Ezequiel 40 - Li Santil hu

Li visión chirix li templo li ta̱yi̱ba̱k mokon

¹ Nak yo̱ o̱b xcaꞌcꞌa̱l chihab kacꞌambal chi pre̱xil Babilonia saꞌ li laje̱b xbe li po re lix ticlajic li chihab la̱in quicuecꞌa xcuanquil li Ka̱cuaꞌ. Quincꞌameꞌ saꞌ visión saꞌ jun li naꞌajej. Aꞌan quicꞌulman nak ac yo̱ ca̱laju chihab xchapbal li tenamit Jerusalén.

² Saꞌ li visión li quixcꞌutbesi chicuu li Dios quinixcꞌam toj saꞌ li naꞌajej Israel. Ut quinixxakab saꞌ jun li tzu̱l kꞌaxal najt xteram. Nabal li cab cuan saꞌ li sur. Chanchan jun nimla tenamit.

³ Li Ka̱cuaꞌ quinixcꞌam chi nachꞌ ut quicuil jun li cui̱nk nalemtzꞌun joꞌ li kꞌan chꞌi̱chꞌ bronce. Xakxo chire li oqueba̱l. Cuan saꞌ rukꞌ jun li cheꞌ re bisoc ut jun li cꞌa̱m lino re bisoc.

⁴ Li cui̱nk quixye cue: —At ralal cui̱nk, il chi us li cꞌaꞌru tincꞌut cha̱cuu, ut abi chi us li cꞌaꞌru tinye a̱cue. Ta̱qꞌue retal li cꞌaꞌru tincꞌut cha̱cuu. Aꞌan aj e nak xatcꞌameꞌ chak arin xban li Dios. Ta̱ye reheb li ralal xcꞌajol laj Israel chixjunil li cꞌaꞌru ta̱cuil, chan cue.

⁵ Li quicꞌutbesi̱c chicuu aꞌan li tzꞌac li sutsu cuiꞌ li templo. Li cui̱nk quixchap lix bisleb cheꞌ oxib metro li rok ut riqꞌuin aꞌan quixbis li tzꞌac. Li tzꞌac, aꞌan oxib metro li xteram ut oxib metro li ru.

Li oqueba̱l li cuan saꞌ li este

⁶ Chirix aꞌan, co̱ saꞌ li oqueba̱l li na-iloc saꞌ li este. Quitakeꞌ saꞌ li gradas ut quixbis li oqueba̱l. Aꞌan oxib metro ru.

⁷ Cuan oxib li cocꞌ naꞌajej saꞌ xcaꞌ pacꞌalil. Oxib metro rok ut oxib metro ru li junju̱nk. Cuib metro riqꞌuin media lix ya̱nkeb li junju̱nk chi naꞌajej. Oxib metro xya̱nk li cuib chi okech li cuanqueb saꞌ li oqueba̱l.

⁸ Quixbis ajcuiꞌ li oqueba̱l li cuan chi saꞌ ut aꞌan oxib metro ajcuiꞌ.

⁹ Ut quixbis li oqueba̱l li cuan saꞌ xmu cab. Ca̱hib metro ru. Ut cuanqueb cuib li okech ju̱nk metro xni̱nkal xsaꞌ. Ut li oqueba̱l, aꞌan na-iloc cuan cuiꞌ li templo.

¹⁰ Saꞌ xcaꞌ pacꞌalil li oqueba̱l cuan oxib li cocꞌ naꞌajej. Juntakꞌe̱t xni̱nkaleb ut juntakꞌe̱t xni̱nkaleb li okech li cuan saꞌ li cuib pacꞌal.

¹¹ Li cui̱nk quixbis li puerta re li oqueba̱l. O̱b metro ru. Ut lix nimal ru li oqueba̱l, aꞌan cuakib metro riqꞌuin media.

¹² Chiru li junju̱nk chi naꞌajej cuan jun li chꞌina tzꞌac. Ut lix nimal ru, aꞌan media metro. Juntakꞌe̱t saꞌ li cuib pacꞌal. Ut li junju̱nk chi naꞌajej oxib metro ru ut oxib metro rok.

¹³ Ut quixbis xya̱nk li cuib chi oqueba̱l. Quixtiquib cuan cuiꞌ lix puertil jun li naꞌajej ut quicuulac cuan cuiꞌ lix puertil li jun chic naꞌajej. Lix najtil xya̱nk, aꞌan cablaju metro riqꞌuin media.

