Ezequiel 34 - Li Santil hu

Resil li raylal li ta̱cha̱lk saꞌ xbe̱neb laj ilol reheb laj Israel

¹ Li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, ye reheb li nequeꞌiloc re li tenamit Israel nak ta̱cha̱lk raylal saꞌ xbe̱neb. Ut ta̱ye reheb: Joꞌcaꞌin xye li Ka̱cuaꞌ li nimajcual Dios. Raylal ta̱cha̱lk saꞌ e̱be̱n la̱ex li nequex-iloc reheb laj Israel xban nak incꞌaꞌ nequeril chi tzꞌakal li tenamit. Junes chokꞌ e̱re nequeraj li us. ¿Ma incꞌaꞌ ta biꞌ tento nak laj ilol xul ta̱ril chi us lix carner?

³ Nequerucꞌ li leche ut nequerocsi li akꞌej yi̱banbil riqꞌuin rix li carner. Nequecamsi ut nequetiu xtibel li cha̱bil carner. Abanan incꞌaꞌ nequerileb chi us le̱ carner.

⁴ Incꞌaꞌ quetenkꞌaheb li incꞌaꞌ cauheb rib, chi moco quebaneb li yaj, chi moco quelan ru lix tochꞌolaleb. Ut incꞌaꞌ quesukꞌisiheb li queꞌel saꞌ lix naꞌajeb chi moco quesicꞌ li queꞌsacheꞌ. Cau quextaklan saꞌ xbe̱neb ut saꞌ joskꞌil.

⁵ Joꞌcan nak queꞌxchaꞌchaꞌi ribeb yalak bar xban nak ma̱cꞌaꞌ aj ilol reheb, ut quilajeꞌtiꞌeꞌ xbaneb li joskꞌ aj xul.

⁶ Eb lin carner yo̱queb chixbeninquil ribeb yalak bar saꞌ eb li tzu̱l ut saꞌ eb li xbe̱n bol. Ut saꞌ chixjunil li ruchichꞌochꞌ queꞌjeqꞌui̱c ruheb. Ut ma̱ ani quisicꞌoc reheb ut ma̱ ani quipatzꞌoc reheb.

⁷ Joꞌcan nak la̱ex aj ilol xul, cherabihak li cꞌaꞌru ninye la̱in li Ka̱cuaꞌ Dios.

⁸ La̱in li yoꞌyo̱quil Dios. Relic chi ya̱l tinye e̱re nak ma̱cꞌaꞌ eb aj ilol reheb lin carner. Xecanab chi elkꞌa̱c lin carner ut xecanab chi camsi̱c xbaneb li joskꞌ aj xul li cuanqueb saꞌ qꞌuicheꞌ. La̱ex incꞌaꞌ nequesicꞌ lin queto̱mk chi moco nequechꞌolaniheb. Junes la̱ex nequechꞌolani e̱rib.

⁹ Joꞌcan ut la̱ex aj ilol xul, cherabihak li cꞌaꞌru naxye li Ka̱cuaꞌ.

¹⁰ Joꞌcaꞌin naxye li nimajcual Dios: —La̱in yo̱ injoskꞌil saꞌ e̱be̱n la̱ex aj ilol xul ut tinqꞌue saꞌ e̱be̱n li cꞌaꞌru nequeꞌxcꞌul lin carner. Tincoleb che̱ru. Ma̱cuaꞌ chic la̱ex tex-ilok reheb. La̱in tincuisiheb che̱ru re nak incꞌaꞌ chic yo̱kex chixtiubaleb. Incꞌaꞌ chic te̱chꞌolani e̱rib e̱junes.

¹¹ Joꞌcaꞌin quixye li nimajcual Dios: —Abihomak li tinye e̱re. La̱in tebinsicꞌ lin carner toj retal tebintau ut la̱in chic tin-ilok reheb xban nak la̱in ninnauheb ru.

¹² Joꞌ nak laj ilol xul naxnau ru lix carner li jeqꞌuinbileb ru, joꞌcan ajcuiꞌ nak tebinnau ru lin carner la̱in ut tebincol saꞌ eb li naꞌajej li cuanqueb cuiꞌ chak li queꞌjeqꞌui̱c cuiꞌ ruheb saꞌ li cutan li kꞌojyi̱n ru xban li raylal.

¹³ La̱in tincuisiheb chak lin carner saꞌ eb li xni̱nkal ru tenamit ut tinchꞌutubeb ru ut tincꞌameb saꞌ lix naꞌajeb. La̱in tinqꞌueheb chi cua̱nc saꞌ eb li tzu̱l ut saꞌ eb li ru takꞌa ut saꞌ eb li cha̱bil naꞌajej aran Israel.

¹⁴ La̱in tebinqꞌue chi ichajibc saꞌ li cha̱bil pachꞌayaꞌ ut saꞌ eb li tzu̱l li cuanqueb Israel tebinqꞌue chi hila̱nc. Aran teꞌcua̱rk saꞌ li cha̱bil naꞌajej. Ut tebinqꞌue chi cuaꞌac saꞌ li kꞌunil pim saꞌ eb li tzu̱l li cuanqueb Israel.

¹⁵ Ut la̱in tincꞌacꞌale̱nk reheb lin carner. La̱in tinsicꞌok re lix naꞌajeb re teꞌhila̱nk.

