Ezequiel 41 - Li Santil hu

¹ Chirix aꞌan li cui̱nk quinixcꞌam saꞌ li templo ut quixbis xya̱nkeb li rokechal li Santil Naꞌajej. Lix bisbal, aꞌan oxib metro rok ut oxib metro ru.

² Li puerta, aꞌan o̱b metro xnimal ru. Ut lix naꞌaj li puerta, aꞌan cuib metro riqꞌuin media li junju̱nk pacꞌal. Ut quixbis ajcuiꞌ li Santil Naꞌajej. Aꞌan junmay metro rok ut laje̱b metro ru.

³ Chirix aꞌan co̱ saꞌ li Lokꞌlaj Santil Naꞌajej li cuan toj chi saꞌ ut quixbis li okech li cuan saꞌ li oqueba̱l. Ju̱nk metro xni̱nkal xsaꞌ. Oxib metro ru li oqueba̱l. Ut oxib metro riqꞌuin media xnajtil xya̱nk li rokechal li cuanqueb saꞌ li cuib pacꞌal.

⁴ Chirix aꞌan quixbis li Lokꞌlaj Santil Naꞌajej ut aꞌan laje̱b metro rok ut laje̱b metro ru. Ut li cui̱nk quixye cue: —Li naꞌajej aꞌin, aꞌan li Lokꞌlaj Santil Naꞌajej, chan.

Eb li cocꞌ naꞌajej li cuanqueb chiru li tzꞌac

⁵ Chirix aꞌan li cui̱nk quixbis li tzꞌac li cuan chirix li templo. Aꞌan oxib metro xpimal. Ut chiru li tzꞌac aꞌan yi̱banbileb li cocꞌ naꞌajej cuib metro xni̱nkal xsaꞌ li junju̱nk.

⁶ Oxib tasal eb li naꞌajej aꞌan. Laje̱b xcaꞌcꞌa̱l chi naꞌajej cuan saꞌ li junju̱nk tasal. Lix nimal li xcaꞌ tasal naxkꞌax xnimal li xbe̱n tasal. Ut lix nimal li rox tasal naxkꞌax xnimal li xcaꞌ tasal. Joꞌcan nak li tzꞌamba li cuan saꞌ li xcaꞌ tasal nahilan saꞌ xbe̱n li xbe̱n tasal. Ut li tzꞌamba li cuan saꞌ li rox tasal nahilan saꞌ xbe̱n li xcaꞌ tasal. Moco chapcho̱queb ta.

⁷ Li cuib chi naꞌajej li cuan saꞌ xbe̱n ni̱nkeb chiru li xbe̱n tasal. Quiyi̱ba̱c li takleba̱l chiru li tzꞌac li cuan chirix re teꞌtakekꞌ cuiꞌ saꞌ li xcaꞌ ut saꞌ li rox tasal. Li takleba̱l aꞌin naxkꞌoti rib.

⁸ Quinqꞌue retal nak saꞌ xca̱ pacꞌalil li naꞌajej li cuan cuiꞌ li templo cuan li cimiento. Saꞌ xbe̱n li cimiento aꞌan queꞌyi̱ba̱c li cocꞌ naꞌajej. Li cimiento, aꞌan oxib metro xteram.

⁹ Li tzꞌac li cuan chirixeb li cocꞌ naꞌajej, aꞌan cuib metro riqꞌuin media ru. Cuan xya̱nk li cocꞌ naꞌajej aꞌan riqꞌuineb lix naꞌajeb laj tij.

¹⁰ Li xya̱nk, aꞌan laje̱b metro ru chixjun sutam li templo.

¹¹ Li oqueba̱l re li cocꞌ naꞌajej, aꞌan cuanqueb chiru li naꞌajej li yamyo. Aꞌan cuib metro riqꞌuin media ru. Eb li cocꞌ naꞌajej cuan cuib lix puertil. Jun cuan saꞌ li norte ut jun cuan saꞌ li sur.

¹² Saꞌ li neba̱l li cuan chirix saꞌ li oeste cuan jun chic li cab. Li cab, aꞌan oꞌlaju xcaꞌcꞌa̱l metro xnimal ru ut o̱b roxcꞌa̱l metro xnimal rok. Ut li tzꞌac, aꞌan cuib metro riqꞌuin media xpimal.

¹³ Li cui̱nk quixbis li templo. Aꞌan laje̱b roxcꞌa̱l metro xnimal rok. Li ru li neba̱l li cuan xbe̱n, rochben li cab ut li tzꞌac, aꞌan laje̱b roxcꞌa̱l metro.

