Ezequiel 3 - Li Santil hu

¹ Quixye cue li Dios: —At ralal cui̱nk, tzaca li hu aꞌin li yo̱quin chixqꞌuebal a̱cue. Ayu ut ta̱ye li cua̱tin reheb li ralal xcꞌajol laj Israel, chan.

² Quinte li cue ut quixqꞌue chintzaca li hu.

³ Quixye cue: —At ralal cui̱nk, tzaca li hu aꞌin li yo̱quin chixqꞌuebal a̱cue. Ta̱tzaca re nak naru tatnujak, chan. La̱in quintzaca li hu ut quiꞌ saꞌ li cue quicana joꞌ li xyaꞌal cab.

⁴ Ut quixye ajcuiꞌ cue: —At ralal cui̱nk, ayu riqꞌuineb laj Israel ut ta̱ye li cua̱tin reheb.

⁵ La̱in incꞌaꞌ yo̱quin cha̱taklanquil saꞌ junak tenamit chꞌaꞌaj xtaubal ru li ra̱tinoba̱leb, chi moco saꞌ junak tenamit incꞌaꞌ ta̱nau ra̱tinanquileb. Yo̱quin ban cha̱taklanquil riqꞌuineb laj Israel.

⁶ Incꞌaꞌ yo̱quin cha̱taklanquil saꞌ eb li tenamit li chꞌaꞌaj xtaubal ru li ra̱tinoba̱leb. Ut cui ta tatintakla saꞌ eb li tenamit aꞌan, eb aꞌan teꞌrabi raj li cꞌaꞌru ta̱ye.

⁷ Eb li ralal xcꞌajol laj Israel incꞌaꞌ teꞌraj rabinquil li cꞌaꞌru ta̱ye xban nak incꞌaꞌ nequeꞌraj rabinquil li cꞌaꞌru ninye la̱in. Chixjunileb laj Israel, aꞌan cauheb xchꞌo̱l ut cauheb li ra̱m.

⁸ Joꞌcan nak la̱in tinqꞌue xcacuilal a̱chꞌo̱l. Tixkꞌax xcacuil xchꞌo̱leb aꞌan. Numtajenak la̱ cacuilal tinqꞌue la̱in chiru xcacuilal eb aꞌan.

⁹ Nabal la̱ cacuilal tinqꞌue. Chanchan xcacuilal li pec. Chanchan xcacuilal li terto̱quil pec diamante xcꞌabaꞌ. Incꞌaꞌ tatxucuak chiruheb xban nak li tenamit aꞌan aj kꞌetoleb a̱tin.—

¹⁰ Ut li Dios quixye ajcuiꞌ cue: —At ralal cui̱nk, chacuabi chi us chixjunil li tinye a̱cue ut chicana̱k saꞌ a̱chꞌo̱l li cua̱tin.

¹¹ Ayu riqꞌuineb laj Israel la̱ cuech tenamitil li cuanqueb chi pre̱xil. Ta̱ye reheb: Joꞌcaꞌin xye li Ka̱cuaꞌ Dios. Usta teꞌrabi usta incꞌaꞌ, abanan la̱at ta̱ye reheb, chan.

¹² Ut lix musikꞌ li Dios quinixcuaclesi ut chicuix quicuabi jun xya̱b cux chanchan nak na-ecꞌan li ca̱k ut quixye: —Chinima̱k ta lix lokꞌal li Ka̱cuaꞌ toj saꞌ lix naꞌaj, chan.

¹³ Ut quicuabi ajcuiꞌ nak qui-ecꞌan nak queꞌxcꞌul rib lix xiqꞌueb li chanchaneb ángel. Ut queꞌecꞌan ajcuiꞌ li rueda li cuanqueb chiruheb. Kꞌaxal cau queꞌecꞌan. Chanchan nak na-ecꞌan li ca̱k.

¹⁴ Quinixcꞌam lix musikꞌ li Dios. Ut la̱in quinco̱in chi ra saꞌ inchꞌo̱l ut chi yo̱ injoskꞌil. Abanan li Ka̱cuaꞌ yo̱ chixqꞌuebal xcacuil inchꞌo̱l.

¹⁵ Ut quincuulac riqꞌuineb laj Israel li cuanqueb chi pre̱xil aran Tel-abib, li cuan chire li nimaꞌ Quebar. Ut quincuan cuukub cutan saꞌ xya̱nkeb chi sachso inchꞌo̱l.