¹⁴ Quixbis ajcuiꞌ li okech re li oqueba̱l li cuan saꞌ xmu cab. Aꞌan laje̱b metro xni̱nkal rok li junju̱nk chi okech.

¹⁵ Quixtiquib chak xbisbal cuan cuiꞌ li oqueba̱l li cuan chiru. Quicuulac cuan cuiꞌ li oqueba̱l li cuan toj chi saꞌ. Ut aꞌan cuan o̱b xcaꞌcꞌa̱l metro xnimal rok.

¹⁶ Cuanqueb ventana cocꞌ ru saꞌ eb li junju̱nk chi naꞌajej. Cuanqueb ajcuiꞌ saꞌ li xmu cab. Ut cuanqueb ajcuiꞌ ventana saꞌ li naꞌajej li nequeꞌnumeꞌ cuiꞌ nak nequeꞌxic saꞌ li neba̱l. Ut lix sahob ru juchꞌbileb chiruheb li okech, aꞌan retalileb li cheꞌ palmera.

Li neba̱l li cuan chirix

¹⁷ Chirix aꞌan li cui̱nk quinixcꞌam saꞌ li neba̱l li cuan chirix. Aran chiru li tzꞌac yi̱banbil laje̱b xcaꞌcꞌa̱l li cocꞌ naꞌajej chixjun sutam li neba̱l. Ut tusbil li xan saꞌ li neba̱l.

¹⁸ Li xan li tusbil chiruheb li oqueba̱l li cuan chirix, aꞌan cubenak caꞌchꞌin xteram chiru li xan li cuanqueb cuiꞌ li cocꞌ naꞌajej.

¹⁹ Li cui̱nk quixtiquib xbisbal xya̱nk li oqueba̱l li cuan chiru saꞌ li este, quicuulac toj saꞌ li oqueba̱l re li neba̱l li cuan chi saꞌ. Ut lix najtil rok, aꞌan laje̱b roxcꞌa̱l metro.

Li oqueba̱l li cuan saꞌ li norte

²⁰ Li cui̱nk quixbis li oqueba̱l re li neba̱l li cuan saꞌ li norte li cuan chirix. Quixbis li rok ut li ru.

²¹ Saꞌ li oqueba̱l aꞌin cuanqueb ox ox li naꞌajej saꞌ xcaꞌ pacꞌalil. Juntakꞌe̱t xbisbaleb li okech ut li xmu cab riqꞌuineb li cuanqueb saꞌ li naꞌajej li cuanqueb saꞌ li oqueba̱l li cuan saꞌ li este. O̱b xcaꞌcꞌa̱l metro xnajtil rok li naꞌajej aꞌan ut cablaju metro riqꞌuin media xnimal ru.

²² Eb li ventana re li naꞌajej aꞌin juntakꞌe̱t riqꞌuineb li ventana li cuanqueb saꞌ li oqueba̱l li cuan saꞌ li este. Lix sahob ru li okech ut lix bisbal juntakꞌe̱t ajcuiꞌ. Saꞌ li oqueba̱l aꞌin cuan cuukub li gradas li nequeꞌtakeꞌ cuiꞌ. Ut chiru aꞌan cuan li xmu cab.

²³ Ut quixbis li xya̱nk li oqueba̱l li cuan saꞌ li norte saꞌ xjayal li oqueba̱l re li neba̱l li cuan toj chi saꞌ. Ut cuan laje̱b roxcꞌa̱l metro xnajtil rok.

Li oqueba̱l li cuan saꞌ li sur

²⁴ Chirix chic aꞌan li cui̱nk quinixcꞌam saꞌ li oqueba̱l re li neba̱l li cuan saꞌ li sur. Quixbis li oqueba̱l ut li okech ut li xmu cab ut juntakꞌe̱t xbisbal riqꞌuineb li jun chꞌol chic.

²⁵ Cuanqueb xventanil joꞌ eb li ventana li cuanqueb saꞌ li jun chꞌol chic li oqueba̱l. Lix nimal li naꞌajej li cuan cuiꞌ li oqueba̱l, aꞌan o̱b xcaꞌcꞌa̱l metro xnajtil rok ut cablaju metro riqꞌuin media xnimal ru.

²⁶ Saꞌ li oqueba̱l aꞌan cuanqueb cuukub li gradas li naxic saꞌ li oqueba̱l. Ut lix sahob ru juchꞌbil chiruheb li okech saꞌ xcaꞌ pacꞌalil, aꞌan retalileb li cheꞌ palmera.

