Ezequiel 44 - Li Santil hu

¹ Li cui̱nk quinixcꞌam cuiꞌchic saꞌ li oqueba̱l li cuan chirix li templo saꞌ li este. Li puerta aꞌan tzꞌaptzꞌo.

² Ut li Ka̱cuaꞌ quixye: —Li puerta aꞌin junelic tzꞌaptzꞌo̱k. Incꞌaꞌ ta̱tehekꞌ. Ma̱ ani ta̱ru̱k ta̱numekꞌ aran xban nak la̱in li Ka̱cuaꞌ lix Dioseb laj Israel quin-oc aran.

³ Caꞌaj cuiꞌ li rey naru ta̱oc aran ut ta̱cꞌojla̱k chi cuaꞌac chiru li Ka̱cuaꞌ. Ta̱oc saꞌ li oqueba̱l li cuan saꞌ li este ut aran ajcuiꞌ ta̱e̱lk, chan.

⁴ Ut li cui̱nk quinrocsi saꞌ li oqueba̱l li cuan saꞌ li norte ut quinixcꞌam chiru li templo. La̱in quicuil nak li templo quinujac riqꞌuin xlokꞌal li Ka̱cuaꞌ. Ut la̱in quinhupub cuib saꞌ chꞌochꞌ.

⁵ Ut li Ka̱cuaꞌ quixye cue: —At ralal cui̱nk, ta̱cuil chi us li tincꞌut cha̱cuu ut ta̱cuabi chi us li tinye. La̱in tinye a̱cue chanru nak teꞌcꞌanjelak saꞌ li templo. Ta̱qꞌue retal ani ta̱ru̱k teꞌoc ut ani incꞌaꞌ ta̱ru̱k teꞌoc saꞌ li templo.

⁶ Joꞌcaꞌin xye li nimajcual Dios reheb laj Israel li nequeꞌxkꞌetkꞌeti ribeb: —Tzꞌakal li ma̱usilal xeba̱nu, la̱ex li ralal xcꞌajol laj Israel. Incꞌaꞌ chic tincuy e̱ma̱c.

⁷ Quemux ru lin templo nak xecanabeb chi oc saꞌ lin templo li jalaneb xtenamit, li incꞌaꞌ niquineꞌxpa̱b ut incꞌaꞌ queꞌxcꞌul li circuncisión. Ut xemayeja li caxlan cua ut lix quiqꞌuel li xul ut lix xe̱bul. Xban li ma̱usilal queba̱nu, querisi xcuanquil li contrato li quinba̱nu e̱riqꞌuin.

⁸ La̱ex aj Israel incꞌaꞌ quexcꞌanjelac chicuu saꞌ lin templo joꞌ quexintakla cuiꞌ. Quexakabeb ban li jalaneb xtenamit chixba̱nunquil.

⁹ La̱in li nimajcual Dios ninye nak ma̱ jun li jalaneb xtenamit teꞌoc saꞌ lin templo cui ma̱jiꞌ xeꞌxcꞌul li circuncisión ut cui incꞌaꞌ niquinixpa̱b, usta cuanqueb saꞌ e̱ya̱nk la̱ex aj Israel.

¹⁰ Eb laj levita rochbeneb laj Israel li rech tenamitil li queꞌtzꞌekta̱nan cue nak queꞌxlokꞌoniheb li jalanil dios teꞌxtoj rix lix ma̱queb.

¹¹ Eb aꞌan naru teꞌcꞌanjelak saꞌ lin templo joꞌ mo̱s. Teꞌxcꞌacꞌale li oqueba̱l. Teꞌxcamsiheb li xul li naqꞌueheꞌ chokꞌ xmayejeb li tenamit. Teꞌcꞌanjelak chiruheb li tenamit.

¹² Xban nak queꞌcꞌanjelac chiruheb li jalanil dios ut queꞌcꞌamoc be chiruheb laj Israel chixba̱nunquil li ma̱usilal, joꞌcan nak la̱in li nimajcual Dios ninye riqꞌuin juramento nak relic chi ya̱l nak teꞌxtoj rix lix ma̱queb.

¹³ Incꞌaꞌ naru teꞌcꞌanjelak chicuu chokꞌ aj tij, chi moco naru teꞌnachꞌok riqꞌuin li cꞌaꞌak re ru santo, chi moco teꞌnachꞌok riqꞌuin li santil mayej. Junelic ban cua̱nk saꞌ xbe̱neb li xuta̱n xban li ma̱usilal queꞌxba̱nu.

¹⁴ La̱in tinxakabeb chixcꞌacꞌalenquil li templo ut teꞌxba̱nu ajcuiꞌ li cꞌaꞌak re ru chi cꞌanjelil li tento xba̱nunquil saꞌ li templo.

¹⁵ Eb laj levita, li ralal xcꞌajol laj Sadoc, aꞌaneb li queꞌcꞌanjelac chicuu nak eb li jun chꞌol chic laj Israel quineꞌxtzꞌekta̱na. Aꞌaneb li teꞌcꞌanjelak chicuu chokꞌ aj tij. Teꞌxmayeja chicuu li xe̱b ut lix quiqꞌuel li xul, chan li nimajcual Dios.

¹⁶ Caꞌaj cuiꞌ eb aꞌan naru teꞌoc saꞌ lin templo ut naru teꞌnachꞌok riqꞌuin lin me̱x chi cꞌanjelac chicuu.

