Ezequiel 31 - Li Santil hu

¹ Nak yo̱ junlaju chihab kacꞌambal Babilonia, li Ka̱cuaꞌ quia̱tinac cuiqꞌuin saꞌ li xbe̱n cutan re li rox po ut quixye cue:

² —At ralal cui̱nk, joꞌcaꞌin ta̱ye reheb laj Egipto ut re laj faraón lix reyeb: ¿Cꞌaꞌru aj iqꞌuin tinjuntakꞌe̱ta cuiꞌ le̱ cuanquil?

³ Cꞌoxla li tenamit Asiria. Chanchan jun li chacalteꞌ aran Líbano, li cꞌajoꞌ xchꞌinaꞌusal li rukꞌ. Nim xmu nak nequeꞌxhel rib saꞌ xbe̱n li qꞌuicheꞌ. Kꞌaxal najt xteram. Chanchan nak li ruꞌuj nacuulac toj takecꞌ saꞌ chok.

⁴ Quitꞌakresi̱c xbaneb li yuꞌam haꞌ ut najt rok quicuulac. Eb li nimaꞌ nequeꞌnumeꞌ cuan cuiꞌ li cheꞌ aꞌan ut nequeꞌtꞌakresi̱c eb li cheꞌ li cuanqueb saꞌ qꞌuicheꞌ xban li haꞌ aꞌan.

⁵ Xban nak quitꞌakresi̱c chi us, kꞌaxal najt rok quicuulac chiruheb chixjunileb li cheꞌ li cuanqueb saꞌ li qꞌuicheꞌ. Nabal li rukꞌ ut najt rokeb.

⁶ Qꞌuila pa̱y ru laj xicꞌanel xul queꞌxyi̱b lix soc saꞌ eb li rukꞌ. Saꞌ li xmu li cheꞌ aꞌan queꞌyoꞌla raleb li joskꞌ aj xul. Ut nabaleb li xni̱nkal ru tenamit queꞌhilan saꞌ lix mu.

⁷ Cꞌajoꞌ xchꞌinaꞌusal li cheꞌ najt xteram xban nak xhel rib li rukꞌ. Cham cuan lix xeꞌ ut nachꞌ riqꞌuin li nimaꞌ.

⁸ Ma̱ jun li cheꞌ li cuan saꞌ xnaꞌaj li cuacui̱mk naru xjuntakꞌe̱tanquil riqꞌuin xban xchꞌinaꞌusal, chi moco li chacalteꞌ, chi moco li ciprés, chi moco li jun chꞌol chic li cheꞌ li cuan aran. Ma̱ jun li cheꞌ cuan rukꞌ joꞌ li rukꞌ li cheꞌ aꞌan.

⁹ La̱in li Ka̱cuaꞌ quinyi̱b chi cꞌajoꞌ xchꞌinaꞌusal ut quinqꞌue chi qꞌui̱c nabal li rukꞌ. Ut chixjunileb li cheꞌ li cuanqueb saꞌ li Edén saꞌ xnaꞌaj li cuacui̱mk queꞌxcakali, chan li Dios.

¹⁰ Joꞌcaꞌin xye li nimajcual Dios: —Xban nak kꞌaxal najt xteram xcuulac li cheꞌ aꞌin ut xban nak kꞌaxal nim lix mu, joꞌcan nak quixkꞌetkꞌeti rib.

¹¹ Joꞌcan nak la̱in tinkꞌaxtesi saꞌ rukꞌ li nataklan saꞌ xbe̱neb li xni̱nkal ru tenamit. Ut aꞌan ta̱qꞌuehok re chixtojbal xma̱c joꞌ xcꞌulub xcꞌulbal xban nak incꞌaꞌ us xba̱nu. La̱in ac xintzꞌekta̱na li cheꞌ aꞌan.

¹² Ut li kꞌaxal joskꞌ saꞌ xya̱nkeb li jalaneb xtenamit teꞌxtꞌan li cheꞌ. Eb li rukꞌ teꞌtꞌanekꞌ saꞌ eb li tzu̱l ut saꞌ eb li ru takꞌa. Teꞌtokekꞌ ut teꞌtꞌanekꞌ saꞌ eb li rok haꞌ. Ut chixjunileb li tenamit li cuanqueb rubel lix mu teꞌe̱lelik ut teꞌxcanab xjunes.

¹³ Eb li xul li nequeꞌrupupic teꞌhila̱nk saꞌ eb li rukꞌ li cheꞌ li tꞌantꞌo saꞌ chꞌochꞌ. Ut eb li joskꞌ aj xul teꞌcua̱nk saꞌ xya̱nkeb li rukꞌ.

¹⁴ Chalen anakcuan ma̱ jun chic li cheꞌ ta̱cuulak xteram joꞌ li cheꞌ aꞌan, usta tꞌakresinbil chi us. Chixjunileb teꞌca̱mk joꞌ nak nequeꞌcam li cui̱nk ut teꞌxic saꞌ xnaꞌajeb li camenak.

¹⁵ Joꞌcaꞌin xye li nimajcual Dios: —Saꞌ li cutan nak tintakla li cheꞌ aꞌin saꞌ xnaꞌajeb li camenak, la̱in tinqꞌue li palau chi chakic xban xrahil xchꞌo̱l. Tinxakab li nimaꞌ ut eb li rok haꞌ re nak incꞌaꞌ chic teꞌbe̱k rok. Xban nak qui-osoꞌ li cheꞌ aꞌan, la̱in tinqꞌue xrahil xchꞌo̱leb chixjunileb li cuanqueb Líbano ut eb li cheꞌ li cuanqueb saꞌ qꞌuicheꞌ telajeꞌsachk xchꞌo̱leb.

¹⁶ Nak ta̱tꞌanekꞌ li nimla cheꞌ aꞌin, eb li xni̱nkal ru tenamit sicsotkeb xbaneb xxiu. Chixjunileb li cheꞌ li cuanqueb Edén li sicꞌbileb ru teꞌsahokꞌ saꞌ xchꞌo̱leb nak ta̱xic li cheꞌ aꞌin saꞌ xnaꞌajeb li camenak. Teꞌcꞌojla̱k xchꞌo̱leb li cha̱bil cheꞌ li queꞌcuan Líbano, li queꞌtꞌakresi̱c chi us, li ac queꞌco̱eb saꞌ xnaꞌajeb li camenak.

¹⁷ Ut teꞌxic ajcuiꞌ rochbeneb aꞌan saꞌ xnaꞌajeb li camenak li xeꞌcamsi̱c saꞌ li ple̱t, eb li xni̱nkal ru tenamit li queꞌtenkꞌan re ut eb li queꞌhilan rubel lix mu.

¹⁸ ¿Ani aj iqꞌuin ta̱ru̱k ta̱juntakꞌe̱ta̱k la̱ lokꞌal ut la̱ cuanquilal, at faraón? Chanchanat li cheꞌ li cuan saꞌ li naꞌajej Edén. Abanan ta̱sachekꞌ a̱cuu joꞌ nak queꞌtꞌaneꞌ eb li cheꞌ li queꞌcuan Edén ut tatxic rubel chꞌochꞌ. Tatcua̱nk a̱cuochbeneb li incꞌaꞌ nequeꞌxpa̱b li Dios saꞌ xya̱nkeb li queꞌcamsi̱c saꞌ li ple̱t. Joꞌcan ta̱cꞌul la̱at, at faraón lix reyeb laj Egipto, a̱cuochbeneb chixjunileb li tenamit, chan li Ka̱cuaꞌ li nimajcual Dios.