Ezequiel 29 - Li Santil hu

Resil li raylal li ta̱cha̱lk saꞌ xbe̱neb laj Egipto

¹ Nak yo̱ laje̱b chihab kacꞌambal Babilonia, saꞌ li cablaju xbe lix laje po, li Ka̱cuaꞌ quia̱tinac cuiqꞌuin ut quixye cue:

² —At ralal cui̱nk, ilon cuan cuiꞌ li tenamit Egipto ut ta̱ye reheb resil li raylal li ta̱cha̱lk saꞌ xbe̱n lix reyeb laj Egipto ut saꞌ xbe̱neb chixjunileb li tenamit.

³ Ta̱ye reheb: joꞌcaꞌin xye li Ka̱cuaꞌ li nimajcual Dios. Yo̱ injoskꞌil saꞌ a̱be̱n la̱at, at faraón, lix reyeb laj Egipto. La̱at chanchanat jun li nimla xul dragón xcꞌabaꞌ li nacuan saꞌ nimaꞌ. Nacaye, “Li nimaꞌ Nilo cue la̱in. La̱in quinyi̱ban re,” chancat.

⁴ Abanan la̱in tinqꞌue li chꞌi̱chꞌ saꞌ la̱ cue. Ut tinqꞌueheb li car li cuan saꞌ eb li nimaꞌ chi letzecꞌ cha̱cuix. Tatcuisi saꞌ li nimaꞌ nak toj cua̱nkeb li car chi letzlo̱queb cha̱cuix.

⁵ La̱in tatincanab saꞌ li chaki chꞌochꞌ a̱cuochbeneb chixjunileb li car li cuanqueb saꞌ eb li nimaꞌ. Tatcana̱k chi tꞌantꞌo saꞌ chꞌochꞌ ut incꞌaꞌ tatmukekꞌ. Ut eb li joskꞌ aj xul ut eb li soꞌsol teꞌxtiu le̱ tibel.

⁶ Ut chixjunileb li cuanqueb Egipto teꞌxqꞌue retal nak la̱in li nimajcual Dios. At faraón, la̱at chanchanat jun xukꞌ caxlan aj chokꞌ reheb laj Israel lin tenamit.

⁷ Nak cateꞌxchap saꞌ rukꞌeb, cattokeꞌ ut cahop li xbe̱neb xtel. Eb aꞌan queꞌxcꞌojob xchꞌo̱leb saꞌ a̱be̱n, abanan la̱at incꞌaꞌ catru xtenkꞌanquileb. Cacanabeb chi sachecꞌ.

⁸ Joꞌcan nak la̱in li Ka̱cuaꞌ ninye nak tintaklaheb li xicꞌ nequeꞌiloc e̱re. Texcamsiheb chi chꞌi̱chꞌ la̱ex joꞌ eb ajcuiꞌ le̱ xul.

⁹ La̱in tinsukꞌisi li naꞌajej Egipto chokꞌ chaki chꞌochꞌ. Ma̱cꞌaꞌ chic cua̱nk chi saꞌ. Ut eb li tenamit teꞌxqꞌue retal nak la̱in li Ka̱cuaꞌ li nimajcual Dios. La̱at caye, “Li nimaꞌ Nilo cue la̱in. La̱in quinyi̱ban re,” chancat.

¹⁰ Joꞌcan nak la̱in yo̱ injoskꞌil saꞌ e̱be̱n ut saꞌ xbe̱neb li nimaꞌ. La̱in tinsach ru le̱ tenamit. Ta̱cana̱k chi ma̱cꞌaꞌ cuan chi saꞌ ta̱ticla̱k chak aran Migdol ut ta̱cuulak toj Sevene ut toj saꞌ li nuba̱l re li naꞌajej Etiopía.

¹¹ Ma̱ jun li cristian chi moco li xul teꞌnumekꞌ aran. Chiru caꞌcꞌa̱l (40) chihab ma̱cꞌaꞌ ta̱cua̱nk aran.

