Ezequiel 43 - Li Santil hu

Lix lokꞌal li Ka̱cuaꞌ quichal cuiꞌchic saꞌ li templo

¹ Ut li cui̱nk li quibisoc re li templo quinixcꞌam saꞌ li oqueba̱l li cuan saꞌ li este.

² Ut quicuil lix lokꞌal li Ka̱cuaꞌ lix Dioseb laj Israel li yo̱ chak chi cha̱lc saꞌ li este. Quicuabi jun li choki̱nc chanchan nak na-ecꞌan li nimaꞌ. Ut li ruchichꞌochꞌ quisakenoꞌ xban lix lokꞌal li Dios.

³ Li visión aꞌin chanchan li visión li quicuil nak quichal li Dios chixsachbal ru li tenamit Jerusalén. Ut chanchan li visión li quicuil nak cuanquin chire li nimaꞌ Quebar. La̱in quinhupub cuib saꞌ chꞌochꞌ.

⁴ Ut lix lokꞌal li Dios qui-oc saꞌ li templo saꞌ li oqueba̱l li cuan saꞌ li este.

⁵ Lix musikꞌ li Ka̱cuaꞌ quinixcuaclesi ut quinixcꞌam saꞌ li neba̱l li cuan chi saꞌ. Aran quicuil nak nujenak li templo riqꞌuin lix lokꞌal li Dios.

⁶ Ut jun li cui̱nk xakxo chincꞌatk ut quicuabi nak li Ka̱cuaꞌ quia̱tinac chak saꞌ li templo.

⁷ Quixye cue: —At ralal cui̱nk, aꞌan aꞌin lix naꞌaj lin cꞌojariba̱l. Aꞌan aꞌin xnaꞌaj li cuok. La̱in tincua̱nk arin chi junelic saꞌ xya̱nkeb li ralal xcꞌajol laj Israel. La̱in tintakla̱nk saꞌ xbe̱neb chi junelic kꞌe cutan. Incꞌaꞌ chic teꞌxmux ru lin cꞌabaꞌ riqꞌuin xlokꞌoninquil li jalanil dios. Chi moco laj Israel chi moco lix reyeb teꞌxba̱nu li ma̱usilal aꞌan. Chi moco teꞌxyi̱b saꞌ li naꞌajej li najt xteram lix jalam u̱ch lix reyeb li queꞌcam.

⁸ Eb li rey queꞌxyi̱b li rochocheb chixcꞌatk lin templo. Ut lix puertil cuan saꞌ xcaꞌyaba̱l lix puertil lin templo. Jun tasal ajcuiꞌ li tzꞌac naramoc re lin templo riqꞌuin li rochocheb aꞌan. Ut queꞌxmux ru lin santil cꞌabaꞌ nak queꞌxba̱nu li ma̱usilal li xicꞌ nacuil. Riqꞌuin aꞌan queꞌxchikꞌ lin joskꞌil. Joꞌcan nak quinsach ruheb.

⁹ Anakcuan teꞌxjucꞌ chi jun aj cua lix jalam u̱ch lix reyeb. Incꞌaꞌ chic teꞌxlokꞌoni. Ut la̱in tincua̱nk riqꞌuineb chi junelic kꞌe cutan.

¹⁰ At ralal cui̱nk, ta̱cꞌut chiruheb laj Israel retalil lin templo re nak teꞌxqꞌue retal ut teꞌxuta̱na̱k xban li ma̱usilal li queꞌxba̱nu.

¹¹ Cui teꞌxuta̱na̱k xban li ma̱usilal li queꞌxba̱nu, la̱at ta̱chꞌolob chiruheb li retalil li templo li xinqꞌue a̱cue. Ta̱chꞌolob chiruheb chanru xyi̱banquil, li puertas li teꞌoc ut teꞌe̱lk cuiꞌ, ut ta̱cꞌut chiruheb chanru lix nimal. Ut ta̱chꞌolob ajcuiꞌ chiruheb chanru xtusbal li cꞌaꞌak re ru. Ta̱chꞌolob chiruheb li chakꞌrab. Ta̱tzꞌi̱ba retalil chiruheb re teꞌril chi us re nak teꞌxba̱nu chi tzꞌakal re ru chixjunil li xinye.

¹² Aꞌan aꞌin li chakꞌrab chirix lin templo: chixjunil li naꞌajej li cuan saꞌ xbe̱n li tzu̱l ut li cuan chixjun sutam, aꞌan santil naꞌajej ut kꞌaxal lokꞌ, chan li Dios.

Li artal

¹³ Li bisleb li quixbis cuiꞌ li templo, aꞌan ajcuiꞌ li quixbis cuiꞌ li artal. Aꞌan aꞌin lix bisbal li artal. Chixjun sutam li artal cuan jun li rok haꞌ media metro xchamal ut media metro ru. Ut chire li rok haꞌ cuan lix rambal o̱b xcaꞌcꞌa̱l centímetros xteram.