¹⁶ La̱in tinsiqꞌueb chak li sachenakeb li queꞌco̱eb saꞌ jalan be ut tinqꞌueheb chi sukꞌi̱c saꞌ xya̱nkeb li queto̱mk. La̱in tinban lix yocꞌolal ut tinlan. Tinqꞌue xcacuilaleb li yajeb. Ut la̱in tinsach ruheb li ni̱nkeb xtibel ut li cauheb rib. La̱in tin-ilok reheb lin carner saꞌ ti̱quilal.

¹⁷ La̱in li nimajcual Dios ninye aꞌin e̱re: La̱ex lin queto̱mk. La̱in tinrakok a̱tin saꞌ e̱be̱n. Tincuisi lin carner saꞌ xya̱nkeb li chiba̱t.

¹⁸ ¿Ma incꞌaꞌ ta biꞌ tzꞌakal riqꞌuin nak nequetzaca li cha̱bil tzacae̱mk? ¿Ma toj tento ta biꞌ nak te̱yekꞌi saꞌ e̱rok li incꞌaꞌ nequetzaca? La̱ex nequerucꞌ li haꞌ li sak ru ut nequetzꞌajni ru riqꞌuin le̱ rok li joꞌ qꞌuial chic nacana.

¹⁹ Eb lin carner nequeꞌxtzaca li tzacae̱mk li quiyekꞌi̱c saꞌ e̱rok ut nequerucꞌ li haꞌ li nequetzꞌajni ru la̱ex.

²⁰ Joꞌcan nak la̱in ninye e̱re nak tinrakok a̱tin saꞌ xbe̱neb li carner. Tincuisiheb li ni̱nkeb xtibel saꞌ xya̱nkeb li bakeb.

²¹ La̱ex nequetiquisiheb li ma̱cꞌaꞌeb xmetzꞌe̱u riqꞌuin le̱ tel ut nequexekꞌeb toj retal nequera̱linaheb ut nequejeqꞌui ruheb.

²² La̱in tincoleb lin carner re nak incꞌaꞌ chic teꞌrahobtesi̱k. La̱in tinrakok a̱tin saꞌ xbe̱neb lin carner.

²³ La̱in tinqꞌue aj ilol reheb. La̱in tinqꞌue laj David laj cꞌanjel chicuu chi iloc reheb ut aꞌan tixchꞌolaniheb.

²⁴ La̱in li Ka̱cuaꞌ. La̱inak lix Dioseb ut laj David laj cꞌanjel chicuu ta̱takla̱nk saꞌ xbe̱neb. La̱in li Ka̱cuaꞌ xinyehoc re aꞌin.

²⁵ La̱in tinba̱nu jun li contrato riqꞌuineb re nak teꞌxcꞌam ribeb saꞌ usilal cuiqꞌuin. Tincuisi chixjunileb li joskꞌ aj xul saꞌ lix naꞌajeb re nak naru teꞌcua̱nk yalak bar saꞌ eb li cꞌaleba̱l ut naru teꞌcua̱rk saꞌ eb li qꞌuicheꞌ chi ma̱cꞌaꞌ nachꞌiꞌchꞌiꞌin reheb.

²⁶ La̱in tincuosobtesiheb ut tebincanab chi cua̱nc chixjun sutam lin tzu̱l. Tincuosobtesiheb ut tintakla li hab saꞌ xkꞌehil.

²⁷ Eb li cheꞌ teꞌu̱chi̱nk ut li acui̱mk saꞌ li cꞌaleba̱l ta̱u̱chi̱nk. Ut chixjunileb teꞌcua̱nk saꞌ xnaꞌajeb chi ma̱cꞌaꞌ ta̱chꞌiꞌchꞌiꞌi̱nk reheb. La̱in tincoleb saꞌ rukꞌeb li queꞌnumta saꞌ xbe̱neb ut queꞌrahobtesin reheb. Ut riqꞌuin aꞌan teꞌxqꞌue retal nak la̱in li Ka̱cuaꞌ.

²⁸ Li xni̱nkal ru tenamit li incꞌaꞌ nequeꞌxpa̱b li Dios incꞌaꞌ chic teꞌxmakꞌ chiruheb li cꞌaꞌru reheb, chi moco li joskꞌ aj xul teꞌxcamsiheb chokꞌ xtibeb. Teꞌcua̱nk ban chi saheb saꞌ xchꞌo̱l ut ma̱cꞌaꞌ ta̱seꞌbesi̱nk reheb.

²⁹ La̱in tinqꞌue li cha̱bil chꞌochꞌ reheb re nak ta̱e̱lk li racui̱mkeb chi cha̱bil. Ut incꞌaꞌ chic ta̱cua̱nk li cueꞌej saꞌ lix tenamiteb. Ut incꞌaꞌ chic ta̱cꞌutekꞌ xxuta̱neb xbaneb li jalan xtenamiteb.

³⁰ Chixjunileb teꞌxqꞌue retal nak la̱in li Ka̱cuaꞌ lix Dioseb ut cua̱nkin riqꞌuineb. Eb laj Israel, aꞌaneb lin tenamit.

³¹ La̱ex aj Israel, la̱ex lin carner. La̱in ninchꞌolanin e̱re. La̱ex lin tenamit ut la̱in le̱ Dios, chan li nimajcual Dios.