Aꞌan li nuba̱l li cuan saꞌ li oeste. 21 Ta̱jeqꞌui li naꞌajej reheb laj Israel aꞌ yal chanru lix te̱paleb. 22 Nak te̱bu̱li rix li chꞌochꞌ re te̱jeqꞌui saꞌ e̱ya̱nk, te̱qꞌue ajcuiꞌ reheb li jalaneb xtenamit li cuanqueb saꞌ e̱ya̱nk. Teꞌxcꞌul lix chꞌochꞌeb li cuanqueb ralal xcꞌajol li queꞌyoꞌla saꞌ le̱ tenamit. Teꞌbu̱lik e̱rochben re nak teꞌtzꞌak chꞌochꞌ saꞌ e̱ya̱nk la̱ex aj Israel. 23 Teꞌxcꞌul xchꞌochꞌeb li jalaneb xtenamit saꞌ lix te̱paleb li yo̱queb cuiꞌ chi cua̱nc, chan li nimajcual Dios. |
© 2019, Wycliffe Bible Translators. All rights reserved.
Wycliffe Bible Translators, Inc.