¹⁴ Oxib tasal li artal. Lix cꞌochleba̱l naticla cuan cuiꞌ li rok haꞌ ut jun metro xteram. Li cꞌochleba̱l media metro nim ru chiru lix caꞌ tasal li cuib metro xteram. Ut lix caꞌ tasal media metro nim ru chiru li rox tasal.

¹⁵ Li rox tasal, aꞌan cuib metro xteram. Ut saꞌ eb lix xuc li artal xakxo̱queb li xucub.

¹⁶ Ca̱ xucu̱t li artal. Cuakib metro rok ut cuakib metro ru li rox tasal.

¹⁷ Ut lix bisbal li cꞌochleba̱l, aꞌan cuukub metro rok ut cuukub metro ru. Li rok haꞌ li cuan chixjun sutam li artal, aꞌan media metro ru. Ut lix rambal li cuan chire, aꞌan o̱b xcaꞌcꞌa̱l centímetro ru. Lix gradas li nequeꞌtakeꞌ cuiꞌ cuan saꞌ li este.

¹⁸ Ut li cui̱nk quixye cue: —At ralal cui̱nk, joꞌcaꞌin xye li nimajcual Dios: Aꞌan aꞌin le̱ chakꞌrabinquil nak acak xeyi̱b li artal. Nak te̱mayeja le̱ cꞌatbil mayej, te̱rachrachi lix quiqꞌuel li xul saꞌ xbe̱n li artal.

¹⁹ Te̱qꞌue jun li toro toj sa̱j reheb laj tij re xtzꞌa̱manquil xcuybal li ma̱c. Eb laj tij, aꞌaneb aj levita xcomoneb li ralal xcꞌajol laj Sadoc. Aꞌaneb li teꞌcꞌanjelak chicuu chokꞌ aj tij.

²⁰ Ta̱qꞌue caꞌchꞌinak li quicꞌ chiruheb li ca̱hib chi xucub li cuan saꞌ eb lix xuc li artal. Ta̱qꞌue ajcuiꞌ saꞌ li xuc li cꞌochleba̱l saꞌ xca̱ pacꞌalil li artal ut ta̱qꞌue chiru lix rambal li sutsu cuiꞌ li artal. Joꞌcaꞌin nak ta̱santobresi li artal.

²¹ Chirix aꞌan ta̱cꞌam li toro li quimayeja̱c re xtzꞌa̱manquil xcuybal li ma̱c ut ta̱cꞌat chirix li templo saꞌ li naꞌajej li nequeꞌcꞌatman cuiꞌ li mayejanbil xul.

²² Cuulajak chic tatmayejak re xtzꞌa̱manquil xcuybal li ma̱c. Ta̱mayeja jun te̱lom chiba̱t toj sa̱j li ma̱cꞌaꞌ re̱cꞌ. Ut eb laj tij teꞌxsantobresi li artal joꞌ queꞌxba̱nu riqꞌuin li toro.

²³ Nak tatrakekꞌ xsantobresinquil li artal, ta̱sicꞌ ru jun li toro toj sa̱j ut jun li te̱lom carner li ma̱cꞌaꞌ re̱qꞌueb.

²⁴ Ta̱mayejaheb li toro ut li carner chicuu la̱in. Eb laj tij teꞌxqꞌue li atzꞌam saꞌ xbe̱n ut teꞌxcꞌat chokꞌ cꞌatbil xmayej re inlokꞌoninquil.

²⁵ Rajlal cutan ta̱qꞌue jun li chiba̱t te̱lom re xtzꞌa̱manquil xcuybal li ma̱c ut ta̱qꞌue ajcuiꞌ jun li toro ut jun li te̱lom carner li ma̱cꞌaꞌ re̱qꞌueb. Ta̱ba̱nu chi joꞌcan chiru cuukub cutan.

²⁶ Eb laj tij teꞌxmayeja li xul aꞌan re xsantobresinquil li artal. Chi joꞌcaꞌin ta̱kꞌaxtesi̱k li artal chi jun aj cua chi cꞌanjelac re inlokꞌoninquil.

²⁷ Nak ac xeꞌnumeꞌ li cutan aꞌin, saꞌ li xcuakxak li cutan eb laj tij teꞌxtiquib xmayejanquil saꞌ xbe̱n li artal li xul li te̱qꞌue chokꞌ cꞌatbil mayej. Ut te̱mayeja li xul re xcꞌambal e̱rib saꞌ usilal cuiqꞌuin. Ut la̱in tincꞌul le̱ mayej chi sa saꞌ inchꞌo̱l, chan li Ka̱cuaꞌ.