¹² La̱in tincanab li tenamit Egipto chi ma̱cꞌaꞌak chic cua̱nk chi saꞌ. Tinsach ru chixjunil li tenamit. Aꞌanak li kꞌaxal poꞌbilak chiruheb chixjunileb li tenamit li queꞌjuqꞌueꞌ. Chiru caꞌcꞌa̱l chihab ma̱cꞌaꞌ cua̱nk saꞌ eb li tenamit aꞌan. Eb laj Egipto tebinjeqꞌui ru yalak bar saꞌ eb li jalan tenamit, chan.

¹³ Li nimajcual Dios quixye: Nak ac xnumeꞌ li caꞌcꞌa̱l chihab, la̱in tinchꞌutub cuiꞌchic ruheb laj Egipto saꞌ eb li tenamit li quinjeqꞌuiheb cuiꞌ.

¹⁴ Ut tincꞌameb cuiꞌchic Egipto saꞌ li naꞌajej Patros li queꞌcuan cuiꞌ lix xeꞌto̱nil yucuaꞌeb. Aran teꞌcana̱k chi ma̱cꞌaꞌak chic xcuanquileb.

¹⁵ Aꞌanak jun tenamit kꞌaxal cubenak xcuanquil. Incꞌaꞌ chic ta̱cua̱nk xcuanquil saꞌ xbe̱neb li jun chꞌol chic tenamit. La̱in tincuisi lix cuanquil re nak incꞌaꞌ chic ta̱takla̱nk saꞌ xbe̱neb li xni̱nkal ru tenamit.

¹⁶ Incꞌaꞌ chic teꞌxcꞌojob xchꞌo̱leb laj Israel riqꞌuin li tenamit Egipto. Nak eb laj Israel teꞌril li tenamit Egipto, ta̱nak saꞌ xchꞌo̱leb chanru nak queꞌma̱cob nak queꞌxcꞌojob xchꞌo̱leb saꞌ xbe̱neb. Ut riqꞌuin aꞌan teꞌxqꞌue retal nak la̱in li nimajcual Dios.—

¹⁷ Nak yo̱ cuukub xcaꞌcꞌa̱l (27) chihab kacꞌambal Babilonia, saꞌ li xbe̱n cutan re li xbe̱n po li Ka̱cuaꞌ quia̱tinac cuiqꞌuin ut quixye cue:

¹⁸ —At ralal cui̱nk, laj Nabucodonosor lix reyeb laj Babilonia quicꞌamoc be chiruheb lix soldado nak queꞌpletic riqꞌuineb laj Tiro. Xban li cacuil trabaj li queꞌxba̱nu quitꞌaneꞌ li rismaleb xjolom ut queꞌmichꞌeꞌ li xbe̱neb xtel. Abanan chi moco li rey, chi moco eb lix soldado queꞌxcꞌul xkꞌajca̱munquil li pletic queꞌxba̱nu riqꞌuineb laj Tiro.

¹⁹ Joꞌcan nak la̱in li nimajcual Dios ninye nak tinkꞌaxtesi li tenamit Egipto saꞌ rukꞌ laj Nabucodonosor lix reyeb laj Babilonia. Laj Nabucodonosor tixmakꞌ chiruheb lix biomaleb ut tixcꞌam chokꞌ re aꞌan ut reheb ajcuiꞌ lix soldado chokꞌ xtojbaleb.

²⁰ La̱in tinkꞌaxtesi li tenamit Egipto saꞌ rukꞌ laj Nabucodonosor chokꞌ xkꞌajca̱munquil xban nak aꞌan quicꞌanjelac chicuu nak quipletic riqꞌuineb laj Tiro.

²¹ Saꞌ eb li cutan aꞌan la̱in tinqꞌue cuiꞌchic xcuanquileb laj Israel. Ut la̱at, at Ezequiel, tatinxakab re nak ta̱chꞌolob xya̱lal chiruheb. Ut riqꞌuin aꞌan teꞌxqꞌue retal nak la̱in li Ka̱cuaꞌ Dios.—