Ezequiel 30 - Li Santil hu

¹ Li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, ta̱ye resil li cꞌaꞌru ta̱cꞌulma̱nk. Ta̱ye: Joꞌcaꞌin xye li Ka̱cuaꞌ li nimajcual Dios. Chexya̱bak ut te̱ye, “Cuulac re xcutanquil nak ta̱cha̱lk li raylal saꞌ kabe̱n.”

³ Cuulac re xcutanquil nak li Ka̱cuaꞌ ta̱rakok a̱tin. Cuulac re xkꞌehil li rahil chꞌo̱lejil nak li Ka̱cuaꞌ ta̱rakok a̱tin saꞌ xbe̱neb li xni̱nkal ru tenamit.

⁴ Ta̱cua̱nk pletic saꞌ li tenamit Egipto. Ut eb li cuanqueb Etiopía, cꞌajoꞌ nak teꞌxucuak xban nak nabaleb laj Egipto teꞌcamsi̱k. Ta̱elkꞌa̱k lix biomaleb ut ta̱juqꞌui̱k lix tenamiteb.

⁵ Chixjunileb li tenamit li teꞌoque̱nk chi pletic chirixeb laj Egipto teꞌcamsi̱k. Teꞌcamsi̱k chixjunileb laj Etiopía, eb laj Fut, eb laj Lud, ut eb laj Arabia joꞌ eb ajcuiꞌ laj Libia.

⁶ Ut quixye ajcuiꞌ li Ka̱cuaꞌ: —Teꞌosokꞌ chixjunileb li nequeꞌtenkꞌan reheb laj Egipto. Ta̱isi̱k xcuanquileb laj Egipto li nequeꞌxnimobresi cuiꞌ ribeb. Teꞌcamsi̱k saꞌ li ple̱t naticlac chak saꞌ li tenamit Migdol ut ta̱cuulak toj Sevene, chan li nimajcual Dios.

⁷ Li naꞌajej Egipto ta̱sachekꞌ ru joꞌ queꞌxcꞌul li jun chꞌol chic tenamit. Ta̱cana̱k chi ma̱cꞌaꞌ chic cuan chi saꞌ. Li tenamit poꞌbil chic ta̱cana̱k joꞌ queꞌxcꞌul li jun chꞌol chic.

⁸ La̱in tinqꞌue xxamlel li tenamit Egipto. Ut tinsach ruheb chixjunileb li teꞌraj oque̱nc chirix. Riqꞌuin aꞌan teꞌxqꞌue retal nak la̱in li Ka̱cuaꞌ.

⁹ Nak ta̱cuulak xkꞌehil nak tinsach ruheb laj Egipto, la̱in tintaklaheb lin takl saꞌ eb li jucub re xqꞌuebal xxiuheb laj Etiopía li cꞌojcꞌo̱queb xchꞌo̱l. Cha̱lc re li cutan nak xiu xiu cua̱nkeb.

¹⁰ Li nimajcual Dios xye: —La̱in tinqꞌue laj Nabucodonosor lix reyeb laj Babilonia chi numta̱c saꞌ xbe̱neb laj Egipto. Chi joꞌcaꞌin tinsach ru lix biomaleb.

¹¹ Lix reyeb laj Babilonia rochbeneb lix soldados teꞌxic chi pletic riqꞌuin chꞌi̱chꞌ riqꞌuineb laj Egipto. Laj Babilonia, aꞌaneb li tenamit li kꞌaxal joskꞌeb saꞌ xya̱nkeb li xni̱nkal ru tenamit. La̱in tinqꞌueheb chi numta̱c saꞌ xbe̱neb laj Egipto ut teꞌxcamsi nabaleb saꞌ li ple̱t.

¹² La̱in tinqꞌueheb chi chakic li nimaꞌ li cuanqueb Egipto. Tinkꞌaxtesi lix chꞌochꞌeb saꞌ rukꞌeb li incꞌaꞌ useb xnaꞌleb. Tinqꞌue chi sachecꞌ ru li naꞌajej ut chixjunil li cuan chi saꞌ xbaneb li jalaneb xtenamit. La̱in li Ka̱cuaꞌ ninyehoc re aꞌin.

¹³ Li nimajcual Dios xye: —La̱in tinpoꞌi li yi̱banbil dios ut tinsach ru li jalam u̱ch li cuanqueb Menfis. Incꞌaꞌ chic ta̱cua̱nk xreyeb laj Egipto. La̱in tinqꞌue xxiuheb chixjunileb li tenamit.