¹⁴ Li ru li neba̱l li cuan saꞌ li este rochben li ru li templo, aꞌan laje̱b roxcꞌa̱l metro xnimal ru.

¹⁵ Chirix aꞌan quixbis lix nimal rok li cab li cuan chirix li templo. Aꞌan li cuan chirix li Santil Naꞌajej li cuan saꞌ li neba̱l li ma̱cꞌaꞌ xbe̱n. Rochben li tzꞌac saꞌ xcaꞌ pacꞌalil lix bisbal, aꞌan laje̱b roxcꞌa̱l metro rok.

¹⁶ Tzꞌaptzꞌo riqꞌuin tzꞌalam cheꞌ li ru li tzꞌac li cuan saꞌ li Santil Naꞌajej ut li ru li tzꞌac li cuan saꞌ li Lokꞌlaj Santil Naꞌajej, joꞌ ajcuiꞌ li xmu cab li cuan chiru li neba̱l. Ut tzꞌaptzꞌo ajcuiꞌ riqꞌuin tzꞌalam cheꞌ li ru li oqueba̱l, li ventanas ut li cuan saꞌ xbe̱n li puerta. Tzꞌaptzꞌo riqꞌuin tzꞌalam cheꞌ saꞌ li oxib tasal naticla saꞌ chꞌochꞌ ut nacuulac toj cuanqueb cuiꞌ li ventanas.

¹⁷ Quixbis chixjunil li cab. Quixbis saꞌ xbe̱n li puerta, chi saꞌ ut chirix. Quixbis chixjunil li tzꞌac li cuan chixjun sutam, chi saꞌ ut chirix.

¹⁸ Lix sahob ru li tzꞌac li cuan saꞌ li templo, aꞌan retalileb li cheꞌ palmera ut retalileb li querubines. Nak queꞌxyi̱b, queꞌxqꞌue junju̱nk querubín ut junju̱nk palmera. Caꞌcab riloba̱leb li junju̱nk chi querubín.

¹⁹ Jun li riloba̱l chanchan na-iloc cui̱nk yo̱ chi iloc cuan cuiꞌ li retalil li cheꞌ palmera saꞌ li jun pacꞌal. Ut li riloba̱l jun chic, aꞌan chanchan na-iloc cakcoj. Yo̱ chi iloc cuan cuiꞌ li retalil li cheꞌ palmera li cuan saꞌ li pacꞌal jun chic. Joꞌcaꞌin quixba̱nu chixjun sutam li templo.

²⁰ Juchꞌbil retalileb li cheꞌ palmera ut retalileb li querubines saꞌ chixjunil li tzꞌac re li templo. Naticla chak saꞌ chꞌochꞌ ut nacuulac toj saꞌ xbe̱n li puerta.

²¹ Li rokechal li templo ca̱ xucu̱teb. Chiru li oqueba̱l re li Lokꞌlaj Santil Naꞌajej cuan jun li chanchan artal.

²² Li artal aꞌan yi̱banbil riqꞌuin tzꞌalam cheꞌ. Jun metro riqꞌuin media xteram. Li ru ut li rok, aꞌan jun metro. Lix xuc, li rok ut li ru yi̱banbil riqꞌuin cheꞌ. Ut li cui̱nk quixye cue: —Li artal aꞌin, aꞌan li me̱x li cuan chiru li Ka̱cuaꞌ, chan.

²³ Cuan cuib li puerta re li templo. Li jun cuan saꞌ li Santil Naꞌajej ut li jun chic cuan saꞌ li Lokꞌlaj Santil Naꞌajej.

²⁴ Li cuib chi puerta caꞌcab pere̱l ruheb. Li puerta nequeꞌrecꞌasi rib saꞌ li chꞌi̱chꞌ li nachapoc re.

²⁵ Chiruheb li puerta qꞌuebil lix sahob ru. Aꞌaneb li retalileb li cheꞌ palmera ut li retalileb li querubines joꞌ li yi̱banbil chi saꞌ chiruheb li tzꞌac. Ut li xmu cab tzꞌaptzꞌo riqꞌuin tzꞌalam cheꞌ.

²⁶ Saꞌ xcaꞌ pacꞌalil li xmu cab cuanqueb li cocꞌ ventanas. Juchꞌbil xsahob ru riqꞌuin li retalil li cheꞌ palmera. Qꞌuebil ajcuiꞌ lix sahob ru li cocꞌ naꞌajej li cuanqueb aran.