Ezequiel 4 - Li Santil hu

Laj Ezequiel quixye resil li raylal li teꞌxcꞌul eb laj Jerusalén

¹ Li Dios quixye: —At ralal cui̱nk, chap jun li xan ut ta̱qꞌue cha̱cuu. Ut ta̱yi̱b chiru li xan jun retalil li tenamit Jerusalén.

² Chirix aꞌan, ta̱yi̱b jun retalil li tzꞌac li sutsu cuiꞌ li tenamit ut ta̱yi̱b jun retalil li pletic. Ta̱yi̱b retalil li rok haꞌ ut retalil lix naꞌajeb li soldados ut ta̱yi̱b ajcuiꞌ retalil li ni̱nki cheꞌ li teꞌxtꞌan cuiꞌ li oqueba̱l re li tenamit.

³ Ut ta̱xakab jun li perpo̱quil chꞌi̱chꞌ cha̱cuu, joꞌ jun li tzꞌac yo̱ chi ramoc re cha̱cuu li xan li tzꞌi̱banbil cuiꞌ retalil li tenamit. Ta̱ba̱nu a̱cuib nak oc a̱cue chi pletic riqꞌuin li tenamit. Aꞌin ta̱ba̱nu chokꞌ retalil li cꞌaꞌru teꞌxcꞌul eb li ralal xcꞌajol laj Israel.

⁴ Ut la̱at tatyocla̱k saꞌ xbe̱n la̱ tzꞌe. Jarub cutan yocyo̱kat, aꞌan retalil li raylal li teꞌxcꞌul eb laj Israel.

⁵ Rajlal cutan tatyocla̱k saꞌ la̱ tzꞌe chiru oxib ciento cutan riqꞌuin laje̱b roꞌcꞌa̱l (390) cutan. Li jun cutan, aꞌan retalil li jun chihab. Li raylal li ta̱cꞌul, aꞌan retalil li raylal li teꞌxcꞌul eb laj Israel chiru oxib ciento chihab riqꞌuin laje̱b roꞌcꞌa̱l chihab xban lix ma̱usilaleb.

⁶ Nak ac xrakeꞌ li cutan nak yocyo̱cat saꞌ xbe̱n la̱ tzꞌe, tatyocla̱k cuiꞌchic saꞌ xbe̱n la̱ nim chiru caꞌcꞌa̱l cutan. Li raylal li ta̱cꞌul, aꞌan retalil li raylal li teꞌxcꞌul eb laj Judá chiru caꞌcꞌa̱l chihab xban xma̱usilaleb. Li jun cutan, aꞌan retalil li jun chihab.

⁷ Ilon cuan cuiꞌ li tenamit Jerusalén retalil nak ta̱chapekꞌ li tenamit. Ut chi tꞌustꞌu la̱ tel ta̱ye resil li raylal teꞌxcꞌul.

⁸ Nak yocyo̱cat saꞌ la̱ tzꞌe ut saꞌ la̱ nim, la̱in tatinbacꞌ saꞌ la̱ naꞌaj re nak incꞌaꞌ ta̱sukꞌisi a̱cuib. Joꞌcan ta̱ba̱nu toj retal ta̱choy li jarub cutan li xinye a̱cue nak ta̱cꞌul li raylal chokꞌ retal nak ta̱chapekꞌ li tenamit Jerusalén.

⁹ Ta̱cꞌam li trigo, li cebada, li habas, li lentejas ut li millo ut li mox, ut ta̱qꞌue saꞌ junak ucꞌal. Ta̱yi̱b la̱ caxlan cua riqꞌuin aꞌan. Aꞌan ta̱tzaca chiru li oxib ciento cutan riqꞌuin laje̱b roꞌcꞌa̱l cutan.

¹⁰ Bisbilak li joꞌ qꞌuial ta̱tzaca chiru li jun cutan. Cuakxakib onza ta̱tzaca rajlal cutan.

¹¹ Joꞌcan ajcuiꞌ li haꞌ li ta̱cuucꞌ bisbilak. Cuib secꞌ ajcuiꞌ li haꞌ ta̱cuucꞌ rajlal cutan.

¹² Li caxlan cua li ta̱tzaca, aꞌan yi̱banbil riqꞌuin cebada pombil saꞌ xam. Chiruheb li tenamit ta̱pom saꞌ xxamlel lix cꞌot cristian, chan.

¹³ Ut li Ka̱cuaꞌ quixye ajcuiꞌ: —Joꞌcaꞌin teꞌtzaca̱nk eb laj Israel nak cua̱nkeb saꞌ xya̱nkeb li jalan tenamit li xebintakla cuiꞌ chi pre̱xil. Muxbilak lix tzacae̱mkeb.—

¹⁴ Ut la̱in quinye: —At Ka̱cuaꞌ, at inDios, la̱in ma̱ jun sut quinmux cuib. Chalen saꞌ incaꞌchꞌinal ut toj chalen anakcuan ma̱ jun cua xintzaca lix tibel li xul li yal quicam xjunes, chi moco li camsinbil xban joskꞌ aj xul. Ma̱ jun cua xintzaca li tzacae̱mk muxbil, chanquin.

¹⁵ Ut li Ka̱cuaꞌ quixye cue: —Tinqꞌue a̱lese̱ns chirocsinquil lix cꞌot cuacax chokꞌ re̱kaj lix cꞌot cristian re nak ta̱pom la̱ caxlan cua, chan.

¹⁶ Ut li Dios quixye cuiꞌchic cue: —At ralal cui̱nk, la̱in incꞌaꞌ chic tinqꞌue chi nabal lix tzacae̱mkeb li cuanqueb Jerusalén. Bisbilak chic lix cua rucꞌaheb tinqꞌue. Ut eb li tenamit teꞌrahokꞌ xchꞌo̱leb ut teꞌoc chi cꞌoxlac cꞌaꞌru teꞌxba̱nu. Ut teꞌxucuak xban nak yo̱k chi osocꞌ lix tzacae̱mkeb ut lix haꞌeb.

¹⁷ Ma̱cꞌaꞌak chic xcua rucꞌaheb. Ut yo̱keb chixcaꞌyanquil ribeb ut yo̱keb chi xucuac. Xjuneseb yo̱keb chi osocꞌ xban li ma̱usilal li nequeꞌxba̱nu, chan.