¹⁴ Tinsach ru li naꞌajej Patros ut tincꞌat li tenamit Zoán. Ut tinqꞌueheb chixtojbal xma̱queb li cuanqueb Tebas.

¹⁵ La̱in tincuisi lin joskꞌil saꞌ xbe̱neb li cuanqueb Sin li cau cuiꞌ xchꞌo̱leb laj Egipto xban nak li tenamit aꞌan cauresinbil chi pletic. Ut tinsach ruheb chixjunileb li cuanqueb Tebas.

¹⁶ Tincꞌat li nimla tenamit Egipto. Cꞌajoꞌ li raylal li teꞌxcꞌul aran Sin. Ta̱sachekꞌ ruheb li cuanqueb Tebas ut junelic cua̱nkeb saꞌ raylal li cuanqueb Menfis.

¹⁷ Eb li sa̱j cui̱nk li cuanqueb Avén ut eb li cuanqueb Pibeset teꞌcamsi̱k chi chꞌi̱chꞌ ut eb li ixk teꞌcꞌamekꞌ chi pre̱xil.

¹⁸ Chanchan nak ta̱kꞌojyi̱nokꞌ ru li cutan aran Tafnes nak la̱in tinsach lix cuanquileb laj Egipto. Tincuisi lix kꞌetkꞌetil nak tincubsi lix cuanquileb. Chanchan nak ta̱tzꞌapekꞌ li tenamit xban li chok. Ut eb li cuanqueb saꞌ li cocꞌ tenamit teꞌcꞌamekꞌ chi pre̱xil.

¹⁹ Joꞌcaꞌin nak tinrakok a̱tin saꞌ xbe̱neb laj Egipto. Ut eb aꞌan teꞌxqꞌue retal nak la̱in li nimajcual Dios.—

²⁰ Nak yo̱ junlaju chihab kacꞌambal Babilonia li Ka̱cuaꞌ quia̱tinac cuiqꞌuin saꞌ li xcuuk cutan re li xbe̱n po ut quixye cue:

²¹ —At ralal cui̱nk, la̱in xcuisi xcuanquil laj faraón lix reyeb laj Egipto. Chanchan nak xintok li rukꞌ ut ma̱ ani xlanoc re, chi moco xeꞌxbacꞌ re ta̱cacuu̱k re nak tixchap cuiꞌchic lix chꞌi̱chꞌ.

²² La̱in li nimajcual Dios ninye: Yo̱ injoskꞌil saꞌ xbe̱n laj faraón lix reyeb laj Egipto. La̱in tincuisi chi junaj cua lix cuanquil. Chanchan nak tintok li rukꞌ xcabichal ut incꞌaꞌ chic ta̱ru̱k tixchap lix chꞌi̱chꞌ.

²³ La̱in tinjeqꞌuiheb laj Egipto saꞌ xya̱nkeb li xni̱nkal ru tenamit. Yalak bar saꞌ ruchichꞌochꞌ tebinjeqꞌui ruheb.

²⁴ La̱in tinqꞌue xcuanquil lix reyeb laj Babilonia. Chanchan nak tinqꞌue lix chꞌi̱chꞌ saꞌ rukꞌ. Ut la̱in tinsach xcuanquil lix reyeb laj Egipto. Ta̱yotꞌekꞌ xchꞌo̱l chiruheb li xicꞌ nequeꞌiloc re toj retal ta̱ca̱mk lix reyeb laj Egipto.

²⁵ La̱in tinqꞌue xcuanquil lix reyeb laj Babilonia, ut lix reyeb laj Egipto ta̱cana̱k chi ma̱cꞌaꞌ chic xcuanquil. Eb aꞌan teꞌxqꞌue retal nak la̱in li Ka̱cuaꞌ nak tinqꞌue xmetzꞌe̱u lix reyeb laj Babilonia chi pletic riqꞌuineb laj Egipto. Chanchan nak tinqꞌue lin chꞌi̱chꞌ saꞌ rukꞌ lix reyeb laj Babilonia.

²⁶ La̱in tinjeqꞌuiheb laj Egipto saꞌ xya̱nkeb li xni̱nkal ru tenamit. Yalak bar saꞌ ruchichꞌochꞌ tebinjeqꞌui ruheb. Riqꞌuin aꞌan teꞌxqꞌue retal nak la̱in li Ka̱cuaꞌ Dios.—