¹⁷ Incꞌaꞌ naru teꞌcꞌanjelak saꞌ li templo, chi moco saꞌ li neba̱l li cuan chi saꞌ cui cuan chirixeb li rakꞌ yi̱banbil riqꞌuin rix li carner. Nak teꞌoc saꞌ li puerta li naxic saꞌ li neba̱l li cuan chi saꞌ, cua̱nk li rakꞌeb lino chirixeb.

¹⁸ Teꞌxbat lix jolomeb riqꞌuin li tꞌicr lino. Ut lix ta li rakꞌeb, aꞌan yi̱banbilak riqꞌuin lino. Incꞌaꞌ teꞌrocsi li akꞌej li ta̱ru̱k teꞌtikobak xban.

¹⁹ Teꞌrisi li rakꞌ li cuan chirixeb nak xeꞌcꞌanjelac saꞌ li templo nak toj ma̱jiꞌ nequeꞌxic saꞌ li neba̱l li cuanqueb cuiꞌ li tenamit. Teꞌxcanab li rakꞌ li teꞌrisi chi saꞌ li templo saꞌ eb li naꞌajej santo. Teꞌxqꞌue jalan rakꞌeb chirix re nak incꞌaꞌ teꞌxsantobresi li tenamit riqꞌuin li rakꞌeb.

²⁰ Eb laj tij incꞌaꞌ teꞌxjo li rismal xjolomeb, chi moco teꞌxcanab chi chamocꞌ. Caꞌaj cuiꞌ tzꞌakal teꞌxbes.

²¹ Eb laj tij incꞌaꞌ teꞌrucꞌ li vino nak teꞌoc saꞌ li neba̱l li cuan toj chi saꞌ.

²² Eb laj tij incꞌaꞌ naru teꞌsumla̱k riqꞌuin junak xma̱lcaꞌan, chi moco naru teꞌsumla̱k riqꞌuin junak ixk xjachom rib riqꞌuin lix be̱lom. Naru teꞌsumla̱k riqꞌuin junak tukꞌ ixk aj Israel li ma̱jiꞌ cuanjenak riqꞌuin cui̱nk, malaj ut riqꞌuin junak xma̱lcaꞌan aj tij.

²³ Eb laj tij teꞌxcꞌut chiruheb lin tenamit cꞌaꞌru li santobresinbil ut cꞌaꞌru li incꞌaꞌ santobresinbil. Teꞌxcꞌut chiruheb cꞌaꞌru li muxbil ut cꞌaꞌru li incꞌaꞌ muxbil.

²⁴ Nak cua̱nk ple̱t, eb laj tij teꞌrakok a̱tin saꞌ xbe̱neb li yo̱queb chixpletinquil ribeb. Teꞌrakok a̱tin saꞌ xbe̱neb aꞌ yal chanru naxye lin chakꞌrab. Teꞌxba̱nu lin chakꞌrab ut chixjunil li cꞌaꞌru xebintakla cuiꞌ. Ut teꞌx-oxlokꞌiheb li hiloba̱l cutan.

²⁵ Eb laj tij incꞌaꞌ teꞌxmux rib riqꞌuin xchꞌeꞌbal junak camenak. Abanan naru teꞌxchꞌeꞌ cui li camenak aꞌan lix naꞌ malaj ut lix yucuaꞌ, malaj li ralal malaj ut lix rabin, malaj li ras cui̱nk malaj ut li ri̱tzꞌin malaj ut li ranab li ma̱jiꞌ sumsu. Naru tixmux rib riqꞌuin xchꞌeꞌbal cui li camenak xcomon laj tij.

²⁶ Nak ac xsantobresi rib, laj tij incꞌaꞌ ta̱cꞌanjelak chiru cuukub cutan.

²⁷ Nak acak xnumeꞌ cuukub cutan, ta̱oc saꞌ li neba̱l re li templo li cuan chi saꞌ. Ut ta̱mayejak re xtzꞌa̱manquil xcuybal lix ma̱c. Chirix aꞌan ta̱ru̱k ta̱cꞌanjelak cuiꞌchic saꞌ li templo, chan li nimajcual Dios.

²⁸ Eb laj tij incꞌaꞌ teꞌqꞌuehekꞌ xchꞌochꞌeb aran Israel. Caꞌaj cuiꞌ la̱in li tineꞌre̱chani. Caꞌaj cuiꞌ la̱in tinqꞌuehok reheb li cꞌaꞌru nequeꞌraj.

²⁹ Eb aꞌan teꞌxtzaca li ru li acui̱mk li ta̱mayeja̱k, ut teꞌxtzaca li mayej re xtojbal rix lix ma̱queb li tenamit, joꞌ ajcuiꞌ li mayej re xtzꞌa̱manquil xcuybal lix ma̱queb. Chixjunil li kꞌaxtesinbilak cue la̱in, reheb laj tij.

³⁰ Reheb laj tij li xbe̱n ru li acui̱mk ut reheb ajcuiꞌ li kꞌaxal cha̱bil li ta̱mayeja̱k chicuu. Nak eb li tenamit teꞌxyi̱b li kꞌem li yi̱banbil riqꞌuin li xbe̱n ru li trigo, teꞌxqꞌue reheb li xbe̱n li ta̱e̱lk. Ut la̱in tincuosobtesiheb li nequeꞌxqꞌue lix mayejeb.

³¹ Eb laj tij incꞌaꞌ teꞌxtiu xtibel li xul li narupupic malaj ut jalan xul, cui yal camsinbil xban xul malaj ut yal nacam xjunes, chan.