²⁷ Li cui̱nk quixbis xya̱nk li oqueba̱l li cuan saꞌ li sur saꞌ xjayal li xmu cab li cuan toj chi saꞌ. Ut cuan laje̱b roxcꞌa̱l metro xnajtil li rok.

Li neba̱l li cuan chi saꞌ

²⁸ Chirix aꞌan li cui̱nk quinixcꞌam saꞌ li oqueba̱l li naxic saꞌ li neba̱l li cuan toj chi saꞌ, saꞌ li pacꞌal li cuan saꞌ li sur. Quixbis li oqueba̱l. Juntakꞌe̱t xbisbal riqꞌuineb li oqueba̱l jun chꞌol chic.

²⁹ Li cocꞌ naꞌajej, ut eb li okech ut eb li ventana juntakꞌe̱t xbisbaleb riqꞌuineb li jun chꞌol chic. Lix bisbal chixjunil, aꞌan o̱b xcaꞌcꞌa̱l metro rok ut cablaju metro riqꞌuin media ru.

³⁰ Li naꞌajej li cuan cuiꞌ li oqueba̱l, aꞌan o̱b xcaꞌcꞌa̱l metro rok ut cablaju metro riqꞌuin media ru.

³¹ Li naꞌajej aꞌan qui-iloc cuan cuiꞌ li neba̱l li cuan chirix. Saꞌ li oqueba̱l aꞌan cuanqueb cuakxakib li grada li naxic saꞌ li oqueba̱l. Ut lix sahob ru juchꞌbil chiruheb li okech, aꞌan retalileb li cheꞌ palmera.

³² Chirix aꞌan li cui̱nk quinixcꞌam saꞌ li oqueba̱l li naxic saꞌ li neba̱l li cuan toj chi saꞌ, li cuan saꞌ li este. Quixbis li oqueba̱l. Juntakꞌe̱t xbisbal riqꞌuineb li jun chꞌol chic.

³³ Li cocꞌ naꞌajej, ut eb li okech ut eb li ventana juntakꞌe̱t xbisbaleb riqꞌuineb li jun chꞌol chic. Li oqueba̱l ut li xmu cab cuanqueb xventanil. Lix bisbaleb li naꞌajej li cuan cuiꞌ li oqueba̱l, aꞌan o̱b xcaꞌcꞌa̱l metro li rok ut cablaju metro riqꞌuin media li ru.

³⁴ Li naꞌajej aꞌan qui-iloc cuan cuiꞌ li neba̱l li cuan chirix. Saꞌ li oqueba̱l aꞌan cuanqueb cuakxakib li grada li naxic saꞌ li oqueba̱l. Ut lix sahob ru li juchꞌbil chiruheb li okech li cuanqueb saꞌ xcaꞌ pacꞌalil li oqueba̱l, aꞌan retalileb li cheꞌ palmera.

³⁵ Chirix aꞌan li cui̱nk quinixcꞌam saꞌ li oqueba̱l li cuan saꞌ li norte ut quixbis. Juntakꞌe̱t xbisbal joꞌ li jun chꞌol chic.

³⁶ Cuanqueb li cocꞌ naꞌajej ut eb li okech ut eb li ventana. Li oqueba̱l ut li xmu cab cuanqueb xventanil. Lix bisbal li naꞌajej li cuan cuiꞌ li oqueba̱l, aꞌan o̱b xcaꞌcꞌa̱l metro li rok ut cablaju metro riqꞌuin media li ru.

³⁷ Li naꞌajej aꞌan qui-iloc cuan cuiꞌ li neba̱l li cuan chirix. Saꞌ li oqueba̱l aꞌan cuanqueb cuakxakib li grada li naxic saꞌ li oqueba̱l. Ut lix sahob ru juchꞌbil chiruheb li okech li cuanqueb saꞌ xcaꞌ pacꞌalil li oqueba̱l, aꞌan retalil li cheꞌ palmera.

³⁸ Ut cuan ajcuiꞌ jun li naꞌajej nachꞌ riqꞌuin li oqueba̱l li cuan saꞌ li norte, li naxic saꞌ li neba̱l li cuan toj chi saꞌ. Saꞌ li naꞌajej aꞌan queꞌxchꞌaj xtibeleb li xul li nequeꞌxqꞌue chokꞌ cꞌatbil mayej.