¹⁶ Ut saꞌ xcuuk li cutan li Ka̱cuaꞌ quia̱tinac cuiqꞌuin ut quixye cue:

¹⁷ —At ralal cui̱nk, la̱in xatinxakab chi cꞌanjelac joꞌ aj ilol reheb li tenamit Israel. La̱at ta̱cuabi li cꞌaꞌru tinye a̱cue ut ta̱chꞌolob lix ya̱lal chiruheb.

¹⁸ Nak la̱in tinteneb ca̱mc saꞌ xbe̱n li yo̱ chixba̱nunquil ma̱usilal, la̱at tento nak ta̱ye re nak incꞌaꞌ us yo̱ re nak tixcanab li ma̱usilal ut incꞌaꞌ ta̱ca̱mk. Ut cui la̱at incꞌaꞌ ta̱ye re ut cui li jun aꞌan ta̱ca̱mk xban li ma̱usilal, a̱ma̱c la̱at nak ta̱ca̱mk saꞌ li ma̱c.

¹⁹ Abanan cui la̱at ta̱chꞌolob lix ya̱lal chiru li incꞌaꞌ us xnaꞌleb ut cui aꞌan incꞌaꞌ tixcanab xba̱nunquil li ma̱usilal ut incꞌaꞌ tixjal xcꞌaꞌux, aꞌan ta̱ca̱mk xban lix ma̱usilal. Ma̱cuaꞌ chic la̱at cuan a̱ma̱c.

²⁰ Cui cuan junak ti̱c xchꞌo̱l ta̱oc chixba̱nunquil li ma̱usilal ut la̱in tincanab chi tꞌanecꞌ, aꞌan ta̱ca̱mk cui la̱at incꞌaꞌ ta̱chꞌolob xya̱lal chiru. Ta̱ca̱mk xban lix ma̱usilal ut incꞌaꞌ ta̱julticokꞌ cue li us li quixba̱nu. Ut saꞌ a̱be̱n la̱at ta̱cana̱k lix camic.

²¹ Abanan cui la̱at ta̱qꞌue xnaꞌleb li ti̱c xchꞌo̱l ut ta̱ye re nak incꞌaꞌ ta̱ma̱cobk, aꞌan incꞌaꞌ ta̱ma̱cobk ut ta̱cua̱nk xyuꞌam xban nak qꞌuebil xnaꞌleb. La̱at ma̱cꞌaꞌ ma̱c saꞌ a̱be̱n, chan li Dios.

²² Ut li Ka̱cuaꞌ quixqꞌue xcacuilal inchꞌo̱l ut quixye cue: —Anakcuan tatxic saꞌ li cꞌaleba̱l ut aran tina̱tinak a̱cuiqꞌuin, chan.

²³ Ut la̱in quinco̱in saꞌ li cꞌaleba̱l. Ut nak quincuulac aran, quicuil cuiꞌchic lix lokꞌal li Dios joꞌ nak quixcꞌut chicuu chire li nimaꞌ Quebar. Ut la̱in quinhupub cuib saꞌ chꞌochꞌ.

²⁴ Ut quichal cuiqꞌuin lix musikꞌ li Dios ut quinixxakab. Ut quia̱tinac cuiqꞌuin ut quixye cue: —Tatxic saꞌ la̱ cuochoch ut ta̱tzꞌap a̱cuib aran.

²⁵ Ut la̱at, at ralal cui̱nk, tateꞌxbacꞌ riqꞌuin cꞌa̱m. Aꞌan retalil nak incꞌaꞌ ta̱ru̱k tat-e̱lk saꞌ xya̱nkeb li tenamit.

²⁶ La̱in tinba̱nu̱nk re nak tixletz rib li ruꞌuj a̱cuakꞌ saꞌ a̱cue ut incꞌaꞌ chic tat-a̱tinak. Incꞌaꞌ chic tatru̱k chixkꞌusbaleb, xban nak kꞌetkꞌet aj tenamiteb.

²⁷ Abanan la̱in tatinqꞌue cuiꞌchic chi a̱tinac nak tinye a̱cue cꞌaꞌru ta̱ye. La̱at ta̱ye reheb: Joꞌcaꞌin xye li Ka̱cuaꞌ Dios. Cui la̱ex nequeraj abi̱nc, chex-abi̱nk. Ut cui incꞌaꞌ nequeraj abi̱nc, mex-abin, xban nak la̱ex jun tenamit kꞌetkꞌetex.