³⁹ Saꞌ xcaꞌ pacꞌalil li naꞌajej aꞌan cuanqueb caꞌcab li me̱x. Saꞌ xbe̱neb li me̱x aꞌan queꞌxcamsiheb li xul li teꞌcꞌatekꞌ ut eb li teꞌmayeja̱k re xpatzꞌbal xcuybal xma̱queb.

⁴⁰ Chirix li naꞌajej aꞌan cuanqueb ca̱hib chic li me̱x juntakꞌe̱teb riqꞌuineb li cuanqueb chi saꞌ. Caꞌcab cuanqueb saꞌ xcaꞌ pacꞌalil li oqueba̱l li cuan saꞌ li norte nachꞌ cuanqueb cuiꞌ li gradas.

⁴¹ Cuakxakibeb chixjunileb li me̱x li queꞌcamsi̱c cuiꞌ eb li xul li teꞌmayeja̱k. Ca̱hib cuanqueb chi saꞌ li naꞌajej li cuan nachꞌ riqꞌuin li oqueba̱l li cuan saꞌ li norte ut ca̱hib cuanqueb saꞌ li neba̱l.

⁴² Li ca̱hib chi me̱x li cuanqueb saꞌ li naꞌajej li queꞌxcauresi cuiꞌ li mayej li teꞌcꞌatekꞌ yi̱banbileb riqꞌuin li pec li ti̱cobresinbileb ru. Lix bisbal li me̱x, aꞌan oꞌlaju xca̱cꞌa̱l centímetro ru ut oꞌlaju xca̱cꞌa̱l centímetro rok. Ut laje̱b roxcꞌa̱l centímetro li xteram. Saꞌ eb li me̱x aꞌan quixoqueꞌ chixjunil li chꞌi̱chꞌ li quicꞌanjelac re xcamsinquileb li xul li teꞌmayeja̱k.

⁴³ Chiru li tzꞌac chixjun sutam li naꞌajej cuanqueb li chapleb chꞌi̱chꞌ jun cꞌutub xni̱nkal rok. Ut saꞌ xbe̱neb li me̱x quiqꞌueheꞌ li tib re ta̱mayeja̱k.

Lix naꞌajeb laj tij

⁴⁴ Chirix chic aꞌan li cui̱nk quinrocsi saꞌ li neba̱l li cuan toj chi saꞌ. Cuan cuib li naꞌajej li nequeꞌiloc saꞌ li neba̱l. Jun cuan chixcꞌatk li oqueba̱l li cuan saꞌ li norte ut li jun chic cuan chixcꞌatk li oqueba̱l li cuan saꞌ li sur. Li naꞌajej jun cuan saꞌ xcaꞌyaba̱l li naꞌajej jun chic. Aꞌaneb lix naꞌajeb laj tij li nequeꞌcꞌanjelac chiru li Dios.

⁴⁵ Li cui̱nk quixye cue nak li naꞌajej li na-iloc saꞌ li sur, aꞌan lix naꞌajeb laj tij li nequeꞌcꞌacꞌalen re li templo.

⁴⁶ Ut li naꞌajej li na-iloc saꞌ li norte, aꞌan lix naꞌajeb laj tij li nequeꞌcꞌanjelac saꞌ li artal. Aꞌaneb li ralal xcꞌajol laj Sadoc. Saꞌ xya̱nkeb li ralal xcꞌajol laj Leví caꞌajeb cuiꞌ aꞌan naru teꞌcꞌanjelak chiru li Ka̱cuaꞌ saꞌ lix artal.

Li templo

⁴⁷ Chirix aꞌan li cui̱nk quixbis li neba̱l li cuan chi saꞌ. Ca̱ xucu̱t li naꞌajej. Laje̱b roxcꞌa̱l metro rok ut laje̱b roxcꞌa̱l metro ru. Li artal cuan chiru li templo.

⁴⁸ Ut li cui̱nk quinixcꞌam saꞌ li naꞌajej li cuan cuiꞌ li oqueba̱l re li templo. Quixbiseb li okech li cuan saꞌ li oqueba̱l. Cuib metro riqꞌuin media xni̱nkal xsaꞌ li junju̱nk chi okech. Li oqueba̱l aꞌan cuukub metro ru. Ut li rokechal li puerta re li templo, aꞌan jun metro riqꞌuin media ru.

⁴⁹ Li naꞌajej li cuan cuiꞌ li oqueba̱l, aꞌan laje̱b metro ru ut cuakib metro rok. Ut laje̱b li gradas li nequeꞌtakeꞌ cuiꞌ. Cuan junju̱nk li okech saꞌ xcaꞌ pacꞌalil li oqueba̱l.